جەعفەر شێخ مستەفا: سەردانەکەی نێچیرڤان بارزانی بۆ سلێمانی زۆر سەرکەوتوو بوو و دەبێت شانازیی پێوە بکرێت

 

 

جەعفەر شێخ مستەفا، جێگری سەرۆکی هەرێمی کوردستان لەمیانی بەشداریکردنی لە هەڤپەیڤینێکدا لەگەڵ سەنگەر عەبدولڕەحمان، ئاماژەی بەوە کرد، "لایەنە سیاسییەکان ئامادەیی خۆیان دەربڕیوە بۆ ئامادەبوون لە هەر کۆبوونەوەیەک لە سەرۆکایەتیی هەرێمی کوردستان بکرێت،" هەروەها لایەنەکان جەختیان لەوە دەکردەوە کە پێویستە یەکێتی و یەکڕیزیی نێو ماڵی کورد لە سەرووی هەموو شتێکەوە بێت.

 

جێگری سەرۆکی هەرێمی کوردستان باسی لەوەش کرد، نێچیرڤان بارزانی بە لایەنەکانی راگەیاندووە کە "بە هیچ جۆرێک کۆڵنادات تاوەکو یەکێتی و یەکڕیزییەکی تەواو دروستدەکات" و هەوڵەکانیشی بۆ ئەو مەبەستە بەردەوام دەبن و "گوتیشی، خەڵکەکەشمان ئاشت دەکەینەوە."

 

جەعفەر شێخ مستەفا پێیوایە کە رێککەوتنی ستراتیژیی نێوان پارتی دیموکراتی کوردستان و یەکێتیی نیشتمانیی کوردستان "بە کرداری کۆتاییهاتووە" و "هیچ بڕگەیەک لە رێککەوتنەکە پیادە ناکرێت."

 

بە گوتەی جێگری سەرۆکی هەرێمی کوردستان، لایەنە سیاسییەکانی عێراق سوودیان لە ناکۆکی و ناتەبایی نێوان لایەنە سیاسییەکانی هەرێمی کوردستان بینیوە و "بە دەنگەکانی کورد تەحەدای یەکدی دەکەن،" ئاماژەی بەوەش کرد، "ئەگەر کورد لە بەغدا یەکدەنگ بووایە دەیتوانی هاوسەنگی بگۆڕێت."

 

لەبارەی گلەییەکانی خەڵکەوە، جەعفەر شێخ مستەفا دەڵێت، گلەییەکانی خەڵک "زیاتر رووبەڕووی حکومەت دەبێتەوە و حکومەتیش دەتوانێت چارەسەری ئەو کێشانە بکات؛" ئەوەیشی خستەڕوو کە سەرۆکایەتیی هەرێمی کوردستان "یارمەتیدەرێکی تەواو دەبێت بۆ حکومەت بۆ چارەسەرکردنی هەموو کێشەکان." جێگری سەرۆکی هەرێمی کوردستان، یەکێک لە کێشەکان بۆ "دەستوەردانی حیزب لە کاروباری حکومەت" دەگێڕێتەوە.

 

جەعفەر شێخ مستەفا ئاماژەی بەوە کرد، "ئەمڕۆ پێویستمان بە هێزی حیزب نییە، بەڵکو پێویستمان بە سوپایەکی پێشمەرگەی یەکگرتووە،" بە گوتەی ئەو، "پێشمەرگەی حیزب هەڕەشەیە لەسەر ئەو دەستکەوتانەی لە کوردستاندا بەدەستهاتوون." هەروەها پێیوایە کە "دەست تێکەڵكردن لەگەڵ هێزی وڵاتانی دەوروبەر لە ئەنجامی بوونی هێزی حیزبە.. ئەگەر هێزێکی یەکگرتوو و یەک سوپامان هەبووایە، دەوڵەتان نەیاندەتوانی لە گۆڕەپانی کوردستاندا جرت و فرت بکەن."

 

 

جەعفەر شێخ مستەفا: دیارە رۆژی یەکشەممە بۆنەیەک هەبوو لە کۆلێژی سەربازیی قەڵاچوالان، بەبۆنەی دەرچوونی پۆلێک پێشمەرگە بۆ ئەفسەری، جەنابی سەرۆکی هەرێم بەو بۆنەیەوە بەشداریی رێوڕەسمەکەی کرد و گوتارێکی تێر و تەسەلی پێشکێشکرد، ئەوەی من گوێم لێبووبێت، بەدەنگەوەهاتنێکی زۆر باشی هەبوو لەلایەن خەڵکەوە، زۆریشیان پێخۆشبوو. هەروەها سەردانی ئەو لایەنانەی کرد کە ئامادەبوون، وەکو یەکێتیی نیشتمانیی کوردستان، یەکگرتووی ئیسلامیی کوردستان و کۆمەڵی دادگەری، هەندێک لایەنی دیکە لێپرسراوەکانیان لە کوردستان نەبوون بۆیە هەر لەگەڵ ئەو سێ لایەنە کۆبووەوە. راستییەکەی کۆبوونەوەکان زۆر ئیجابی بوون، هەرسێ لایەن سەرۆکی حیزبەکان لەگەڵ ژمارەیەک لە ئەندامانی مەکتەبی سیاسی و سەرکردایەتییان پێشوازییەکی زۆر گەرمیان لێکرد و زۆر بە خۆشحاڵییەوە سەردانەکەیان هەڵسەنگاند. پێموایە یەکێک بوو لەو سەردانە باشانەی کە راستییەکەی دەبێت مرۆڤ حیسابی لەسەر بکات. هەر لایەنێک لە لایەنەکان بگریت، دیارە کۆمەڵێک گلەیی و کۆژانیان هەیە. بە روونی گوتیان ئێمە سەرۆکایەتیی هەرێم بە چەترێک دەزانین بۆ کۆکردنەوەی لایەنە سیاسییەکان و چارەسەرکردنی هەموو کێشە نێوخۆییەکان و دروستکردنی یەکێتی و یەکڕیزی و یەکدەنگی لە هەرێمی کوردستان. لەگەڵ ئەوەشدا ئامادەیی خۆیانیان دەربڕیبوو بۆ ئامادەبوون لە هەر کۆبوونەوەیەک لە سەرۆکایەتیی هەرێمی کوردستان بکرێت، بەڵام پێشتر دەبێت زەمینەی بۆ بڕەخسێندرێت بۆئەوەی هەموو لایەنەکان ئامادەی ئەو کۆبوونەوەیە بن. بۆیە پێموایە سەردانەکەی رۆژی یەکشەممە، یەکێک بوو لە سەردانە هەرە سەرکەوتووەکان، راستییەکەی مرۆڤ دەبێت شانازیی پێوە بکات.

 

 

جەعفەر شێخ مستەفا: راستییەکەی جگە لە کێشەی ئەوان، ئەمە کێشەی خەڵکیش بوو، ناڕەزایەتیی خەڵک، بێ متمانەیی خەڵک، ئەمەش یەکێکی دیکە بوو لەو پێشنیازانەی کردیان. ئەوان پێشتریش کە بەشداریی کۆبوونەوەکانیان کردووە، داوای ئەوەیان کردووە کە ئەگەر بێتو یەکێتی و پارتی چارەسەری کێشەکان لەنێوان خۆیاندا بکەن، ئەوان هیچ کێشەیەکی ئەوتۆیان نامێنێت لە گۆڕەپانەکە. هەر هەموو لایەنەکانیش جەختیان لەوە دەکردەوە کە پێویست دەکات یەکێتی و یەکڕیزیی نێو ماڵی کورد لە سەرووی هەموو شتێکەوە بێت، لە پارتی و یەکێتییەوە دەستپێبکات، پارتی و یەکێتی یەکڕیز و یەکدەنگ بن، بەڵام نەک یەکڕیزی و یەکدەنگی بۆ شکاندنی ئەوان یان بۆ ستەمکردن و بەتاڵانبردنی سەروەت و سامانی وڵات بێت، بەڵکو خزمەتکردنی وڵات و ئاوەدانکردنەوەی وڵات و دەستکەوتەکانی میللـەتەکەمان بێت. ئەمە پێشنیازێک بوو لەو پێشنیازانەی کە کردیان، یەکێتی و یەکڕیزییەکەی پارتی و یەکێتییان هەر بۆ ئەوە نەبوو یەکێتی و یەکڕیز بن بۆ هەندێک پرس، بەڵکو بۆ پرسە باشەکان کە لە خزمەتی میللەتەکەماندایە. سەرۆکایەتی هەرێمی کوردستان رۆڵی خۆی بینیوە، بە تایبەتی سەرۆکی هەرێمی کوردستان کە جێگری سەرۆکی پارتی دیموکراتی کوردستانیشە، راستییەکەی رۆڵی خۆی بینیوە. هەمووشیان جەختیان لەوە کردەوە کە ئەمڕۆ دەبێت پارتی زیاتر بێتە پێشەوە و هەنگاو بنێت، چونکە سەرۆکی هەرێمی کوردستان لە پارتی دیموکراتی کوردستانە، سەرۆکی حکومەت لە پارتی دیموکراتی کوردستانە، زۆرینەی پەرلەمانیش لە پارتی دیموکراتی کوردستانە. بۆیە پێویست دەکات پارتی لە یەکێتیش زیاتر هەست بە بەرپرسیارێتی بکات و هەنگاو بنێت بۆ چارەسەرکردنی کێشەکان. سەرۆکی هەرێمی کوردستانیش هەم بەڵێنی ئەوەی پێدان کە لە پێشتر پێی گوتن: هەوڵێکی زۆرم داوە لەسەر ئەو پرسە و لە هەوڵی خۆشم ناکەوم، بە هیچ جۆرێک کۆڵنادەین تاوەکو یەکێتی و یەکڕیزییەکی تەواو دروست دەکەین و چارەسەری هەموو کێشەکان دەکەین، جارێکی دیکە خەڵکەکەشمان ئاشت دەکەینەوە.

 

 

جەعفەر شێخ مستەفا: ئەوەی من گوێم لە یەکێتی بوو، گوتیان ئێمە ئامادەین هەموو هەنگاوێک بنێین لەپێناو یەکێتی و یەکڕیزی کە لە خزمەتی میللەتەکەمان بێت، لەپێناوی پاراستنی ئەو دەستکەوتانە و دەستکەوتەکانی دیکەش. بڕیارە سەردانی پارتی دیموکراتی کوردستانیش بکەین.

 

 

جەعفەر شێخ مستەفا: هێشتا نەچووینەتە لای پارتی دیموکراتی کوردستان، بەڵام پێویست دەکات کە مەکتەبی سیاسییەکانیان ئەگەر دانیشتنەکان دەستپێبکاتەوە ئەو گفتوگۆیانە لە مەکتەبی سیاسییەکان بکرێت و لەوێ ئەنجامەکان دەردەکەوێت نەرمی نواندن چەندە.. چونکە ئەمڕۆ بێت یاخود سبەی، دەبێت ئەو کێشانە چارەسەر بکرێن و هەردوولا نەرمی بنوێنن بۆ چارەسەرکردنی ئەو کێشانە، چەند رۆژێک زووتر بکرێت باشترە، بەڵام هەر دەبێت بکرێت. چەند دواشی بخەن هەم بە زیانی خۆیان و هەمیش بە زیانی خەڵک تەواو دەبێت، بۆیە پێویستی بەوەیە و پێشموایە ئێستا رەنگە ئەوەی ئێمە دەیبینین بەتایبەتی ئەو شەڕە میدیاییە راگیراوە، ئەوە هەنگاوێکی زۆر باشە و خەڵک دڵی پێی خۆشە، رەنگە ئەمە بنچینەیەک یان دەستپێشخەرییەکە بۆئەوەی بگەینە ئەنجامێکی باش.

 

 

جەعفەر شێخ مستەفا: مرۆڤ نازانێت چی وەڵام بداتەوە.. چونکە ئێمە هەموو کاتێک لەسەر هەموو پرسەکان پێشتر کە کاتی خۆی رێککەوتنی ستراتیجیمان هەبووە، لەسەر هەموو ئەو پرسانە رێککەوتووین چ لە کوردستان و چ لە عێراق. لە عێراق سازانێکی زۆر باش لەنێوان پارتی و یەکێتیدا هەبووە. کاتی خۆی بەپێی رێککەوتنی ستراتیجی کە ئێستا نەماوە، سەرۆککۆمار لە یەکێتیی نیشتمانیی کوردستان بێت کە جەنابی مام جەلال دوو خوول سەرۆکی کۆمار بوو، لێرەش سەرۆکی هەرێم لە پارتی دیموکراتی کوردستان بێت کە جەنابی کاک مەسعود بێت. راستییەکەی بۆ چارەسەرکردنی ئەو کێشانە دەبوو پێشتر پارتی و یەکێتی رێککەوتبان، گفتوگۆی هەموو بابەتەکانیان کردبا و چارەسەریان بۆ هەموو بابەتەکان دانابا... دوایی ناکرێت حیزبە کوردستانییەکانی دیکەش چ بچووک چ گەورە، پشتگوێ بخەین، ئەوانیش مافی خۆیانە، لە کوردستان ئەرکیان هەیە و پێویستە مافیشیان هەبێت، ئینجا لەگەڵ ئەوانیش کۆبوونەوە کرابووایە و پرس و رایان پێکرابا، چونکە سەرۆککۆمار یان هەر پۆستێکی دیکە لە عێراق دەستمان کەوێت چ پارتی چ یەکێتی داوای بکات راستییەکەی ئەوەیە بۆ کوردە نەک بۆ حیزبێک، کوردیش هەمووی یەکێتی و پارتی نییە. پارتی و یەکێتی دوو حیزبی گەورە و بنچینەیین پێویستی بەوە دەکرد پێشتر رێککەوتنیان کردبا.

 

 

جەعفەر شێخ مستەفا: خۆم لە بەغدا نەبووم، بەڵام ئەوەی کە گوێم لێبوو، پێشتر لەنێوان پارتی دیموکراتی کوردستان و سوننە و سەدرییەکان رێککەوتنێک کرابوو بەبێ ئەوەی یەکێتیی نیشتمانیی کوردستان بەشداریی تێدا بکات. بۆیە یەکێتیی نیشتمانیی کوردستان پێیوابوو دەبێت ئەو رێککەوتنەی کە کراوە یان ئەوەی ئێمە رێککەوتنی لەسەر دەکەین، پێشتر لەلایەن هەردوو لاوە دیراسەت بکرێت و بەیەکەوە بچین لەوێ پرۆژەی خۆمان پێشکێش بکەین و بەرگریی لێ بکەین، نەک وەکو پاشکۆیەک کوێرانە بچێتە نێو رێککەوتنێک و بەرنامەیەک واژۆ بکات، کە من پێموابوو ئەو بەرنامەیە شتێکی وای تێدا نەبوو بۆ کورد. هەربۆیە یەکێتی کشایەوە. لە پرۆسەی دەنگدانیش بە سەرۆک و جێگرانی سەرۆکی پەرلەمان دژ نەبوو، بەڵام کە ئەو شتە روویدا، ناچاربوو بەشداریی دانیشتنەکانی پەرلەمان نەکەن و بێنە دەرەوە.

 

 

جەعفەر شێخ مستەفا: بە کرداری کۆتاییهاتووە، هیچ شتێک نابینین پیادە بکرێت بەپێی ئەو رێککەوتنە، بەڵکو هەرکەسەو بۆ خۆیەتی.

 

 

جەعفەر شێخ مستەفا: وەکو یەکێتییەک کە ئاگاداری سیاسەتی یەکێتیم، یەکێتیی نیشتمانیی کوردستان خۆی بە خاوەنی شارێک یان گوندێک یانیش ناوچەیەک نازانێت، بەڵکو خۆی بە هاوبەشێکی راستەقینە دەزانێت لەو کوردستانە، بەشێکە لە سەرکردایەتیی سیاسیی کورد. ئەمە شتێکی نەتەوەیی و نیشتمانییە، لە هەر خاڵێک لەو کوردستانە، لەم هەرێمە هەڕەشەیەک بکەوێتە سەر کوردستان.. یەکێتیی نیشتمانیی کوردستان بە هەموو هێز و توانایەکی لە سەنگەردایە بۆ رووبەڕووبوونەوەی ئەو هەڕەشەیە، جا لە زاخۆ بێت یاخود دهۆک، لە جەلەولا بێت یان سەعدیە، لە مەخموور بێت یان لە هەر خاڵێک بێت. وەکو بینیمان لە شەڕی داعشدا یەکێتیی نیشتمانیی کوردستان هێزی یەکەی 70ی هەبوو، لە شنگال، موسڵ و کەرکووک لەگەڵ هێزەکانی پارتی دیموکراتی کوردستان لە چوارچێوەی یەکەی 80 و هێزەکانی وەزارەتی پێشمەرگە، ئەمانە یەک سەرکردایەتیی هەبوو، 8 میحوەر دروستکرابوو، هەندێک لە میحوەرەکان لە برادەرانی پارتی بوون و هەندێکی لە یەکێتی بوون، ئەو هێزانەشی کە هی یەکێتی بوون لەژێر فەرمانی ئەو فەرماندە پارتییە بوو کە سەرپەرشتیی هێزەکانی دەکرد لە شەڕەکاندا. بۆیە هەر کاتێک هەر هەڕەشەیەک بێتە سەر هەرێمی کوردستان، بەبێ دوودڵی بە ئەرکێکی نەتەوەیی و نیشتمانیی دەزانین رووبەڕووی ئەو هەڕەشانە ببینەوە، یەکێتیی نیشتمانیی کوردستان لە سەنگەرێکدا بێت لەگەڵ هەموو لایەنە سیاسییەکانی دیکە.

 

 

جەعفەر شێخ مستەفا: ئەگەر بێینە سەر راستی، رێگر زۆرە لەبەردەمی جەنابی سەرۆکی هەرێم و سەرۆکایەتیی هەرێمی کوردستان بۆ ئەو بەرنامانەی کە هەیانبووە بۆ یەکێتی و یەکڕیزی و چارەسەرکردنی کێشەکان، بەڵام لەگەڵ ئەوەشدا سەرۆکی هەرێم خۆڕاگرییەکی بێوێنەی تێدابووە، بەردەوام هەوڵی خۆی داوە پەیوەندییەکانی لەگەڵ یەکێتیی نیشتمانیی کوردستان بە هیچ جۆرێک نەپچڕێت، هەوڵی ئەوەی داوە وەکو جێگری سەرۆکی پارتی هەم لەگەڵ ئەواندا هەوڵیداوە ئەو ململانێیانە رابگیرێت کە دەبێتە هۆی ناڕەحەتی و نائومێدی بۆ خەڵکەکەمان و هەڕەشە بۆسەر دەستکەوتەکان و سوودوەرگرتنی لەلایەن دووژمنەوە. بۆیە ئەوەی ئاگام لێبووە هەوڵەکانی بێوچان بووە، ئێستاش پێموایە هەوڵەکانی بەردەوام دەبێت تاوەکو دەگاتە ئەنجام، ئەنجامیش دەبێت هەوڵەکانی ئەو سەرکەوتووبێت بۆ چارەسەرکردنی ئەو کێشانە.

 

 

جەعفەر شێخ مستەفا: بە دڵنیاییەوە ئەو پەیامانە گرنگیی خۆی هەبوو، پەیامەکانی سەرۆکی هەرێمی کوردستان بۆ یەکێتی و یەکڕیزی و چارەسەرکردنی کێشەکان تەنیا لە میدیا و لەسەر کاخەز نییە، بەڵکو بە کردارییش هەوڵەکانی خستووەتەگەڕ لەگەڵ پەیامەکانی. بۆیە پەیامەکانی جێگەی دڵخۆشی بوو، هیواداریشم هەردوو حیزب بەباشی لە پەیامەکەی جەنابی سەرۆکی هەرێم تێگەیشتبن و هەنگاو بنێن بۆ چارەسەری کێشەکان، شەڕی میدیایی تاڕاددەیەکی باش راگیراوە، خەڵک ئومێدێکی هەیە، خەڵک بە هەوڵی ئەوی دەزانێت، بە ئەنجامی پەیامەکانی جەنابی سەرۆکی هەرێمی دەزانێت کە ئەو دۆخەی ئێستا هاتووەتە پێشەوە، ئومێدی ئەوە دەکرێت کۆبوونەوەکان دەستپێبکاتەوە بۆ چارەسەری هەموو کێشەکان، هەم لەنێوانی پارتی و یەکێتی، هەم لەنێوانی هەموو لایەنە سیاسییەکانی کوردستان.

 

 

جەعفەر شێخ مستەفا: بە دڵنیاییەوە.. تەنیا کورد سوودی لێ نەبینیوە، ئەگەرنا هەموو کەسێک سوودی خۆی لێ بینیوە، چونکە کاتێک عێراقییەکان لەگەڵ حیزبێک دادەنیشن پێویستیان بە حیزبەکە نییە، بەڵکو پێویستیان بە کورسی و دەنگەکانی هەیە، کە دەنگ و کورسییەکانیان بەدەستهێنا دواتر حیزبەکە دەبێتە سفری دوای فاریزە.. جا یەکێتییە پارتییە.. کە بە تەنیا دەچین ئەو لایەنانە تەنیا پێویستیان بە دەنگەکانمان هەیە و پێویستیان بە حیزبەکە نییە؛ کە دەنگەکانیان لێ وەرگرتین، ئەسڵەن هیچ حیسابێک بۆ حیزبەکە ناکرێت، تاوەکو ئامانجەکانی خۆیان دەپێکن. بۆیە دەبێت ئێمە وەکو میللـەتێک، وەکو گەلی کوردستان بچین لەگەڵیان دابنیشین، بەڵام ئەگەر وەکو حیزب بچین، پێموایە هەم حیزبەکە سووک و سەلیم و ریسوا دەبێت، هەم میللەتەکەشمان زۆر شت لەدەستدەدەن. بۆیە چوونی حیزب بە تەنیا جا یەکێتییە یاخود پارتییە یانیش هەر کەسێک بچێت، جگە لە شکانی خۆی و سووککردنی میللەتەکەی هیچ ئەنجامێکی نابێت.

 

 

جەعفەر شێخ مستەفا: سوودی باشی لێ بینیوە، یەکێک لەوانەی کە سوودی لێ بینیوە تەحەدای یەکدی دەکەن لە خۆیان، لە بنەڕەتدا کۆک نین و جۆرەها کێشەیان هەیە، بەڵام ئێمەیان کردووە بە پاساو و دەڵێن، ئێوە کێشەکان دروستدەکەن، بەڵام لەگەڵ ئەوەش سوودی تەواویان لێ بینیوە کە ئێستا بە دەنگەکانی کورد تەحەدای یەکدیی پێدەکەن، چونکە کورد زیاتر لە 50 کورسیی هەیە، ئەگەر بە یەکدەنگی چووباین بۆ عێراق و لەگەڵ لایەنەکان دانیشتباین، هاوسەنگییەکەشمان دەگۆڕی.

 

 

جەعفەر شێخ مستەفا: لەڕاستیدا ئەو گلەییانەی کە خەڵک هەیەتی لە حکومەتە نەک سەرۆکایەتی هەرێم، چونکە حکومەت لایەنی جێبەجێکارە، بۆ نموونە لە پرسی مووچە، مووچە لە وەزارەتی داراییە کە وەزارەتی حکومەتی هەرێمی کوردستانە، کە لە کاتی خۆیدا نادرێت و بە کەمی دەدرێت و نادادپەروەریی تێدایە، گلەیی دەکات. لە لایەکی دیکە، نەبوونی خزمەتگوزاری و ئاوەدانکردنەوە دووبارە حکومەت دەیکات، ئەمن و ئاسایشە حکومەت دەیکات، ئاشتکردنەوەی خەڵکەکەیە حکومەت دەیکات، بێکاری و دۆزینەوەی هەلی کارە حکومەت دەیکات، ئەمانە هەمووی حکومەت دەیکات.. سەرۆکایەتیی هەرێم نایکات. لەبەرئەوە گلەییەکانی خەڵک زیاتر رووبەڕووی حکومەت دەبێتەوە و حکومەتیش دەتوانێت چارەسەری ئەو کێشانە بکات، سەرۆکایەتیی هەرێمیش یارمەتیدەرێکی تەواو دەبێت بۆ حکومەت بۆ چارەسەرکردنی هەموو کێشەکان. خەڵک ئەمڕۆ بە چاوی خۆی شت دەبینێت، هیچ شتێک شاراوە نییە، جگە لەوە هاندانێکی دووژمنانی میللـەتەکەشمان زۆرە بۆ خەڵکانێک کە دەیانجوڵێنێت بۆئەوەی خەڵکەکەمان زیاتر بێئومێد بکات و بڕەنجێنێت، بۆیە گلەییەکان زۆربەی لە حکومەتە؛ بەڵام ناشکرێت بە تەنیا حکومەت تاوانبار بکرێت، چونکە حیزبەکان دەستیان وەرداوەتە ئیشوکارەکانی حکومەت. تاوەکو ئێستا یەکێک لە کێشەکانی حکومەت دەستوەردانی حیزبەکانە لە ئیشوکارەکانی حکومەت، کە زۆرجار دەبنە رێگر لەبەردەمی ئیشوکارەکانی حکومەت، بەڵام گلەییەکان لە حکومەت دەکرێت.

 

 

جەعفەر شێخ مستەفا: بە دڵنیاییەوە هاوئاهەنگیی تەواو هەیە، چونکە بە یاسا سەرۆکی هەرێم دەسەڵاتی خۆی هەیە، دەبێت حکومەت لەڕێگەی سەرۆکایەتیی هەرێمەوە ئەو کارانە جێبەجێ بکات کە دەکەوێتە دەسەڵاتی سەرۆکایەتیی هەرێم.

 

 

جەعفەر شێخ مستەفا: ئێمە ئەمڕۆ لە شاخ نین، ئەمڕۆ خاوەن دامەزراوەین، حکومەتی هەرێمی کوردستان و پەرلەمان و سەرۆکایەتیی هەرێم و کیانێکمان هەیە، کە یاسا و سیستمی تێدایە. بۆیە ئەمڕۆ پێویستیمان بە هێزی حیزب نییە، بەڵکو پێویستمان بە سوپایەکی پێشمەرگەی یەکگرتوو هەیە، مەشقی تەواو بێت، پڕچەک بێت، لە هەموو روویەکەوە ئامادەکراو بێت بۆئەوەی بتوانین ئەو دەستکەوتانە بپارێزین، ئەوانەشی کە بەدەستنەهاتوون لە رێگەی ئەو سوپایەوە بەدەستیان بهێنین، ئەگەر دەپرسی حیزب هێزی بۆ چییە، هێزی بۆ پاراستنی دەستکەوت و دەسەڵاتە، ئەو دەستکەوتانەی ئەمڕۆ لە کوردستان هەیە هی خەباتی پێشمەرگەی ئەو حیزبانەیە لە شاخ، بەڵام چونکە ئەمڕۆ حکومەت و پەرلەمان و سەرۆکایەتیی هەرێممان هەیە، پێویستمان بە سوپایەکی پێشمەرگەیە. لەبەرئەوە پێشمەرگەی حیزب ئەمڕۆ گەورەترین هەڕەشەیە لەسەر ئەو دەستکەوتانەی لە کوردستاندا بەدەستهاتوون. بۆیە سەرۆکی هەرێم بەوپەڕی جیددییەت و هەستکردن بە بەرپرسیارێتی هەوڵی ئەوەی داوە یەک سوپای پێشمەرگە هەبێت لەژێر چەتری وەزارەتی پێشمەرگە و حکومەتی هەرێمی کوردستان، تاوەکو بتوانێت ئەو ئەرکەی دەکەوێتە ئەستۆی جێبەجێی بکات. ئێستا ئەگەر ببینی لە هەرێمی کوردستاندا بوونی ئەم جۆرە هێزانە، هێزی یەکێتی و پارتی.. هەندێک لایەن و هەندێک شوێن بە دەوڵەتەکانی دەوروبەریشمانەوە سوودیان لێوەرگرتووە، یەک لە دژی یەک هێزەکەی پاڵپشتیی شوێنێک دەکات کە دژ بە بەژەوەندیی میللـەتەکەمان و ئەو دەستکەوتانەیە کە ئەمڕۆ لە هەرێمی کوردستاندا هەیە. یەکێکمان دەست لەگەڵ ئەم دەوڵەتە تێکەڵ دەکات، یەکێک لەگەڵ دەوڵەتێکی دیکە تێکەڵی دەکات، ئەمە هەمووی لە دەرئەنجامی بوونی هێزی حیزبە، ئەگەر حیزب هێزی نەبێت ئەوسا حکومەتمان هەبوو لەڕێگەی حکومەتەوە دانوستاندن لەگەڵ دەوڵەتە ئیقلیمییەکان دەکرا، مامەڵەی ئەو لایەنانەش دەکرا کە هێزیان هەیە و لەناو کوردستاندان و دۆخەکەیان بە هەل بۆ خۆیان وەرگرتووە، ئەوکاتەش ئەوان پابەندی یاساکانی کوردستان دەکران و نەیاندەتوانی لە گۆڕەپانی کوردستاندا هەندێک جرت و فرت هەیە بیکەن.

 

 

جەعفەر شێخ مستەفا: سەرۆکی هەرێم فەرماندەی گشتیی هێزی پێشمەرگەی کوردستانیشە، ئەوە ئەرکی سەرۆکی هەرێم و سەرۆکایەتیی هەرێم بوو لەڕووی رێکخستنەوەی هێزی پێشمەرگە و جووڵەپێکردنەوە هەستابان بەو ئەرکە. بۆ ئەمەش راستییەکەی بەرنامەیەکی باش داڕێژرابوو بە ئامادەبوونی سەرۆکی هەرێم و هەندێک لە برادەرانی سەرۆکایەتیی هەرێم، هەم وەزیری پێشمەرگە و ژمارەیەک لە ئەفسەری بەتوانا و شارەزا، هەم لە یەکەی 70 و 80، بەرنامەیەکی زۆر جوان و رێکوپێک دانرابوو، کە من پێموابوو ئێستا توانرابوو سوپایەکی پێشمەرگە دروستبکەین، هیچ هێزێک لە دەرەوەی وەزارەتی پێشمەرگە نەمێنێت. بەداخەوە یەکێک لەوانە بڵاوبوونەوەی کۆرۆنا بوو، کە یەکێک بوو لە رێگرەکان، جارێکی دیکە پێویستی بە بڕیاری سیاسی هەبوو لەلایەن یەکێتی و پارتییەوە بدرێت، ئەو بڕیارەش دواکەوت، بووە رێگر لەبەردەم سەرۆکی هەرێم و سەرۆکایەتیی هەرێم کە نەتوانرێت هەنگاوەکان بە باشی بنرێن.

 

 

جەعفەر شێخ مستەفا: ئەگەر بەراوردێک لەنێوان ئێستا و پێشتردا بکەین، ئێستا زیاتر رازین لە پێشتر، چونکە راستییەکەی زیاتر لە پێنج ساڵە راوێژکارانی ئەمریکا، بەریتانیا، هۆڵەندا و ئەڵمانیا خەریکی چاکسازین لە وەزارەتی پێشمەرگە، بەڵام بەداخەوە هەنگاوەکان زۆر بە سستی رۆیشتووە، بەڵام ماوەیەکە دەتوانین بڵێین باشترە لە جاران، لەو ماوەیەدا هەردوو فەرماندەیی هێزەکانی پشتیوانیی یەک و دوو چوونەتە سەر وەزارەتی پێشمەرگە، ژمارەیەک لیوای دیکە چوونەتە سەر وەزارەتی پێشمەرگە لە یەکەکانی 70 و 80، ئێستا لە یەکەکانی 70 و 80 ئامادەکاری دەکرێت لیوای دیکە بخەنە سەر وەزارەتی پێشمەرگە. بۆیە ئێستا هاوپەیمانان زیاتر رازین، بەڵام نەک 100%، جاری وا هەیە پرۆسەکە بە سستی دەڕوات، خەتاکەش لە یەکەکانی 70 و 80 و هەندێک شوێنی دیکەیە.

 

 

جەعفەر شێخ مستەفا: رەنگە هەندێکی پەیوەندیی بە درەنگ وەڵامدانەوەی ئەو لێکۆڵینەوە ئەمنییەوە هەبێت کە دەکەوێتە سەر هاوپەیمانان، جاری وا هەیە بە شەش مانگ وەڵامی ئەو لێکۆڵینەوە ئەمنییە ناداتەوە، بۆ نموونە لیوایەک ئامادەکراوە، بەڵام بەو هۆیەوە دوادەکەێت. رەنگە هەندێکجاریش لە ناوخۆ لە وەزارەتی پێشمەرگە جیاوازییەک بکرێت لەنێوان لیوایەک بۆ لیوایەکی دیکە، ئەوەش خەتایەکی دیکەیە. هاوپەیمانان ئێستا رازین، پرۆسەکەش بەردەوامە، بەڵام ئەگەر ئێمە بەرژەوەندیی خەڵک و حکومەت و وڵاتەکەمان بویستبووایە، ئێستا پێموایە هاوپەیمانان سوپایەکی پێشمەرگەیان بۆ دروستکردبووین کە پڕ مەشق بێت و باشترین جۆری چەکی پێبێت، ئامادەیی تەواوی هەبووایە بۆ هەموو هەڕەشەیەک کە بهاتبایە سەر ئەو هەرێمە و پشت و پەنایەک بووایە بۆ ئەو دەستکەوتانە و دابینکردنی ئەمنیەت و ئاسایش بۆ وڵاتەکەمان.