کوردستان
وێنەیەکی شوێنی رووداوەکە کە تێیدا ئامبوڵانسێکی فریاکەوتن و کەسێک دەردەکەوێ کە رەنگە یەکێک لە بریندارەکان بێت
رووداو دیجیتاڵ
لە ئاهەنگی جەژنی ئەکیتۆ لە دهۆک کەسێک بە چەقۆ هێرشدەکاتە سەر دوو کەسی دیکە و بە برینداریان دەکات و کەسێکیان تەندروستیی ناجێگیرە.
فەرمان عەوڵا عەلی، بەڕێوەبەری فریاکەوتنی نەخۆشخانەی ئازادی لە دهۆک رۆژی سێشەممە، 01ـی نیسان بە تۆڕی میدیایی رووداوی راگەیاند: "هەردوو بریندارەکە کە ژن و گەنجێکن، گەیێندراونەتە نەخۆشخانە."
رووداوەکە لەچوارچێوەی رێوڕەسمی جەژنی ئەکیتۆ روویداوە؛ بەڕێوەبەری فریاکەوتنی نەخۆشخانەی ئازادی باس لەوە دەکات کە "ژنەکە تەمەنی 65 ساڵە و تەندروستیی ناجێگیرە و لەژێر چاودێریی چڕی پزیشکیدایە."
جەژنی ئەکیتۆ، یان جەژنی سەری ساڵی بابلی - ئاشووری، دەکەوێتە یەکەمین رۆژی مانگی نیسانەوە. لەو جەژنەدا وەکو نەریتێک ساڵانە فێستیڤاڵ و چالاکیی جیاواز بەڕێوەدەچن.
ئەم جەژنە، کە بەلای کلدانەکانەوە جەژنێکی نەتەوەییە، مێژووەکەی بۆ 5300 ساڵ بەر لە زایین دەگەڕێتەوە.
ساتی دەستگیرکردنی تۆمەتبارەکە
فەرمان عەوڵا عەونی گوتی: "ژنەکە بێ هۆشە، هێرشکارەکە چەقۆکەی لە سەری داوە و خوێن رژاوەتە نێو مێشکی."
سەرچاوەیەک لە هێزە ئەمنییەکانی دهۆک بە رووداوی گوت، کە هێرشکارەکە دەستگیرکراوە و لێکۆڵینەوەی لەگەڵ دەکرێت و تائێستا هۆکاری هێرشەکە ئاشکرا نەبووە.
جەژنی ئەکیتۆ ماوەی 12 رۆژ دەخایێنێت، جگە لە سەما و هەڵپەڕکێ، هاوشێوەی نەورۆزی کوردان، گەشت و سەیرانیشی تێدایە. لە هەرێمی کوردستان لە ساڵی 1992ـەوە کریستیانەکان ئەو جەژنەیان پیرۆز دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ