رووداو دیجیتاڵ
بارتەقای نەبوونی و دەستکورتی ماڵێکی رۆژهەڵاتی کوردستان، دڵگەورەیی و مرۆڤدۆستییان بۆ بەخشینی ئەندامانی جەستەی کوڕەکەیان بووە هۆی ئەوەی سێ کەس لە مردن رزگاریان ببێت.
وەکو رێزلێنانێک بۆ ئەو دڵگەورەییە، خێرخوازان بە هەرەوەز بنەماڵەی حوسێن خاڵەییان لە کۆنە خانوویەکی تەنگ و پڕ درز و بچووک رزگار کرد و بردیاننە نێو ماڵێکی نوێ و گونجاو بۆ ژیان.
سەلام گوڵنەواز، مامۆستای ئایینی لە گوتارێکدا ئاماژەی بەوە کرد کە باوکی کوڕەکە گەورەترین کاری خێرخوازیی کردووە، دەستکورتی و نەبوونیش نیشانەی لاوازی نییە و کەسانێکی لەم شێوەیە هەن کە دەستکورتن و لە لووتکەی گەورەییدان.
حوسێن خاڵەیی تەمەن 23 ساڵان، کۆڵبەر و تاکە کاسبکاری خێزانەکەیان بوو؛ ساڵێک و 6 مانگ لەمەوپێش لە سنووری نێوان رۆژهەڵات و باشووری کوردستان بەهۆی لەقەی هێستر، سەری بەر بەردێک کەوت و بەو هۆیە بێهۆش بوو. دوای ئەوەی پزیشکەکان لە چاکبوونەوەی بێهیوا بوون، باوکی بڕیاریدا بێ بەرامبەر ئەندامانی جەستەی ببەخشێت.
ناسر یوسفزادە، کەسوکاری حوسێن خاڵەیی گوتی، "بەڕاستی بڕیاردان لەوکاتەدا پیاو و مەردی خۆی دەوێت، بەڵام کاک محەممەد ئەو کارەی کرد و بڕیاری دا بە بەخشینی جەستەی منداڵەکەی، کارێکی زۆر گەورە بوو. بڕوا بکەن پێی دەگوتم کە ناوێرم ئەو کارە بکەم، لەبەر ئەوەی هەژارم و خەڵک لەوانەیە بڵێن جەستەی کوڕەکەی فرۆشتبێت."
پێش بەخشینی، پێشنیاز بە باوکی حوسێن کرابوو ئەندامانی جەستەی کوڕەکەی لە بەرامبەر وەرگرتنی چەندین ملیار تمەندا بفرۆشێت، بەڵام فرۆشتنیانی رەتکردەوە و بە خێر بەخشییە سێ نەخۆش.
هەڵوێستی بنەماڵەی خاڵەیی، مامۆستایانی ئایینی و کەسایەتی و چالاکڤانانی سەردەشتی هاندا بۆ رێزگرتن لە دڵگەورەیی ئەو خێزانە، بە هەرەوەز سەرپەنایەکی گونجاو بۆ هاوژین و منداڵ، دایک و باوک و سێ خوشک و برای خاوەن پێداویستی تایبەتی حوسێن دروست بکەن.