رووداو دیجیتاڵ
دەزگای دژە تیرۆری کوردستان رایگەیاند کە ئەمشەو پێنجشەممە، درۆنێکی بۆمبڕێژکراو لە نزیک فڕۆکەخانەی نێودەوڵەتیی هەولێر خراوەتە خوارەوە، بێ ئەوەی هیچ زیانێکی لێبکەوێتەوە.
لە راگەیێندراوێکی کورتدا کە ئەمشەو، 3ی تەممووزی 2025 بڵاویکردەوە، دژە تیرۆری کوردستان ئاشکرای کرد کە کاژێر 9:58ی شەو، "درۆنێکی بۆمبڕێژکراو لە نزیک فڕۆکەخانەی نێودەوڵەتیی هەولێر خرایە خوارەوە".
راگەیێندراوەکە جەخت لەوە دەکاتەوە کە رووداوەکە هیچ زیانێکی گیانی و ماددیی لێ نەکەوتووەتەوە و بارودۆخەکە لەژێر کۆنترۆڵدایە.
رووداو ڤیدیۆی ساتی رووداوەکەی دەستکەوتووە؛ فریاد ئەحمەد هاونیشتمانییەکی هەولێرە و ساتی کەوتنی درۆنەکەی لە کامێرای چاودێرییەوە بۆ رووداو نارد، وەکو لەو دیمەنەی خوارەوەدا دەردەکەوێت.
🔴 ساتی کەوتنە خوارەوەی تەنێک [دیار نییە درۆنە یان مووشەک] لە گەزنەی هەولێر لە کامێرای چاودێرییەوە
— Rudaw (@Rudawkurdish) July 3, 2025
فریاد ئەحمەد ڤیدیۆکەی بۆ رووداو ناردووە. pic.twitter.com/bzJfTStNc5
لە لایەکی دیکە، لاوەند مەموندی، بەڕێوەبەری رێگەپێدراوی فلای ئەربیل بە رووداوی گوت، هیچ گەشتێکی کۆمپانیاکەیان لە فڕۆکەخانەی هەولێرەوە هەڵنەوەشێندراوەتەوە.
ناوچەی نزیک فڕۆکەخانەی نێودەوڵەتیی هەولێر، کە بنکەی سەربازیی هێزەکانی هاوپەیمانانیشی لێیە، لە ماوەی رابردوودا چەندین جار کراوەتە ئامانجی هێرشی هاوشێوە لە رێگەی درۆن و مووشەکەوە.
تائێستا هیچ لایەنێک بەرپرسیارێتیی خۆی لە هێرشەکەی ئەمشەو رانەگەیاندووە و لێکۆڵینەوە لە رووداوەکە دەستی پێکردووە.
