هەڵەیەک روویدا! دووبارە هەوڵبدە
بەشێک لەو دەرمانانەی لەنێو باری بلۆکەکەدا دۆزراونەتەوە
رووداو - سۆران
دەرمانێکی ئێرانی لەژێر بلۆکی بیناسازیدا حەشاردرابوو، کە بارهەڵگرێک لە دەروازەی نێودەوڵەتیی حاجی ئۆمەرانەوە بارەکەی هێناوە. ئاسایشی کۆمەڵگەی گومرگی پێی زانیوە و لۆرییەکەی خستووەتە ژێر چاودێری تاوەکو گەیشتووەتە کۆگایەکی کاشیفرۆشی لە هەولێر، دەرکەوتووە چوار کەس بازرگانی دەرمانەکە بوون.
سیامەند ئەرگۆشی، بەرپرسی نووسینگەی تایبەتی ئاسایشی سۆران دەڵێت "دوای زیاتر لە شەو و رۆژێک چاودێریی بەردەوام، چوار تۆمەتبارمان دەستگیرکردن، دووانیان خەڵکی رۆژهەڵاتی کوردستان و دووانی دیکەش خەڵکی هەولێرن، ئەم تۆمەتبارانەش لەو کاتەدا دەستگیرکران کە خەریکی دانانی ئەو دەرمانە و گواستنەوەی بوون بۆ کۆگاکانی دەرمان".
بارهەڵگرەکە 28 تۆن بلۆک و دوو تۆن دەرمانی بارکردبوو، دەرمانەکە ناوی ئایزۆ فلۆرانە، بۆ سڕکردنی گشتی بەکاردێت، دەبێت لە سی پلەی ژێر سفری سیلیزی هەڵبگیرێت، هێنانی دەرمان دەبێت لەڕێگەی بارهەڵگری ساردکەرەوەوە بێت و 72 کاژێر پێشتر بگاتە بنکەکانی کەرەنتینەی تەندروستیی سنوور بۆ پشکنین.
سدیق عەلی، بەڕێوەبەری گشتیی ئاسایشی سۆران دەڵێت "داواکارین لە حکومەت، ئامێری تیشک بۆ پشکنینی کاڵا و کەلوپەلە هاوردەکراوەکان دابین بکات، ئەوە ئەم بارە پێی زانرا و دەستی بەسەرداگیرا، کە دەبینن چۆن هەوڵی هێنانی دراوە، کەچی رۆژانە باری کاشی و بەرد و دەیان شتی لەو جۆرە دێت و رەنگە بتوانن قاچاخیی پێوە بکەن".
شۆفێری بارهەڵگرەکە خەڵکی سنووری سۆران بووە، ئازادکراوە و ئاسایش دەڵێت، بێتاوانە، چوار تۆمەتبارەکەش لەژێر لێکۆڵینەوەدان، بارهەڵگرەکەش لەبەردەم ئاسایشی سۆران راگیراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ