رووداو دیجیتاڵ
لە گوندی دوو گۆمانی سنووری ناحیەی سەنگەسەر لە ئیدارەی سەربەخۆی راپەڕین، شەڕ و ئاڵۆزی لەنێوان دوو خێزاندا روویدا. بەڕێوەبەری ناحیەکە دەڵێت، کەسێک کوژراوە.
نەهرۆ عەبدوڵڵا، بەڕێوەبەری ناحیەی سەنگەسەر ئەمڕۆ دووشەممە بە تۆڕی میدیایی رووداوی گوت، "شەڕەکە لەنێوان دوو خێزاندا بووە کە ئامۆزا و کەسوکاری یەکترن".
بە گوتەی نەهرۆ عەبدوڵڵا، بەگوێرەی ئاماری سەرەتایی، کەسێک کوژراوە و کەسێکی دیکەش بریندارە.
بریندارەکە رەوانەی نەخۆشخانەی سەنگەسەر کراوە. نەهرۆ عەبدوڵڵا گوتی، پۆلیس و ئاسایش گەیشتوونەتە شوێنی رووداوەکە و لێکۆڵینەوە لە هۆکارەکەی دەکەن.
هاوکات، مستەفا رەسوول، بەڕێوەبەری پۆلیسی راپەڕین بە رووداوی راگەیاند، هەردوولای شەڕەکە ئامۆزای یەکدین.
ئاماری پار بڵاونەکراوەتەوە. بەگوێرەی ئاماری پۆلیس، لە ساڵی 2022ـدا، 455 رووداوی کوشتنی ئەنقەست، بە هەڵە و خۆکوشتن لە هەرێمی کوردستان تۆمار کراون.