مەسرور بارزانی، سەرۆکوەزیرانی هەرێمی کوردستان
رووداو دیجیتاڵ
مەسرور بارزانی، سەرۆکوەزیرانی هەرێمی کوردستان داوا لە بەغدا دەکات رێگری لە "هێرشی گرووپە لە یاسا دەرچووەکان" بکات. دەشڵێت، "هەرێمی کوردستان لەگەڵ ئەوەیە نەوت هەناردە بکرێ و رێگر نییە".
سەرۆکوەزیرانی هەرێمی کوردستان لەسەر مووچە، هێرشە درۆنی و مووشەکییەکان، هەناردەکردنی نەوت، دۆخی نێوخۆ و ناوچەکەش قسەی کرد.
مەسرور بارزانی گوتی، "بەداخەوە بە مووشەک و درۆن پەلاماری کوردستان دراوە و ئەمە هیچ پاساوێک هەڵناگرێ، هەرێمی کوردستان بەشێک نییە لەم شەڕە و داوا لە حکومەتی فیدراڵی دەکەین رێگری لەو هێرشانە بکات".
سەرۆکوەزیرانی هەرێمی کوردستان رایگەیاند، "حکومەتی فیدراڵی بەرپرسە لە راگرتنی هێرشی گرووپە لە یاسا دەرچووەکان، چونکە بەشێکیان مووچەخۆری حکومەتی عێراقن".
سوپاسی هاوپەیمانانی کرد لە خستنەخوارەوەی مووشەک و درۆنەکان بەتایبەت لە هەولێر و گوتی "رۆڵێکی یەکجار باشیان هەبووە".
مەسرور بارزانی لەبارەی هەناردەکردنی نەوت لە رێگەی بۆریی نەوتی هەرێمی کوردستان گوتی، "ئێمە وەکو هەرێمی کوردستان لە هەموو کەسێک زیاتر پەرۆشی ئابووریی هەرێمی کوردستان و مووچە و بژێویی خەڵکین، ئێستاش دووپاتی دەکەینەوە هەرێمی کوردستان لەگەڵ ئەوەیە نەوت هەناردە بکرێ".
لەبارەی نیگەرانییەکانی بەغداش، باسی لەوە کرد، "هەرێمی کوردستان رێگر نییە، تەنیا داوای ئەوەی کردووە گەرەنتی هەبێت و بتوانین لە کێڵگەکانی خۆشمان نەوت هەناردە بکەین". گوتیشی، پێویستە بەغدا مافەکانی خەڵکی هەرێمی کوردستان بدات و ئەو ئابڵووقەیەی هەیە لایبدات.
مەسرور بارزانی باسی لەوەش کرد، ئەو نەوتەی ئێستا بەغدا دەیەوێ هەناردەی دەرەوەی بکات، قەرەبووی ئەو بڕە زۆرەی پێشتر ناکاتەوە، چونکە بە هەمووی ناکاتە نیو ملیۆن بەرمیل نەوت.
سەرۆکوەزیرانی هەرێمی کوردستان، سەرەخۆشی لە کەسوکاری شەهیدان کرد و گوتی، "هەرچیمان پێ بکرێ دەیکەین بۆ پاراستنی خەڵکی کوردستان".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ