رووداو دیجیتاڵ
دەستەی سەرۆکایەتیی و سەرۆکی فراکسیۆنەکانی پەرلەمانی کوردستان لەبارەی پرسی دەستووری هەرێمی کوردستان کۆدەبنەوە و سکرتێری پەرلەمانیش دەڵێ، "کۆبوونەوەکە دوای نامەیەکی سەرۆکی هەرێمی کوردستان دەکرێت کە ئاراستەی سەرۆکایەتیی پەرلەمانی کردووە بۆ دەستپێکردنەوەی کۆبوونەوە و گفتوگۆ لەسەر دەستوور."
رۆژی یەکشەممە 21ی ئابی 2022، مونا قەهوەچی، سکرتێری پەرلەمانی کوردستان بە تۆڕی میدیایی رووداوی راگەیاند، رۆژی سێشەممە 23ی ئابی 2022، دەستەی سەرۆکایەتی و سەرۆکی فراکسیۆنەکانی پەرلەمانی کوردستان لەبارەی رەشنووسی هەرێمی کوردستان کۆدەبنەوە و رای هەموو سەرۆک فراکسیۆنەکان (وەکو نوێنەری لایەنە سیاسییەکان) لەسەر ئامادەکردنی رەشنووسی دەستوور وەردەگیرێت.
مونا قەهوەچی گوتی: "نێچیرڤان بارزانی، سەرۆکی هەرێمی کوردستان نامەیەکی ئاراستەی سەرۆکایەتیی پەرلەمان کردووە و داوایکردووە گفتوگۆکان لەبارەی پرسی دەستوور و گەیشتن بە رێککەوتنێکی هەمەلایەنە دەستپێبکەنەوە."
رۆژی 10-2-2022، مونا قەهوەچی بە رووداوی راگەیاند، "ئەمڕۆ دوا وادەبوو بۆ وەرگرتنی بۆچوونی فراکسیۆنەکان لەبارەی دەستوور و یاسای هەڵبژاردن، بۆچوونی هەموویانمان بە یەک پاکێج بەدەست گەیشتووە."
لە ساڵی 2009 دەستووری هەرێمی کوردستان نووسرایەوە و پەرلەمان پەسندیکرد، بەڵام بەهۆی ئاڵۆزیی سیاسییەوە رەشنووسەکە نەخرایە گشتپرسی.
لە خولی چوارەمی پەرلەماندا جارێکی دیکە دەستوور لە کۆی زیاتر لە 120 ماددە، 73 ماددەی نووسرایەوە و ئاڵۆزیی سیاسی کۆتایی پێهێنا.
سەبارەت بە بۆچوونی لایەنەکان لەسەر ئەو سێ پرسە، سکرتێری پەرلەمانی کوردستان گوتی: "هەموو لایەنەکان جگە لە نەوەی نوێ بە باشیان زانیوە کە هەرێمی کوردستان دەستووری خۆی هەبێت، ئیدی لیژنەکە دروستبکرێتەوە و کار لەسەر ئەو پرسە بکرێت."
.png&w=3840&q=75)