رووداو دیجیتاڵ
نێچیرڤان بارزانی، سەرۆكی هەرێمی كوردستان، فەرمانی هەرێمی بۆ دەستنیشانكردنی رۆژی هەڵبژاردنی گشتیی پەرلەمانی هەرێمی كوردستان ـ عیراق واژۆ كرد و بڕیاری دا رۆژی 1/10/2022 هەڵبژاردن بکرێت.
ئەمڕۆ پێنجشەممە 24-02-2022 نێچیرڤان بارزانی، سەرۆكی هەرێمی كوردستان، فەرمانی هەرێمی بۆ دەستنیشانكردنی رۆژی هەڵبژاردنی گشتیی پەرلەمانی هەرێمی كوردستان ـ عێراق واژۆ كرد.
لە فەرمانه هەرێمییهکهدا هاتووە: "بەپێی یاسای ژمارە یەكی ساڵی 2005، یاسای سەرۆكایەتیی هەرێمی كوردستان ـ عیراق، هەمواركراو، رۆژی 1/10/2022 وەك رۆژی ئەنجامدانی خولی شەشەمی هەڵبژاردنی پەرلەمانی كوردستان دەستنیشان كرا".
هەر بەپێی فەرمانەكە پێویستە لایەنە پەیوەندیدارەكانی وەك پەرلەمان و حكوومەت و كۆمسیۆنی باڵای سەربەخۆی هەڵبژاردنی هەرێمی كوردستان، دەست بە رێكارە پێویستەكان بۆ بەڕێوەچوونی پرۆسەكە بكەن.
رۆژی 13-02-2022 شاندێکی سەرۆکایەتیی هەرێمی کوردستان لەبارەی پرسی هەڵبژاردن و رێکخستنەوەی پەیکەری کۆمیسیۆن و رەشنووسی دەستوور، سەردانی لایەنە سیاسییەکانی کرد.
رۆژی 10-02-2022، فراکسیۆنەکانی پەرلەمانی کوردستان بۆچوونی خۆیان لەبارەی كۆمیسیۆن و یاسای هەڵبژاردن و نووسینەوەی دەستوور رادەستی سەرۆکایەتیی پەرلەمانی کوردستان کرد. بڕیارە ئەم هەفتەیە دەستەی سەرۆکایەتیی پەرلەمان کۆببێتەوە بۆ دیاریکردنی رۆژێک بۆ کۆبوونەوە لەوبارەوە.
ئەم خولەی پەرلەمانی کوردستان لە 11-06-2022 ماوەی یاسایی کۆتایی پێدێت، سەرجەم لایەنەکان داوای ئەوە دەکەن کە دەبێت هەڵبژاردن لە کاتی خۆی و لە مانگی ئەیلوولی ئەمساڵ بەڕێوەبچێت، بەڵام تاوەکو ئێستا رێککەوتنی کۆتایی لەسەر ئەو پرسە نەکراوە.
بەپێی یاسای هەڵبژاردن، دەبێت لە 30ـی ئەیلوولی 2022 هەڵبژاردنی خولی شەشەمی پەرلەمانی کوردستان بەڕێوەبچێت، ئەگەر لایەنەکان لەبارەی هەڵبژاردنەوە بگەنە رێککەوتن، کۆمیسیۆن شەش مانگی پێویستە بۆ ئامادەکاریی هەڵبژاردن، شێروان زرار، گوتەبێژی کۆمیسیۆن دەڵێت، دەبێت تاوەکو رۆژی 31ـی ئادار کۆمیسیۆن بۆ ئەو ئەرکە راسپێدرابێت، ئەگەرنا هەڵبژاردن لە وادەی خۆیدا ناکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ