رووداو دیجیتاڵ
لە شارۆچکەی قامووشان سەر بە پارێزگای قەرسی باکووری کوردستان، لە ئەنجامی پێکدادانی ئۆتۆمبێلێک و بارهەڵگرێکدا چوار کەس گیانیان لەدەستدا و کەسێکی دیکەش بریندار بوو.
رووداوەکە شەوی شەممە 24ی ئەیلوولی 2022 لەسەر رێگەی سەرەکیی قەرس - ئەرزەڕۆم روویداوە و تێیدا ئۆتۆمبێلێکی بارهەڵگر لەنزیک ناوچەی "کەکلیک دەرە" لەگەڵ ئۆتۆمبێلێکی تایبەتدا پێکیاندا داوە.
دوای ئەوەی شۆفێرەکانی دیکە لایەنە پەیوەندیدارەکانیان ئاگادارکردەوە، تیمەکانی تەندروستی، پۆلیس، ئافاد، ئاگرکوژێنەوە و جەندرمە رەوانەی شوێنی رووداوەکە کران.
لەنێو ئۆتۆمبێلە تایبەتەکەدا سێ کەس گیانیان لەدەستدا، کە یەکێکیان شۆفێری ئۆتۆمبێلەکە بوو، کەسێكیش کە گیریخواردبوو لەلایەن تیمەکانەوە رزگار کرا.
لە رووداوەکەدا شۆفێری بارهەڵگرەکەش بریندار بوو و لەگەڵ بریندارەکەی دیکە گوازرانەوە بۆ نەخۆشخانەی هاراکانی دەوڵەت. سەرباری هەوڵی پزیشکان، نەتوانرا شۆفێری بارهەڵگرەکە رزگار بکرێت و لە نەخۆشخانە گیانی لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ