دەزگەی خێرخوازیی حاجی ئیدریس: دەیانەوێت شوێنی مزگەوتەکەی دریم ستی بکەنە پڕۆژەی بازرگانی

 

رۆژی سێشەممە 25-10-2022، د. فکری سوورچی، بەڕێوەبەری دەزگەی خێرخوازیی حاجی ئیدریس سوورچی، لەبارەی کێشەی زەویی مزگەوتی شاری خەونەکان - دریم ستی لە شاری هەولێر کە رۆژی دووشەممە داوای چارەسەرکردنیان کرد لە ژمارەیەک لە سەرۆکایەتییەکان و دامەزراوەکانی هەرێمی کوردستان بە تۆڕی میدیایی رووداوی گوت: "ئێمە پێشتر لەگەڵ کۆمپانیای دریم ستی گرێبەستمان کردووە بۆ دروستکردنی مزگەوتێک لەنێو شاری خەونەکان بە خێرخوازیی و سەرجەم تێچووەکەی لە ئەستۆ دەگرین. لە ساڵی 2017 رێگەپێدانی دەستەی وەبەرهێنان و وەزارەتی ئەوقاف و وەزارەتی شارەوانیمان وەرگرت، لە ساڵی 2018 دەستکرا بە دروستکردنی مزگەوتەکە."

 

د. فکری سوورچی ئاشکرای کرد، بناخەی مزگەوتەکە کە لەسەر رووبەری 11 هەزار و 374 مەتر دووجا دروستدەکرێت، لەگەڵ چوار پایە کە لە قوڵایی 50 مەتر لە ژێر زەوی و 46 مەتر لەسەر زەوی دەبێت بەشێکی زۆری تەواو بووە و منارەکان نزیکەی 60 مەتریان لێکراوە، 900 هەزار دۆلاریشیان تێدا خەرجکردووە، بەڵام ماوەیەکە کۆمپانیاکە شوورایان بە دەوری مزگەوتەکە دروستکردووە و نیازیان وایە بیکەنە پڕۆژەیەکی بازرگانی، چونکە شوێنەکەی زۆر ستراتیژییە.

 

بەڕێوەبەری دەزگەی خێرخوازیی حاجی ئیدریس سوورچی رەتیکردەوە رێگە بە تێکدانی مزگەوتەکە بدەن و گوتی: "ئێستا کێشەکە لە دادگەیە و داوا دەکەین دادگە بڕیاری خۆی بدات و بابەتەکە یەکلایی بکاتەوە."   

 

بەڕێوەبەری دەزگەی خێرخوازیی حاجی ئیدریس سوورچی دەڵێت، بەپێی خەمڵاندنەکانیان تێچووی دروستکردنی مزگەوتەکە 5 ملیۆن دۆلار دەبێت، بە قسەی ئەو دەیانەوێت، بیکەنە "یەکێک لە هێماکانی هەولێر و پڕۆژەیەکی تەواو ئەندازەیی جوان." 

 

هەروەها دەڵێت: "دوای ئەوەی کێشە کەوتە نێوان کۆمپانیاکە و دەزگەکەوە دواتر لیژنەیەک دروستکرا بۆ ئەوەی شوێنێکی دیکە بۆ مزگەوتەکە تەرخانبکرێت کە رووبەرەکەی 2000 مەتر دووجا دەبێت، لیژنەی شارەوانی هات و پاشان وەزارەتی ئەوقاف و بە بڕیاری خودی وەزیر کاک پشتیوان سادق ئەوەی رەتکردەوە، ئێمەش پێی رازی نەبووین و رەتمانکردەوە."

 

رووداو تایبەت بەو پرسە پەیوەندیی بە کۆمپانیای دریم ستییەوە کرد، بەڵام بەرپرسێکی کۆمپانیاکە گوتی: "هیچ قسەیەکمان لەسەر ئەو بابەتە نییە."

 

دەزگەی خێرخوازیی حاجی ئیدریس سوورچی، رۆژی دووشەممە 25-10-2022، نامەیەکی کراوەی ئاراستەی ژمارەیەک لایەن و بەرپرس کردبوو بۆ ئەوەی لەسەر بابەتەکە بێنە دەنگ.