کوردستان
قوباد تاڵەبانی، جێگری سەرۆکوەزیران (لای راست) پێشوازیکرد لە پاتریک دۆرێل، باڵیۆزی فەڕەنسا لە عێراق.
رووداو دیجیتاڵ
قوباد تاڵەبانی، جێگری سەرۆکوەزیران پێشوازیکرد لە پاتریک دۆرێل، باڵیۆزی فەڕەنسا لە عێراق و لە کۆبوونەوەی نێوانیاندا گفتوگۆکانی نێوان هەرێم و بەغدا و چەند پرسێکی جێی بایەخی هەردوولا تاوتوێ کران. لەبارەی گفتوگۆکانی ئەم دواییەی هەولێر و بەغداوە رایگەیاند، "گەشبینین بە رێککەوتن".
لە کۆبوونەوەکەدا کە رۆژی دووشەمە (30/6/2025) بە ئامادەبوونی هەر یەکە لە یان برێم، کۆنسووڵی گشتیی فەڕەنسا لە هەرێم و دابان شەدەڵە، جێگری لێپرسراوی فەرمانگەی پەیوەندییەکانی دەرەوەی هەرێم و لیوا چەتۆ ساڵح، بریکاری وەزارەتی ناوخۆ بەڕێوەچوو، باس لە دوایین بەرەوپێشچوونەکانی گفتوگۆکانی نێوان هەرێم و بەغدا کرا.
قوباد تاڵەبانی بە ئاماژەدان بە ژیان و گوزەرانی هاوڵاتییانی هەرێم روونیکردەوە کە "گفتوگۆکانی نێوان وەفدە دانووستانکارەکانی هەردوولا لە چەند رۆژی رابردوودا بە شێوەیەکی ئەرێنی بەڕێوەچووە و گەشبینین لە ماوەیەکی نزیکدا بگەینە رێککەوتن و کێشەی موچەی فەرمانبەرانی هەرێمی کوردستان چارەسەر بکرێت".
لە بەشێکی دیکەی کۆبوونەوەکەدا جێگری سەرۆکوەزیران سوپاسی هاوکارییەکانی حکومەتی فەڕەنسای کرد بۆ هەرێمی کوردستان و بەتایبەتیش لە بواری گەشەپێدانی ناوچەیی. لەم بارەیەشەوە ئاماژەی بەوەکرد رێژەیەکی زۆری کۆچی گەنجان بۆ دەرەوەی وڵات لە شار و شارۆچکە کەمتر گەشەسەندووەکانە، هەربۆیە گەشەپێدانی ئەو ناوچانە کاریگەری گەورەی دەبێت لەسەر کەمکردنەوەی رێژەی کۆچی نایاسایی و ئەمەش لە بەرژەوەندی هەموو لایەکدایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ