خەلیل حەییە، سەرۆکی مەکتەبی سیاسی بزووتنەوەی حەماس لە غەززە و سەرۆکی شاندی دانوستاندنکاری بزووتنەوەکە.
رووداو دیجیتاڵ
خەلیل حەییە، سەرۆکی مەکتەبی سیاسی بزووتنەوەی حەماس لە غەززە و سەرۆکی شاندی دانوستاندنکاری بزووتنەوەکە، رۆژی پێنجشەممە رایگەیاند، حەماس لەلایەن نێوەندگیران و ئەمریکاوە دڵنیایی پێدراوە کە شەڕی ئیسرائیل لەسەر کەرتی غەززە "بەتەواوەتی کۆتایی هاتووە."
دەشڵێت بۆ کۆتاییهێنان بە شەڕ، دەستپێکردنی جێبەجێکردنی ئاگربەستێکی هەمیشەیی و ئاڵوگۆڕکردنی بەندکراوانی فەڵەستینی و بارمتەکانی ئیسرائیل گەیشتوونەتە رێککەوتن.
حەییە لە پەیامێکی ڤیدیۆییدا گوتی: "ئەمڕۆ گەیشتن بە رێککەوتنێک بۆ کۆتاییهێنان بە شەڕ و دەستدرێژی بۆ سەر گەلەکەمان و دەستپێکردنی جێبەجێکردنی ئاگربەستێکی هەمیشەیی، کشانەوەی هێزەکانی داگیرکەر، هاتنەناوەوەی هاوکارییەکان، کردنەوەی دەروازەی رەفەح بە هەردوو ئاراستەدا و ئاڵوگۆڕی دیلەکان رادەگەیێنین."
ئاشکراشی کرد کە 250 بە ندکراوی حەماس کە لە ئیسرائیل سزای زیندانیکردنی تاهەتاییان بۆ دەرکراوە، لەگەڵ هەزار و 700 بەندکراوی دیکەی خەڵکی کەرتی غەززە کە دوای 7ی ئۆکتۆبەری 2023 دەستگیرکراون، ئازاد دەکرێن، "لەگەڵ ئازادکردنی هەموو منداڵ و ژنان."
حەییە گوتیشی: "ئێمە لە برا نێوەندگیرەکان و ئیدارەی ئەمریکاوە دڵنیاییمان وەرگرتووە و هەموویان جەختیان کردووەتەوە کە شەڕ بەتەواوەتی کۆتایی هاتووە. ئێمە لەگەڵ هێزە نیشتمانی و ئیسلامییەکان بەردەوام دەبین لە کارکردن بۆ تەواوکردنی هەنگاوەکانی دیکە و کارکردن بۆ بەدیهێنانی بەرژەوەندییەکانی گەلی فەڵەستین و دیاریکردنی چارەنووسی خۆی، تاوەکو دامەزراندنی دەوڵەتی سەربەخۆی فەلەستین کە پایتەختەکەی قودس بێت."
هەروەها گوتی: "ئێمە بە بەرپرسیارێتییەکی بەرزەوە مامەڵەمان لەگەڵ پلانی سەرۆک دۆناڵد ترەمپ کرد و وەڵامێکمان پێشکێش کرد کە بەرژەوەندی و مافەکانی گەلەکەمان دەستەبەر دەکات و خوێنڕشتن رادەگرێت، هەروەها دیدگەی ئێمە بۆ راگرتنی شەڕ لەخۆدەگرێت."
حەییە باسی لەوەشکرد: "شاندەکەمان بە بەرپرسیارێتی و ئەرێنییەوە هاتە کۆماری میسری عەرەبی، ئەمەش وایکرد ئێمە و هێزەکانی مقاوەمە بتوانین رێککەوتنێک بەدەستبهێنین و پێشکێشی گەلە خۆشەویستەکەمان بکەین."
حەییە رووی لە خەڵکی غەززە کرد و گوتی: "جیهان سەرسام بوو بەوەی ئێوە پێشکێشتان کرد لە بەخشین و قوربانیدان و خۆڕاگری و ئارامگری، چونکە ئێوە رووبەڕووی شەڕێک بوونەوە کە جیهان وێنەی نەبینیوە و بەرەنگاری ستەمی دوژمن و دڕندەیی سوپاکەی و کۆمەڵکوژییەکانی بوونەوە."
ئەو سەرکردەیەی حەماس گوتی، دوای زیاتر لە دوو ساڵ لە جەنگی سەر غەززە، "ئێمە لەبەردەم قارەمانێتیی پیاوانی مقاوەمە و پاڵەوانەکانیداین کە لە خاڵی سفرەوە شەڕیان کرد و وەک کێوێکی مەزن لەبەردەم تانک و ئامێر و سەربازەکانی داگیرکەردا وەستانەوە و یەک لە دوای یەک پیلانەکانی دوژمنیان پووچەڵکردەوە، لەوانە پیلانی راگواستن، برسیکردن و دروستکردنی ئاژاوە."
حەییە سڵاوی ئاراستەی گەلی فەڵەستین لە هەموو شوێنێک، نێوەندگیران لە میسر، قەتەر و تورکیا و هەموو ئەوانە کرد کە لە یەمەن، لوبنان و شوێنەکانی دیکە بەشداریی شەڕی دژ بە ئیسرائیلیان کردووە. هەروەها سڵاوی بۆ هەموو هاوسۆزانی دۆزی فەڵەستین لە جیهاندا و بەشداربووانی "کاروانەکانی پشتیوانی و ئازادی لە وشکانی و دەریاوە" نارد.
پێشتر ئەمڕۆ، نێوەندگیران لە دانوستاندنەکانی شەرم شێخ لە میسر، رێککەوتنێکی ئاگربەستیان راگەیاند. دۆناڵد ترەمپ، سەرۆکی ئەمریکاش ئەمڕۆ پێنجشەممە رێککەوتنەکەی نێوان ئیسرائیل و حەماسی پشتڕاستکردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ