21-06-2025
00:16
هێرشی ئێران بۆ سەر ئیسرائیل دەستی پێکردەوە
رووداو
میدیای ئێران دەڵێت، شەپۆلی 19ی ئۆپەراسیۆنی 'بەڵێنی راست 3' بۆ سەر ئیسرائیل دەستی پێکرد.
18:08
بەرپرسێکی میدیای ئێران: چیرۆکی داواکردنی رێگەی سەلامەت بۆ سەردانەکەی عێراقچی، شەڕی دەروونییە
عەباس عێراقچی، وەزیری دەرەوەی ئێران
بەڕێوەبەری پەیوەندییەکانی دامەزراوەی رادیۆ و تەلەڤزیۆنی ئێران ئەو دەنگۆیانە رەتدەکاتەوە گوایە عەباس عێراقچی، وەزیری دەرەوەی وڵاتەکەی داوای رێگەیەکی ئارامی بۆ سەردانەکەی دوێنێی بۆ جنێڤ کردبێت و دەڵێت، ئەو هەواڵە بەشێکە لەو جەنگە دەروونییەی ئیسرائیل و ئەمریکا دەیکەن.
لە پەیامێکدا لە تۆڕی کۆمەڵایەتیی ئێکس محەممەد حوسێن رەنجبەران، بەڕێوەبەری پەیوەندییەکانی دامەزراوەی رادیۆ و تەلەڤزیۆنی ئێران نووسیویەتی، هەواڵەکە لەلایەن رۆژنامەڤانێکی ئیسرائیلییەوە بڵاوکراوەتەوە و میدیای ئیسرائیلیش بڵاویکردووەتەوە، گوایە عەباس عێراقچی بۆ سەردانەکەی لە تارانەوە بۆ جنێڤ، داوای رێگەیەکی ئارامی کردووە.
ئەو بەرپرسە دەڵێت، ئەو هەواڵە بەشێکە لە جەنگی دەروونیی ئیسرائیل-ئەمریکا. ئاماژە بەوەش دەکات، بەرپرسانی حکومەتی وڵاتەکەی بۆ روونکردنەوەی هەڵوێستی رەوای ئێران و "بەرگریکردن لە وڵات، بە ئازایەتییەوە کار دەکەن و پێویستیان بە وەرگرتنی مۆڵەت لە هیچ لایەنێکی سێیەم نییە."
رەنجبەران باس لەوەش دەکات، وەزیری دەرەوەی وڵاتەکەی لەکاتی بۆردوومانی چڕی ئیسرائیلدا بۆسەر لوبنان و سووریا، سەردانی هەردوو وڵاتی کرد.
سەرەتای مانگی تشرینی یەکەمی رابردوو، عەباس عێراقچی سەردانی سووریا و لوبنانی کرد، ئەوەش کاتێک ئەو دوو وڵاتە لەلایەن ئیسرائیلەوە رۆژانە بۆردوومان دەکران.
ئەم نووسینەی رەنجبەران لە کاتێکدایە، دوێنێ ژمارەیەک رۆژنامەڤان و پەیج و کەناڵ بڵاویانکردەوە کە عەباس عێراقچی بۆ سەردانکردنی جنێڤ بە مەبەستی کۆبوونەوە لەگەڵ هاوشانە بەریتانی، فەرەنسی و ئەڵمانییەکانی لەگەڵ ئیسرائیل هاوئاهەنگی کردووە.
17:54
گوتەبێژی حکومەتی ئێران: دۆخەکە لەژێر کۆنترۆڵدایە
فاتمە مهاجرانی، گوتەبێژی حکومەتی ئێران
گوتەبێژی حکومەتی ئێران دەڵێت، دابینکردنی خۆراک و کاڵا سەرەکییەکان لە نێوخۆی وڵات ئاساییە. ئاماژە بەوەش دەکات، پاکێجێکی هاوکاریی دارایی بۆ پشتیوانی لە کەرتی پیشەسازی ئامادە کراوە.
فاتمە مهاجرانی، گوتەبێژی حکومەتی ئێران ئەمڕۆ شەممە رایگەیاند، وەزارەتەکان و دامەزراوەکانی حکومەت بە جیدی کارەکانیان بەڕێوەدەبەن و هیچ کێشەیەک لە دابینکردنی کاڵا و خزمەتگوزارییەکان نییە.
گوتەبێژی حکومەتی ئێران گوتیشی، "پرۆسەی دابینکردن، دابەشکردن و خستنەڕووی بەرهەمە کشتوکاڵییەکان بێ کێشە بەردەوامە و یەدەگی ستراتیژیی وڵات دەستی لێنەدراوە." ئاماژەی بەوەش دا، بۆ رێکخستنی بازاڕ، دەسەڵاتی تایبەت بە پارێزگارەکان دراوە.
مهاجرانی ژمارەیەک رێنوێنیشی بۆ هاووڵاتییان راگەیاند کە ئەمانەن:
خوێندنەوەی پێوەرەکان: کۆمپانیای نیشتمانیی گاز و وەزارەتی وزە رایگەیاندووە کە تاوەکو چەند رۆژی داهاتوو پێوەری ماڵان ناخوێندرێتەوە، بۆیە پێویست ناکات هاووڵاتییان دەرگا لە هیچ کەسێک بکەنەوە و لەکاتی هەر بارێکی گوماناویشدا پەیوەندی بە ژمارە 110، 113 و 114ـەوە بکەن.
پشتیوانیی دەروونی: بۆ ئەو کەسانەی تووشی دڵەڕاوکێ بوون، سیستمی راوێژکاری 4030 و 1480 بە بەشداریی دەروونناسان ئامادەی پێشکێشکردنی خزمەتگوزارین.
خزمەتگوزاریی پۆستە: ئەو کەلوپەلانەی نەگەیشتوونەتە دەستی خاوەنەکانیان، تاوەکو کاتی ئامادەبوونیان پارێزراو دەبن.
گەشتە ئاسمانییەکان: بۆ پاراستنی ئاسایشی هاووڵاتییان، گەشتەکان بۆ کاتێکی نادیار راگیراون.
ئینتەرنێت: پەیوەندییەکان لەسەر بنەمای ئینتەرنێتی نیشتمانی بەردەستن و هاووڵاتییانی دەرەوەی وڵات دەتوانن لە رێگەی ئەپلیەکەیشنە نێوخۆییەکانەوە پەیوەندی بە کەسوکاریانەوە بکەن.
فاتمە مهاجرانی رایگەیاند، "بەهۆی ئەو زیانانەی بەر پیشەسازییەکانی وڵات کەوتووە، وەزارەتی پیشەسازی پاکێجێکی تایبەتی بۆ پشتیوانی لە بەرهەمهێنان لە دۆخی قەیران ئامادە کردووە."
هاوکات سەرۆکی رێکخراوی خۆراک و دەرمانی ئێران دڵنیایی دا کە "بەرهەمهێنانی شیری وشکی منداڵان شەو و رۆژ بەردەوامە، دەرمانی پێویست بۆ نەخۆشە تایبەتەکان دابین کراوە و دەرمانخانەکانیش لە سەرتاسەری وڵات کراوەن."
رەزا تەڵایی، گوتەبێژی وەزارەتی بەرگریی ئێرانیش ئەمڕۆ شەممە رایگەیاند، لەگەڵ بەردەوامبوونی جەنگەکەدا پشتیوانییەکانیان بۆ هێزە چەکدارەکان بەردەوام دەبن و ئەوەی پێویستیان بێ بۆیان دابین دەکەن.
تەڵایی گوتی، "بەگوێرەی یاسا نێودەوڵەتییەکان، هێرشکردنە سەر خەڵک و شوێنە ناسەربازییەکان بە تاوانی جەنگ هەژمار دەکرێت. گەلی ئێران و جیهان تاوانەکانی ئیسرائیل لە هێرشکردنە سەر شوێنی نیشتەجێبوون، ژن و منداڵان بە چاوی خۆیان دەبینن."
هەر ئەمڕۆ ناسنامەی 15 ئەندامی هێزە ئاسمانییەکانی ئێران راگەیێندرا کە لە ئەنجامی هێرشەکانی ئیسرائیل کوژراون.
17:18
راوێژکاری باڵای خامنەیی دوای برینداربوونی: ئامادەم 100 جار فیدای گەلی ئێران بم
عەلی شەمخانی
راوێژکاری باڵای عەلی خامنەیی لە پەیامێکدا دوای برینداربوونی رایدەگەیێنێت، "بە جەستەیەکی بریندارەوە دەمێنمەوە تاوەکو ببێتە هۆکاری رق و دووژمنایەتیی ناحەزان."
ئەمڕۆ شەممە 21-06-2025 عەلی شەمخانی، راوێژکاری باڵای عەلی خامنەیی، رێبەری کۆماری ئیسلامیی ئێران لە هەژماری تایبەتی خۆی لە تۆڕی کۆمەڵایەتیی ئیکس تویتێکی بڵاوکردەوە، تێیدا هەڵوێستی خۆی دوای برینداربوونی راگەیاند.
شەمخانی نووسیویەتی، "چارەنووس وابوو کە بە جەستەیەکی بریندارەوە بمێنمەوە، بۆیە دەمێنمەوە تاوەکو هۆکارێک بم بۆ دووژمنایەتیی ناحەز، چونکە ئەو باش دەزانێت هۆکارەکەی چییە و منیش دەزانم!"
راوێژکارەکەی خامنەیی هەروەها دەڵێت، "ئامادەم 100 جار فیدای گەلی ئێران بم. شەڕکردن لەگەڵ گەلی هیوا و خاوەن غیرەت، یاریکردنە بە ئاگرێک، کە جگە لە خۆڵەمێش هیچی دیکەی بۆ دووژمن نابێت."
عەلی شەمخانی، راوێژکاری خامنەیی یەکێک بوو لەو بەرپرسانەی کە لە هێرشەکەی ئیسرائیل بۆسەر تاران لە رۆژی 13-06-2025 بریندار بوو.
17:18
ئێران کوژرانی 20 ئەندامی سوپای پاسداران و هێزی ئاسمانیی راگەیاند
دیمەنی بۆردوومانێکی سوپای ئیسرائیل بۆسەر ناوچەیەکی ئێران
میدیای ئێران کوژرانی پێنج ئەندامی سوپای پاسدارانی لە لوڕستان و 15 ئەندامی هێزی ئاسمانیی وڵاتەکەی لە ناوچە جیاجیاکانی دیکە راگەیاند.
بەگوێرەی میدیای فەرمیی ئێران، ئەو 5 ئەندامەی سوپای پاسدارا ئەمڕۆ شەممە لە شاری خوڕەمئاباد لە پارێزگای لوڕستان، لە ئەنجامی هێرشێکی سوپای ئیسرائیلدا کوژراون.
ناوی کوژراوەکانی ئەم بەیانییە بەم شێوەیە راگەیێندراوە: سەجاد مودهەنی، حەمید ئاقایی، سەمەد لوڕستانی، عەباس شەرەفی، عەلیڕەزا سەبزیپوور.
هەر ئەمڕۆ ناسنامەی 15 ئەندامی هێزە ئاسمانییەکانی ئێران راگەیێندرا، کە لە ئەنجامی هێرشەکانی ئیسرائیلدا کوژراون.
میدیای فەرمیی ئێران ئاماژەی بە کات و شوێنی گیانلەدەستدانی ئەندامەکانی هێزی ئاسمانی نەکردووە و رایگەیاندووە، کوژراوەکان زۆرینەیان ئەفسەری باڵا بوون لە هێزی ئاسمانی.
لە 13ی حوزەیرانەوە جەنگی ئیسرائیل و ئێران دەستیپێکردووە، تائێستا ژمارەیەکی بەرچاو لە فەرماندە سەربازییەکانی ئێران کوژراون.
09:20
ئەم لایڤ بلۆگە دادەخەین
بە درێژایی رۆژانی رابردوو لێرەوە دوایین زانیاری و شرۆڤەتان لەبارەی رووداوەکانی جەنگی ئێران و ئیسرائیل زانی، ئێستا ئەم لایڤ بلۆگە دادەخەین. دەتوانن سەردانی رووداو بکەن بۆ دوایین زانیارییەکان. هەروەها لایڤ بلۆگی نوێ لەوێ دەکرێتەوە.
07:09
ئیسرائیل کوژرانی فەرماندەیەکی باڵای سوپای پاسدارانی راگەیاند
بەیانیی ئەمڕۆ شەممە سوپای ئیسرائیل رایگەیاند، فەرماندەی لیوای دووەمی فڕۆکەی بێفڕۆکەوانی لە هێزی ئاسمانیی سەر بە سوپای پاسدارانی ئێرانی کوشتووە.
سوپای ئیسرائیل لە بەیاننامەیەکدا رایگەیاند، "هێزی ئاسمانی لە رێگەی فڕۆکەی جەنگییەوە ئەمینپوور جودەکی، فەرماندەی لیوای دووەمی فڕۆکەی بێفڕۆکەوانی هێزی ئاسمانیی سەر بە سوپای پاسدارانی کوشتووە."
لە بەیاننامەکەدا ئەوەش خراوەتەڕوو، "ئەمینپوور جودەکی لە چوارچێوەی پۆستەکەیدا، سەتان فڕۆکەی بێفڕۆکەوانی بەرەو خاکی ئیسرائیل ئاراستە کردووە، لە ناوچەی ئەهواز لە باشووری رۆژئاوای ئێرانەوە." هەروەها ئاماژە بۆ ئەوە کراوە، "دوای کوشتنی تەهارپوور، فەرماندەی بنکەی فڕۆکە بێفڕۆکەوانەکان لە هێزی ئاسمانیی سەر بە سوپای پاسداران لە 13ی حوزەیران، جودەکی رۆڵێکی سەرەکیی لە چالاکییەکانی بنکەکەدا گێڕاوە."
تاوەکو ئێستا زانیاری لەبارەی ئەوە بڵاونەکراوەتەوە کە بەرپرسە سەربازییە باڵا ئێرانییەکە لە کوێ کراوەتە ئامانج.
لە لایەکی دیکەوە هێزی ئاسمانیی ئیسرائیل بەرەبەیانی ئەمڕۆ شەممە 21ی حوزەیرانی 2025 رایگەیاند، لە نۆیەمین رۆژی جەنگی نێوان هەردوو وڵاتدا، هێرشی دیکەی ئاسمانیی کردووەتەسەر ناوچەکانی هەڵگرتن و هەڵدانی مووشەکەکان لە ناوەڕاستی ئێران.
لە پۆستێکدا لە پلاتفۆرمی "ئێکس"، هێزی ئاسمانیی ئیسرائیل رایگەیاند، "ژێرخانی کۆگاکردنی مووشەکەکان و شوێنی هەڵدانی مووشەکی لە ناوەڕاستی ئێران کردووەتە ئامانج."
تەلەڤیزیۆنی فەرمیی ئێران رایگەیاند، "هێرشێکی تیرۆریستی کراوەتەسەر باڵەخانەیەکی نیشتەجێبوون لە شاری قوم" لە ناوەڕاستی ئێران، لە باشووری تاران.
ئاژانسی هەواڵیی "تەسنیم"ی ئێران لە زاری مورتەزا حەیدەری، گوتەبێژی لیژنەی بەڕێوەبردنی قەیرانەکان لە پارێزگای قومەوە رایگەیاند، "بەرەبەیانی ئەمڕۆ (شەممە) لە درێژەی دەستدرێژییە قێزەونەکانی رژێمی زایۆنیدا، نهۆمی چوارەمی یەکێک لە باڵەخانەکان لە گەڕەکی سالارییەی شاری قوم کرایە ئامانج."
حەیدەری گوتیشی، "بەداخەوە، ئەم هێرشە بووە هۆی شەهیدبوونی کوڕێکی تەمەن 16 ساڵ و برینداربوونی دوو کەسی دیکە، کە گواستراونەتەوە بۆ ناوەندە پزیشکییەکان بۆ وەرگرتنی چارەسەر."
گوتەبێژەکە ئاماژەی بەوەش کرد، "وردەکارییەکانی رووداوەکە هێشتا لەژێر لێکۆڵینەوەدایە و زۆر زوو خەڵکی بەڕێزی قوم لێی ئاگادار دەکرێنەوە."
هەروەها میدیاکانی ئێران رایانگەیاند، تەقینەوە لە شاری ئیسفەهان روویانداوە. ئاژانسی هەواڵیی "فارس" بڵاویکردووەتەوە، "چەند خولەکێک پێش ئێستا دەنگی تەقینەوە لە ئیسفەهان بیستراوە و سیستمی بەرگریی ئاسمانی لە شارەکە چالاک کراوە."
05:36
وەزیری دەرەوەی ئێران گەیشتە تورکیا؛ 'لەگەڵ ئەردۆغانیش کۆدەبمەوە'
عەباس عێراقچی، وەزیری دەرەوەی ئێران لەکاتی گەیشتنی بۆ ئیستەنبووڵ
وەزیری دەرەوەی ئێران دوای کۆبوونەوە لەگەڵ وەزیرانی دەرەوەی سێ وڵاتی ئەورووپی، بۆ بەشداریکردن لە کۆبوونەوەی رێکخراوی هاریکاریی ئیسلامی گەیشتە ئیستەنبووڵ. عێراقچی دەڵێت، "کۆبوونەوەم لەگەڵ سەرۆککۆماری تورکیاش دەبێت."
بەرەبیانی ئەمڕۆ شەممە 21-06-2025 عەباس عێراقچی، وەزیری درەوەی ئێران بۆ بەشداریکردن لە کۆبوونەوەی رێکخراوی هاریکاریی ئیسلامی گەیشتە شاری ئیستەنبووڵی تورکیا.
لەبارەی کۆبوونەوەی وەزیرانی دەرەوەی وڵاتانی ئەندام لە رێکخراوە ئیسلامییەکەدا، عێراقچی بە میدیای فەرمیی وڵاتەکەیی راگەیاند، "پێشتر پلانی بۆ دانرابوو، بەڵام ئێمە داوامان کرد دانیشتنێکی تایبەت لەبارەی رووداوەکانی ئەم دواییانە و دەستدرێژییەکانی ئیسرائیل بۆسەر ئێران بەڕێوەبچێت، کە قبووڵ کرا."
وەزیری دەرەوەی ئێران هیوای خواست، دوای کۆبوونەوەکە، راگەیێندراوێکی "زۆر باش و تووند،" بە مەبەستی سەرکۆنەکردنی هێرشەکانی ئیسرائیل دەربکرێت.
عەباس عێراقچی، وەزیری دەرەوەی ئێران گەیشتە ئیستەنبووڵ و دەڵێت: لەگەڵ رەجەب تەیب ئەردۆغان، سەرۆککۆماری تورکیا کۆدەبێتەوە pic.twitter.com/3kWsHSQcXJ
— Rudaw (@Rudawkurdish) June 21, 2025
رێکخراوەکە 57 وڵاتی زۆرینە موسڵمان تێیدا ئەندامن. وەکو عەباس عێراقچی دەڵێت، لە پەراوێزی دانیشتنەکەدا، دیداری لەگەڵ زۆربەی وەزیرانی دەرەوەی وڵاتانی ئەندام لە رێکخراوی هاریکاریی ئیسلامیدا دەبێت.
وەزیری دەرەوەی ئێران ئەوەشی خستەڕوو، لە سەردانەکەیدا بۆ تورکیا، دیداری لەگەڵ سەرۆکی رێکخراوی هاریکاریی ئیسلامی و رەجەب تەیب ئەردۆغان، سەرۆککۆماری تورکیاش دەبێت.
عێراقچی ئاماژەی بەوە دا، "لەو دەرفەتە کەڵک وەردەگرین کە دەنگی ستەملێکراوی خەڵکی ئێران و لەسەر حەقبوونیان بگەیێنین و باس لە بەگریی رەوا و هەڵوێستی خۆمان بکەین."
وەکو وەزیری دەرەوەی ئێران دەڵێت، لە دانیشتنی سەرەکیی رێکخراوی هاریکاریی ئیسلامی و دانیشتنی تایبەت بە وڵاتەکەیدا، گوتاری دەبێت.
کۆبوونەوەی وڵاتانی ئەندام لە رێکخراوی هاریکاریی ئیسلامی لە کاتێکدایە کە ئێران و ئیسرائیل لە 13ی حوزەیرانەوە لە جەنگدان و بەردەوام هێرش دەکەنە سەر یەکدی.
04:48
سوپای پاسداران: بە مووشەک و درۆن فڕۆکەخانەی بن گوریۆنمان لە تەل ئەڤیڤ کردە ئامانج
ساتی هەڵدانی مووشەکی ئێران بەرەو ئیسرائیل
سوپای پاسدارانی ئێران دەڵێت، لە دوایین هێرشیاندا بۆسەر ئیسرائیل، درۆن و مووشەکی دوورمەودا بەکارهێندراون و فڕۆکەخانەی بن گوریۆن و ناوەندی پشتیوانیی ئۆپەراسیۆنەکانی ئیسرائیل کراونەتە ئامانج.
بەرەبەیانیی ئەمڕۆ شەممە 21-06-2025 سوپای پاسداران لەبارەی شەپۆلی 18یەمی هێرشە مووشەکییەکانیان بۆسەر ئیسرائیل، راگەیێندراوێکی بڵاوکردەوە و تێیدا هاتووە، ناوەندی وڵاتەکە و فڕۆکەخانەی بن گوریۆن کراونەتە ئامانج.
بەگوتەی سوپای پاسداران، یەکێکی دیکە لە ئامانجەکانی هێرشەکە، ناوەندی پشتیوانیی ئۆپەراسیۆنەکانی ئیسرائیل بووە، کە "بە سەرکەوتوویی لە رێگەی ژمارەیەک درۆنی شاهید-136 و مووشەکی دوورمەودای سووتەمەنیی شل و رەق، کراوەتە ئامانج."
لە راگەیێندراوەکەدا ئەوەش هاتووە، درۆنەکانی شاهید-136 نوێترین سیستمەکانی بەرگریی ئاسمانیی وڵاتەکەیان بڕیوە و "ئیسرائیلییەکان ناچار بوون دووبارە بەرەو پەناگەکانیان هەڵبێن."
سوپای پاسداران جەختیشی لەوە کردووەتەوە، ئۆپەراسیۆنە مووشەکی و درۆنییەکانیان بە شێوەیەکی "ئامانجدار" بەردەوام دەبن.
هێرشەکە کاژێر 02:35 خولەکی بەرەبەیانیی ئەمڕۆ کرا و لە حەیفا، تەل ئەڤیڤ و چەند ناوچەیەکی دیکەی ئیسرائیل زەنگی ئاگادارکردنەوە لێدرا.
لە بەرامبەردا ئیسرائیلیش بەردەوامە لە بەئامانجگرتنی بنکە سەربازی و ئەتۆمییەکانی ئێران.
جەنگی دوو وڵاتەکە لە 13ی حوزەیرانەوە دەستیپێکردووە و تاوەکو ئێستا بەردەوامە.
03:44
میدیای ئێران: باڵەخانەیەک لە قوم کرایە ئامانج
رووداو
میدیای ئێران بڵاویکردووەتەوە لە شاری قوم بە درۆن هێرشکراوەتە سەر باڵەخانەیەک؛ تاوەکو ئێستا زیانەکانی نازانرێت.
هێرشەکە کاژێر 03:30 خولەکی بەرەبەیانیی ئەمڕۆ شەممە، 21-06-2025، لەلایەن ئیسرائیلەوە بە درۆن کراوەتە سەر نهۆمی دووەمی باڵەخانەیەک.
وەک لە وێنەکاندا دەردەکەوێت، نهۆمی یەکەمی باڵەخانەکە هیچ زیانێکی پێنەگەیشتووە، بەڵام نهۆمی دووەم لە ئەنجامی هێرشەکەدا بە تەواوی تێکدراوە.
تاوەکو ئێستا نازانرێت کێ لەو باڵەخانەیەدا بووە، بەڵام پێشتر سوپای ئیسرائیل رایگەیاندووە، ''ئامانجدار'' هێرش دەکاتە سەر ئەو باڵەخانانەی کە شوێنی مانەوەی زانایانی ئەتۆمی یان فەرماندە سەربازییەکانە.
دوێنێش بە هەمانشێوە ئیسرائیل هێرشی کردە سەر باڵەخانەیەک لە ناوەندی تاران و رایگەیاند، زانایەکی ئەتۆمی کراوەتە ئامانج.
جەنگی نێوان ئێران و ئیسرائیل لە 13ـی حوزەیرانەوە دەستیپێکردووە و تاوەکو ئێستا بەردەوامە.
03:43
میدیای سوپای پاسدارانی ئێران: دەنگی تەقینەوەی بەهێز لە تاران بیسترا
بەگوێرەی میدیای سوپای پاسداران، لە درێژەی هێرشەکانی ئیسرائیل بۆسەر ئێران، لەدوای بیستنی دەنگی چەند تەقینەوەیەکی بەهێز لە رۆژئاوا و رۆژهەڵاتی تاران، سیستمی بەرگریی ئاسمانیی شارەکە کارا کراوە.
کاژێر 03:20 خولەکی بەرەبەیانیی ئەمڕۆ شەممە 21-06-2025 میدیای سوپای پاسداران بڵاویکردەوە، دەنگی چەند تەقینەوەیەکی بەهێز لە رۆژئاوا و رۆژهەڵاتی تارانی پایتەخت بیستراون.
وەکو میدیاکە دەڵێت، لەدوای بیستنی دەنگی تەقینەوەکان، سیستمی بەرگریی ئاسمانی لە تاران کارا کراوە و بەرپەرچی هێرشەکانی ئیسرائیلی داوەتەوە.
بەگوێرەی زانیارییەکان، لە ئاسمانی تاران و کەرەج فڕۆکەی جەنگیی ئیسرائیل بیندراوە و بە چڕی بۆردوومانی چەند ناوچەیەکی کردووە.
هاوکات لە ئیسفەهانیش سیستمی بەرگریی ئاسمانی لە ئەنجامی چەند هێرشێکدا کارا کراوە.
بیستنی دەنگی تەقینەوەکان لە چەند ناوچەیەکی ئێران و رۆژهەڵاتی کوردستان لە کاتێکدایە، بەرەبەیانیی ئەمڕۆ هێزە چەکدارەکانی وڵاتەکە، بە 15 مووشەک هێرشی کردە سەر ئیسرائیل.
هەروەها سوپای ئیسرائیلیش بڵاوی کردووەتەوە، لە ناوەندی تاران هێرشیان کردووەتە سەر ژێرخانی سەربازی و بنکە مووشەکییەکانی ئێران.
جەنگی نێوان ئێران و ئیسرائیل لە 13ی حوزەیرانەوە دەستیپێکردووە و تاوەکو ئێستا بەردەوامە.
03:37
گوتەبێژی حکومەتی ئێران: خەڵک پاڵپشتی لە رێبەری وڵات دەکەن
فاتمە مهاجرانی، گوتەبێژی حکومەتی ئێران
گوتەبێژی حکومەتی ئێران پەیامێکی بڵاوکردووەتەوە کە تێیدا هاتووە، خەڵکی وڵاتەکە پاڵپشتیی رێبەری کۆماری ئیسلامی ئێران دەکەن. ئاماژە بەوەش دەکات، "خەڵکی ناوچەکە بەرامبەر هەر زیانگەیاندنێک بە رێبەری وڵات، کاردانەوەی بەرفراوانیان دەبێت."
بەرەبەیانیی ئەمڕۆ شەممە 21-06-2025 فاتمە مهاجرانی، گوتەبێژی حکومەتی ئێران لەبارەی هەڕەشەکانی دۆناڵد ترەمپ، سەرۆکی ئەمریکا لە عەلی خامنەیی، رێبەری کۆماری ئیسلامیی ئێران پەیامێکی بڵاوکردووەتەوە و دەڵێت، "خەڵکی ناوچەکە کاردانەوەی بەرفراوانیان دەبێت، بەرامبەر هەر زیانێک کە بە رێبەری بگات."
مهاجرانی ئاماژەی بەوەش کردووە، "گەلی ئێران لە بەرامبەر هەڕەشەکاندا، لەپشت رێبەری وڵات وەستاون."
پەیامەکەی گوتەبێژی حکومەتی ئێران لە کاتێکدایە کە دۆناڵد ترەمپ لە پۆستێکی ئێکسدا بە ئاشکرا هێڵی سووری بۆ ئێران دیاری کرد و نووسی، "ئێمە بە دروستی دەزانین ئەو کەسەی پێی دەگوترێت (رێبەری باڵا) لە کوێ خۆی حەشارداوە. ئەو ئامانجێکی ئاسانە، بەڵام لەوێ سەلامەتە - ئێمە لەناوی نابەین (نایکوژین)، لانیکەم بۆ ئێستا نا."
هەروەها داوای "خۆبەدەستەوەدانی بێمەرج"ی لە ئێران کردووە، بۆئەوەی کۆتایی بە جەنگی نێوان ئیسرائیل و وڵاتەکە بهێندرێت و دانوستاندنی ئەتۆمی دەستپێبکاتەوە.
جەنگی نێوان ئێران و ئیسرائیل لە 13ی حوزەیرانەوە دەستیپێکردووە و تاوەکو ئێستا بەردەوامە.
03:21
ئێران 15 مووشەکی ئاراستەی ئیسرائیل کرد
باڵەخانەیەک لە تەل ئەڤیڤ کە بەهۆی کەوتنەخوارەوەی مووشەکی ئێرانەوە ئاگری گرتووە
ئێران کەمێک پێش ئێستا 15 مووشەکی ئاراستەی تەل ئەڤیڤ کرد و میدیای ئیسرائیلی باس لەوە دەکەن، ناوچەی حولون لە تەل ئەڤیڤی گەورە کراوەتە ئامانج.
بەپێی چەند دیمەنێک کە لە تۆڕە کۆمەڵایەتییەکان بڵاوبووەتەوە، دەردەکەوێت باڵەخانەیەک بەهۆی کەوتنەخوارەوەی مووشەکی ئێرانەوە ئاگری گرتووە و تیمێکی ئاگرکوژێنەوەی ئیسرائیل سەرقاڵی کوژاندنەوەی ئاگرەکەن.
دەستەی پەخشی ئیسرائیل ئاماژەی بەوە کردووە، سێ نهۆمی ئەو باڵەخانەیە ئاگریان گرتووە.
01:44
وەزیرێکی ئیسرائیل: پەرەپێدانی بۆمبی ئەتۆمیی ئێرانمان 'لانیکەم 2 بۆ 3 ساڵ' دواخست
جەدعون ساعر، وەزیری دەرەوەی ئیسرائیل
وەزیری دەرەوەی ئیسرائیل رایدەگەیێنێت، هەڵسەنگاندنیان بۆ ئەوە کردووە کە هێرشەکانیان بۆسەر ئێران، توانای تارانی بۆ پەرەپێدانی چەکی ئەتۆمی "لانیکەم بۆ دوو یان سێ ساڵ" دواخستووە.
رۆژی هەینی 20ی حوزەیرانی 2025 جەدعون ساعر، وەزیری دەرەوەی ئیسرائیل بە رۆژنامەی بێڵدی ئەڵمانیی گوت، هێرشەکەی ئیسرائیل، کە سەدان پێگەی ئەتۆمی و سەربازیی کردووەتە ئامانج و بووەتە هۆی کوژرانی فەرماندە باڵاکان و زانایانی ئەتۆمی، ئەنجامی "زۆر گرنگی" هەبووە.
وەزیرە ئیسرائیلییەکە دەڵێت، "بەپێی ئەو هەڵسەنگاندنەی دەبیستین، ئێمە پێشوەختە ئەگەری ئەوەمان دواخستووە کە ئەوان بۆ ماوەی لانیکەم دوو بۆ سێ ساڵی دیکە ببنە خاوەنی بۆمبی ئەتۆمی."
هەروەها ئاماژە بەوەش دەکات، "ئەو راستییەی کە ئێمە ئەو کەسانەمان لەنێوبرد کە سەرکردایەتییان دەکرد و پاڵنەری پرۆگرامی ئەتۆمی بوون، زۆر گرنگە."
جەدعون هۆشداری دەدات و دەڵێت، "ئێمە پێشوەختە شتی زۆرمان بەدەستهێناوە، بەڵام هەرچی لە تواناماندا بێت دەیکەین. راناوەستین و هەموو شتێک پێمان بکرێت دەیکەین بۆئەوەی ئەو هەڕەشەیە نەهێڵین."
ئێرانییەکان تۆمەتەکانی ئیسرائیل رەتدەکەنەوە و دەڵێن، پرۆگرامی ئەتۆمییان بۆ مەبەستی ئاشتییە.
لەبارەی رووخاندنی حکومەتی ئێستای ئێران، وەزیری دەرەوەی ئیسرائیل گوتی، حکومەتی ئیسرائیل "گۆڕینی رژێم"ی لە کۆماری ئیسلامی وەکو "ئامانجێک لەم شەڕەدا" دیاری نەکردووە.
هەروەها گوتیشی، "لانیکەم تاوەکو ئێستا، ئێمە ئەوەمان نەکردووە."
01:31
میدیای ئێران: هێرشکراوەتە سەر کەرەج و ئیسفەهان
رووداو
بەگوێرەی میدیای ئێرانی لە ئەنجامی هێرشێکی ئیسرائیلدا بۆ سەر ئیسفەهان، سیستمی بەرگریی ئاسمانی لە شارەکە کارا کراوە، هەروەها فڕۆکژەی جەنگی لەسەر ئاسمانی شاری کەرەج بینراوە.
بەرەبەیانیی ئەمڕۆ شەممە 21-06-2025، میدیای ئێران پشڕاستی کردەوە، هێرش کراوەتە سەر شاری ئیسفەهان و لە ئەنجامدا سیستمی بەرگریی ئاسمانی کارا کراوە.
باس لەوەش دەکرێت ژمارەیەک فڕۆکەی جەنگیی ئیسرائیل لە ئاسمانی شاری کەرەج بینراون و سیستمی بەرگریی ئاسمانی هەوڵی بەرپەرچدانەوەی هێرشێکی داوەتەوە.
هاوکات لە چەند شاری دیکەی ئێران و رۆژهەڵاتی کوردستان وەکو تاران، کەرەج، شیراز، بووشێهر، سنە و مەریوان دەنگی تەقینەوەی بەهێز بیستراوە.
هێزە چەکدارەکانی ئێرانیش لە بەرامبەر هێرشە بەردەوامەکانی ئیسرائیل، بە چەند قۆناخ هێرشی مووشەکی و درۆنییان کردووەتە سەر وڵاتەکە و لەبارەی دوایین شەپۆلدا کە دوێنێ هەینی کرا راگەیێندراوێکیان بڵاوکردەوە کە تێیدا هاتووە، ''لە سەرانسەری زەوییە داگیرکراوەکان دژی هەندێک لە ئامانج کە بریتی بوون لە ناوەندەکانی سەربازی، پیشەسازیی بەرگری، ناوەندەکانی فەرماندەیی و کۆنترۆڵ، کۆمپانیاکانی پاڵپشتیکار لە ئۆپەراسیۆنی سەربازی و بنکە ئاسمانییەکانی نڤاتیم و هاتزێریم کرانە ئامانج.''
جەنگی ئێران و ئیسرائیل 13ـی حوزەیران دەستیپێکردووە و پێی ناوەتە نۆیەم رۆژەوە.
00:24
فەرەنسا، ئەڵمانیا، بەریتانیا و EU: زۆر نیگەرانین لە گرژییەکانی رۆژهەڵاتی نێوەڕاست
کۆنگرەی رۆژنامەڤانیی وەزیرانی دەرەوەی فەرەنسا، ئەڵمانیا، بەریتانیا و نوێنەری باڵای یەکێتیی ئەورووپا. وێنە: Reuters/Denis Balibouse
وەزیرانی دەرەوەی فەرەنسا، ئەڵمانیا و بەریتانیا، لەگەڵ نوێنەری باڵای یەکێتیی ئەورووپا، رۆژی هەینی 20ی حوزەیرانی 2025 لە جنێڤ لەگەڵ وەزیری دەرەوەی ئێران کۆبوونەوە؛ لە بەیاننامەیەکی هاوبەشدا نیگەرانیی خۆیان لەبارەی دۆخی ناوچەکە و پرۆگرامی ئەتۆمیی ئێران راگەیاند.
لە بەیاننامەکەدا هاتووە، ئەو چوار لایەنە نیگەرانیی خۆیان سەبارەت بە زیادبوونی گرژییەکان لە رۆژهەڵاتی نێوەڕاست دەربڕیوە، پابەندبوونی پتەوی خۆیشیان بە ئاسایشی ئیسرائیل دووپات کردووەتەوە.
هەروەها رایانگەیاندووە، پێویستە هەموو لایەنەکان خۆیان لە گرتنەبەری هەر هەنگاوێک کە ببێتە هۆی پەرەسەندنی زیاتری گرژییەکان لە ناوچەکەدا بەدوور بگرن و، بەپەلە چارەسەرێک لە رێگەی دانوستانەوە بدۆزرێتەوە بۆ دڵنیابوونەوە لەوەی ئێران هەرگیز نابێتە خاوەنی چەکی ئەتۆمی.
وەزیرانی فەرەنسا، بەریتانیا، ئەڵمانیا و نوێنەری باڵای یەکێتیی ئەورووپا، نیگەرانییە لەمێژینەکانی خۆیان لەبارەی فراوانکردنی پرۆگرامی ئەتۆمیی ئێران دووپات کردووەتەوە، کە "هیچ ئامانجێکی مەدەنیی باوەڕپێکراوی نییە" و پێشێلکاریی زۆربەی بڕگەکانی رێککەوتنی ئەتۆمییە (JCPOA). هەروەها گفتوگۆیان لەبارەی رێگاکانی گەیشتن بە چارەسەرێکی دانوستاندنکراو بۆ پرۆگرامی ئەتۆمیی ئێران کردووە، لەگەڵ جەختکردنەوە لەسەر بەپەلەیی بابەتەکە.
ئەو چوار لایەنە ئامادەیی خۆیان نیشانداوە بۆ بەردەوامبوون لە گفتوگۆکردن لەسەر هەموو ئەو پرسانەی پەیوەستن بە پرۆگرامی ئەتۆمیی ئێران و پرسە فراوانترەکانەوە.
هاوکات، پشتیوانیی تەواوی خۆیان بۆ بەڕێوەبەری گشتیی ئاژانسی نێودەوڵەتیی وزەی ئەتۆم (IAEA) دەربڕیوە و هانی ئێرانیان دا کە بە تەواوی هاوکاریی ئاژانسەکە بکات، بەگوێرەی پابەندبوونە یاساییەکانی و لەبەر رۆشنایی دوایین راپۆرتی ئاژانسەکە سەبارەت بە جێبەجێکردنی ئەرکەکانی پارێزگاری لە ئێران.
لە کۆتایی بەیاننامەکەدا، پشتیوانیی خۆیان بۆ بەردەوامبوونی گفتوگۆکان راگەیاندووە و پێشوازییان لە هەوڵە بەردەوامەکانی ئەمریکا کردووە بۆ دۆزینەوەی چارەسەرێکی گونجاو. هەروەها ئامادەیی خۆیان بۆ کۆبوونەوەی دیکە لە داهاتوودا دەربڕیوە.
23:37
شێخی ئەزهەر: ئامانجی ئیسرائیل راکێشانی ناوچەکەیە بۆ لێواری تەقینەوە
شێخی ئەزهەر
لەبارەی جەنگی ئیسرائیل و ئێران، شێخی ئەزهەر لە پۆستێکدا لە پلاتفۆرمی فەیسبووک نووسیویەتی، "بە تووندی سەرکۆنەی بەردەوامیی هێرشی قەوارەی داگیرکەر بۆ سەر کۆماری ئیسلامیی ئێران و ئەو هێرشە بەرنامە بۆداڕێژراو و تووندوتیژییە بەردەوامە دەکەم کە ئەو قەوارە قۆرخکار و شەڕانگێزە دەیکات."
بە بڕوای ئەحمەد تەیب، ئامانجی ئیسرائیل لەو هێرشانە، "راکێشانی ناوچەکەیە بۆ لێواری تەقینەوە و هەڵگیرساندنی شەڕێکی سەرتاسەری کە تەنیا بازرگانانی خوێن و چەک تێیدا سەردەکەون."
ئەحمەد تەیب رایگەیاندووە، "بێدەنگی کۆمەڵگەی نێودەوڵەتی لەسەر ئەم ستەمکارییە و شکستهێنانی لە وەستاندنی، وەک هاوبەشییە لە تاوانکارییەکەدا و بەرهەمەکەشی هەڕەشەکردنە بۆ سەر ئاسایشی هەموو جیهان؛ شەڕیش ناتوانێت ئاشتی دروست بکات."
23:25
ئەورووپا لە جنێڤەوە بە ئێران دەڵێت: کێشە بە سەربازی چارە ناکرێت و دەبێت ئەمریکاش بەشدار بێت
وەزیرانی دەرەوەی فەرەنسا، ئەڵمانیا، بەریتانیا و نوێنەری باڵای یەکێتیی ئەورووپا لە جنێڤ. وێنە: Reuters
وەزیرانی دەرەوەی ئەڵمانیا، فەرەنسا و بەریتانیا، لەگەڵ بەرپرسی سیاسەتی دەرەوەی یەکێتیی ئەورووپا، رۆژی هەینی لە جنێڤ لەگەڵ عەباس عێراقچی، وەزیری دەرەوەی ئێران کۆبوونەوە، جەختیان لەوە کردەوە کە "چارەسەری سەربازی" بۆ پرسی ئەتۆمیی ئێران نییە و پێویستە دەرگای گفتوگۆ بکرێتەوە، بەتایبەت لەگەڵ ویلایەتە یەکگرتووەکانی ئەمریکا.
دوای کۆبوونەوەکە، یۆهان ڤادیفول، وەزیری دەرەوەی ئەڵمانیا رایگەیاند، "من و هاوتا فەرەنسی و بەریتانییەکەم گفتوگۆی جیدیمان لەگەڵ هاوکارە ئێرانییەکانمان کرد."
ڤادیفول جەختی لەوە کردەوە، "پێویستە ئەمریکا بەشداری لە گفتوگۆی زیاتردا بکات بۆ دۆزینەوەی چارەسەرێک."
هاوکات، ژان نۆیل بارۆ، وەزیری دەرەوەی فەرەنسا، بە روونی رایگەیاند، "پرسی ئەتۆمیی ئێران بە رێگەی سەربازی چارەسەر ناکرێت" و گوتی، "ئێمە لێرەین لە چوارچێوەی دەستپێشخەرییەکی دیپلۆماسیدا بۆ کەمکردنەوەی ئەو ململانێیەی لە رۆژهەڵاتی نێوەڕاست لەئارادایە." بارۆ هیوای خواست کە ئێرانییەکان "لەگەڵ لایەنی ئەمریکیشدا کراوە بن بۆ دانوستاندن."
لە لایەکی دیکەوە دەیڤد لامی، وەزیری دەرەوەی بەریتانیا نیگەرانیی وڵاتەکەی لە فراوانبوونی جەنگەکە نیشاندا و گوتی، "نامانەوێت زیادبوونی گرژییەکی هەرێمی و ململانێی نێوان ئێران و ئیسرائیل ببینین." هەروەها جەختی لەسەر هەڵوێستی نەگۆڕی رۆژئاوا کردەوە و گوتی، "ئێمە روون بووین لەوەی ئێران ناتوانێت ببێتە خاوەنی چەکی ئەتۆمی."
کایا کالاس، بەرپرسی سیاسەتی دەرەوەی یەکێتیی ئەورووپا، کورتترین و روونترین پەیامی هەبوو و رایگەیاند، "پێویستە گفتوگۆکان لەگەڵ تاران بە کراوەیی بهێڵدرێنەوە."
کۆبوونەوەکەی جنێڤ لە هەشتەمین رۆژی جەنگی راستەوخۆی نێوان ئێران و ئیسرائیلدا بەڕێوەچوو. ئەم هەوڵە دیپلۆماسییەی ئەورووپا لە کاتێکدایە کە دۆناڵد ترەمپ، سەرۆکی ئەمریکا مۆڵەتی دوو هەفتەی بۆ دیپلۆماسییەت دیاریکردووە پێش ئەوەی بڕیاری کۆتایی لەسەر بەشداریکردنی سەربازیی وڵاتەکەی بدات.
پێشتر لە هەمان رۆژدا، عەباس عێراقچی لە ئەنجوومەنی مافی مرۆڤی نەتەوە یەکگرتووەکان، ئیسرائیلی بەوە تۆمەتبار کرد کە "خیانەتی" لە رێککەوتنێکی ئەتۆمیی "زۆر بەڵێندەرانە" کردووە، کە بڕیار بووە لەگەڵ ئەمریکادا ئەنجامی بدەن. ئەم لێدوانانە ئاڵۆزیی زیاتری خستە ناو دۆخەکەوە و ئەرکی دیپلۆماتە ئەورووپییەکانی قورستر کرد، کە هەوڵدەدەن هەردوو لایەنی ئێران و ئیسرائیل قایل بکەن بە گەڕانەوە بۆ سەر مێزی گفتوگۆ.
22:28
پەیامێکی بەپەلەی ترەمپ بۆ گرووپە چەکدارەکانی نزیک لە ئێران
وێنەیەکی ترەمپ کاتێک قسەی بۆ رۆژنامەڤانان دەکرد
دۆناڵد ترەمپ، سەرۆکی ئەمریکا رایگەیاند: "نیگەرانین گرووپە چەکدارەکانی نزیک لە ئێران هێرش بکەنە سەر بەرژەوەندییەکانمان و [ئەگەر وابکەن] بە تووندی وەڵامیان دەدەینەوە."
دۆناڵد ترەمپ قسەی بۆ رۆژنامەڤانان کرد و گوتی: "گفتوگۆ لەگەڵ ئێران دەکەین، بزانین لەدوای ئەوە چی روودەدات."
سەرۆکی ئەمریکا جارێکی دیکە جەخت دەکاتەوە کە ئێران نزیکبووە لە دروستکردنی چەکی ئەتۆم.
هەروەها دۆناڵد ترەمپ باسی ئەو دوو هەفتەیەی کرد بۆ ئێرانی داناوە و دەڵێت، "وابزانم دوو هەفتە کاتێکی گونجاوە بۆ ئەوەی بزانین ئێرانییەکان بە هۆش دێنەوە یان نا." گوتیشی، ئەو ماوەیە زۆرترین ماوەیە کە پێی داون.
لە درێژەی قسەکانی سەرۆکی ئەمریکا جەختیکردەوە، رەنگە پشتگیری لە ئاگربەست بکات بەپێی هەلومەرجەی کە هەیە.
21:45
ئێران مەرج بۆ دەستپێکردنەوەی دانوستاندن دادەنێت: هێرشەکان رابگیرێن
عەباس عێراقچی، وەزیری دەرەوەی ئێران
عەباس عێراقچی، وەزیری دەرەوەی ئێران ئامادەیی وڵاتەکەی بۆ گەڕانەوە بۆ سەر مێزی گفتوگۆ راگەیاند، بەڵام مەرجێکی روونی دانا کە بریتییە لە راگرتنی هێرشەکان. هاوکات جەختیشی کردەوە کە "بەرنامەی ئەتۆمیی ئێران ئاشتیانەیە."
عێراقچی دوای کۆبوونەوەی لەگەڵ بەرپرسانی ئەورووپا بەجیا هاتە نێو رۆژنامەڤانان و چەند خولەکێک قسەی بۆ کردن و هەڵوێستی وڵاتەکەی بەرامبەر بە جەنگەکەیان لەگەڵ ئیسرائیل و گەڕانەوە بۆ مێزی دانوستاندن دەربڕی.
وەزیری دەرەوەی ئێران جەختی لەسەر مافی وڵاتەکەی بۆ "بەرگریکردن لە خۆی" کردەوە و گوتی: "بەردەوام دەبین لە پەیڕەوکردنی مافی رەوامان لە بەرگریکردن لە خۆمان." لەبارەی توانای سەربازیی ئێرانەوە، بە روونی گوتی: "ئامادە نین دانوستاندن لەسەر توانا بەرگرییەکانمان بکەین."
عێراقچی، ئیسرائیلی بە "پێشێلکردنی یاسای نێودەوڵەتی" تۆمەتبار کرد و رایگەیاند، "ئێران بەردەوام دەبێت لە بەرگریکردن لە خۆی لە دژی دەستدرێژییەکانی ئیسرائیل."
سەبارەت بە بەرنامە ئەتۆمییەکەیان، وەزیری دەرەوەی ئێران گوتی: "بەرنامە ئەتۆمییەکەمان ئاشتییانەیە،" بەڵام هیچ زانیارییەکی زیاتری لەوبارەیەوە نەخستەڕوو.
20:40
ئەنجامی کۆبوونەوەی بەرپرسانی ئەورووپا لەگەڵ وەزیری دەرەوەی ئێران
رووداو
لەدوای کۆبوونەوەکەی وەزیرانی دەرەوەی بەریتانیا، ئەڵمانیا و فەرەنسا، جێگری سەرۆکی ئەنجوومەنی یەکێتیی ئەورووپا لەگەڵ وەزیری دەرەوەی ئێران لەبارەی جەنگی ئێران و ئیسرائیل کۆنفرانسێکی رۆژنامەڤانیان کرد.
لە سەرەتای کۆنفرانسەکە، یۆهان وادپۆڵ، وەزیری دەرەوەی ئەڵمانیا رایگەیاند: "بەرنامەی ئەتۆمیی ئێران مەترسییەکی گەورەیە" و لە داهاتوو راگەیێندراوێک بڵاودەکەنەوە.
وەزیری دەرەوەی ئەڵمانیا گوتیشی: "لەگەڵ هاوتا فەرەنسی و بەریتانییەکەم گفتوگۆی جیدیمان لەگەڵ هاوتا ئێرانییەکەمان کرد."
دواتر مایکی رۆژنامەڤانان بردرایە بەردەم دەیڤد لامی، وەزیری دەرەوەی بەریتانیا و لەبارەی کۆبوونەوەکەی جنێڤ گوتی: "ئێمە راشکاوین، نابێت ئێران چەکی ئەتۆمی هەبێت."
بە گوتەی دەیڤد لامی، وڵاتەکەی ئامادەیە بۆ "بەردەوامیدان" بە دانوستاندن [لەنێوان ئیسرائیل و ئێران.]
ئەو وەزیرە بەریتانییە راشیگەیاند: "هانی ئێران دەدەین لە دانوستاندن لەگەڵ ئەمریکا بەردەوام بێت."
ژان نوێل بارۆ، وەزیری دەرەوەی فەرەنساش قسەی بۆ رۆژنامەڤانان کرد و رایگەیاند: "بەرنامەی ئەتۆمیی ئێران هەڕەشەیەکی گەورەیە، لەڕێگەی دیپلۆماسییەوە دەکرێت پرسی بەرنامەی ئەتۆمیی ئێران چارەسەر بکرێت."
ژان نوێل بارۆ باسی لەوەشکرد: "لە داهاتوو لەگەڵ ئەمریکا و ئیسرائیل و وڵاتانی ناوچەکە [بۆ دانوستاندن] لەسەر هێڵ دەبین."
ئەو وەزیرە فەرەنسییە باسی لە هەڵوێستی ئێران لەبارەی کۆبوونەوەکان کرد و گوتی: "عەباس عێراقچی، وەزیری دەرەوەی ئێران ئامادەیی خۆی پێشاندا بۆ بەردەوامیی ئەم کۆبوونەوانە."
"ئێران ویستی خۆی بۆ دانوستاندن لەسەر پڕۆگرامە ئەتۆمییەکەی پێ راگەیاندین." ئەمە بە گوتەی ژان نوێل بارۆ و هەروەها راشیگەیاند: " ئێمە لێرەین لەپێناو دەستپێشخەرییەکی دیپلۆماسی بۆ نەهێشتنی گرژییەکانی رۆژهەڵاتی نێوەڕاست."
دواتر کایا کالاس، جێگری سەرۆکی ئەنجوومەنی یەکێتیی ئەورووپا رایگەیاند: "دەبێت دەرگای دانوستاندن لەگەڵ ئێران بە کراوەیی بهێڵینەوە و رێککەوتین گفتوگۆ لەسەر پڕۆگرامی ئەتۆمی و کێشەکانی دیکەش بکەین."
19:09
نوێنەری ئێران لە نەتەوە یەکگرتووەکان: ئەنجوومەنی ئاسایشی نێودەوڵەتی شکستیهێناوە
رووداو
نەتەوە یەکگرتووەکان لەبارەی جەنگی نێوان ئیسرائیل و ئێران کۆبوونەوە؛ نوێنەری وڵاتان گوتاری خۆیان پێشکێش کرد، لەنێویاندا نوێنەری کۆماری ئیسلامیی ئێران "رەخنەی تووندی" لە ئەنجوومەنی ئاسایشی نێودەوڵەتی گرت و گوتی: "شکستیان هێناوە."
نوێنەرەکەی ئێران باسی لەوەش کرد کە "ئەنجوومەنەکە دووفاقی دەکەن."
19:01
کۆبوونەوەیەکی چارەنووسساز؛ وەزیری دەرەوەی ئێران لەگەڵ بەرپرسانی ئەورووپا لە کۆبوونەوەدایە
عەباس عێراقچی لە کۆبوونەوەکە
مووشەکی هەردوو وڵات لە ئاسمانن و یەکدی دەکەنە ئامانج، عەباس عێراقچی، وەزیری دەرەوەی ئێران لەگەڵ هاوتا بەریتانی، فەرەنسی و ئەڵمانییەکەی بە ئامادەبوونی یەکێتیی ئەورووپا لە جنێڤ لە کۆبوونەوەدان.
ئەو وەزیرانە زیاتر لە کاژێرێکە لە کۆبوونەوەدان، بەڵام بەگوێرەی زانیارییەکانی زنار شینۆ، پەیامنێری رووداو لە جنێڤ: "پشوویەکی کورتیان وەرگرتووە."
پاش 90 خولەک لە گفتوگۆی نێوان وەزیری دەرەوەی ئێران لەگەڵ هاوتا بەریتانی، فەرەنسی و ئەڵمانییەکەی بە ئامادەبوونی یەکێتیی ئەورووپا لە جنێڤ؛ پشوویان وەرگرت و کەمێکی دیکە کۆبوونەوەکە دەستپێدەکاتەوە.
— Rudaw (@Rudawkurdish) June 20, 2025
وێنەکە ئەورووپییەکانن چەند ساتێک پێش گەیشتنی عەباس عێراقچی: AFP pic.twitter.com/rRRHm4Hjnt
وڵاتانی ئەورووپی بەدوای دەرچەیەکدا دەگەڕێن بۆ "راگرتنی تووندتیژییەکان" لەنێوان ئیسرائیل و ئێران.
ڤیدیۆی دەستپێکی کۆبوونەوەی عێراقچی و ئەورووپییەکان؛ جیهان چاوی لە ئەنجامی ئەم گفتوگۆیەیە تاوەکو چارەنووسی جەنگەکەی بۆ روون ببێتەوە pic.twitter.com/uHwyfbH2mt
— Rudaw (@Rudawkurdish) June 20, 2025
18:58
پەیامی نوێی نەتەنیاهوو لەبارەی هێرشەکانی ئێران
رووداو
بنیامین نەتەنیاهوو دەڵێت، ئێران نیو سەدەیە، "خەڵکی خۆیان دەچەوسێننەوە" هەروەها جەختی کردەوە کە نابێت، "ئەو وڵاتە چەکی ئەتۆمی هەبێت."
سەرۆکوەزیرانی ئیسرائیل، سوپاسی ترەمپ دەکات بۆ ئەوەی پشتگیریی وڵاتەکەی و دەڵێت: "[ئێمە] بەرگری لە خۆمان بکەین."
نەتەنیاهوو لە بەشێکی دیکەی قسەکانی باسی لە هێرشەکانی ئێران کرد و گوتی: "خەڵکی سڤیل دەکەنە ئامانج" و باسی لەوەشکرد، لەگەڵ ئەمریکا دوژمنێکی هاوبەشیان هەیە.
"ئامانجمانە پرۆگرامی چەکی ئەتۆمیی ئێران لەناو ببەین" نەتەنیاهوو وای گوت. راشیگەیاند: "تەنیا بنکەی ئەتۆمی و سەربازیی ئێران دەکەینە ئامانج."
لەبارەی ئەو مووشەکانەی ئێران هەیەتی، سەرۆکوەزیرانی ئیسرائیل دەڵێت: "28 هەزار مووشەکی هەیە، هاوکات ئێران هەوڵی بەدەستهێنانی بۆمبی ئەتۆمی دەدات."
17:42
کۆبوونەوەی عێراقچی و ئەورووپییەکان درێژە دەکێشێت
کۆبوونەوەی عێراقچی و ئەورووپییەکان درێژە دەکێشێت
زنار شینۆ، نێردراوی رووداو بۆ جنێڤ رایدەگەیێنێت، کۆبوونەوەی عێراقچی لەگەڵ دیپلۆماتە بەریتانی و ئەورووپییەکان درێژەدەکێشێت، ئێستا پشوویەک وەرگیراوە.
بڕیاربوو کۆبوونەوەکە کاژێر 18:00 بە کاتی هەولێر کۆتاییبهاتبا.
17:36
ئەنجوومەنی دەستنیشانکردنی بەرژەوەندییەکانی ئێران: ئاشتیی سەپێندراو قبووڵ ناکەین
ئاڵای ئێران
ئەنجوومەنی دەستنیشانکردنی بەرژەوەندییەکانی کۆماری ئیسلامیی ئێران راگەیێندراوێکی لەبارەی جەنگ بڵاوکردەوە و دەڵێت، وڵاتەکە ''ئاشتی سەپێندراو'' یان ''خۆبەدەستەوەدان'' قبووڵ ناکات؛ ئاماژە بەوەش دەکات، ''بەرگری لە سنوورە ئایینی و نیشتمانییەکانی خۆمان دەکەین.''
رۆژی هەینی، 20-06-2025، ئەنجوومەنی دەستنیشانکردنی بەرژوەندییەکانی کۆماری ئیسلامیی ئێران لە پەیامێکدا لەبارەی جەنگی نێوان وڵاتەکە و ئیسرائیل رایگەیاند: ''ترەمپ و پاڵپشتیکارانی ئیسرائیل ئەوە بزانن کە خۆبەدەستەوەدان یان قبووڵکردنی ئاشتی سەپێندراو خەونێکە" کە نایەتەدی.
لە راگەیێندراوەکەدا بەو شێوەیە ئاماژە بە هەڕەشەکانی دۆناڵد ترەمپ، سەرۆکی ئەمریکا بۆ کوشتنی عەلی خامنەیی، رێبەری کۆماری ئیسلامیی ئێران کراوە کە ''گەلی مەزنی ئێمە هۆشیارانە و بە جێبەجێکردنی فەرمانەکانی رێبەر، بەرگری لە سنوورە ئایینی و نیشتمانییەکانی خۆی دەکات.''
جەختیش لەوە کراوەتەوە کە ''سەرۆککۆماری ئەمریکا گەلی مەزنی ئێران و تۆکمەیی و یەکگرتوویی مەرجەعییەتی شیعەی نەناسیوە.''
17:03
دوایین زانیاری لەبارەی کۆبوونەوەکەی جنێڤ
پەیامنێری رووداو زانیارییەکان باس دەکات
عەباس عێراقچی، وەزیری دەرەوەی ئێران لەگەڵ نوێنەرانی وڵاتانی ئەورووپا و بەریتانیا لە جنێڤ لە کۆبوونەوەدایە، لەکاتی گەیشتنی بۆ ئەو هۆتێلەی کۆبوونەوەکەی لێدەکرێت، هیچ کام لە بەرپرسەکان پێشوازییان لێنەکرد.
پەیامنێری رووداو کە رووماڵی کۆبوونەوەکە دەکات، پێمان دەڵێت: وڵاتانی ئەورووپا یەک داوایان لە ئێران هەیە، دەستبەرداری بەرنامە ئەتۆمییەکەی بێت، یان ئەوەی ئەمریکا و ئیسرائیل لەنێوی دەبەن بە بنکەی فۆردۆشەوە.
17:02
ئەردۆغان: ململانێکە گەیشتووەتە شوێنێک گەڕانەوەی تێدا نییە
رەجەب تەیب ئەردۆغان، سەرۆککۆماری تورکیا. وێنە: Reuters
سەرۆککۆماری تورکیا دەڵێت: جینۆسایدی غەززە و ململانێی ئیسرائیل لەگەڵ ئێران گەیشتووەتە شوێنێک کە گەڕانەوەی تێدا نییە، بەڵام ئەم شێتییە دەبێ بوەستێ، ئەگەرنا کاریگەریی دوورمەودای لەسەر ناوچەکە، ئەورووپا و ئاسیا دەبێت.
16:19
وێنە.. کۆبوونەوەی عێراقچی و نوێنەرانی یەکێتیی ئەورووپا دەستیپێکرد
ساتی گەیشتنی عێراقچی. وێنە: زنار شینۆ - رووداو
پەیامنێرمان لە شوێنی کۆبوونەوەی وەزیری دەرەوەی ئێران و نوێنەرانی وڵاتانی یەکێتیی ئەورووپا و بەریتانیا رایگەیاند، عەباس عێراقچی گەیشتووەتە شوێنی کۆبوونەوەکە و کۆبوونەوە دەستیپێکردووە.
ئامانجی کۆبوونەوەکە گفتوگۆیە لەبارەی پڕۆگرامی ئەتۆمیی ئێران و وەستاندنی جەنگی نێوان ئیسرائیل و ئێران.
16:14
ڤیدیۆی هێرشەکانی ئێران لە حەیفا
بۆردوومانی ئێران لە حەیفا
ڤیدیۆی کاریگەریی مووشەکەکانی ئێران لەنێو حەیفا دەبینین کە دووکەڵێکی زۆر بە ئاسماندا دەچێت، بەپێی میدیای ئیسرائیلی، بەلایەنی کەمەوە 10 کەس برینداربوون کە برینی دووانیان سەختە.
15:33
ئێران ژمارەیەک مووشەکی دیکەی ئاراستەی ئیسرائیل کرد
ئێران ژمارەیەک مووشەکی دیکەی ئاراستەی ئیسرائیل کرد
کەمێک لەمەوبەر ئێران ژمارەیەک مووشەکی بەرەو ئیسرائیل هەڵدا، بەپێی میدیای ئیسرائیل گومان دەکرێت، نزیکەی 20 مووشەک بووبن.
بەپێی ئەو وێنە و ڤیدیۆیانەی لە میدیای ئێران بڵاوکراونەتەوە، لە حەیفا مووشەکەکان سیستمی بەرگرییان بڕیوە و زیانیان هەبووە.
عەلی خامنەیی، رێبەری باڵای ئێران لە پۆستێکدا دەڵێت: "دوژمنی زایۆنی بە سزای خۆی دەگات؛ ئەوەتا ئێستا تۆڵەی خۆی وەردەگرێتەوە."
15:32
تەندروستیی ئیسرائیل: لە شەوی رابردووەوە 54 بریندار گوێزراونەتەوە نەخۆشخانە
تەندروستیی ئیسرائیل: لە شەوی رابردووەوە 54 بریندار گوێزراونەتەوە نەخۆشخانە
وەزارەتی تەندروستیی ئیسرائیل زانیاریی نوێی لەبارەی بریندارانی هێرشەکانی ئێران لە شەوی رابردوو بڵاوکردەوە و دەڵێت، 54 کەس برینداربوون و گوێزراونەتەوە نەخۆشخانە. تاوەکو ئێستاش 2517 کەس لە ئەنجامی هێرشەکانی ئێران بریندار بوون.
هاوکات وەزارەتی تەندروستیی ئێران پێشتر رایگەیاندبوو، لە ئەنجامی هێرشەکانی ئیسرائیل 2800 کەس بریندار بوون.
چەند زانیارییەکی دیکە کە تازە روویانداوە:
- فڕۆکە جەنگییەکانی ئیسرائیل کرماشان لە رۆژهەڵاتی کوردستان و ئەهواز لە ئێران بۆردوومان دەکەن.
- میدیای ئێران دەڵێت: سیستمی دژە مووشەکی کارا کراوە و هەوڵی شکستهێنان بە هێرشەکان دەدرێ
14:03
لە میدیاکانی ئێران دەبینین لە تاران خۆپیشاندان دژی ئیسرائیل دەکرێت
میدیای ئێران چەند دیمەنێکی گواستەوەتەوە تێیدا دەردەکەوێت، هەزاران کەس لە تارانی پایتەختی وڵاتەکە دژی ئیسرائیل خۆپیشاندان دەکەن و دروشم لە دژی وڵاتەکە دەڵێنەوە.
لە دیمەنەکان دا دەردەکەوێت، خۆپیشاندەران وێنەی ئەو فەرماندانەیان بەرزکردووەتەوە کە لە سەرەتای ئەم جەنگەوە لەلایەن ئیسرائیلەوە کوژراون.
بەگوێرەی میدیای وڵاتەکە، خۆپیشاندان لە تەورێز و شیرازیش دەستی پێکردووە.
13:28
ئەگەر ئێستا دێیتە نێو لایڤ بلۆگی رووداو؛ گرنگترین زانیارییەکانی ئەمڕۆ بزانە
جەنگی ئێران و ئیسرائیل ئەمڕۆ هەشتەم رۆژە بەردەوامە. ئیسرائیل ناوەندی توێژینەوە و ئێران ناوەندی تەکنەلۆجی بەئامانج دەگرن.
هێرشەکانی ئەمڕۆی ئێران و ئیسرائیل
سوپای ئیسرائیل رایگەیاند، بەرەبایانیی ئەمڕۆ بە 60 فڕۆکەی جەنگی و بەکارهێنانی 120 بۆمب هێرشی کردووەتە سەر ئێران و چەندین ئامانجیان پێکاوە. لەنێویاندا ناوەندی توێژینەوەی پرۆگرامی ئەتۆمیی ئێران. سوپای پاسداران کوژرانی دوو سەربازی راگەیاند.
مووشەکێکی بالیستیی ئێران باڵەخانەیەکی تەکنەلۆجی لە شاری بێرشیبا لە باشووری ئیسرائیل پێکا. فریاکەوتنی ئیسرائیل برینداربوونی 7 کەسی راگەیاند.
دوایین پێشهاتەکانی ئەمڕۆ
وەزیرانی دەرەوە و دیپلۆماتانی ئەورووپا لەگەڵ عەباس عێراقچی، وەزیری دەرەوەی ئێران لە جنێڤی سویسرا کۆدەبنەوە. تەوەری کۆبوونەوەکە پرۆگرامی ئەتۆمیی ئێرانە.
ئێران ئەمڕۆ جارێکی دیکە گفتوگۆی لەگەڵ ئەمریکا رەتکردەوە. دەڵێن، دەبێت هێرشەکان بووەستن، ئەوکات گفتوگۆ دەکەن.
13:14
جنێڤ؛ وەزیری دەرەوەی بەریتانیا گەیشتە شوێنی کۆبوونەوەکە
جنێڤ؛ وەزیری دەرەوەی بەریتانیا گەیشتە شوێنی کۆبوونەوەکە
دەیڤد لامی، وەزیری دەرەوەی بەریتانیا گەیشتە شوێنی کۆبوونەوەی وڵاتەکەی و وڵاتانی یەکێتیی ئەورووپا لەگەڵ عەباس عێراقچی، وەزیری دەرەوەی ئێران.
کۆبوونەوەکە بۆ گفتوگۆ و دانوستاندنە لەبارەی جەنگی ئێران و ئیسرائیل کە زیاتر لە هەفتەیەکە بەردەوامە و دۆناڵد ترەمپ دوو هەفتە کاتی داوە بۆ دیپلۆماسی پێش ئەوەی بڕیار لەسەر ئەوە بدات کە بەشداریی جەنگەکە بکات یان نا.
13:07
بەشێک لە تێچووی ئیسرائیل لە بەرامبەر ئێران
سیستمی بەرگریی دژە مووشەکی ئێرۆ 3.
جەنگی ئێران و ئیسرائیل بەردەوامە. ئەمڕۆ هەشتەمین رۆژە هێرش دەکەنە سەر یەکدی. جگە لە تێکچوونی ژێرخانی هەردوو وڵاتەکە، زیانە گیانی و مادییەکانیشیان زۆرن.
لە پاڵ زیانەکانی دیکەی ئێران و ئیسرائیل، هێرشکردن و بەرپەرچدانەوەی هێرشەکانیش تێچوویەکی زۆری هەیە.
رۆژنامەی (Wall Street Journal)ـی ئەمریکی لە راپۆرتێکدا ئاماژە بە بەشێک لە تێچووی هێرش و بەرگریکردنی ئیسرائیل لە دەکات.
بەگوێرەی ئەو راپۆرتە ئیسرائیل بۆ چالاککردنی سیستمی دژە مووشەک، پارەیەکی خەیاڵی خەرج دەکات.
راپۆرتەکە تێچووی ئیسرائیلی بۆ چالاککردنی یەک جاری سیستمی دژە مووشەکی بەم جۆرەی خوارەوە پۆلێن کردووە.
دژە مووشەکەکان بۆ یەک جار چالاککردن:
دەیڤد سلینگ= 700،000 دۆلار
ئێرۆ 2= 3 ملیۆن دۆلار
ئێرۆ 3= 4 ملیۆن دۆلار
ئیسرائیل بۆ هێرشکردنە سەر ئێران زیاتر پشت بە فڕۆکەی F-35 ئەمریکی دەبەستێت.
دووری نێوان تەل ئەڤیڤ و تاران 983 میلە، فڕۆکەکەش بۆ هەزار میل پێویستی بە 10،000 دۆلار (یەک دەفتەر دۆلاری ئەمریکی) هەیە. واتە ئیسرائیل بۆ یەک هێرش بە فرۆکەی F-35، پێویستی بە 20 هەزار دۆلار زیاتر هەیە. ئەمە جگە لە تێچووی ئەو بۆمبانەی بەکاری دەهێنێت.
رۆژنامە ئەمریکییەکە ئاماژە بەوەش دەدات، ئەگەر جەنگەکە مانگێک بخایەنێت، نزیکەی 12 ملیار دۆلار لەسەر ئیسرائیل دەکەوێت.
12:46
هیچ سیستمێکی بەرگری بەرپەرچی بۆمبی ئەتۆمی دەداتەوە؟
هیچ سیستمێکی بەرگری بەرپەرچی بۆمبی ئەتۆمی دەداتەوە؟
لەکاتێکدا باسی جەنگە لەسەر چەکی ئەتۆمی، پرسیارێک دەکرێت کە هیچ سیستمێکی بەرگری هەیە بەرپەرچی بۆمبی ئەتۆمی بداتەوە؟
هەرچەندە تاوەکو ئێستا هیچ وڵاتێک سیستمێکی بەرگریی ئاسمانیی هێندە پێشکەوتووی نییە کە بەرپەرچی بۆمبی ئەتۆمی بداتەوە، بەڵام چەند سیستمێکی بەرگری هەن بە توانای جیاواز کە وا دیزاین کراون بەرپەرچی مووشەکی بالیستی و ئەو مووشەکانە بدەنەوە کە کڵاوەی ئەتۆمییان پێوەیە
سیستمەکان ئەمانەن: (GMD), Aegis BMD, THAAD ـی ئەمریکی، Arrowـی ئیسرائیلی و S-400/S-500ـی رووسی.
هەموو ئەو سیستمانەش گرەنتییان نییە کە بتوانن بەرپەرچی بۆمب و ئەو مووشەکانە بدەنەوە کە کڵاوەی ئەتۆمییان هەیە، ئەگەر کاریگەرییشیان هەبێت، ئەوا بە رێژەیەکی کەمە
@rudaw.official لەکاتێکدا باسی جەنگە لەسەر چەکی ئەتۆمی، پرسیارێک دەکرێت کە هیچ سیستمێکی بەرگری هەیە بەرپەرچی بۆمبی ئەتۆمی بداتەوە؟ هەرچەندە تاوەکو ئێستا هیچ وڵاتێک سیستمێکی بەرگریی ئاسمانیی هێندە پێشکەوتووی نییە کە بەرپەرچی بۆمبی ئەتۆمی بداتەوە، بەڵام چەند سیستمێکی بەرگری هەن بە توانای جیاواز کە وا دیزاین کراون بەرپەرچی مووشەکی بالیستی و ئەو مووشەکانە بدەنەوە کە کڵاوەی ئەتۆمییان پێوەیە سیستمەکان ئەمانەن: (GMD), Aegis BMD, THAAD ـی ئەمریکی، Arrowـی ئیسرائیلی و S-400/S-500ـی رووسی. هەموو ئەو سیستمانەش گرەنتییان نییە کە بتوانن بەرپەرچی بۆمب و ئەو مووشەکانە بدەنەوە کە کڵاوەی ئەتۆمییان هەیە، ئەگەر کاریگەرییشیان هەبێت، ئەوا بە رێژەیەکی کەمە
♬ original sound - Rudaw
12:30
وردەکاریی کۆبوونەوەی بەریتانیا و وڵاتانی ئەورووپی لە جنێڤ
وردەکاریی کۆبوونەوەی بەریتانیا و وڵاتانی ئەورووپی لە جنێڤ
زنار شینۆ، پەیامنێرمان لە جنێڤی سویسرایە و رووماڵی کۆبوونەوەی وڵاتانی یەکێتیی ئەورووپا و بەریتانیا لەگەڵ عەباس عێراقچی، وەزیری دەرەوەی ئێران دەکات. دەڵێت، زۆربەی وڵاتانی ئەورووپا هیچ هیوایەکیان بە کۆبوونەوەکە نییە.
پەیامنێری رووداو لەبەردەم نوێنەرایەتیی ئەڵمانیاوە قسەی کرد کە کۆبوونەوەکەی تێدا بەڕێوەدەچێت.
دەیڤد لامی، وەزیری دەرەوەی بەریتانیا لەگەڵ هاوتا ئەمریکییەکەی و نوێنەری ترەمپ بۆ رۆژهەڵاتی نێوەڕاست قسەی کردووە پێش ئەوەی بچێتە کۆبوونەوەکە. پەیامی ئەمریکا ئەوەیە، دەکرێت بە گفتوگۆ بگەنە رێککەوتن.
پەیامنێری رووداو دەڵێت: بەم دۆخەی ئێستاوە ئەگەر لایەنەکان سازش بۆ یەکدی نەکەن، "ئەو داواکارییانەی لە واشنتن هەن، ئەو چاوەڕوانییەی لەلای ئەورووپییەکان هەیە، ئەو هیوا گەورەیەی لە تەل ئەڤیڤ و ئەو بێهیواییەی لە تاران هەن، کە وڵاتانی ئەورووپا ناتوانن نێوەندگیرێکی سەرکەوتووبن، زەحمەتە لەو کۆبوونەوەیەدا بڕیاری ئاگربەست و وەستاندنی هێرشەکان بدرێت."
چوونی وڵاتانی ئەورووپا بۆ کۆبوونەوەکە، دوای دەستپێشخەریی سەرۆککۆماری فەرەنسا هات. وڵاتانی ئەورووپا نیگەرانن لە ئەگەری بەشداریکردنی ئەمریکا لە جەنگەکە کە راستەوخۆ کاریگەریی لەسەر بەرژەوەندییەکانی ئەو وڵاتانە و ئاشتی لە ناوچەکە دەبێت.
لەم هەفتەیەدا، عەباس عێراقچی و ستیڤ ویتکۆف، نوێنەری ترەمپ بە تەلەفۆن قسەیان کردووە و پەیامیان گۆڕیوەتەوە، بەڵام چاوەڕوان ناکرێت لە کۆبوونەوەکەدا لایەنی ئەمریکی بە فیزیکی بەشداربن.
11:34
ئیسرائیل دەڵێت، هێرشێکی دیکەی ئێرانیان بۆ سەر وڵاتەکەیان پووچەڵکردووەتەوە
سوپای ئیسرائیل دەڵێت، ئێران بەیانیی ئەمڕۆ پلانی هێرشێکی دیکەی بۆ سەر شاری بیرشیبا داناوە، بەڵام هێرشەکانیان پلانەکانی تارانی پووچەڵکردووتەوە.
سوپای ئیسرائیل دەڵێت، پێش ئەوەی هێرشە ئەنجام بدەن، "سێ سەکۆی سەرەکی مووشەکەکانیانمان بە ئامانج گرت."
دیمەنی هێرشەکەیان بۆ سەر سەکۆی مووشەکەکانی ئێران
11:24
بەهۆی هێرشەکەی بەیانیی ئەمڕۆی ئێران حەوت کەس لە ئیسرائیل برینداربوون
بەرپرسانی تەندروستی لە ئیسرائیل زانیاریی نوێیان راگەیاند و دەڵێن تاوەکو ئێستا حەوت کەس لە هێرشە مووشەکییەکەی ئێران بۆ سەر بئر سەبع لە بەرەبەیانی ئەمڕۆ بریندار بوون.
گوتەبێژێکی ناوەندی پزیشکیی سۆرۆکا دەڵێت، هەر حەوت کەسەکە بۆ چارەسەر گواستراونەتەوە نەخۆشخانەکان.
بەپێی گوتەبێژەکە، کەسەکان لە کاتی راکردن بۆ پەناگەکان و لە ئەنجامی کاریگەریی هێرشەکە برینداربوون.
11:09
عەلی شەمخانی دوای برینداربوونی: زیندووم و ئێران سەردەکەوێ
راوێژکاری رێبەری کۆماری ئیسلامیی ئێران کە لە هێرشەکەی 13ـی حوزەیرانی ئیسرائیلدا بە سەختی بریندار بوو، پەیامێکی بڵاوکردەوە کە تێیدا هاتووە: ''سەرکەوتن نزیکە و ناوی ئێران وەک هەمیشە لە مێژوودا دەدرەوشێتەوە.''
ئەمڕۆ هەینی 20-06-2025، عەلی شەمخانی، راوێژکاری سیاسیی عەلی خامنەیی، رێبەری کۆماری ئیسلامیی ئێران، یەکەم پەیامی خۆی لەدوای هێرشەکەی ئیسرائیل و برینداربوونی، بڵاوکردەوە و رایگەیاند، "سهرکهوتن نزیکه."
عەلی شەمخانی دەشڵێت: "ناوی ئێران وهک ههمیشه له مێژوودا دهدرهوشێتهوه.''
11:07
عەباس عێراقچی: لەسەر توانای مووشەکیمان گفتوگۆ ناکەین
عەباس عێراقچی: لەسەر توانای مووشەکیمان گفتوگۆ ناکەین
وەزیری دەرەوەی ئێران دەڵێت، بۆ دانوستاندن، تەنیا لەسەر بەرنامەی ئەتۆمی گفتوگۆ دەکەن، دەشڵێت، ''بە هیچ شێوەیەک لەسەر توانای مووشەکیمان لەگەڵ هیچ کەسێک گفتوگۆ ناکەین.''
ئەمڕۆ هەینی 20-06-2025، عەباس عێراقچی، وەزیری دەرەوەی ئێران لەبارەی مژاری گفتوگۆ لەگەڵ وەزیرانی دەرەوەی بەریتانیا، ئەڵمانیا و فەرەنسا لە ژنێڤ بە میدیای وڵاتەکەی راگەیاند، ''بابەتی گفتوگۆی ئێمە تەنیا بەرنامەی ئەتۆمی و پرسەکانی ناوچەکە دەبێت.''
بەگوتەی عەباس عێراقچی، ئێران لەبارەی توانای مووشەکییەوە، ''بە هیچ شێوەیەک هیچ گفتوگۆیەک لەگەڵ هیچ کەسێک ناکات. ئێستا گومانێک نییە کە توانای مووشەکیی ئێران، توانایەکی بەرچاوی بەرگرییە لە وڵات.''
وەزیری دەرەوەی ئێران جەختی لەوە کردەوە، ''هیچ کات مووشەکەکانی ئێمە بۆ هێرشکردنە سەر هیچ وڵاتێک نەبوون، بەڵکو بۆ بەرگریکردن لە خۆمانە. ئێستا ئەوە مووشەکانمانن کە بەرگری لە وڵات دەکەن، بۆیە گفتوگۆکردن لەبارەی توانای مووشەکی لە ئەجێندای کارماندا نییە.''
10:54
عەزیز وەیسی روونکردنەوە لەبارەی دەنگۆی دەستگیرکردنی دەدات
روونکردنەوەکەی عەزیز وەیسی
هونەرمەندی بەنێوبانگی کورد عەزیز وەیسی دەڵێت، دەستگیر نەکراوە و سەلامەتە، ئەو دەنگۆیەی کە بڵاویشبووەتەوە، دەگەڕێتەوە بۆ ساڵی 2022 لەکاتی "شۆڕشی ژینا ئەمینی."
ئەو هونەرمەندە داوا لە هەموو لایەکیش دەکات، پێش بڵاوکردنەوەی هەواڵەکان، پشتڕاستکردنەوەی تەواو بکەن.
عەزیز وەیسی لەکاتی چوونی بۆ هەرێمی کوردستان لە دەروازەی سنووریی شووشمێوە لە سنووری هەڵەبجە، قسەی بۆ سازگار سەڵاح، پەیامنێری رووداو کرد. لەبارەی دۆخی خەڵکیش لە رۆژهەڵاتی کوردستان و ئێران لەم کاتی جەنگە گوتی، "دۆخەکە زۆر خراپە، منداڵەکانم لە بەیانی تاوەکو نیوەڕۆ نۆرەیان گرتووە 5 نانیان بەرکەوتووە، ئەگەر وابڕوات خەڵک تیادەچێت."
10:01
لایەنەکان گفتوگۆ دەکەن، بەڵام هیچ ئاماژەیەک بۆ کەمبوونەوەی هێرشەکانی ئێران و ئیسرائیل نییە
پاشماوەی بۆردوومانی ئیسرائیل لە تاران
دۆناڵد ترەمپ، سەرۆکی ئەمریکا رایگەیاند کە دوو هەفتە مۆڵەت دەدات بۆ گفتوگۆ و دیپلۆماسی، پێش ئەوەی بڕیار بدات ئاخۆ هێرش بکاتە سەر ئێران یان نا.
بەگوێرەی بەرپرسانی ئەمریکی، ئومێدی ترەمپ و راوێژکارانی ئەوەیە ئێران لە هەڵوێستە تووندەکەی پاشگەز ببێتەوە و رازی بێت بەو مەرجانەی پێشتر رەتیکردبوونەوە، لەوانەش وازهێنان لە پیتاندنی یۆرانیۆم.
لە هەفتەی رابردوودا کە جەنگ دەستیپێکردووە، پەیامی بەردەوامی ئێران بۆ ئەمریکا ئەوە بووە کە ناکەونە هیچ گفتوگۆیەکی زیاتر لەگەڵ ئەمریکا تاوەکو هێرشەکانی ئیسرائیل کۆتاییان نەیێت.
بە گوتەی چەند سەرچاوەیەک کە قسەیان بۆ میدیای ئەمریکی کردووە، ئەمریکا تائێستا گوشاری نەکردووەتە سەر ئیسرائیل بۆ راگرتنی هێرشەکانی.
ئەمەش نوێترین زانیارییەکانە تاوەکو بەیانیی هەینی:
هێرشی ئێران:
بەرەبەیانی ئەمڕۆ شاری بئر سەبع لە ئیسرائیل بەر هێرشێکی دیکەی مووشەکیی ئێران کەوت. ئەو شوێنەی کرابووە ئامانج نزیک پارکێکی تەکنەلۆجییە کە ئۆفیسێکی کۆمپانیای مایکرۆسۆفتی تێدایە.
بەهۆی بۆردوومانەکە، ئاگر لە شوێنەکە کەوتەوە و تیمە فریاگوزارییەکان سەرقاڵی کۆنترۆڵکردنی بوون. بەپێی زانیاریی سەرەتایی بە لایەنی کەم 18 کەس برینداربوون لەو هێرشانەی ئێران.
شارەکە دەکەوێتە بیابانی نەقەب، کە بنکەی ئاسمانیی نەڤاتیمی ئیسرائیلی لێیە.
نوێترین هێرشی ئیسرائیل:
سوپای ئیسرائیل رایگەیاند، شەوی رابردوو دەیان ئامانجی سەربازی لە ئێران پێکاوە، لەوانەش شوێنەکانی بەرهەمهێنانی مووشەک و دامەزراوەیەکی توێژینەوەی ئەتۆمی لە تاران.
لەنێو ئەو ئامانجانەی سوپای ئیسرائیل دەڵێت پێکاوێتی، بارەگای سەرەکیی پرۆگرامی SPND بووە، کە ئاژانسێکی توێژینەوە و پەرەپێدانی بەرگرییە.
کۆبوونەوەی لایەنەکان:
وەزیرانی دەرەوەی فەرەنسا و ئەڵمانیا، هەروەها نوێنەری باڵای یەکێتیی ئەورووپا، کایا کالاس، ئەمڕۆ لە جنێڤی سویسرا بەشداری کۆبوونەوەیەک دەکەن لەگەڵ عەباس عێراقچی، وەزیری دەرەوەی ئێران. وەزیری دەرەوەی بەریتانیا دەیڤد لامی دەڵێت، "ئێستا دەرفەتێک هەیە" بۆ کۆتاییهێنان بە قەیرانە پەرەسەندووەکەی رۆژهەڵاتی نێوەڕاست.
09:52
مانگی سووری ئێران: هێرشەکانی ئیسرائیل زیانیان بە پێنج نەخۆشخانە گەیاندووە
ئیسرائیل باڵەخانەیەکی لە ئێران کردووەتە ئامانج و دووکەڵی لێ بەرزدەبێتەوە.
بەرپرسی مانگی سووری ئێران دەڵێت، تاوەکو ئێستا لەلایەن ئیسرائیلەوە هێرشکراوەتە سەر دەوروبەری 5 نەخۆشخانەی وڵاتەکەی کە زیانی زۆری لێکەوتووەتەوە.
یەعقووب سولەیمانی، بەرپرسی مانگی سووری ئێران بە میدیایی فەرمیی وڵاتەکەی راگەیاند، لە سەرەتای جەنگەوە، ئیسرائیل هێرشی کردووەتەوە سەر دەوروبەری 5 نەخۆشخانە، ''ئەگەرچی بە شێوەی راستەوخۆ هێرشەکە بۆ سەر نەخۆشخانەکان نەبووە، بەڵام بۆردوومانکردنی دەوروبەریان بووەتە هۆی شکانی شووشەکان.
بەگوتەی یەعقووب سولەیمانی، دووکەڵی بۆردوومانەکانیش، زیانی بە نەخۆشان گەیاندووە، هەروەها تووشی دڵەڕاوکێی زۆر بوون.
09:47
گوتەبێژی پۆلیسی ئێران: ژمارەی بازگەکان زیاد دەکرێن
پاشماوەی بۆردوومانی ئیسرائیل لە ناوچەی شەهرانی تاران. وێنە: AFP
گوتەبێژی پۆلیسی ئێران پشتڕاستی کردەوە کە ژمارەی بازگەکان و خاڵەکانی پشکنین لە ئێران و رۆژهەڵاتی کوردستان زیاد کراون و دەڵێت، مەبەست لە هەنگاوەکە ''بەرەنگاربوونەوەی دز و هەلپەرستان''ـە.
ئەمڕۆ هەینی 20-06-2025، سەعید مونتەزیرمەهدی، گوتەبێژی پۆلیسی ئێران رایگەیاند، بە مەبەستی چاودێری و پاراستنی زیاتری ئاسایشی وڵات، ژمارەی بازگەکان و خاڵەکانی پشکنین زیادکراون.
بەگوتەی سەعید مونتەزیرمەهدی، بڕیارەکە بۆ ''بەرەنگاربوونەوەی جیدی دز و هەلپەرستان''ـە لە دۆخی ئێستادا کە وڵاتەکە لە جەنگدایە.
09:32
وەزیرى بەرگریى عێراق: لە مانگەکانى داهاتوو یەکەم کاروانى سیستمى بەرگریى ئاسمانیی کۆریا دەگات
وەزیرى بەرگریى عێراق: لە مانگەکانى داهاتوو یەکەم کاروانى سیستمى بەرگریى ئاسمانیی کۆریا دەگات
لە چوارچێوەی کاردانەوە ناوخۆییەکانی جەنگەکە، بەیانیی ئەمڕۆ هەینی سابت عەباسی، وەزیرى بەرگریى عێراق راگەیێندراوێکى لەبارەى تواناى بەرگری و رێکارەکانیان بۆ بەهێزکردنى بڵاوکردەوە.
وەزیرى بەرگریى عێراق رایدەگەیێنێت، گرێبەستێکیان لەگەڵ کۆمپانیایەکى کۆریاى باشوور واژۆ کردووە بۆ کڕینى سیستمى بەرگریى ئاسمانى و لە چەند مانگى داهاتوودا یەکەم کاروانى ئەو سیستمە دەگاتە عێراق.
عەباسی دەڵێت، "لە چوارچێوەی پابەندبوونمان بە پەرەپێدانی تواناکانی سوپای عێراق و بەهێزکردنی بۆ پاراستنی سەروەریی نیشتمانی، لەوەتەی ئەرکەکانمان لە وەزارەتی بەرگری وەرگرتووە، دەستمان بە داڕشتنی پلانێکی ستراتیژیی گشتگیر کردووە کە ئامانج لێی پاراستنی ئاسمانی عێراقە لە رێگەی پەرەپێدانی سیستمی بەرگریی ئاسمانییەوە".
لە راگەیێنراوەکەدا هاتووە کە لە پارەوە دەستیان بە گرتنەبەری رێکاری کردەیی و راستەوخۆ کردووە، دیارترینیان واژۆکردنی رێککەوتنێکی ستراتیژیی بووە لەگەڵ کۆمپانیای LIG Nex1ی کۆریاى باشوور کە سەر بە وەزارەتی بەرگریی ئەو وڵاتەیە و تایبەتە بە بواری پیشەسازیی بەرگری.
ئامانج لەو رێککەوتنە، پڕچەککردنی عێراقە بە سیستمێکی بەرگریی ئاسمانیی پێشکەوتوو و مۆدێرن کە توانای رووبەڕووبوونەوەی کارا و کاریگەری هەڕەشە ئاسمانییەکانی هەبێت.
وەزیری بەرگریی عێراق دەڵێت، "بڕیارە لە مانگەکانی داهاتوودا یەکەم کاروانی ئەو سیستمە وەربگرین، بەپێی خشتەیەکی کاتیی ورد کە رەچاوی کارى لە پێشینە و پێداویستییەکانی هێزە چەکدارەکانمان دەکات، هەروەها بەم دواییانە یەکەم کاروانی فڕۆکەی فرەئەرکی فەرەنسی لە جۆری کاراکاڵمان وەرگرتووە و کاروانەکانی دیکەش لە ماوەی داهاتوودا بەدوای یەکدا دەگەن."
گرێبەستى عێراق لەگەڵ کۆمپانیا کۆرییەکە بە بەهاى 2.78 ملیار دۆلارە و سیستمى چیۆنگونگى لێ دەکڕێت کە بە ئێم –سام 2 ناسراوە، مووشەکە بەرگرییەکانى بۆ مەودواى مامناوەندن.
08:59
هۆشدارییەک لە وەزیری بەرگریی ئیسرائیلەوە بۆ ئەمینداری حیزبوڵڵا
هۆشدارییەک لە وەزیری بەرگریی ئیسرائیلەوە بۆ ئەمینداری حیزبوڵڵا
ئیسرائیل کاتز، وەزیری بەرگریی ئیسرائیل رایدەگەیێنێت، "وادیارە ئەمینداری گشتیی حزبوڵڵا وانە لە پێشینەکانی وەرناگرێت و هەڕەشەی ئەوە دەکات کە دژی ئیسرائیل بجوڵێتەوە" بەگوێرەی رێنوێنییەکانی عەلی خامنەیی.
وەزیرە ئیسرائیلییەکە ئەوەشی گوتووە، "پێشنیاز بۆ بریکارە لوبنانییەکە دەکەم وریابێت و تێبگات کە ئیسرائیل ئارامی نەماوە بەرامبەر ئەو تیرۆریستانەی هەڕەشەی لێدەکەن. ئەگەر تیرۆر هەبێت، ئەوا حیزبوڵڵا نامێنێت."
08:54
نزیکەی 10 هەزار بیانی ئێران و ئیسرائیلیان جێهێشتووە یان بە نیازی جێهێشتنین
پۆرتوگالییەکان لە میسرەوە دەگەڕێنەوە وڵاتەکەیان. وێنە: AFP
جەنگی ئیسرائیل و ئێران هێرشەکانی هەردوولا بۆ سەر یەکدی بەردەوامن. تاوەکو ئێستا ئەمریکا، ئوستراڵیا، چین و دەیان وڵاتی دیکە هۆشدارییان بە هاووڵاتییانیان داوە سەردانی ئەو دوو وڵاتە نەکەن و ئەوانەی لەوێشن ئەو دوو وڵاتە و رۆژهەڵاتی نێوەڕاست جێبێڵن.
بەرپرسانی ئوستراڵیا دەڵێن، بەهۆی جەنگەوە هۆشدارییان بە هاووڵاتییانیان داوە سەردانی ئێران و ئیسرائیل نەکەن. ئاماژە بەوەش دەکەن، نزیکەی هەزار و 500 ئوستراڵی لە ئێران و هەزار و 200ـی دیکەش لە ئیسرائیل دەژین و سەرقاڵی بردنەدەرەوەیان لەو دوو وڵاتە.
بە گوێرەی وەزارەتی دەرەوەی چین، بە هەمان هۆکاری سەرەوە لە زووترین کاتدا هاووڵاتییانیان لە ئێران و ئیسرائیل دەبەنە دەرەوە. بە وەزارەتەکە دەڵێت، نزیکەی هەزار و 600 هاووڵاتییان لە ئیسرائیل و سەدانی دیکەش لە ئیسرائیل دەژین.
بەرپرسانی پەکین دەڵێن، پێشنیازیان بۆ هاووڵاتییانیان کردووە بە رێگەی وشکانی و هەریەک لە وڵاتانی ئازەربایجان، تورکمانستان، تورکیا، ئەرمینیا و عێراقەوە ئەو دوو وڵاتە جێبێڵن.
حکومەتی هیندستانیش بڵاویکردەوە، نزیکەی 110 قوتابی وڵاتەکەیان بە رێگەی ئەرمینیاوە گەڕاندووەتەوە. هەروەها، نزیکەی 30 هەزار کەسیشیان لە هیندستان دەژین و نیازیان هەیە ئەوانەی دەیانەوێت ئەو وڵاتە جێبێڵن، بیانبەنە دەرەوە.
07:21
ئیسرائیل دەڵێت، شەوی رابردوو ژمارەیەک ناوەندی توێژینەوە ئەتۆمیی ئێرانیان کردووەتە ئامانج
بنکەیەکی ئەتۆمی لە شاری ئاراک. وێنە: مانگی دەستکردی Maxsar
سوپای ئیسرائیل دەڵێت، شەوی رابردوو هێزی ئاسمانیی وڵاتەکە ژمارەیەک ناوەندی توێژینەوەی ئەتۆمی و بنکەی سەربازیی ئێرانیان بە ئامانج گرتووە.
سوپای وڵاتەکە دەڵێت، لە هێرشەکەدا چەند بنکەیەکی بەرهەمهێنانی مووشەکیان بە ئامانج گرتووە کە وەکو بنکەی پیشەسازی سەرەکی وەزارەتی بەرگریی ئێران بەکارهاتووە.
لە هێرشەکەدا 60 فڕۆکەی جەنگی بەشدارییان کردووە و 120 تەقەمەنییان فڕێداوە، ئەمە بەگوێرەی سوپای وڵاتەکە.
07:11
زیانی هێرشەکەی ئەم بەیانییەی ئێران بۆ سەر ئیسرائیل
دیمەنی بەشێک لە زیانەکانی هێرشی ئەم بەیانییەی ئێران بۆ سەر ئیسرائیل
کەناڵ 12 ئیسرائیلی لە زاری بەرپرسانی دەستەی فریاگوزاریی ئیسرائیلەوە دەڵێت: بەهۆی هێرشەکەی ئەم بەیانییەی ئێرانەوە، 5 ئیسرائیلی بریندار بوون و نزیکەی 30 کەسی دیکەش بارودۆخی دەروونیان تێکچووە و "تووشی شۆک بوون."
06:22
ئێران هێرشێکی نوێی مووشەکی بۆ سەر ئیسرائیل دەستپێکرد
رووداو
ئێران بە چەندین 'مووشەکی بالیستی' هێرشی کردە سەر شاری بێرشیبا لە باشووری ئیسرائیل و یەکێک لە مووشەکەکانی بە باڵەخانەیەک کەوتووەتەوە، بەپێی ئەو ڤیدیۆیانەی لە تۆڕە کۆمەڵایەتییەکان بڵاوکراوەتەوە، ئاگر کەوتووەتەوە و دووکەڵێکی زۆر بەرز دەبێتەوە
تاوەکو ئێستا ئیسرائیل باسی لە زیانەکان نەکردووە.
05:55
سوپای ئیسرائیل: ئێران ژمارەیەک مووشەکی ئاراستەی وڵات کرد
رووداو
سوپای ئیسرائیل رایگەیاندووە، خۆیان ئامادە دەکەن بۆ بەرپەرچدانەوەی ژمارەیەک مووشەک کە لە ئێرانەوە ئاراستە کراون و زەنگی ئاگادارکردنەوە لێدراوە.
05:39
زیلینسکی: رووسیا هەوڵدەدات بەرنامە ئەتۆمییەکەی ئێران رزگار بکات
ڤۆلۆدیمێر زیلینسکی
سەرۆکی ئۆکراینا هەڵوێستی رووسیای لە بەرگریکردن لە ئێران بە "کارێکی بێشەرمانە" ناوبرد و جەختی کردەوە، ئەمە نیشانەی لاوازیی گوشارە جیهانییەکانە و داوای هەنگاوی تووندتر و یەکگرتوویی دژی مۆسکۆ دەکات.
رۆژی پێنجشەممە، 19ـی حوزەیرانی 2025، ڤۆلۆدیمێر زیلینسکی، سەرۆکی ئۆکراینا لە گرتە ڤیدیۆیەکدا گوتی، بەکارهێنانی درۆنە ئێرانییەکانی جۆری شاهید و تەقەمەنیی کۆریای باکوور لەلایەن رووسیاوە، بەڵگەیە لەسەر ئەوەی کە هاوپەیمانەکانی کیێڤ گوشاری پێویستیان نەخستووەتە سەر مۆسکۆ.
سەرۆکی رووسیا ئاماژەی بەوەش کرد، "ئێستا رووسیا هەوڵدەدات بەرنامە ئەتۆمییەکەی ئێران رزگار بکات. هیچ روونکردنەوەیەکی دیکەی گونجاو نییە بۆ ئاماژە ئاشکراکان و چالاکییە نهێنییەکانیان لەمبارەیەوە."
زیلینسکی پێی وایە بە بێهێزبوونی ئێران، رووسیاش لاواز دەبێت و گوتی، "کاتێک یەکێک لە هاوکارەکانیان توانای هەناردەکردنی جەنگی لەدەستدەدات، رووسیا لاواز دەبێت و هەوڵی دەستوەردان دەدات. ئەمە زۆر بێشەرمانەیە و چەندینجار دەیسەلمێنێتەوە کە نابێت رێگە بدرێت رژێمە شەڕانگێزەکان یەکبگرن و ببنە هاوبەش."
وەکو ئەو باسی دەکات، کاتێک رووسیا چەک لە تاران و پیۆنگیانگەوە هاوردە دەکات، "ئەوە ئاماژەیەکی روونە کە هاوسۆزیی جیهان و گوشاری جیهانی بەپێی پێویست بەهێز نین."
04:49
ئێران بۆ ترەمپ: خۆت تێکەڵی شەڕێک مەکە، هی تۆ نییە
جێگری وەزیری دەرەوەی ئێران
جێگری وەزیری دەرەوەی ئێران بە کەناڵی بی بی سی راگەیاندووە، بەشداریکردنی ئەمریکا لە هێرشەکانی ئیسرائیلدا "دۆزەخێک بۆ تەواوی ناوچەکە" دروست دەکات.
سەعید خەتیبزادە لەبارەی بەشداریکردنی ئەمریکا لە جەنگەکە دەڵێت، ئەمە "شەڕی ئەمریکا نییە" و ئەگەر دۆناڵد ترەمپ، سەرۆکی ئەمریکا، دەستوەردان بکات، هەمیشە وەکو سەرۆکێک دەمێنێتەوە کە " چووەتە ناو شەڕێکەوە کە هی ئەو نییە".
جێگری وەزیری دەرەوەی ئێران ئاماژەی بەوەش کردووە، دەستوەردانی ئەمریکا ململانێکە دەگۆڕێت بۆ "زەلکاوێک"، دەبێتە هۆی بەردەوامیی دەستدرێژی و کۆتاییهێنان بە "تاوانە دڕندانەکان" دوادەخات.
03:03
پەیامێکی تووند لە رووسیاوە لەبارەی ئەگەری 'کوشتنی عەلی خامنەیی'
رووداو
دیمتری پیسکۆڤ، گوتەبێژی کرێملین لە چاوپێکەوتنێکدا لەگەڵ کەناڵی سکای نیوز لەبارەی هەڵوێستی وڵاتەکەی لەبەرامبەر ئەگەری بە ئامانجگرتنی رێبەری کۆماری ئیسلامیی ئێران رایگەیاند: "ئەگەر عەلی خامنەیی بکوژرێت وەڵامێکی نەرێنیمان دەبێت."
02:58
سەرۆکی ئیسرائیل: گۆڕینی رژێمی ئێران ئامانجی ئێمە نییە
یسحاق هێرزۆگ، سەرۆکی ئیسرائیل
سەرۆکی ئیسرائیل رایگەیاند، لە هێرشەکانیاندا بۆ سەر ئێران راستەوخۆ عەلی خامنەیی ناکەنە ئامانج، بەڵام ئاماژەی بەوەش کرد، دوورخستنەوەی رێبەری باڵا لە کۆتاییدا سوودی بۆ گەلی ئێران دەبێت.
رۆژی پێنجشەممە، 19ـی حوزەیرانی 2025، یسحاق هێرزۆگ، سەرۆکی ئیسرائیل گوتی: "ئامانجی ئێمە خامنەیی و گۆڕینی رژێم نییە.. بەڵام دەکرێت ئەمە ببێتە کاریگەرییەکی لاوەکیی روونی دەرەنجامە مێژووییە گەورەکان کە سوودی بۆ گەلی ئێران هەبێت."
سەرۆکی ئیسرائیل هەروەها جەختی لەوە کردەوە کە ئامانجی سەرەکیی ئیسرائیل چڕبووەتەوە لەسەر لەناوبردنی بەرنامە ئەتۆمی و مووشەکییەکانی ئێران، کە بە گوتەی ئەو هەڕەشەیە بۆ سەر ئاسایشی جیهان.
هێرزۆگ گوتی: "ئێمە مامەڵە لەگەڵ بەرنامە ئەتۆمییەکەی ئێران دەکەین، کە دێوەزمەیەکی هەشتپێ ئاسایە و چەندین لایەنی هەیە، و پێویستە تواناکانیان لاببەین و سنوورداریان بکەین."
لەبارەی ئەگەری بەشداریکردنی ئەمریکا لە ململانێکەدا، هێرزۆگ گوتی: "ئێمە رێز لە سەرۆک ترەمپ دەگرین، پێمانوایە سەرۆک ترەمپ دانایی، توانا و تێگەیشتنێکی روونی لەبارەی دۆخەکە هەیە. پێموایە ئەمە دەرفەتێکی دەگمەنە بۆ لابردنی هەڕەشەیەک کە ماوەیەکی زۆرە سێبەری بەسەر جیهاندا دروست کردووە."
سەرۆکی ئیسرائیل هەروەها "ستایشی" پشتیوانیی فرێدریش مێرتس، راوێژکاری ئەڵمانیای کرد، کە رۆژی سێشەممە ستایشی ئیسرائیلی کردبوو بۆ ئەنجامدانی "کارە قێزەونەکە" لەبری رۆژئاوا.
هێرزۆگ لەوبارەیەوە گوتی: "من ستایشی فرێدریش دەکەم بۆ دەنگی راشکاوی، چونکە ئەو راستییەکە دەڵێت. ئێمە بەرگری لە ئەورووپا دەکەین. ئێمە بەرگری لە ویلایەتە یەکگرتووەکان دەکەین."
هێرزۆگ گوتی، ئیسرائیل هەمیشە دەرگای بۆ دیپلۆماسی کراوە بووە: "دیپلۆماسی هەمیشە دەتوانێت بەشێک بێت لە چارەسەر. ئێمە هەرگیز نەمانگوتووە نەخێر."
کاتێک پرسیاری لێکرا چی روودەدات ئەگەر ئەمریکا بڕیار بدات دەستێوەردان نەکات، سەرۆکی ئیسرائیل گوتی: "ئێمە دەزانین چی بکەین. نیشانمان داوە کە دەزانین چی بکەین."
02:23
وەزیری دەرەوەی بەریتانیا لە ئەمریکاوە: دەرفەتێکی دیپلۆماسی لەگەڵ ئێران هەیە
وەزیری دەرەوەی بەریتانیا
وەزیری دەرەوەی بەریتانیا دوای گفتوگۆکانی لە کۆشکی سپی لەگەڵ مارکۆ رووبیۆ، وەزیری دەرەوەی ئەمریکا، رایگەیاند کە "هێشتا کات ماوە بۆ گەیشتن بە چارەسەرێکی دیپلۆماسی لەگەڵ ئێران لەسەر بەرنامە ئەتۆمییەکەی."
لامی لە واشنتن لەگەڵ رووبیۆ و ستیڤ ویتکۆف، نێردەی تایبەتی ئەمریکا، کۆبووەوە، ئەوەش رۆژێک پێش ئەوەی بڕیار بێت لەگەڵ هاوتا فەرەنسی و ئەڵمانییەکەی بگاتە جنێڤ بۆ گفتوگۆکردن لەگەڵ عەباس عێراقچی، وەزیری دەرەوەی ئێران.
لامی لە راگەیێندراوێکدا کە باڵیۆزخانەی بەریتانیا لە واشنتن بڵاویکردووەتەوە، گوتی: "دۆخی رۆژهەڵاتی ناوەڕاست هێشتا مەترسیدارە. ئێمە سوورین لەسەر ئەوەی کە ئێران نابێت هەرگیز چەکی ئەتۆمی هەبێت."
لامی گوتیشی: "ئێمە گفتوگۆمان لەبارەی ئەوە کرد کە چۆن ئێران دەبێت رێککەوتنێک بکات بۆ خۆلادان لە قووڵبوونەوەی ململانێکان. ئێستا لە ماوەی دوو هەفتەی داهاتوودا دەرفەتێک رەخساوە بۆ گەیشتن بە چارەسەرێکی دیپلۆماسی."
"سبەی، من شانبەشانی هاوتا فەرەنسی، ئەڵمانی و هاوتا ئەورووپییەکانم بەرەو جنێڤ بەڕێدەکەوم بۆ کۆبوونەوە لەگەڵ وەزیری دەرەوەی ئێران. ئێستا کاتی ئەوەیە کۆتایی بە دیمەنە مەترسیدارەکانی رۆژهەڵاتی ناوەڕاست بهێنرێت و رێگری لە پەرەسەندنێکی هەرێمی بکرێت کە سوودی بۆ هیچ کەسێک نابێت." وەزیری دەرەوەی بەریتانیا وای گوت.
01:41
میدیای ئەمریکی: FBI چاودێریکردنی سوپای پاسداران چڕتر دەکاتەوە
کەناڵی سی بی ئێس ـی ئەمریکی لە زاری چەند سەرچاوەیەکەوە باس لەوە دەکات کە ئێف بی ئای (نووسینگەی لێکۆڵینەوەی فیدراڵیی ئەمریکا) چاودێریکردنی ئامانجەکانی سوپای پاسدارانی ئێرانی چڕتر کردوونەتەوە
01:33
راگرتنی گەشتە ئاسمانییەکان لە ئێران درێژکرایەوە
رێکخراوی فڕۆکەوانی مەدەنیی ئێران دەڵێت: سەرجەم گەشتەکان هەڵدەوەشێندرێنەوە و گەشتە ئاسمانییەکان رادەگیرێن تاوەکو هەینی کاژێر 14:00.
00:40
سوپای ئیسرائیل داوای چۆڵکردنی ناوچەیەکی پیشەسازیی تاران دەکات
رووداو
سوپای ئیسرائیل لەسەر نەخشە ناوچەی پیشەسازیی سفیدروود لە نزیکی گوندی کڵاش تاڵەشان لە تاران دیاریکردووە و داوا لە دانیشتووانی ئەو ناوچەیە دەکات کە چۆڵی بکەن.
سوپای ئیسرائیل باسی لەوەکردووە کە ئەو ناوچەیە ژێرخانی سەربازیی ئێرانە و دەیکەنە ئامانج
22:45
وەزارەتی گەیاندنی ئێران: پچڕانی ئینتەرنێت بەردەوام دەبێت
وەزارەتی گەیاندنی ئێران باسی پچڕانی تەواوەتیی ئینتەرنێتی لە وڵاتەکەدا کرد و لە بەیاننامەیەکیدا کە ئاژانسی هەواڵی تەسنیمی سەر بە سوپای پاسداران بڵاویکردووەتەوە، تێیدا هاتووە، دەستڕاگەیشتن بە ئینتەرنێت دوای هێرشی ئەلیکترۆنیی بەرفراوان سنووردارکراوە.
بە گوتەی وەزارەتەکە، لەم رۆژانەی سەرەتای جەنگەکە، بانکێکی حکومی و بانکێکی تایبەت هاککراوە، هەروەها ئاڵوگۆڕی دراوی ئەلیکترۆنی روویداوە، کە نزیکەی 100 ملیۆن دۆلار لە سەروەت و سامانیان بەهۆی هاککەرەکانەوە لەدەستداوە.
وەزارەتەکە پچڕانی ئینتەرنێتەکەی وەک ئامرازێکی بەرگری لەو هاککردنە ناوبردووە و رایگەیاندووە، تووندیی هێرشە ئەلیکترۆنییەکان دوای ئەوەی رۆژی چوارشەممە دەستڕاگەیشتن بە ئینتەرنێت پچڕێندرابوو، کەمیکردبوو.
بۆیە ئەو وەزارەتە دەڵێت، پچڕانی ئینتەرنێت بەردەوام دەبێت.
22:35
ئیسرائیل هێرشیکردە سەر تاران و باکووری ئێران
ئیسرائیل هێرشیکردە سەر تاران و باکووری ئێران
میدیای ئێران دەڵێت، بەرگریی ئاسمانی لە تاران و گوڵستان لە باکووری ئێران دژی "هێرشەکانی دووژمن" چالاکن. هەروەها لە ورمێش هێرشی ئیسرائیل هەبووە.
میدیای ئێران ڤیدیۆیشی بڵاوکردووەتەوە کە بەرپەرچدانەوەی تەنەکان لە ئاسمان دەبیندرێن.
21:39
حیزبوڵڵای عێراق: ئەمریکا بچێتە جەنگەکەوە، بنکەکانیان دەبنە شوێنی راوکردنی مراوی
حیزبوڵڵای عێراق: ئەمریکا بچێتە جەنگەکەوە، بنکەکانیان دەبنە شوێنی راوکردنی مراوی
بەرپرسی ئەمنیی کەتائیبی حیزبوڵڵای عێراق لە پۆستێکیدا دەڵێت، ئەگەر ئەمریکا بچێتە نێو ئەم جەنگەوە، ئەوا دۆناڵد ترەمپ، "سەرجەم ئەو تریلیۆن دۆلارانە لەدەست دەدات، کە لە خەونەکانی بۆ دەستبەسەرداگرتنی لەم ناوچەیە دەیبینێت؛ پلان بۆ ئەو مەبەستە دانراوە."
لەبارەی ئەگەری بەشداریکردنی ئەمریکا لە جەنگی ئیسرائیل دژ بە ئێران، ئەبو عەلی عەسکەری، بەرپرسی ئەمنیی کەتائیبی حیزبوڵڵای عێراق دەڵێت، "بنکە ئەمریکییەکان کە لە سەرانسەری ناوچەکەدان، دەبنە گۆڕەپانی راوکردنی مراوی."
ئەو بەرپرسەی کەتائیبی حیزبوڵڵای عێراق رایگەیاندووە، "گەرووی هورمز و بابولمەندەب دادەخرێن و بەندەرەکانی نەوتی سەر دەریای سووریش کارەکانیان رادەگرن، باسی ئەو هەژەندە چاوەڕوان نەکراوانەش ناکەم، کە رەنگە فڕۆکەکانیان لە ئاسماندا تووشی ببن."
کەتائیبی حیزبوڵڵاى عێراقى یەکێکە لە پێکهێنەرانى ئەو گرووپەی خۆیان بە موقاوەمەى ئیسلامى لە عێراق دەناسێنن و نزیکن لە ئێرانەوە.
21:25
کۆشکی سپی: ئێران دەتوانێت لە ماوەی دوو هەفتەدا بۆمبی ئەتۆمی دروست بکات
گوتەبێژی کۆشکی سپی
کۆشکی سپی دەڵێت، ئێران دەتوانێت " بە دوو هەفتە" بۆمبی ئەتۆمی دروست بکات، لە کاتێکدا دۆناڵد ترەمپ، سەرۆکی ئەمریکا لە راوێژدایە بۆ ئەوەی بڕیار لەسەر بەشداربوون لە جەنگی ئیسرائیل دژی ئێران بدات.
کارۆلاین لێڤیت، سکرتێری رۆژنامەڤانیی کۆشکی سپی، رۆژی پێنجشەممە بە رۆژنامەڤانانی راگەیاند: "ئێران هەموو ئەو شتانەی هەیە کە بۆ بەدەستهێنانی بۆمبی ئەتۆمی پێویستن. تاکە شت پێویستیان بێت، بڕیاری [عەلی خامنەیی] رێبەری باڵایە بۆ ئەوەی ئەو کارە بکەن. ئەو کات تەنیا دوو هەفتەیان پێویست دەبێت بۆ ئەوەی بەرهەمهێنانی ئەو چەکە تەواو بکەن."
21:21
بیرکردنەوەی واشنتن لەبارەی شەڕ لەگەڵ ئێران
بیرکردنەوەی واشنتن لەبارەی شەڕ لەگەڵ ئێران
تاوەکو ئێستا دۆناڵد ترەمپ بڕیاری کۆتایی نەداوە بەشداری لە شەڕی ئێران بکات یان نا، بیریان لە بژاردەی سەربازی کردووەتەوە و هەڵسەنگاندنیان بۆ بژاردە سەربازییەکانیش کردووە، تەنیا ئەوە ماوە بڵێت، "دەستپێبکەن"، بەڵام دەیانەوێت تاوەکو دوایین خولەک دەرفەت بدەنە دیپلۆماسی و رێککەوتن. لە دوایین لێدوانیشدا دۆناڵد ترەمپ لە کۆشکی سپی گوتی، ''رەنگە بەشداری لە شەڕەکە بکەین، رەنگە بەشداریش نەکەین، دوا خولەک بڕیار دەدەم چی دەکەین''.
دۆناڵد ترەمپ خۆی نایەوێت بچێتە نێو شەڕەکەوە، لە دڵەوە حەز دەکات بە رێککەوتن ئەو کێشەیە چارەسەر بکات، بۆیە لە چەند رۆژی رابردوودا، پەیوەندیی راستەوخۆ لەنێوان وەزیری دەرەوەی ئێران و ستیڤ ویتکۆف، نێردەی تایبەتی دۆناڵد ترەمپ بۆ کاروباری رۆژهەڵاتی نێوەڕاست هەبووە، تاوەکو ئێستا ئەمریکا هیوای بەوەیە رێککەوتن بکرێت، چەند جارێکیش دۆناڵد ترەمپ بە تەلەفۆن قسەی لەگەڵ سەرکردەکانی ناوچەکە کردووە و بە تەلەفۆن قسەی لەگەڵ ڤلادمیر پووتین، سەرۆکی رووسیاش کردووە کە پەیامەکانیان بە ئێران بدات و گوشار لە ئێران بکات بە رێککەوتن رازی بن.
لە ئەگەری رێکنەکەوتن، ئەمریکا لە قۆناخی یەکەمدا هێرشێکی سنووردار بۆ سەر بنکە ئەتۆمییەکانی ئێران دەکات بەتایبەتیش بنکەی ئەتۆمیی فۆردۆ لە رێگەی فڕۆکەی "بی دوو" کە توانای هەڵگرتنی بۆمبی 14 تۆنی هەیە. هۆشداریش بە ئێران بدات، لە بەرامبەر ئەو هێرشانەدا وەڵامی ئەمریکا نەداتەوە، یان وەڵامەکانی هاوشێوەی ئەو وەڵامانە بن کە لە تۆڵەی کوژرانی قاسم سولەیمانی کردنی، واتە زیانی گیانیان نەبێت.
شتێک تاوەکو ئێستا رێگری لەوە دەکات دۆناڵد ترەمپ بەخێرایی هەنگاو بۆ ئەو بژاردەیە نەنێت، ترس لە فراوانبوونی شەڕەکە و تێوەگلانی زیاتری ئەمریکایە و بەشداریی گرووپ و لایەنەکانی دیکەیە لەم شەڕە، بۆیەش دڵنیا دەبنەوە لەوەی هێرشەکانیان پەلکێشی ئەم قۆناخەیان ناکات، ئەگەر پەلکێشیش بکرێن تەواو ئامادەن.
تەواوی وتارەکەی دیار کوردە بخوێننەوە
20:59
درۆنێک لە سنووری کۆیە کەوتەخوارەوە
درۆنێک لە سنووری کۆیە کەوتەخوارەوە
لە چوارچێوەی شەڕی ئێران و ئیسرائیل، درۆنێک لە گوندێکی سنووری کۆیە لە پارێزگای هەولێر کەوتووەتەخوارەوە. بەپێی ڤیدیۆی کەوتنەخوارەوە کە رووداو بڵاویکردووەتەوە، ئاگرێکی گەورە دەبیندرێت و لە دەوروبەریشی ئاگرکەوتووەتەوە.
تاوەکو ئێستا نازاندرێت درۆنەکە سەر بە چ لایەنێکە. لایەنە فەرمییەکانی هەرێمی کوردستانیش روونکردنەوەیان لەبارەیەوە نەداوە.
@rudaw.official لە کامێرای چاودێرییەوە بیبینە؛ ساتی کەوتنەخوارەوەی درۆنێک لە سنووری کۆیە کە ئاگرێکی گەورە دەکاتەوە تاوەکو ئێستا نازاندرێت کە درۆنەکە سەر بە چ لایەک بووە
♬ original sound - Rudaw
20:34
بڕیارێکی بەپەلەی ترەمپ لەسەر بەشداریکردن لە جەنگەکە
بڕیارێکی بەپەلەی ترەمپ لەسەر بەشداریکردن لە جەنگەکە
کارۆلین لێڤیت، گوتەبێژی کۆشکی سپی لەبارەی ئەگەری تێوەگلانی ئەمریکا لە شەڕی ئێران و ئیسرائیل، دەڵێت دۆناڵد ترەمپ گوتوویەتی: بە پشتبەستن بەو راستییەی کە هێشتا دەرفەتی دانوستاندن ماوە کە لەوانەیە لە ماوەیەکی نزیکدا لەگەڵ ئێران سەربگرێت یانیش سەرنەگرێت. لە ماوەی دوو هەفتەی داهاتوودا بڕیاری خۆم دەدەم [لەبارەی بەشداریکردنی ئەمریکا لە شەڕی ئێران و ئیسرائیل]
19:29
ئێران هۆشداری دەدات: هەر لایەنێک دەستوەردان بکات کاردانەوەی دەستبەجێمان دەبێت
ئێران هۆشداری دەدات: هەر لایەنێک دەستوەردان بکات کاردانەوەی دەستبەجێمان دەبێت
ئێران هەڕەشەیەکی نوێی ئاراستەی هەر "لایەنێکی سێیەم" کردووە کە بیر لە تێوەگلان لە ململانێیەکەیدا لەگەڵ ئیسرائیل دەکاتەوە و هەڕەشەی وەڵامدانەوەیەکی "دەستبەجێ" لەو لایەنانە دەکات.
ئەنجوومەنی باڵای ئاسایشی نیشتمانیی ئێران ئێوارەی رۆژی پێنجشەممە بەیاننامەیەکی دەرکرد و تێیدا رایگەیاند کە "رووبەڕووبوونەوە لەگەڵ دووژمن بەردەوام دەبێت،" تاوەکو قەرەبووی هێرشی سەریان دەکرێتەوە.
لەکاتێکدا ململانێی نێوان ئێران و ئیسرائیل هەفتەیەکی خایاندووە، ئەنجوومەنەکە رایگەیاند کە ئێران پلانی ئامادەکراوی هەیە بۆ سیناریۆی جیاواز.
بەبێ ناوبردنی ئەمریکا یان هیچ وڵاتێکی دیکە، ئەنجوومەنەکە دەڵێت، "لە ئەگەری دەستێوەردانی لایەنێکی سێیەم لەم دەستدرێژییەدا، دەستبەجێ رووبەڕوویان دەبینەوە بەپێی پلانێکی دیاریکراو."
دۆناڵد ترەمپ، سەرۆکی ئەمریکا بیر لە چوونە نێو ململانێکە دەکاتەوە، بەڵام ئاماژەی داوە کە هێشتا بڕیاری نەداوە. خۆی گوتی، "رەنگە بیکەم، رەنگە نەیکەم."
کەسێکی ئاگادار لە پرسەکە بە سی ئێن ئێنی ئەمریکی گوتووە، ترەمپ پێداچوونەوەی بە پلانەکانی هێرشکردندا کردووە، بەڵام رایگرتووە بۆ ئەوەی ببینێت ئایا تاران لە بەرنامە ئەتۆمییەکەی پاشەکشە دەکات یان نا.
19:27
ئێران و ئەمریکا گفتوگۆیان کردووە؛ بەخێرایی بزانە ئەمڕۆ چی روویداوە
مووشەکی ئێران لە ئاسمانی ئیسرائیل
رۆژی حەوتەمی جەنگەکەیە و ئێران و ئیسرائیل هێرشی فراوان دەکەنە سەر یەکدی. بە خێرایی بزانە ئەمڕۆ چی روویداوە.
لە ئیسرائیل
نەخۆشخانەی سۆرۆکا لە بئرسەبعی باشووری ئیسرائیل بەهۆی هێرشێکی مووشەکییەوە زیانی پێگەیشتووە، بەپێی شیکاریی شارەزایان، وا دەردەکەوێت مووشەکی راستەوخۆ لێیداوە. ئێران دەڵێت، ئامانجی بنکەیەکی سەربازی بووە لە نزیک نەخۆشخانەکە.
هێرشەکە وایکرد وەزیری بەرگریی ئیسرائیل بڵێت، رێبەری ئێران "پێویستە چی دیکە بوونی نەمێنێت."
وەزارەتی تەندروستیی ئیسرائیل رایگەیاند، 71 کەس لەو هێرشەدا بریندار بوون.
بەرەبەیانی ئەمڕۆ پێنجشەممە، چەندین ناوچەی دیکەی ئیسرائیلیش بە مووشەکی ئێرانی کرانە ئامانج و کوژراو و برینداری لێکەوتەوە.
لە ئێران
شەوی رابردوو، هێزەکانی ئیسرائیل هێرشیان کردە سەر بنکە ئەتۆمییەکانی ئێران، لەنێویاندا کارگەی ئاوی قورسی ئەراک.
هاوکات ئەمڕۆش دەنگی تەقینەوە لە تاران بیستراوە.
ئەو وڵاتە لە دوێنێوە دەستڕاگەیشتن بە ئینتەرنێتی سنووردار کردووە، ئەوەش وایکردووە بۆ خەڵکی دەرەوەی وڵاتەکە قورستر بێت پەیوەندی بە هەرکەسێکەوە بکەن لەناو وڵاتدا.
ئیسرائیل هەڕەشەی تۆڵەسەندنەوەی هێرشەکەی کردووە و بنیامین نەتەنیاهوو، سەرۆکوەزیرانی ئیسرائیل دەڵێت: لە کۆتایی ئەو ئۆپەراسیۆنەیاندا هیچ هێرشێکی ئەتۆمی و مووشەکی لەسەر ئیسرائیل نامێنێت.
کەناڵی سی بی ئێسی ئەمریکی دەڵێت، دۆناڵد ترەمپ هێرشی بۆ سەر ئێران دواخستووە بەو هیوایەی ئێران خۆبەخشخانە دەستبەرداری بەرنامە ئەتۆمییەکەی بێت.
هەروەها دەشڵێت، ترەمپ ئامادەیە ئەمریکا بباتە جەنگەکەوە بۆ خاپوورکردنی بنکە ئەتۆمییەکانی ئێران، هەروەها ئەگەرێکی بەردەست ئەوەیە رێگە بە ئێران بدەن خۆی بنکەی فۆردۆ هەڵبوەشێنێتەوە.
بەپێی دوایی زانیاریی رۆیتەرزیش، ئێران و ئەمریکا گفتوگۆی راستەوخۆیان لەبارەی جەنگەکەوە کردووە. گفتوگۆکە لەنێوان عەباس عێراقچی و ستیڤ ویتکۆف بووە.
18:53
22 هەزار گەشتیار دەیانەوێت لە ئیسرائیل دەربچن
ژمارەیەک گەشتیار لە کەناراوێکی ئیسرائیل
وەزارەتی گەشتوگوزاری ئیسرائیل رایگەیاندووە، ناوی 22 هەزار گەشتیاری تۆمارکردووە کە خوازیاری جێهێشتنی وڵاتەکەن.
ئاسمانی ئیسرائیل ماوەی هەفتەیەکە بەهۆی شەڕەوە داخراوە، جگە لەو گەشتە تایبەتانەی کە بۆ گەڕاندنەوەی ئەو ئیسرائیلییانە تەرخانکراون کە لە دەرەوەی وڵات گیریان خواردووە، ئەو گەشتانە دوێنێوە دەستیان بە کارکردووە، بەڵام هێشتا رێگەیان پێنەدراوە بەهۆی هۆکاری ئەمنییەوە گەشتیاران بەرنە دەرەوە.
وەزارەتەکە لە بەیاننامەیەکدا رایگەیاند، لە نزیکەی 40 هەزار گەشتیار کە لە سەرەتای شەڕدا لە ئیسرائیل بوون، نزیکەی 32 هەزاریان هێشتا لە وڵاتەکەدا ماونەتەوە، گوتیشی هەندێکیان لە رێگەی دەروازە وشکانییەکانەوە لەگەڵ ئوردن و میسر ئیسرائیلیان جێهێشتووە.
18:49
میدیای بەریتانی: ئەمریکا و ئێران قسەیان لەسەر کۆتاییهێنانی گرژییەکان کردووە
رووداو
چەند دیپلۆماتێک دەڵێن، لەگەڵ دەستپێکردنی جەنگی ئێران و ئیسرائیل، وەزیری دەرەوەی ئێران و نێردەی تایبەتی ئەمریکا بۆ رۆژهەڵاتی نێوەڕاست چەندین جار بۆ کۆتاییهێنان بە جەنگەکە بە تەلەفۆن قسەیان کردووە.
بەگوێرەی ئەو سەرچاوە دیپلۆماسییانە کە قسەیان بۆ ئاژانسی هەواڵی رۆیتەرز کردووە. عەباس عێراقچی وەزیری دەرەوەی ئێران بە ستیڤ ویتکۆف، نێردەی تایبەتی ئەمریکا بۆ رۆژهەڵاتی نێوەڕاستی گوتوە، تاوەکو ئیسرائیل کۆتایی بە هێرشەکانی نەهێنێت، ناچنەوە نێو گفتوگۆ لەگەڵ ئەمریکا.
ویتکۆف باسی لە پێشنیازەکەی ئەمریکا بۆ ئێران کردووە کە لە کۆتایی مانگی ئایاری ئەم ساڵ پێشکێشی ئێرانیان کردووە.
لە پێشنیازەکە داوا لە ئێران کراوە، کۆمەڵە کۆمپانیایەک لە ناوچەکە یۆرانیۆمی ئێران بپیتێنن، بەڵام ئێران رەتیکردووەتەوە.
18:34
سوپای ئێران دەڵێت، 6 سەربازیان لە هێرشێکی ئیسرائیل بۆ سەر لوڕستان کوژراون
رووداو
سوپای ئێران دەڵێت، 6 سەربازیان لە هێرشێکی ئیسرائیل بۆ سەر بنکەیەکی سەربازی لە پارێزگای لوڕستان کوژراون.
پێشتر سوپای ئیسرائیل رایگەیاندبوو، هێزی ئاسمانیی وڵاتەکە بە 20 فڕۆکەی جەنگی ژمارەیەک سەکۆی مووشەکی بالیستیی ئێرانی لە رۆژئاوای وڵاتەکە بە ئامانج گرتووە.
18:10
لەنێو هێزەکانی ئێران دەسەڵات چۆن دابەش بووە؟
لەنێو هێزەکانی ئێران دەسەڵات چۆن دابەش بووە؟
لە كۆماری ئیسلامیی ئێران، بەرزترین دەسەڵاتداری گشتیی هێزە چەكدارەكان، عەلی خامنەیی، رێبەری كۆماری ئیسلامی ئێرانە.
هەر ئەو سەرۆك ئەركان و فەرماندەی باڵای سەربازی بڕیار لێ دەدات و دایدەنێت، لە رۆژی هەینی رابردووەوە 13-6-2025 خامنەیی ناچاربوو كۆمەڵێك بڕیار بۆ جێگرتنەوەی ئەو فەرماندانە دەربكات كە لە بۆردوومانی رۆژی یەكەمی ئیسرائیل بۆ سەر ئێران كوژران.
زنجیرەی دەسەڵاتی سەربازیی لە ئێران لە خوار خامنەییەوە بەسەر سێ بەش دا دابەش دەبێ و دوو بەشیان چەندین لقیان لێ دەبێتەوە، بەڵام دیارترینیان سوپای پاسدارانە كە یەكێك لە لقەكانی سوپای قودسە.
لە ماوەی هەفتەیەكدا زۆرترین ئەو فەرماندانە كراونەتە ئامانج كە لە ستوونی پاسداران بوون.
بەهۆی زیاتر بەئامجگرتن و تەنانەت هەڕەشەی كوشتن لەلایەن ئیسرائیلەوە، عەلی خامنەیی لە دوو رۆژی رابردوو، هەندێ لە دەسەڵاتەكانی شۆڕكردەوە بۆ سوپای پاسداران.
18:09
بۆمبی ئەتۆمی چۆن دروست دەکرێت؟
بۆمبی ئەتۆمی چۆن دروست دەکرێت؟
کەرتبوونی ناوکی بۆمبی ئەتۆمی بەرهەم دەهێنێت، کە چەکێکی کۆمەڵکوژە و ئەو هێزە بەکاردەهێنێت کە لە کەرتبوونی ناوکە گەردیلەییەکانەوە ئازاد دەبێت.
کاتێک یەک نیوترۆنی ئازاد بەر ناوکی گەردیلەیەکی ماددەی تیشکدەر وەک یۆرانیۆم یان پلوتۆنیۆم دەکەوێت، دوو یان سێ نیوترۆنی دیکە ئازاد دەکات. لەدوای ئەوە وزە ئازاد دەبێت کاتێک ئەو نیوترۆنانە لە ناوکەکە جیا دەبنەوە و نیوترۆنە تازە ئازادبووەکان بەر ناوکەکانی دیکەی یۆرانیۆم یان پلوتۆنیۆم دەکەون، بە هەمان شێوە دەیانکەن بە چەند کەرتەوە و وزە و نیوترۆنی زیاتر ئازاد دەکەن. ئەو کارلێکە زنجیرەییە نزیکەی لە چاوتروکانێکدا بڵاودەبێتەوە.
هیوا جەمال بە ڤیدیۆ روونی دەکاتەوە
17:29
سەرۆکوەزیرانی بەریتانیا داوا لە ترەمپ دەکات هێز لە دژی تاران بەکارنەهێنێت
کییەر ستامەر و دۆناڵد ترەمپ لە لووتکەی وڵاتانی گرووپی 7. وێنە: AFP
کییەر ستامەر، سەرۆکوەزیرانی بەریتانیا داوا لە ترەمپ دەکات واز لە بیرۆکەی بەکارهێنانی هێز لە دژی تاران بهێنێت.
ستامەر دەڵێت، "مەترسیەکی گەورە بۆ فراوانبوونی گرژییەکان هەیە" و داوا لە هەموو لایەنەکان دەکات دان بەخۆیان دا بگرن.
سەرۆکوەزیرانی بەریتانیا پێیوایە، ئەو گفتوگۆیەی لەنێوان ئەمریکا ئێران هەبووە، تاکە رێگەی چارەسەرکردنی گرژییەکانە.
17:12
دیپلۆماتێک: کۆبوونەوەی ئێران و زلهێزە ئەورووپییەکان بە راوێژ لەگەڵ ئەمریکا دەبێت
بڕیارە رۆژی هەینی وەزیری دەرەوەی ئێران لە سویسرا لەگەڵ نوێنەرانی بەریتانیا، ئەڵمانیا، فەرەنسا و یەکێتیی ئەورووپا کۆببێتەوە، بە گوتەی دیپلۆماتێک لە یەکێک لەو وڵاتانەی رۆژئاوا بۆ سی ئێن ئێن، کۆبوونەوەکە بە راوێژ لەگەڵ ئیدارەی ترەمپ ئەنجام دەدرێت.
ئەو بەرپرسە گفتوگۆکانی بە سەرەتایی وەسفکرد، بۆ "هەڵسەنگاندنی دۆخەکە" لەوەی کە دەتوانرێت چی بەدەست بهێنرێت.
16:58
ئێران هێرشێکی نوێی مووشەکی کردە سەر ئیسرائیل
ئێران هێرشێکی نوێی مووشەکی کردە سەر ئیسرائیل
ئێران بە ژمارەیەک مووشەک کە سوپای ئیسرائیل پێشبینیی دەکات 10 مووشەک بووبن، هێرشی کردە سەر شارەکانی ئیسرائیل و زەنگی ئاگادارکردنەوە لێدرا.
تاوەکو ئێستا هیچ راپۆرتێک لەبارەی کاریگەریی مووشەکەکان نییە و پێدەچێت لەلایەن سیستمی بەرگرییەوە خرابنەخوارەوە.
16:31
ئێران 24 کەس بەتۆمەتی سیخوڕی کردن بۆ ئیسرائیل دەستگیر دەکات
پۆلیسێکی ئێران.
پۆلیسی ئێران 24 کەس بەتۆمەتی سیخوڕی کردن بۆ ئیسرائیل دەستگیر دەکات. دەڵێت، "وێنەی وڵاتەکە ناشیرن دەکەن".
پۆلیسی ئێران دەڵێت، ئەو کەسانە "بەشێوەی ئۆنلاین و ئۆفلاین سیخوڕییان بۆ رژێمی زایۆنی دەکرد و هەوڵی شێواندنی رای گشتی و ناشیرین کردنی وێنەی وڵاتەکەیان داوە."
16:30
نەتەنیاهوو بەڵێن دەدات هەڕەشەی ئەتۆمیی ئێران بسڕێتەوە
باڵەخانەیەکی تەل ئەڤیڤ کە لەلایەن ئێرانەوە بۆردوومان کراوە
زانیاریی زیاتر لە بنیامین ناتانیاهۆ، سەرۆک وەزیرانی ئیسرائیلەوە گەیشت کە دەڵێت، ئیسرائیل هەڕەشەی ئەتۆمیی ئێران "لەنێودەبات".
نەتەنیاهوو لە نەخۆشخانەی سۆرۆکا کە لەلایەن ئێرانەوە بۆردوومانکرا، بە پەیامنێرانی گوت: "لە کۆتایی ئەم ئۆپەراسیۆنەدا، هیچ هەڕەشەیەکی ئەتۆمی لەسەر ئیسرائیل نامێنێت، هەروەها هیچ هەڕەشەیەکی مووشەکی بالیستیش نامێنێت."
نەتەنیاهۆ ئاماژەی بەوەشکرد، ئیسرائیل پێشوەختە زیانێکی "زۆر بەهێزی" بە بەرنامە ئەتۆمییەکەی ئێران گەیاندووە.
لە وەڵامی پرسیارێکدا کە ئایا عەلی خامنەیی، رێبەری باڵای ئێران، ئامانجی ئۆپەراسیۆنەکەیانە، نەتەنیاهوو دەڵێت، "هیچ کەسێک پارێزراو نییە".
16:17
پەیامێکی بەپەلە لە وەزیری دەرەوەی ئێرانەوە بۆ خەڵکی ئیسرائیل
وەزیری دەرەوەی ئێران داوا لە خەڵکی ئیسرائیل دەکات لە شوێنە سەربازی و هەواڵگرییەکان دووربکەونەوە لەکاتی هێرشی مووشەکیی وڵاتەکەی بۆ سەر ئیسرائیل.
15:56
ئیسرائیل؛ زیاتر لە 5 هەزار کەس بەهۆی هێرشەکانی ئێران ئاوارە بوون
گەشتیارانی ئیسرائیل، باکووری بەندەری حەیفا چۆڵ دەکەن. وێنە: AFP
وەزارەتی ناوخۆی ئیسرائیل دەڵێت، 5 هەزار و 110 کەس بەهۆی هێرشەکانی ئیسرائیل بۆ سەر وڵاتەکەیان ئاوارە بوون.
بەگوێرەی وەزارەتەکە، لەوانەی ئاوارەبوون، 97ـیان لە تەل ئەڤیڤی پایتەختی ئیسرائیل بوون.
15:29
وەزیری دەرەوەی ئیسرائیل: ئامانجمان کۆتاییهێنانە بە بەرنامەی ئەتۆمی ئێران
جەدعۆن سار، وەزیری دەرەوەی ئیسرائیل
جەدعۆن سار، وەزیری دەرەوەی ئیسرائیل دەڵێت، تاوەکو ئێستا کابینەی ئەمنیی ئیسرائیل دیاری نەکردووە رژێمی ئێران بگۆڕێت، بەڵکو "ئامانجمان کۆتاییهێنانە بە بەرنامەی ئەتۆمیی ئێران."
15:27
نەتەنیاهوو: رەنگە ئەنجامەکە کەوتنی رژێمی ئێران بێت
رووداو
بنیامین نەتەنیاهوو، سەرۆکوەزیرانی ئیسرائیل دەڵێت، رەنگە ئەنجامەکە کەوتنی رژێمی ئێران بێت، بەڵام ئەوە پەیوەستە بە گەلی ئێرانەوە.
دەشڵێت، "ئەمە چرکەساتێکی مێژووییە و خەڵکی ئێران دەبێ خۆیان هەوڵی رزگاریی خۆیان بدەن".
15:02
سوپای ئیسرائیل: ژمارەیەک مووشەکهاوێژی ئێرانمان بە ئامانج گرت
رووداو
سوپای ئیسرائیل دەڵێت، هێزی ئاسمانیی سوپاکە ژمارەیەک سەکۆی مووشەکی بالیستیی ئێرانی لە رۆژئاوای وڵاتەکە بە ئامانج گرتووە.
سوپای ئیسرائیل دەڵێت، 20 فڕۆکەی جەنگی لە هێرشەکە بەشدار بوون.
سوپای وڵاتەکە دەشڵێت، بارهەڵگرێکی مووشەک هەڵگر لەلایەن درۆنێکیانەوە بە ئامانج گیراوە.
14:54
بەرپرسێکی ئیسرائیل دەڵێت، دوو لەسەر سێی مووشەکهاوێژەکانی ئێرانیان پێکاوە
مووشەکهاوێژێکی ئێران لەنێو ئامانجی فڕۆکەکانی ئیسرائیل.
بەرپرسێکی ئیسرائیل بە ئاژانسی هەواڵی رۆیتەرزی راگەیاندووە، دوو لەسەر سێی مووشەکهاوێژکانی ئێرانیان پێکاوە.
ئەو بەرپرسە دەڵێت، ئامانجی سەرەکییان لێدانە لە مووشەکهاوێژەکانی ئێران.
بەرپرسانی ئێرانیش دەڵێن، زیاتر لە 100 مووشەکهاوێژی ئامادەیان هەیە.
14:34
زانیاریی لەسەر دوایین هێرش و کاردانەوەکانی ئیسرائیل و ئێران
نەخۆشخانەی شاریبا لە ئیسرائیل لەلایەن ئێران بە ئامانج گیرا. وێنە: AFP
ئیسرائیل و ئێران بەردەوامن لە هێرشەکانیان بۆ سەر یەکدی. هێرشەکان زیانی گیانی و مادی زۆری لێکەوتوەتەوە.
لە ئیسرائیل چی روویداوە؟
بەهۆی دوایین هێرشی مووشەکی ئێران بۆ سەر ئیسرائیل، نەخۆشخانەی شاریبا لە باشووری ئیسرائیل زیانێکی زۆری پێگەیشت.
هێرشەکە ئیسرائیل کاتز، وەزیری بەرگریی ئیسرائیلی بەدەنگ هێنا و هەڕەشەی لە رێبەری کۆماری ئیسلامیی ئێران کرد.
ئێران لەبارەی هێرشەکەوە دەڵێت، ئامانجیان بنکەیەکی سەربازی بووە لە نزیک نەخۆشخانەکە.
جگە لە بە ئامانجگرتنی نەخۆشخانەکە، ئێران چەندین شوێنی دیکەی پێکاوە و دەزگای فریاکەوتنی ئیسرائیل دەڵێت، دوایین هێرشی ئێران بووەتە هۆی برینداربوونی 125 کەس.
نەتەوە یەکگرتووەکان دەڵێت، ئێران لە هەینیی رابردووەوە تاوەکو ئێستا بە 450 مووشەکی بالیستیی هێرشی کردووەتە سەر ئیسرائیل. هەروەها 24 کەس لە وڵاتەکە گیانیان لەدەستداوە.
لە ئێران چی روویداوە؟
ئیسرائیل دەڵێت، چەندین بنکەی ئەتۆمیی ئێرانیان پێکاوە. لەنێویاندا بنکەی پیتاندنی یۆرانیۆمی نەتەنز و ناوەندی توێژینەوەی ئەتۆمی لە پارێزگای ئاراک.
ئێران لەبارەی هێرشەکانی ئیسرائیل بۆ سەر بنکە ئەتۆمییەکانی لە ئاژانسی نێودەوڵەتیی وزەی ئەتۆم سکاڵای تۆمارکردووە.
مەسعود پزیشکیان ئەمڕۆ گوتی، "ئەم رۆژە سەختانە تێدەپەڕێنین."
بەگوێرەی نەتەوە یەکگرتووەکان لە ئەنجامی هێرشەکانی ئیسرائیل بۆ سەر ئێران، تاوەکو ئێستا 585 کەس کوژراون.
13:55
سەرۆکی رووسیا و چین بە تووندی سەرکۆنەی هێرشی ئیسرائیل بۆ سەر ئێران دەکەن
رووداو
سەرۆکی رووسیا و چین بە تووندی سەرکۆنەی هێرشی ئیسرائیل بۆ سەر ئێران دەکەن و داوا دەکەن گرژییەکان بە رێگەی دیپلۆماسیی چارەسەر بکرێن.
ڤلادیمیر پووتین، سەرۆکی رووسیا و شی جینپینگ، سەرۆکی چین بە تەلەفۆن لەبارەی جەنگی ئێران و ئیسرائیل قسەیان کرد.
کۆشلکی کرێملن دەڵێت، پووتین و شی بە تووندی سەرکۆنەی کردارەکانی ئیسرائیلیان کرد.
میدیای چین دەڵێت، شی جینپینگ بە پووتینی گوتووە، ئاگربەست کاری لەپێشینەیانە و دەبێت ئیسرائیل هێرشەکانی رابگرێت.
ڤلادیمیر پووتین تاوەکو ئێستا رۆڵی نێوەندگیر لەنێوان ئیسرائیل و ئێران دەگێڕێت. کرێملن دەڵێت، سەرۆکی چین ئەمەی بەرز نرخاندووە و رایگەیاندووە "گرژییەکان کەمدەکەنەوە."
13:15
نێردەی ئەمریکا بۆ کاروباری سووریا هۆشداری لە بەشداری حیزبوڵڵا لە جەنگی ئێران و ئیسرائیل دەدات
تۆم باراک، نێردەی تایبەتی ئەمریکا لە سووریا.
نێردەی تایبەتی ئەمریکا بۆ کاروباری سووریا هۆشداری لە دەستوەردانی حیزبوڵڵا لە جەنگی ئێران و ئیسرائیل دەدات و بە "بڕیارێکی زۆر زۆر زۆر خراپ" ناوی دەبات.
تۆم باراک، نێردەی تایبەتی ئەمریکا بۆ کاروباری سووریا دەڵێت، "لە بری سەرۆک [سەرۆکی ئەمریکا] دەتوانم بڵێم، ئەمە بڕیارێکی زۆر زۆر زۆر خراپ دەبێت."
12:29
ئێران هەڕەشە لە ئەمریکا دەکات؛ 'وانەیەک فێری دووژمن دەکەین'
کازم غەریبئابادی، جێگری وەزیری دەرەوەی ئێران.
دوای ئەوەی سەرۆکی ئەمریکا باسی لە ئەگەری هێرشکردنە سەر ئێران کرد، جێگری وەزیری دەرەوەی ئێران هەڕەشە لە واشنتن دەکات و دەڵێت، 'وانەیەک فێری دووژمن دەکەین.'
کازم غەریبئابادی، جێگری وەزیری دەرەوەی ئێران دەڵێت، "ئەگەر ئەمریکا بیەوێت بەشێوەیەکی چالاکانە پشتیوانی ئیسرائیل بکات، ئێران هیچ بژاردەیەکی دیکەی نامێنێت جگە لە بەکارهێنانی ئامرازەکانی بۆ ئەوەی وانەیەک فێری دووژمن بکات و بەرگریی لە خۆی بکات."
غەریبئابادی دەڵێت، "پێشنیازمان بۆ ئەمریکا ئەوەیە، ئەگەر ناشیانەوێت دووژمناکارییەکەی ئیسرائیل رابگرن، لانیکەم با خۆیان دوور رابگرن."
جێگری وەزیری دەرەوەی ئێران دەشلێت، بڕیاربەدەستانی سەربازی ئێران هەموو بژاردەیەکیان لەبەردەستە.
12:05
وەزیری بەرگریی ئیسرائیل: فەرمان بە سوپاکەمان کرا هێرشەکانی بۆ سەر ئێران چڕبکاتەوە
یسرائیل کاتز، وەزیری بەرگریی ئیسرائیل
وەزیری بەرگریی ئیسرائیل دەڵێت، عەلی خامنەیی، رێبەری کۆماری ئیسلامیی ئێران "بە بەرپرسیار دادەنرێ" لە بەرامبەر هێرشی سەر نەخۆشخانەکەی ئەمڕۆ. ئاماژە بەوەش دەکات، فەرمانی بە سوپا کردووە "هێرشەکان" چڕ بکاتەوە.
یسرائیل کاتز، وەزیری بەرگریی ئیسرائیل ئەمڕۆ پێنجشەممە گوتی، ئەوەی ئەم بەیانییە ئێران کردی، تاوانی جەنگە؛ ئاماژەی بەوەشکرد، عەلی خامنەیی، رێبەری کۆماری ئیسلامیی ئێران بە "بەرپرسیار" دادەنرێ.
کاتز رایگەیاند، لەگەڵ بنیامین نەتەنیاهوو، سەرۆکوەزیرانی ئیسرائیل فەرمانیان بە سوپا کردووە "هێرشەکان بۆ سەر ئامانجە ستراتیژییەکانی نێو ئێران و ژێرخانی وزەی تاران چڕبکاتەوە، ئەوەش بەمەبەستی لەنێوبردنی هەڕەشەکان بۆ سەر دەوڵەتی ئیسرائیل."
بنیامین نەتەنیاهووش گوتی، سوپای وڵاتەکەی بێ وەڵام نامێنێتەوە لە بەرامبەر ئەو هێرشەی ئەم بەیانییە ئێران کردییە سەر ئیسرائیل و هەربۆیە تاران "باجێکی گەورە" دەدات.
11:30
سوپای پاسداران دەڵێت، ناوەندێکی فەرماندەیی و هەواڵگریی ئیسرائیلی بۆردوومان کردووە
رووداو
سوپای پاسداران لەبارەی هێرشەکەی ئەم بەیانییەی بۆسەر ئیسرائیل دەڵێت، ناوەندێکی هەواڵگری و فەرماندەیی سوپای ئیسرائیلی کردووەتە ئامانج.
لە راگەیێندراوی ژمارە 12ـی پەیوەندییە گشتییەکانی سوپای پاسداراندا هاتووە: "شەپۆلی چواردەیەمی ئۆپەراسیۆنی بەڵێنی راستگۆ 3 بە سوودوەرگرتن لە فڕۆکەی بێفڕۆکەوانی بۆمبڕێژکراو و مووشەکی ئاراستەکراو" ئەنجام درا.
سوپای پاسداران دەشڵێت، لەو هێرشەدا ناوەندی فەرماندەیی و هەواڵگریی سوپای ئیسرائیل لە نزیک یەکێک لە نەخۆشخانەکان بە وردییەکی زۆر کرایە ئامانج.
لە بەشێکی دیکەی راگەیێندراوەکەدا، سوپای پاسداران ئاماژەی بەوە کردووە کە "ئێستا توانای هەواڵگری و هێزی پێکانی مووشەکەکانی هێزە چەکدارەکانی کۆماری ئیسلامیی ئێران" لای هەموو کەس روونە.
سوپای پاسداران دەڵێت، سوپای ئیسرائیل هەموو ناوەندە سەربازییەکانی چۆڵکردووە و سیستەمە مووشەکی و بەرگرییە بێسوودەکانی لەنێو شارەکان جێگیر کردووە.
سوپای پاسداران ئاماژە بەوەش دەکات کە پێشتریش هۆشدارییان دابوو تەواوی ئاسمانی ئیسرائیل بێ بەرگرییە و ئێستاش هەمان شت دووبارە دەکەنەوە.
ئەم بەیانییە ئێران هێرشی کردە سەر ئیسرائیل و لە ئەنجامدا زیاتر لە 50 کەس بریندار بوون. یەکێک لەو شوێنانەی کرایە ئامانج نەخۆشخانەیەک بوو.
یسرائیل کاتز، وەزیری بەرگریی ئیسرائیل دەڵێت، عەلی خامنەیی، رێبەری کۆماری ئیسلامیی ئێران "بە بەرپرسیار دادەنرێ" لە بەرامبەر هێرشی سەر نەخۆشخانەکەی ئەمڕۆ؛ ئاماژە بەوەش دەکات، فەرمانی بە سوپا کردووە "هێرشەکان" چڕ بکاتەوە.
وەزیری بەرگریی ئیسرائیل جەختی لەوەیش کردەوە کە ئەوەی ئەم بەیانییە ئێران کردی، تاوانی جەنگە؛ ئاماژەی بەوەشکرد، عەلی خامنەیی، رێبەری کۆماری ئیسلامیی ئێران بە "بەرپرسیار" دادەنرێت.
10:40
بەهۆی هێرشەکەی ئێرانەوە بۆ سەر تەل ئەڤیڤ 65 کەس بریندار بوون
رووداو
فریاگوزاریی ئیسرائیل دەڵێت، بەهۆی مووشەکەکانی ئەم بەیانییەی ئێرانەوە بۆ سەر تەل ئەڤیڤ، لانیکەم 65 کەس بریندار بوون.
فریاگوزاریی ئیسرائیل باسی لەوە کردووە، تەندروستیی سێ لە بریندارەکان ناجێگیرە.
10:21
وەزارەتی دەرەوەی ئەڵمانیا بۆ رووداو: باڵیۆزخانەکەمان لە تاران بەهۆی رەوشی ناجێگیرەوە داخراوە
باڵیۆزخانەی ئەڵمانیا لە تاران
وەزارەتی دەرەوەی ئەڵمانیا بە تۆڕی میدیایی رووداوی راگەیاند، بەهۆی جەنگەوە باڵیۆزخانەیان لە تاران داخستووە و تەنیا کاروباری ئەو ئەڵمانییانە بەڕێوەدەبەن، کە دەگەڕێنەوە وڵاتەکەیان.
وەزارەتی دەرەوەی ئەڵمانیا بە تۆڕی میدیایی رووداوی گوت: "هەموو باڵیۆزخانەکانمان لە ناوچەکە کاردەکەن. بەهۆی رەوشی ئەمنیی ناجێگیرەوە، باڵیۆزخانەکەمان لە تاران بۆ سەردان داخراوە، بەڵام هاوکارەکانمان کارئاسانی بۆ ئەڵمانییەکان دەکەن بۆ گەڕانەوە".
وەزارەتەکە دەڵێت، باڵیۆزخانەکانیان لە ناوچەکانی رۆژهەڵاتی نێوەڕاست کاردەکەن و تەنیا باڵیۆزخانەی تارانی پایتەخت بۆ سەردانی گشتی داخراوە.
تاوەکو ئەمڕۆ سنوورە وشکانییەکانی نێوان ئێران و تورکیا، ئێران و ئەرمینیا و ئێران لەگەڵ عێراقدا کراوەن.
وەزارەتی دەرەوەی ئەڵمانیا دەڵێت: "سنوورەکانی نێوان ئێران و ئازەربایجان و تورکمانستان بۆ هاتووچۆی ئاسایی داخراون. حکومەتی فیدراڵی [ئەڵمانیا] بەردەوام هەموو بژاردەکانی دەرچوون هەڵدەسەنگێنێت و لە رێگەی تیمی قەیرانەکانەوە لەگەڵ نوێنەرایەتییەکانی ئەو ناوچەیە لە ئاڵوگۆڕی زانیاریی نزیکدایە".
بەگوێرەی زانیارییەکانی وەزارەتی دەرەوەی ئەڵمانیا، کە 18ـی حوزەیران بە رووداوی داوە: "ئێستا رەوشی ئەمنیی ناجێگیر پلانی گەشتی وشکانیی ئاستەنگ کردووە. بۆیە داوا لە هاووڵاتییانی ئەڵمانی لەو ناوچەیە دەکرێت بە لەبەرچاوگرتنی رەوشی تاکەکەسیی خۆیان، پەناگە پارێزراوە بەردەستەکان و زانیاریی دەزگا ئەمنییە خۆجێیەکان، لەسەر بەرپرسیارێتیی خۆیان، دەرفەتەکانی دەرچوون بە رێگەی وشکانی بۆ خۆیان هەڵبسەنگێنن".
وەکو ئاماژەیان پێکردووە، وەزارەتەکە دەڵێت، لە پاییزی ساڵی 2023ـەوە هۆشداریی گەشتکردنیان بۆ ئێران داوە.
09:32
بنیامین نەتەنیاهوو هەڕەشە دەکات: ئێران باجێکی گەورە دەدات
بنیامین نەتەنیاهوو، سەرۆکوەزیرانی ئیسرائیل
سەرۆکوەزیرانی ئیسرائیل دەڵێت، ئێران باجێکی زۆر گەورە دەدات، دوای ئەو هێرشەی ئەم بەیانییە کردییە سەر وڵاتەکەی.
بنیامین نەتەنیاهوو، سەرۆکوەزیرانی ئیسرائیل رایگەیاند، سوپای وڵاتەکەی بێ وەڵام نامێنێتەوە لە بەرامبەر ئەو هێرشەی ئەم بەیانییە ئێران کردییە سەر ئیسرائیل و تاران "باجێکی گەورە" دەدات.
هاوکات ئوریێل بوسۆ، وەزیری تەندروستیی ئیسرائیل گوتی، ئێران بە کردنەئامانجی نەخۆشخانەی سۆرۆکا لە بئێرشێڤا لە باشووری وڵاتەکە هێڵی سووری بەزاند.
رادیۆی سوپای ئیسرائیل لە زاری بوسۆوە گواستیەوە، ئەوەی کراوە تاوانی جەنگە کە ئێران ئەنجامی داوە.
ئەم بەیانییە ئێران هێرشی کردە سەر ئیسرائیل و لە ئەنجامدا زیاتر لە 30 کەس بریندار بوون.
09:06
سوپای پاسداران هێرشی کردە سەر ئیسرائیل؛ زیاتر لە 30 کەس بریندارن
ئەو نەخۆشخانەی لە تەل ئەڤیڤ کرایە ئامانج
ئێران ئەم بەیانییە هێرشی کردەوە سەر ئیسرائیل و بەهۆیەوە زیاتر لە 30 کەس بریندار بوون.
ئەم بەیانییە ئێران بە مووشەک و درۆن هێرشی کردەوە سەر ئیسرائیل. میدیای ئێران بڵاویکردەوە، ئامانجی سەرەکیی هێرشەکە بارەگای فەرماندەیی، هەواڵگری سوپای ئیسرائیل و سەربازگەی هەوڵگریی بووە لە ناوەندی توێژینەوەی گاڤ یام لە شاری بیەرشیبا.
هێرشەکە زیانی گەورەی هەبوو. تەندروستیی نیشتمانیی ئیسرائیل بڵاویکردەوە، لە ئەنجامی هێرشەکەدا لانیکەم 30 کەس بریندارن.
دەکرێ ژمارەکە بەرزبێتەوە، بە هۆکاری ئەوەی هێرشەکە تازە روویداوە. کەمێک لەمەوبەریش سوپای ئیسرائیل بڵاویکردەوە، خەڵک دەتوانێ لە پەناگەکان دەربچێت.
دیمەنی تەلئەڤیڤ دوای ئەوەی کەمێک لەمەوبەر چەند مووشەکێک لە شارەکەدا کەوتنە خوارەوە pic.twitter.com/cGVIERh04w
— Rudaw (@Rudawkurdish) June 19, 2025
جێگری وەزیری دەرەوەی ئیسرائیل سەرکۆنەی هێرشەکەی کرد و گوتی، یەکێک لە ئامانجەکانی هێرشەکەی ئێران، نەخۆشخانەیەک بووە کە دەست ئەنقەست ئەو شوێنە کراوەتە ئامانج و ئەوەشی بە تاوان ناوبرد.
سوپاکە لە راگەیێندراوێکدا گوتی، دوای هەڵسەنگاندنی دۆخەکە، فەرماندەیی بەرەی نێوخۆ بڵاویکردەوە خەڵک دەتوانن پەناگەکان جێبهێڵن.
08:50
سوپای ئیسرائیل: شەوی رابردوو بنکەی ئەتۆمیی نەتەنزمان بۆردوومان کرد
رووداو
سوپای ئیسرائیل دەڵێت، شەوی رابردوو لە بنکەی ئەتۆمیی تەتەنز شوێنێکیان بۆردوومان کردووە تێیدا پەرە بە چەکی ئەتۆمی دەدرا.
سوپای ئیسرائیل دەشڵێت، "ئەو شوێنەی لە نەتەنز بۆردوومان کرا کەرەستەی پێشکەوتووی تێدابوو، یارمەتیی خێراکردنی بەرنامە ئەتۆمییەکەی ئێرانی دەدا".
08:46
پلانی هێرشکردنە سەر ئێران لەسەر مێزی ترەمپە؛ چاوەڕێی فەرمانی کۆتاییە
دۆناڵد ترەمپ، سەرۆکی ئەمریکا
میدیای ئەمریکی دەڵێت، ترەمپ رۆژی سێشەممە بە راوێژکارە باڵاکانی راگەیاندووە پلانی هێرشکردنە سەر ئێرانی پەسند کردووە.
رۆژی چوارشەممە، 18ـی حوزەیرانی 2025، رۆژنامەی وۆڵ ستریت جۆرناڵی ئەمریکی لەسەر زاری چەند کەسێکی ئاگادار لە گفتوگۆکان رایگەیاند، ترەمپ پلانی هێرشکردنە سەر ئێرانی پەسند کردووە.
ئەو کەسانەی قسەیان بۆ وۆڵ ستریت جۆرناڵ کردووە دەڵێن، ترەمپ هەرچەندە پلانەکەی پەسند کردووە، چاوەڕێ دەکات بزانێت تاران واز لە پرۆگرامی ئەتۆمییەکەی دەهێنێت یان نا.
ترەمپ رۆژی سێشەممە، لە وەڵامی پرسیارێکدا کە ئایا بڕیاری داوە هێرش بکاتە سەر دامەزراوە ئەتۆمییەکانی ئێران، گوتی: "رەنگە بیکەم، رەنگە نەیکەم."
هەروەها دووپاتی کردەوە پێویستە ئێران بێ مەرج خۆی رادەست بکات و گوتی: "هەفتەی داهاتوو چارەنووسساز دەبێت. رەنگە کەمتریش لە هەفتەیەک."
عەلی خامنەیی، رێبەری ئێران پێشتر رایگەیاندبوو وڵاتەکەی خۆی رادەست ناکات و هۆشداری دا هەر دەستوەردانێکی سەربازیی ئەمریکا ئەنجامی خراپی لێدەکەوێتەوە.
سوپای ئەمریکا لە رۆژانی رابردوودا هێزەکانی لە رۆژهەڵاتی نێوەڕاست کۆکردووەتەوە. سێیەم کەشتیی جەنگیی تێکشکێنەری هێزی دەریایی ئەمریکا چووەتە رۆژهەڵاتی دەریای نێوەڕاست و دووەم گرووپی کەشتییە هەڵگرەکانی فڕۆکەی جەنگیی ئەمریکاش بەرەو دەریای عەرەب بەڕێکەوتووە.
سەرۆکی ئەمریکا مەرجەکانی واشنتنی بۆ کۆتاییهێنان بەم دۆخە خستووەتەڕوو و دەڵێت: "ئێران دەبێت خۆی رادەست بکات و دەستبەرداری بەرنامە ئەتۆمییەکەی بێت."
ئێرانییەکانیش دەڵێن، پڕۆگرامی ئەتۆمییان بۆ مەبەستی ئاشتیخوازانەیە و دەیانەوێت وەکو سەرچاوەی بەدەستختنی وزە بەکاریبهێنن و تاوەکو ئێستاش رەتیدەکەنەوە دەستبەرداری بن.
08:21
ئێران نەخۆشخانەیەکی لە ئیسرائیل کردە ئامانج
رووداو
بەیانیی ئەمڕۆ ئێران هێرشی کردەوە سەر ئیسرائیل و نەخۆشخانەیەکی لە تەل ئەڤیڤ کردە ئامانج.
میدیای ئیسرائیل دەڵێت، ئێران ئەم بەیانییە 25 مووشەکی ئاراستەی خاکی ئیسرائیل کردەوە.
07:18
ئێران هێرشی مووشەکیی کردەوە سەر ئیسرائیل
ڤیدیۆ.. کەمێک لەمەوبەر سیستمی بەرگریی ئاسمانیی ئیسرائیل بەرپەرچی ژمارەیەک مووشەکی ئێرانی دایەوە
06:37
پەیامێکی بەپەلە لە عەلی سیستانییەوە لەبارەی دۆخی ناوچەکە
رووداو
سەرلەبەیانی ئەمڕۆ عەلی سیستانی، مەرجەعی باڵای شیعە لە عێراق راگەیێندراوێکی بڵاوکردەوە و سەرکۆنەی بەئامانجگرتنی فەرماندە و سیاسییە باڵاکانی ئێران دەکات، هۆشداریی لە فراوانبوونی شەڕەکە دەدات و داوای دەستبەجێ گفتوگۆ دەکات.
نوسینگەی عەلی سیستانی مەرجەعی باڵای شیعە لە عێراق بەرەبەیانی ئەمڕۆ راگەیێندراوێکی بڵاوکردەوە و کە تێیدا سیستانی سەرکۆنەکردنی دووپاتکردنەوە لەبەرامبەر هێرشکردنە سەر ئێران و بەئامانجگرتنی فەرماندە سیاسییە باڵاکانی ئەو وڵاتە.
مەرجەعی باڵای شیعە لە عێراق هۆشداری دەدات و هێرشەکان بەرامبەر ئێران بە تاوان لە قەڵم دەدات، هەروەها نووسیویەتی: "جگە لەوەی پێشێلکارییەکی ئاشکرای پێوەرە ئایینی و ئەخلاقییەکان و پێشێلکارییەکی زەقی دابوونەریت و یاسا نێودەوڵەتییەکانە، بۆ دۆخی تەواوی ناوچەکە ئەنجامی زۆر خراپی لێدەکەوێتەوە."
عەلی سیستانی دەڵێت: رەنگە دۆخەکە ببێتە هۆی ئەوەی بەتەواوەتی لە کۆنترۆڵ دەربچێت و پشێوییەکی گەورە دروست بێت کە ئازار و مەینەتیی گەلانی ناوچەکە زیاتر دەکات و تا دوورترین ئاست زیان بە بەرژەوەندییەکانی هەمووان دەگەیەنێت."
مەرجەعی باڵای شیعە لە عێراق دەڵێت: "لێرەوە، بانگەواز لە هەموو لایەنە نێودەوڵەتییە کاریگەرەکان و وڵاتانی جیهان، بەتایبەتی وڵاتە ئیسلامییەکان، دەکەین هەموو توانایەکی خۆیان بخەنەگەڕ بۆ راگرتنی ئەم شەڕە ستەمکارانەیە و دۆزینەوەی چارەسەرێکی ئاشتییانە و دادپەروەرانە بۆ دۆسیەی ئەتۆمیی ئێران، بەپێی بنەماکانی یاسای نێودەوڵەتی."
06:16
میدیای ئێران: دەنگی تەقینەوەی بەهێز لە رۆژئاوای تاران بیسترا
رووداو
بەگوێرەی میدیای ئێران جارێکی دیکە دەنگی تەقینەوەی بەهێز لە رۆژئاوای پایتەختی وڵاتەکە بیسترا و سیستمی بەرگریی ئاسمانی لە شارەکە کاراکراوە.
کاژێر 06:00ـی بەیانیی ئەمڕۆ پێنجشەممە 19-06-2025، میدیای ئێران بۆ سێیەم جار، بیستنی دەنگی تەقینەوەی بەهێزی لە رۆژئاوای تاران پشتڕاستکردەوە.
بەگوێرەی زانیارییەکان، سیستمی بەرگریی ئاسمانی بە مەبەستی پێکانی ژمارەیەک ئامانج، ''سەرکەوتووانە'' کارا کراوە.
هەروەها لە شاری کەرەجی سەر بە پارێزگای ئەلبورز کە نزیکە لە تاران، چەندین جار دەنگی تەقینەوەی بەهێز بیستراوە و میدیاکان باس لە هێرشێکی ''قورس''ـی سوپای ئیسرائیل بۆ سەر چەند ناوچەیەکی ئەو شارە دەکەن.
بیستنی دەنگی تەقینەوە لە چەند شاری ئێران و رۆژهەڵاتی کوردستان لەکاتێکدایە کە بەرەبەیانیی ئەمڕۆ سوپای ئیسرائیل رایگەیاند بە زیاتر لە 50 فڕۆکەی جەنگی هێرش دەکەن سەر چەند ئامانجێک لە تاران.
هاوکات سوپای پاسداران بە چەند مووشەک هێرشی کردە سەر ئیسرائیل و لە راگەیێندراوێکدا ئاشکرای کرد، مووشەکی دوورمەودای سجیلی لە هێرشەکەدا بەکارهێناوە.
لە رۆژی هەینی 13ـی حوزەیرانەوە جەنگی نێوان تەلئەڤیڤ و تاران بە هێرشی راستەوخۆی ئیسرائیل بۆ سەر بنکە ئەتۆمی و سەربازییەکانی ئێران دەستیپێکرد. تاوەکو ئێستا جەنگەکە بەردەوامە و هەردوو لا هێرش دەکەنە سەر یەکدی.
06:11
ترەمپ لەگەڵ تیمی هەواڵگری کۆدەبێتەوە
رووداو
دیار کوردە، پەیامنێری رووداو لە واشنتن: بڕیارە پێشنیوەڕۆی ئەمڕۆ پێنجشەممە بەکاتی واشنتن [ئێوارە بەکاتی هەولێر] دۆناڵد ترەمپ لە ژووری ئۆپەراسیۆنەکان لەگەڵ تیمی هەواڵگری کۆببێتەوە بۆ تاوتوێکردنی شەڕی ئێران و ئیسرائیل.
05:01
راپرسییەک: زۆربەی لایەنگرانی ترەمپ خوازیاری ئەوەن ئەمریکا لە جەنگی ئێران و ئیسرائیل بەدووربێت
دۆناڵد ترەمپ
بەپێی راپرسییەک کە رۆژی چوارشەممە بڵاوکرایەوە، زۆرینەی لایەنگرانی دۆناڵد ترەمپ دژی تێوەگلانی سەربازیی ئەمریکان لە جەنگی ئیسرائیل لەگەڵ ئێران.
راپرسییەکە بە هاوبەشی لەلایەن گۆڤاری ئیکۆنۆمیست و دامەزراوەی YouGov ئەنجامدارە و تێیدا دەرکەوتووە کە 53٪ـی دەنگدەرانی ترەمپ نایانەوێت وڵاتەکەیان بەشداری لە جەنگەکە بکات.
19٪ـی ئەوانەیشی بەشدارییان لە راپرسییەکەدا کردووە، پاڵپشتی لەوە دەکەن کە ئەمریکا بەشداری لە جەنگەکەدا بکات و 28٪ـیشیان دەڵێن، تاوەکو ئێستا خۆیان یەکلایی نەکردووەتەوە.
هەروەها راپرسییەکی دیکە کە لە مانگی نیسانی لەلایەن ئەنجوومەنی شیکاگۆ بۆ کارووباری جیهان ئەنجامدرابوو، دەرخستبوو کە لە هەر 10 هاووڵاتی ئەمریکی، 10ـیان پاڵپشتی لە هەنگاوی دیپلۆماسی و تووندکردنی سزاکا ئابوورییەکانی سەر ئێران.
راپرسییەکە کاتێکدایە کە ژمارەیەک لە سیاسەتمەدارانی کۆماری و هاوپەیمانانی ترەمپ دژایەتیی خۆیان بۆ تێوەگلانی هێزەکانی ئەمریکا لەلایەن سەرۆکەوە بەبێ رەزامەندیی کۆنگرێس دەردەبڕن.
تۆماس ماسی، ئەندامی ئەنجوومەنی نوێنەرانی ئەمریکا کە کەسێکی کۆمارییە، رۆژی دووشەممە لە پۆستێکدا لە تۆڕی ئێکس نووسی: "ئەمە جەنگی ئێمە نییە. بەڵام ئەگەر وابوایە، پێویستە کۆنگرێس بەپێی دەستوورمان بڕیار لەسەر ئەم جۆرە پرسانە بدات."
رۆژی چوارشەممە، تیم بێرچێت کە ئەندامێکی ئەنجوومەنی نوێنەرانی ئەمریکا و سەر بە پارتەکەی ترەمپ، راگەیاند کە دەیەوێت "کەمترین" تێوەگلانی ئەمریکا لە رۆژهەڵاتی نێوەڕاست ببینێت.
تیم هەروەها گوتیشی: "پێویستیمان بە جەنگێکی بێ کۆتایی دیکە نییە لە رۆژهەڵاتی نێوەڕاست. پیاوە بەتەمەنەکان بڕیار دەدەن و گەنجەکان دەمرن، ئەمەش مێژووی جەنگە."
ئەو ئەندامەی ئەنجوومەنی نوێنەرانی ئەمریکا پێی وایە، "پێویستە هەناسەیەکی قووڵ هەڵبمژین و ئەم بابەتە هێور بکەینەوە و بهێڵین ئیسرائیلییەکان کاری خۆیان بکەن."
تەنانەت ئەگەر دیپلۆماسی یان سزای ئابووریش شکست بهێنن، راپرسییەکەی ئیکۆنۆمیست و YouGov دەریخستووە کە ئەمریکییەکان لایەنگری زیادکردنی کردەوەی دیکەن جگە لە تێوەگلانی سەربازی.
لە هەر 10 هاووڵاتی ئەمریکی، شەشیان رایانگەیاندبوو کە پشتگیری لە ئەنجامدانی هێرشی سایبەریی ئەمریکا دەکەن بۆ سەر سیستەمە ئەلیکترۆنییەکانی ئێران، لە کاتێکدا تەنیا 48٪ پشتگیری لە هێرشی ئاسمانی بۆ سەر دامەزراوە ئەتۆمییەکانی ئێران دەکەن.
04:27
سوپای ئیسرائیل داوای 'دەستبەجێ چۆڵکردنی' ناوچەیەکی ئەتۆمیی ئێران دەکات
سوپای ئیسرائیل داوای 'دەستبەجێ چۆڵکردنی' ناوچەیەکی ئەتۆمیی ئێران دەکات
رووداو دیجیتاڵ
سوپای ئیسرائیل هۆشدارییەکی بڵاو کردووەتەوە و تێیدا داوا لە دانیشتووانی بەشێکی شارەکانی خۆنداب و ئەراکی سەر بە پارێزگای مەرکەزیی ئێران دەکات کە ''دەستبەجێ'' ئەو ناوچانە چۆڵ بکەن.
کاژێر 04:23 خولەکی بەرەبەیانیی ئەمڕۆ پێنجشەممە، 19-06-2025، سوپای ئیسرائیل بە هەردوو زمانەکانی فارسی و عەرەبی هۆشدارییەکی بڵاوکردووەتەوە و تێیدا داوای لە دانیشتووانی شارەکانی خۆنداب و ئەراکی سەر بە پارێزگای مەرکەزی کردووە کە دەستبەجێ شارەکە چۆڵ بکەن. ئەو ناوچەیەی ئیسرائیل دیاریکردووە، بنکەیەکی ئەتۆمیی ئێرانی لێیە.
سوپای ئیسرائیل ئاماژەی بەوە کردووە، هێرش دەکاتە سەر ژێرخانی سەربازیی ئێران لەو ناوچانە، ''بۆیە بۆ پاراستنی گیانی خۆتان دەستبەجێ لێێان دوور بکەونەوە.''
04:07
میدیای ئێران: 18 کەس لە مەشهەد بە تۆمەتی دروستکردنی درۆن بۆ ئیسرائیل دەستگیرکران
رووداو
بەگوێرەی میدیای فەرمیی ئێران لە پارێزگای خوراسانی رەزەوی، 18 کەس بە تۆمەتی دروستکردنی درۆن بۆ ئیسرائیل دەستگیرکران.
بەرەبەیانیی ئەمڕۆ پێنجشەممە، 19-06-2025، میدیایی فەرمیی ئێران بڵاوی کردەوە، هێزە ئەمنییەکان لە شاری مەشهەدی سەر بە پارێزگای خوراسانی رەزەوی، 18 کەسیان بە تۆمەتی دروستکردنی درۆن بۆ ئیسرائیل دەستگیر کردووە.
دەستگیرکردنی ئەو کەسانە لەکاتێکدایە کە پێشتر بەڕێوەبەرایەتیی پۆلیسی ئێران و وەزارەتی هەواڵگری، هەڵوەشاندنەوەی ژمارەیەک تۆڕی ''سیخوڕی''ـی مۆسادیان لە تارانی پایتەخت، لوڕستان، کرماشان، زەنجان و چەندین شاری دیکەی ئێران و رۆژهەڵاتی کوردستان پشتڕاست کردبووەوە.
بەگوێرەی زانیارییەکان تاوەکو ئێستا دەست بەسەر بڕێکی زۆر تەقەمەنی، درۆن، فڕۆکەی بێفڕۆکەواندا گیراوە کە وەک هێزە ئەمنییەکانی ئێران دەڵێن، ''تۆڕەکانی سیخوڕیی مۆساد مەبەستیان بووە بۆ کاری تێکدەرانە و تۆقاندنی خەڵک بەکاریان بهێنن.''
جەنگی نێوان ئێران و ئیسرائیل پێی ناوەتە حەوتەم رۆژەوە و هەردوو وڵات، بە بەردەوامی هێرش دەکەنە سەر یەکدی.
03:23
میدیای ئێران: سیستمی بەرگریی ئاسمانی لە ناوەندی تاران و چەند شارێکی دیکە کاراکراوە
رووداو
پەیمان محەممەد
بەگوێرەی میدیای ئێرانی، لە ئەنجامی زنجیرە هێرشێکی سوپای ئیسرائیل، سیستمی بەرگریی ئاسمانی لە ناوەندی تارانی پایتەخت و ئیسفەهان کاراکراوە.
کاژێر 03:18 خولەکی بەرەبەیانیی ئەمڕۆ پێنجشەممە 19-06-2025، میدیای ئێران رایگەیاند، لە درێژەی هێرشەکانی سوپای ئیسرائیل بۆ سەر ناوەندی پایتەختی وڵاتەکە، سیستمی بەرگیی ئاسمانی کاراکراوە و بە ''قورسی'' بەرپەرچی هێرشەکە دراوەتەوە.
هاوکات هێرشکردنە سەر ئیسفەهان پشتڕاستکراوەتەوە و وەک میدیای ئێران دەڵێت، ''بە قورسی بەرەوڕووی چەند ئامانجێکی هێرشبەر بوونەتەوە.''
میدیای سوپای پاسدارانیش باس لەوە دەکات، لە شارەکانی مەلارد، باقرشار و ئیسلامشاری سەر بە پارێزگای تاران دەنگی تەقینەوە بیستراوە و سیستمی بەرگریی ئاسمانیش کاراکراوە.
کاراکردنی سیستمی بەرگریی ئاسمانی لە تاران و شارەکانی دیکە لەکاتێکدایە کە چەند کاژێرێک لەمەوپێش سوپای ئیسرائیل رایگەیاند، بە زیاتر لە 50 فڕۆکەی جەنگی هێرش دەکەنە سەر چەند ئامانجێک لە تاران.
هەروەها سوپای پاسداران دوای زنجیرە هێرشێکی مووشەکی راگەیێندراوێکی بڵاوکردەوە کە تێیدا هاتبوو، بە مووشەکی سجیل چەند ناوچەیەکیان لە ئیسرائیل کردووەتە ئامانج.
جەنگی نێوان ئێران و ئیسرائیل پێی ناوەتە حەوتەم رۆژەوە و هەردوو وڵات، بە بەردەوامی هێرش دەکەنە سەر یەکدی.
03:19
میدیای ئێرانی: سیستمی بەرگریی ئاسمانی لە ناوەندی تاران و ئیسفەهان چالاککرا
میدیای ئێرانی: سیستمی بەرگریی ئاسمانی لە ناوەندی تاران و ئیسفەهان چالاککرا
03:15
بۆمبە وێرانکەرەکەی ئەمریکا کە ئیسرائیل داوای دەکات
شارەزایان پێیانوایە کە بۆمبی 30 هەزار پاوەندیی " قەڵاشکێن"ـی ئەمریکا تاکە چەکە کە بتوانێت وێستگەی ئەتۆمی فۆردۆی ئێران لەنێوببات.
— Rudaw (@Rudawkurdish) June 18, 2025
"قەڵاشکێن" (Bunker Buster) جۆرە بۆمبێکە کە بەتایبەتی بۆ بڕینی ئامانجە پتەو و قایمەکان یان ئەوانەی لە قووڵایی زەویدا شاردراونەتەوە دیزاین کراوە، وەکو… pic.twitter.com/cPl9jwyQky
03:14
چین: هاووڵاتیانمان بە پاس لە ئیسرائیل دەگوازینەوە
چین: هاووڵاتیانمان بە پاس لە ئیسرائیل دەگوازینەوە
باڵیۆزخانەی چین لە ئیسرائیل دەڵێت، رۆژی هەینی هاوکاریی هاووڵاتیانیان دەکەن بۆ ئەوەی لە رێگەی میسرەوە ئیسرائیل جێبهێڵن. دەشڵێت، ئەگەری خراپتربوونی دۆخەکە لە ئارادایە
01:54
میدیای فەرمیی ئێران: لە رۆژئاوای وڵات درۆنێک خرایە خوارەوە
بەگوێرەی میدیای فەرمیی ئێران لە رۆژئاوای وڵاتەکە لە ئەنجامی هێرشێکی ئیسرائیلدا، سیستمی بەرگریی ئاسمانی کارا کراوە و درۆنێک کراوەتە ئامانج.
بەرەبەیانیی ئەمڕۆ پێنجشەممە، 19-06-2025، میدیای فەرمیی ئێران بەبێ ئاماژەدان بە شارێکی دیاریکراو بڵاوی کردەوە، سیستمی بەرگریی ئاسمانی لە رۆژئاوای ئێران، درۆنێکی ئیسرائیلی بە شێوەیەکی ''سەرکەوتوو'' کردووەتە ئامانج.
هاوکات، گرتە ڤیدیۆیەکیش بڵاوکراوەتەوە کە تێیدا کردنە ئامانجی درۆنێک لەلایەن سیستمی بەرگریی ئاسمانییەوە دەردەکەوێت. وەک میدیای ئێران دەڵێت، درۆنەکە لە جۆری ''هێرمس'' بووە.
ڤیدیۆ.. میدیای فەرمیی ئێران دەڵێت، سیستمی بەرگریی وڵاتەکە درۆنێکی ئیسرائیلیی لە رۆژئاوای ئێران خستووەتە خوارەوە pic.twitter.com/8qMNlfdwdC
— Rudaw (@Rudawkurdish) June 18, 2025
هێرمس یەکێک لە گرنگترین درۆنەکانی تەلئەڤیڤە کە لە لایەن کۆمپانیای ''ئێلبیت سیستم''ـی ئیسرائیلییەوە دروست کراوە. درۆنەکە لە دوو جۆری ''هێرمس 450'' و ''هێرمس 900''ـدا خراونەتەڕوو و توانای کۆکردنەوەی زانیاری و بە ئامانجگرتنیان هەیە.
جەنگی نێوان ئیسرائیل و ئێران پێی ناوەتە حەوتەم رۆژەوە و هەردوو وڵات بەردەوامن لە هێرشکردنە سەر یەکدی.
01:25
پووتین: ئێران داوای هاوکاری لێنەکردووین
کۆبوونەوەکەی پووتین
ڤلادیمیر پووتین، سەرۆکی رووسیا لە سانت پترسبۆرگەوە رایگەیاند، رووسیا "هیچ شتێک بەسەر هیچ کەسێکدا ناسەپێنێت، ئێمە تەنها باسی ئەوە دەکەین کە چۆن رێگەیەکی گونجاو بۆ دەرچوون لەم دۆخە دەبینین."
گوتیشی کە بڕیارەکە دەبێت بدرێتە دەست "سەرکردایەتیی سیاسیی هەموو ئەم وڵاتانە، بە پلەی یەکەم ئێران و ئیسرائیل."
لە وەڵامی پرسیارێکی ئاژانسی فرانس پرێسدا کە ئایا ئێران داوای یارمەتی لە رووسیا کردووە، پووتین وەڵامی دایەوە، "هاوڕێ ئێرانییەکانمان داوای ئەمەیان لێ نەکردووین."
01:23
کۆبوونەوەکەی دۆناڵد ترەمپ لە ژووری ئۆپەراسیۆنەکان تەواوبوو
پێشتر دۆناڵد ترەمپ بە رۆژنامەڤانانی راگەیاند، کۆبوونەوەیەکی گرنگی هەیە لە ژووری ئۆپەراسیۆنەکان. دوای نزیکەی کاژێرێک کۆبوونەوەکە تەواو بوو و هیچ راگەیێندراوێکیش لەبارەی کۆبوونەوەکە نییە.
01:18
میدیای ئێران: تۆڕێکی سیخوڕیی مۆساد هەڵوەشێندرایەوە
ئاڵای ئیسرائیل و لۆگۆی مۆساد.
بەگوێرەی میدیای ئێران، هێزە ئەمنییەکان لە پارێزگای کۆھگیلوویە و بۆیەر ئەحمەد، تۆڕێکی ''سیخوڕی''ـی مۆسادیان هەڵوەشاندووەتەوە و چەند کەسێکیان دەستگیرکردوون.
بەرەبەیانیی ئەمڕۆ پێنجشەممە، 19-06-2025، میدیای ئێران بڵاوی کردەوە، لە درێژەی جەنگی نێوان ئیسرائیل و وڵاتەکە، هێزە ئەمنییەکان لە پارێزگای کۆھگیلوویە و بۆیەر ئەحمەد ، چەند کەسێکیان بە تۆمەتی ''سیخوڕی''ـی بۆ مۆساد دەستگیرکردوون.
وەکو میدیای ئێران دەڵێت، ''ئەو تۆڕە سیخوڕییە، مەبەستیان بوو بە ئامادەکردنی چەک و دابەشکردنی کار لە شارە جیاجیاکانی پارێزگاکە، کردەوەی تێکدەرانە ئەنجام بدەن''.
پێشتر بەڕێوەبەرایەتیی پۆلیسی ئێران و وەزارەتی هەواڵگری، هەڵوەشاندەوەی چەندین ''تۆڕی سیخوڕی''ـیان لە پارێزگاکانی تاران، کرماشان، زەنجان و لوڕستان راگەیاندبوو.
جەنگی نێوان ئێران و ئیسرائیل پێی ناوەتە حەوتەم رۆژەوە و هەردوو وڵات بە بەردەوامی هێرش دەکەنە سەر یەکدی.
لە دوایین پێشهاتەکاندا سوپای پاسداران رایگەیاندووە، بە مووشەکی دوورمەودای سجیل، ژمارەیەک ناوچەی لە ئیسرائیل کردووەتە ئامانج. لە بەرامبەردا سوپای ئیسرائیل دەڵێت، بە 50 فڕۆکە چەندین ئامانجی لە تاران و شارەکانی دیکەی ئێران پێکاوە.
01:00
پەیامێکی تووند لە کۆریای باکوورەوە لەبارەی شەڕی ئێران و ئیسرائیل
رووداو
وەزارەتی دەرەوەی کۆریای باکوور دەڵێت، وڵاتەکەیان "بە تووندی سەرکۆنەی دەستپێکردنی هێرشەکانی ئیسرائیل بۆ سەر ئێران دەکەین" و هۆشداری دەداتە ئەمریکا و زلهێزە ئەوروپییەکان لە "خۆشکردنی ئاگری شەڕ".
گوتەبێژێک لە وەزارەتەکە لە راگەیێندراوێکدا کە لەلایەن ئاژانسی هەواڵی فەرمیی (KCNA)ـەوە بڵاوکراوەتەوە، دەڵێت: "کۆریای باکوور نیگەرانیی قووڵی خۆی سەبارەت بە هێرشە سەربازییەکەی ئیسرائیل دەردەبڕێت و بە تووندی سەرکۆنەی دەکات."
گوتیشی، کە "کوشتنی خەڵکی سڤیل لەلایەن ئیسرائیلەوە تاوانێکی دژی مرۆڤایەتییە کە ناکرێت لێخۆشبوونی بۆی هەبێت."
وەزارەتی دەرەوەی کۆریای باکوور هۆشداری دەدات لەوەی "کردەوەی تیرۆریستی بە سپۆنسەری ئیسرائیل مەترسیی هەڵگیرساندنی شەڕێکی نوێی سەرتاسەری لە رۆژهەڵاتی نێوەڕاست زیاد دەکات."
00:41
هەوڵێکی نوێی دیپلۆماسی بۆ ئاگربەستی ئێران و ئیسرائیل
مانەوە لە پەناگەکانی ئیسرائیل لە ترسی هێرشی ئێران. وێنە: AFP
بەرپرسێکی باڵای ئێرانی لە وەزارەتی دەرەوەی ئێران کە داوایکردووە ناوی ئاشکرا نەکرێت، دەڵێت، "ئێران پێشنیازەکەی سەرۆک ترەمپ بۆ یەکدیبینین قبووڵ دەکات."
رۆژی دووشەممەی ئەم هەفتەیە، دۆناڵد ترەمپ ئاماژەی بە ئەگەری دیدارێک لەگەڵ ئێرانییەکان کرد. دیدارەکە لەنێوان شاندی ئێران و نێردەی تایبەتی خۆی، ستیڤ ویتکۆف، یان تەنانەت جەی دی ڤانسی جێگری بێت.
بەرپرسە ئێرانییەکە قسەی بۆ نیویۆرک تایمز کردووە و گوتوویەتی، عەباس عێراقچی، وەزیری دەرەوەی ئێران دیداری لەو جۆرە قبووڵ دەکات بۆ گفتوگۆکردن لەسەر ئاگربەست لەگەڵ ئیسرائیل و بەرنامە ئەتۆمییەکەی وڵاتەکەی.
عێراقچی لە نوێترین راگەیێندراویدا ئەمشەو، چوارشەممە ئاماژەی بەوە کردووە، "نە هەرگیز نە بە نیازی دروستکردنی چەکی ئەتۆمی بووین و نە لە داهاتووشدا دەمانەوێت دروستی بکەین."
سەرەتای هەفتەکەش عێراقچی رایگەیاندبوو، ئێران دەگەڕێتەوە بۆ دیپلۆماسی ئەگەر ئیسرائیل هێرشەکانی رابگرێت. هەروەها گوتبووی، دۆناڵد ترەمپ دەتوانێت بە یەک پەیوەندیی تەلەفۆنی بۆ سەرۆکوەزیرانی ئیسرائیل، کۆتایی بە ململانێکە بهێنێت.
لە شۆڕشی 1979ـی ئێرانەوە کە حکومەتێکی ئایینی لە ئێران دامەزراند، هیچ جێگرێکی سەرۆک یان سەرۆکێکی ئەمریکی لەگەڵ بەرپرسانی ئێران کۆنەبووەتەوە، تەنانەت دیداریش لەگەڵ بەرپرسانی باڵای کابینەی ئەمریکا دەگمەن بووە.
پێش ئەوەی هەفتەی رابردوو ئیسرائیل هێرش بکاتە سەر ئێران، وڵاتەکە لەگەڵ ویلایەتە یەکگرتووەکانی ئەمریکا لە نێوەڕاستی دانوستاندندا بوون لەسەر بەرنامەی ئەتۆمیی وڵاتەکە بە نێوەندگیریی عومان. هەردوولا پێشنیازی نووسراویان بۆ چوارچێوەی رێککەوتنێک سەبارەت بە بەرنامە ئەتۆمییەکەی ئێران ئاڵوگۆڕ کردبوو، هەرچەندە هێشتا زۆر لێک دوور بوون.
ئێستا بنیامین نەتەنیاهوو داوای لە دۆناڵد ترەمپ کردووە بەشداریی شەڕەکە بکات و، چەکی بەهێز کە ئیسرائیل نییەتی بەکاربهێنێت بۆ لەناوبردنی بنکە ئەتۆمییە ژێرزەمینییەکانی ئێران.
سەرۆکی ئەمریکا ئەم هەفتەیە بە ئاشکرا باسی ئەگەری بۆردوومانکردنی ئێران و تەنانەت کوشتنی عەلی خامنەییش کرد، بەڵام ئێوارەی رۆژی چوارشەممە گوتی، هێشتا بڕیاری نەداوە چۆن هەنگاو بنێت، هەروەها گوتی "هێشتا درەنگ نییە بۆ دیپلۆماسی."
رۆژی چوارشەممە لە وتارێکی تەلەڤزیۆنیدا، لە پەناگەیەکی سەلامەتی ژێرزەمینییەوە، عەلی خامنەیی بیرۆکەی دانوستاندنەکانی رەتکردەوە و گوتی: "ئەوان ناتوانن نە شەڕ و نە ئاشتی بەسەر کۆماری ئیسلامیی ئێراندا بسەپێنن."
دوای نزیکەی هەفتەیەک لە جەنگەکە، هەوڵێکی دیپلۆماسیی نوێ سەریهەڵداوە بە هیوای نێوەندگیرییکردن بۆ ئاگربەست پێش ئەوەی ململانێکە لایەنی دیکەی ناوچەکە یان ویلایەتە یەکگرتووەکان تێوەبگلێنێت. وەزیرانی دەرەوە و سەرۆکی وڵاتانی ئەورووپی، تورکیا و وڵاتانی عەرەبی لەگەڵ ئێران و ویلایەتە یەکگرتووەکان لە گفتوگۆدان بۆ ئەو مەبەستە.
نوێنەرایەتیی ئێران لە نەتەوە یەکگرتووەکان رۆژی چوارشەممە داوای کۆبوونەوەیەکی بەپەلەی ئەنجوومەنی ئاسایشی کرد، کۆبوونەوەکە بڕیارە بەیانیی رۆژی هەینی بەڕێوەبچێت.
00:35
وەزیری دەرەوەی ئێران: هەرگیز هەوڵی بەدەستهێنانی چەکی ئەتۆمیمان نەداوە و هەوڵیشی بۆ نادەین
رووداو
عەباس عێراقچی، وەزیری دەرەوەی ئێران لە دوایین پەیامی دا دەڵێت، "نە هەرگیز نە بە نیازی دروستکردنی چەکی ئەتۆمی بووین و نە لە داهاتووشدا دەمانەوێت دروستی بکەین."
وەزیری دەرەوەی ئێران لە پۆستێکی ئێکسدا چوار خاڵی خستووەتە روو کە دەڵێت: "لەم کاتە دا دەبێت هەموو جیهان ئەمە بزانێت."
(1) ئێران تەنیا بۆ بەرگری لە خۆی هەنگاو دەنێت. تەنانەت لەبەرامبەر قێزەونترین دەستدرێژی دژی گەلەکەمان، ئێران تا ئێستا تەنیا وەڵامی رژێمی ئیسرائیلی داوەتەوە و نەک ئەو لایەنانەی کە یارمەتیدەر و هاندەرین. هەروەک چۆن نەتەنیاهوو ئەم شەڕەی بۆ لەنێوبردنی دیپلۆماسی هێنایە ئاراوە، دەبێت جیهانیش زۆر نیگەران بێت لە هەوڵە بەردەوامەکانی رژێمی شکستخواردووی ئیسرائیل بۆ ئەوەی لایەنەکانی تر فریای بکەون و ئاگری شەڕەکە بۆ ناوچەکە و دەرەوەی فراوان بکەن.
(2) ئێران بە کردەوە ئەوەی سەلماندووە کە هەمیشە بە ئاشکرا پێوەی پابەند بووە: ئێمە هەرگیز هەوڵی بەدەستهێنانی چەکی ئەتۆمیمان نەداوە و هەرگیزیش هەوڵی بۆ نادەین. ئەگەر وانەبوایە، چ پاساوێک لە دەستدرێژییەکەی ئێستای تەنیا رژێمی خاوەن چەکی ئەتۆمیی ناوچەکە باشتر بوو بۆ پەرەپێدانی ئەو چەکە نامرۆڤانانە؟
(3) ئێران بە شانازی و ئازایەتییەوە بەردەوام دەبێت لە پەیڕەوکردنی مافی بەرگری لە خۆی و وا دەکەین دەستدرێژیکار پەشیمان ببێتەوە و باجی هەڵە گەورەکەی بدات.
(4) جگە لە رژێمی ناشەرعی، جینۆسایدکار و داگیرکەری ئیسرائیل، ئێمە پابەندین بە دیپلۆماسییەوە. وەک پێشوو، ئێمە لە روانگەماندا جددیین و روومان لە داهاتووە.
00:25
سوپای ئیسرائیل بۆ خەڵک: ئاساییە لە پەناگەکان دەربچن
دوای هێرشە مووشەکییەکەی ئێران، سوپای ئیسرائیل هۆشداریی نوێی بۆ هاووڵاتییانی راگەیاند و دەڵێت، دوای هەڵسەنگاندنی دۆخەکە، ئاساییە ئەگەر لە پەناگەکان دەربچن.
00:12
ڤیدیۆی بەرپەرچدانەوەی مووشەکەکانی ئێران لە تەل ئەڤیڤ
ڤیدیۆی بەرپەرچدانەوەی مووشەکەکانی ئێران لە تەل ئەڤیڤ
کەمێک پێش ئێستا بینیمان کە مووشەکی ئێران گەیشتنە ئاسمانی تەل ئەڤیڤ. بەپێی ڤیدیۆکان مووشەکەکان لە ئاسمان بەرپەرچ درانەوە.
ڤیدیۆکەی ببینە
00:11
ئێران ژمارەیەک مووشەکی دیکەی ئاراستەی ئیسرائیل کرد
ئێران ژمارەیەک مووشەکی دیکەی ئاراستەی ئیسرائیل کرد
سوپای ئیسرائیل رایگەیاند، ئێران ژمارەیەک مووشەکی دیکەی ئاراستەی وڵاتەکەیان کردووە. بەپێی ڤیدیۆکان، مووشەکەکانی ئێران لە ئاسمانی تەل ئەڤیڤ دەبیندرێن، بەڵام دیار نین کە هیچیان لە شارەکە کەوتبنە خوارەوە.
22:37
سوپای ئیسرائیل: هێرشمان کردە سەر 20 ئامانجی سەربازی
سوپای ئیسرائیل راگەیێندراوی نوێی هەیە و دەڵێت، 60 فڕۆکەی جەنگی بە هاوکاریی رێنوێنیی هەواڵگریی ورد، لە چەند کاژێری رابردوودا شەپۆلێکی هێرشیان بۆ سەر زیاتر لە 20 ئامانجی سەربازی لە تاران کردووە.
22:33
ترەمپ: رقم لە بینینی مردنە
دۆناڵد ترەمپ، سەرۆکی ئەمریکا
دۆناڵد ترەمپ، سەرۆکی ئەمریکا لە کۆشکی سپی قسەی بۆ رۆژنامەڤانان کرد و رایگەیاند، "کەمێکی دیکە لە ژووری ئۆپەراسیۆنەکان (سیچوەیشن رووم)" کۆبوونەوەی هەیە. گوتیشی، با بزانین چی روودەدات، "رقم لە بینینی مردنە."
سەرۆکی ئەمریکا بانگەشەی ئەوەشی کرد کە ئێران دەیانەوێت بچنە کۆشکی سپی و لەگەڵیدا کۆببنەوە.
ترەمپ گوتی، ئێران "دەبوو رێککەوتنەکەیان بکردایە، من رێککەوتنێکی گەورەم بۆیان هەبوو... لە کۆتاییدا بڕیاریان دا ئەنجامی نەدەن و، ئێستا خۆزگە دەخوازن بیان کردایە."
هەروەها گوتی، نوێنەرانی ئێران "دەیانەوێت کۆببنەوە" و بانگەشەکەی دووپاتکردەوە کە ئەوان "دەیانەوێت بێنە کۆشکی سپی".
ئەمە یەکەم جار نییە ترەمپ دەڵێت، ئێران دەیەوێت کۆبوونەوەی لەگەڵدا بکات، پێشتر دەسەڵاتدارانی ئێران رایانگەیاندبوو ئەوە درۆیە و لە تۆڕە کۆمەڵایەتییەکاندا نووسیبوویان: "هیچ بەرپرسێکی ئێرانی داوای نەکردووە لە بەردەم دەروازەکانی کۆشکی سپیدا بپاڕێتەوە."
هەروەها پرسیاری زیاتری لێکرا کە ئایا رژێمەکە دەکرێت بگۆڕێت، ئەویش لە وەڵامدا گوتی: "بێگومان. هەموو شتێک دەکرێت رووبدات، وانییە؟"
22:19
نەتەنیاهوو سوپاسی ترەمپ دەکات بۆ 'پشتیوانی' لە جەنگی ئێراندا
وێنەیەکی ترەمپ و نەتەنیاهوو لە کۆشکی سپی
بنیامین نەتەنیاهوو، سەرۆکوەزیرانی ئیسرائیل رۆژی چوارشەممە سوپاسی دۆناڵد ترەمپ، سەرۆکی ئەمریکای کرد بۆ "پشتیوانییەکەی لە بەرگریکردن لە ئاسمانی ئیسرائیل"، لە کاتێکدا ئیسرائیل شەش رۆژە لەگەڵ ئێران هێرش دەکەنە سەریەکدی.
دوای دەیان ساڵ لە دووژمنایەتی و جەنگێکی سێبەری درێژخایەن، شەڕ و پێکدادان رۆژی هەینی دەستیپێکرد کاتێک ئیسرائیل دەستی بە هەڵمەتێکی بۆردوومانی بەرفراوان کرد کە وای لە ئێران کرد بە مووشەک و درۆن وەڵام بداتەوە.
نەتەنیاهوو لە گوتارێکی تەلەڤزیۆنیدا گوتی: "دەمەوێت سوپاسی سەرۆک ترەمپ بکەم، دۆستێکی گەورەی دەوڵەتی ئیسرائیلە."
"سوپاسی دەکەم بۆ ئەوەی لە تەنیشتمانەوەیە و سوپاسی پشتیوانیی ویلایەتە یەکگرتووەکان لە بەرگریکردن لە ئاسمانی ئیسرائیل."
نەتەنیاهوو گوتی ئیسرائیل بە هێزەوە لە ئێران دەدات، هاوکات دانی بەوەشدا نا کە ئیسرائیل "زیانی بەئازار"ـی بەرکەوتووە لە جەنگەکەدا.
سەرۆکوەزیرانی ئیسرائیل گوتی: "ئێمە بە هێزێکی گەورەوە لە رژێمی ئایەتوڵڵاکان دەدەین. ئێمە لە بەرنامە ئەتۆمییەکەیان، مووشەکەکانیان، بارەگا سەربازییەکانیان و هێماکانی دەسەڵاتیان دەدەین."
هەروەها گوتی: "زیانی زۆرمان بەرکەوتووە، زیانی بەئازار؛ بەڵام بەرەی ناوخۆ پتەوە، گەل بەهێزە و دەوڵەتی ئیسرائیل لە هەموو کاتێک بەهێزترە."
بەپێی نووسینگەی نەتەنیاهوو، لە رۆژی هەینییەوە لانیکەم 24 کەس لە ئیسرائیل کوژراون و سەدانی دیکەش بریندار بوون.
22:15
ئەمریکا مردنی سەربازێکی لە هەولێر رادەگەیێنێت
ئەمریکا مردنی سەربازێکی لە هەولێر رادەگەیێنێت
وەزارەتی بەرگریی ئەمریکا ئەمڕۆ گیانلەدەستدانی سەربازێکی وڵاتەکەی لە هەولێر راگەیاند کە لە چوارچێوەی هێزەکانی هاوپەیمانیی نێودەوڵەتی لە خزمەتدا بووە.
سەربازەکە ناوی سۆڵ فابیان گۆنزالێزە و تەمەنی 26 ساڵان بووە. ئەمریکا دەڵێت، هۆکاری گیانلەدەستدانەکەی پەیوەندی بە شەڕەوە نەبووە و لێکۆڵینەوەی لێدەکەن.
21:39
چی لەبارەی مووشەکە جیاوازەکەی ئێران دەزانین؟
چی لەبارەی مووشەکە جیاوازەکەی ئێران دەزانین؟
سوپای پاسداران زانیاری لەبارەی ئەو مووشەکە بڵاوکردەوە کە لە 12ـەمین شەپۆلی هێرشەکانیان بۆ سەر ئێران بەکاریان هێناوە و ناوی سجیل 2 ـە.
زانیارییەکان:
ناوی سجیل 2 ـە و بالیستییە
بە دوو قۆناخ هەڵدەدرێت و بەشێوەی ستوونی دەڕوات
درێژییەکەی 17.5 مەترە
ساڵی 2008 دروستکراوە
تاوەکو 2000 کیلۆمەتر دەبڕێت
21:34
درۆنێکی بۆمبڕێژکراو لە سنووری هەولێر تێکشکێندرا
درۆنێکی بۆمبڕێژکراو لە سنووری هەولێر تێکشکێندرا
بەگوێرەی زانیارییەکانی دژەتیرۆری کوردستان، ئێوارەی ئەمڕۆ چوارشەممە، لە نزیک گوندی شێراوا لە سنووری هەولێر درۆنێکی بۆمبڕێژکراو تێکشکێندراوە و خراوەتە خوارەوە.
دژەتیرۆر نەیگوتووە کە درۆنەکە سەر بە ئێران بووە یان ئیسرائیل، تەنیا ئەوەی گوتووە کە "خۆشبەختانە هیچ زیانێکی ماددی و گیانی لێ نەکەوتووەتەوە."
21:31
ئیسرائیل دەڵێت مووشەکی زیاتر ئاراستەی تاران دەکات
لە کۆنفرانسی رۆژانەیدا، سوپای ئیسرائیل رایگەیاند، شەپۆلێکی نوێی هێرشیان دەستپێکردووە کە سیستمە مووشەکییەکان و شوێنەکانی کۆگاکردنیان لە تاران کردووەتە ئامانج.
ئیسرائیل هەروەها دەڵێت، لە هێرشێکی سێ شەپۆلیدا کە سێ کاژێری خایاندووە، زیانیان بە بنکەیەکی بەرهەمهێنانی ئامێرەکانی (سەنتەرفیوج) گەیاندووە.
20:51
سەدر داوای خۆپێشاندانی جەماوەری دوای نوێژی هەینی دەکات
موقتەدا سەدر، سەرۆکی رەوتی سەدر
سەرۆکی رەوتی سەدر، لە دژی هێرشەکانی ئیسرائیل بۆ سەر ئێران و چەند ناوچەیەکی دیکەی رۆژهەڵاتی ناوەڕاست، داوا دەکات خۆپێشاندانی جەماوەری ئاشتیخوازانە دوای نوێژی هەینی لە سەرجەم پارێزگاکانی عێراق بکرێت.
ئەمشەو، 18ـی حوزەیرانی 2025، موقتەدا سەدر، سەرۆکی رەوتی سەدر، پەیامێکی لە تۆڕی ئێکس بڵاوکردەوە و رایگەیاند، بۆ سەرکۆنەکردن و وەستان لە دژی "تیرۆری زایۆنی و ئەمریکی و فراوانکردنی بازنەی داگیرکارییەکانیان و دوژمنایەتیکردنی گەلان و ئاینەکان لە رێگەی کۆمەڵکوژکردن و دەستدرێژیکردنە سەر وڵاتانی عەرەبی و ئیسلامی هەر لە فەلەستینەوە بگرە بەرەو لوبنان، سووریا یەمەن و دواجاریش بۆ ئێرانی دراوسێمان."
سەدر دەڵێ، "بۆیە لەژێر ناونیشانی نەخێر نەخێر بۆ ئیسرائیل و نەخێر نەخێر بۆ ئەمریکا کە داینامۆی سەرەکی و یەکەمی هەموو جەنگەکانی جیهانە."
ئەو رێبەرەی رەوتی سەدر باس لەوە دەکات: "لەم چوارچێوەیەدا داوا دەکەم سبەی دوای نوێژی هەینی، خۆپێشاندانێکی جەماوەری رێکخراو و ئاشتیخوازانە لە سەرجەم پارێزگاکان بکرێت. هەروەها داوا لە رێکخەرانی خۆپێشاندانەکان دەکەم رێگە نەدەن گەندەڵکاران بەشداری لە خۆپیشاندانەکان بکەن."
20:47
بەڕێوەبەری نووسینگەی رووداو لە واشنتن: ترەمپ و کۆشکی سپی خۆیان یەکلاکردووەتەوە
بەڕێوەبەری نووسینگەی رووداو لە واشنتن: ترەمپ و کۆشکی سپی خۆیان یەکلاکردووەتەوە
لە ئەمریکاوە بڕیاری یەکلاکەرەوە لەبارەی جەنگەکە دەدرێت و دۆناڵد ترەمپ خۆی یەکلایی دەکاتەوە. بەڕێوەبەری نووسینگەی رووداو لە واشنتن دەڵێت، کۆشکی سپی و دۆناڵد ترەمپ تاڕادەیەکی زۆر خۆیان یەکلایی کردووەتەوە.
ئەمریکا دوو مەرجی هەیە: ئێران بێمەرج خۆی بەدەستەوە بدات. دووەمیش ئەوەیە کە واز لە پیتاندنی یۆرانیۆم و پڕۆگرامی ئەتۆمی بهێنێت، پاشان گفتوگۆی لەگەڵ دەکات.
بەپێی زانیارییەکان، لە کۆبوونەوەکەی رۆژی سێشەممە لە سیچوەیشن رووم، نوێنەری ترەمپ بۆ رۆژهەڵاتی نێوەڕاست ئامادەبووە و ئەو بڕیارە دراوە کە ئەگەر ئێران بە مەرجەکان رازی نەبێت، ئەمریکا دەچێتە جەنگەکەوە.
بەشداریی ئەمریکا لە جەنگەکە بە لێدانی بنکەی ئەتۆمیی فۆردۆ دەستپێدەکات.
20:47
لە رۆژی شەشەمی جەنگەکەدا چی روویدا؟
رۆژی شەشەمی ململانێکانە، ئێران و ئیسرائیل هێرش دەکەنە سەر یەکدی و دۆناڵد ترەمپیش لە لێواری بڕیاردانە بۆ بەشداریکردن لە جەنگەکە. ئەمە دوایین پێشهاتەکانن
ئیسرائیل و ئێران رۆژی چوارشەممە، لە شەشەمین رۆژی هێرشەکاندا لە چڕترین رووبەڕووبوونەوەی مێژوویاندا، دیسان هێرشیان کردەوە سەر یەکدی، ئەمەش ترسەکانی درێژبوونەوەی جەنگەکە کە رەنگە رۆژهەڵاتی نێوەڕاست بگرێتەوە، زیاد دەکات.
زنجیرەیەکی نوێی مووشەک
سوپای ئیسرائیل رۆژی چوارشەممە رایگەیاند، مووشەکی نوێی لە ئێرانەوە دەستنیشانکردووە و گوتیشی سیستمی بەرگرییەکەی بەرپەرچی دانەوە.
ئەم راگەیێنراوە دوای ئەوە هات، ئێران ئاگادارییەکی چۆڵکردنی بۆ دانیشتووانی شاری حەیفای ئیسرائیل دەرکرد.
هاوکات، مایک هاکەبی، باڵیۆزی ئەمریکا لە ئیسرائیل، پلانی بۆ گواستنەوەی ئەمریکییەکان لە رێگەی ئاسمان و دەریاوە راگەیاند.
پچڕانی نزیک لە تەواوەتیی ئینتەرنێت
رێکخراوی چاودێریی نێتبلۆکس کە بنکەکەی لە لەندەنە، لە پۆستێکدا لە تۆڕی ئێکس (X) نووسی، ئێران لە "پچڕانێکی نزیک لە تەواوەتیی ئینتەرنێت" دایە.
ئێران هەفتەی رابردوو رایگەیاندبوو، لەکاتی جەنگەکە سنووردارکردنی کاتی دەخاتە سەر ئینتەرنێت و رۆژی چوارشەممە سنووردارکردنەکەی قورستر کرد.
وەزارەتی پەیوەندییەکان لە راگەیێندراوێکدا کە ئاژانسی هەواڵی فارس بڵاویکردەوە، گوتی سنووردارکردنەکان بەهۆی "خراپ بەکارهێنانی تۆڕی پەیوەندییەکانی وڵاتەکە لەلایەن ئیسرائیلەوە بۆ مەبەستی سەربازی" سەپێندراون.
ژمارەیەکی زۆر ماڵپەڕ و ئەپڵیکەیشن لەکارکەوتوون.
تەلەڤزیۆنی فەرمیی ئێران رۆژی سێشەممە داوای لە ئێرانییەکان کرد ئەپڵیکەیشنی واتسئەپ لە تەلەفۆنەکانیان بسڕنەوە، بە تۆمەتی ئەوەی کە "شوێنی بەکارهێنەران و زانیارییە کەسییەکان کۆدەکاتەوە و بۆ دووژمنی زایۆنی دەیانگەیەنێت."
گوتەبێژێکی واتسئەپ وەڵامی بانگەشەکانی دایەوە و گوتی: "نیگەرانین کە ئەم راپۆرتە ناڕاستانە ببنە بیانوو بۆ بلۆککردنی خزمەتگوزارییەکانمان لە کاتێکدا کە خەڵک زیاتر لە هەموو کاتێک پێویستیان پێیەتی."
ترەمپ لەبارەی هێرش و دانوستاندنەوە
دۆناڵد ترەمپ رۆژی چوارشەممە رایگەیاند، تاران پەیوەندیی کردووە و داوای دانوستاندنی کردووە بۆ کۆتاییهێنان بە ململانێکە. گوتی: "رەنگە بیکەم، رەنگە نەشیکەم."
لەبارەی هێرشیش ترەمپ بە رۆژنامەڤانانی گوت: "رەنگە بیکەم، رەنگە نەیکەم. مەبەستم ئەوەیە، کەس نازانێت من چی دەکەم. دەتوانم ئەمەتان پێ بڵێم، کە ئێران کێشەی زۆری هەیە و دەیانەوێت دانوستاندن بکەن."
ترەمپ گوتی، ئێران تەنانەت پێشنیازی ناردنی بەرپرسانی بۆ کۆشکی سپی کردووە بۆ گفتوگۆ لەسەر بەرنامە ئەتۆمییەکەی تاران و کۆتاییهێنان بە هێرشە ئاسمانییەکانی ئیسرائیل، بەڵام گوتی "زۆر درەنگە." کاتێک پرسیاری لێکرا ئایا بۆ دانوستاندن زۆر درەنگە، گوتی: "هیچ شتێک زۆر درەنگ نییە."
ئیسرائیل: بارەگای 'بەڕێوەبەرایەتیی پۆلیس'مان خاپوور کرد
ییسرائیل کاتس، وەزیری بەرگریی ئیسرائیل رایگەیاند، فڕۆکە جەنگییەکانی هێزی ئاسمانی "بارەگای بەڕێوەبەرایەتیی پۆلیسی" ئێرانیان خاپوور کردووە.
خامنەیی هۆشداری دەداتە ئەمریکا
عەلی خامنەیی، رێبەری کۆماری ئیسلامیی ئێران رایگەیاند، گەلەکەی "هەرگیز خۆی بەدەستەوە نادات"، هاوکات هۆشداریی دایە ئەمریکا کە "زیانی قەرەبوونەکراوە"ی بەردەکەوێت ئەگەر دەستوەردان بکا."
ترەمپ رۆژی سێشەممە گوتی، ئەمریکا دەزانێت خامنەیی لە کوێیە بەڵام "بۆ ئێستا" نایکوژێت.
ژمارەی قوربانییەکان لە بەرزبوونەوەدایە
هێرشەکانی ئیسرائیل بنکە ئەتۆمی و سەربازییەکانی دەوروبەری ئێران و ناوچە سڤیلنشینەکانی کردووەتە ئامانج. ناوچە سڤیلنشینەکانی ئیسرائیلیش کراونەتە ئامانج و حکومەتە بیانییەکان هەوڵەکانیان بۆ گواستنەوەی هاووڵاتییانیان چڕکردووەتەوە.
نووسینگەی بنیامین نەتەنیاهوو، سەرۆکوەزیرانی ئیسرائیل رۆژی دووشەممە رایگەیاند، لانیکەم 24 کەس لە ئیسرائیل کوژراون و سەدانی دیکەش بریندار بوون.
ئێران رۆژی یەکشەممە رایگەیاندبوو، هێرشەکانی ئیسرائیل بوونەتە هۆی کوژرانی لانیکەم 224 کەس، کە فەرماندەی سەربازی، زانای ئەتۆمی و هاووڵاتیی سڤیلیان تێدایە.
20:35
ژمارەی ئەو مووشەک و درۆنانەی تائێستا ئێران ئاراستەی ئیسرائیلی کردوون، چەندن؟
وێنەی مووشەکێکی ئێران لە ئاسمانی ئیسرائیل؛ وێنە: REUTERS
بەرپرسێکی سەربازیی ئیسرائیل ژمارەی ئەو مووشەک و درۆنانەی ئێران ئاراستەی ئیسرائیلی کردوون لە سەرەتای جەنگەکەوە بۆ سی ئێن ئێن ـی ئەمریکی ئاشکرا کردووە و دەڵێ: "بە 400 مووشەکی بالیستی و 1000 درۆن هێرشی کردووەتەسەر ئیسرائیل."
ئەو بەرپرسە ئاماژەی بەوەشکردووە، لەو مووشەکانەی کە ئاراستەکراون، نزیکەی 20 مووشەکی بالیستیی ناوچە مەدەنییەکانی ئیسرائیلیان داوە.
20:17
ئێران دان بە سنووردارکردنی کاتیی ئینتەرنێتدا دەنێت
ئێران بە شێوەیەکی کاتی دەستڕاگەیشتن بە ئینتەرنێت سنووردار دەکات، ئەمەش بەپێی وەزارەتی گەیاندنی وڵاتەکە.
لە راگەیێندراوێکدا کە لەلایەن میدیاکانی ئێرانەوە بڵاوکراوەتەوە، وەزارەتەکە دەڵێت، سنووردارکردنەکان بۆ رێگریکردنە لە هەڕەشەکانی "دووژمن".
20:08
سوپای ئیسرائیل: ئێران خەڵکی سڤیل دەکاتە ئامانج
سوپای ئیسرائیل: ئێران خەڵکی سڤیل دەکاتە ئامانج
ئێران ژمارەیەک مووشەکی بالیستی بەرەو ئیسرائیل هەڵدا، بەپێی وێنە و ڤیدیۆکان وا دەردەکەوێت مووشەکێکی نوێ بێت.
سوپای ئیسرائیل دەڵێت، "بۆ شەشەم رۆژ لەسەر یەک، ئیسرائیل خەڵکی سڤیل دەکاتە ئامانج."
19:57
کاتی بووڵتەنی کاژێر 08:00ـی شاهۆ ئەمینە
کاتی بووڵتەنی کاژێر 08:00ـی شاهۆ ئەمینە
دوایین زانیارییەکانی رۆژ لە بووڵتەنی کاژێر 08:00ـی شاهۆ ئەمین دەزانن. گوزەرێکی خێرایە بەنێو ئەو رووداوانەی ئەمڕۆ روویاندا و ئەوانەی دەکرێت ئەمشەو روو بدەن.
19:42
وەزارەتی تەکنەلوژیا و پەیوەندییەکانی ئێران: تۆڕی ئینتەرنێتی نێودەوڵەتی سنووردار دەکرێت
کەسێک وشەی نهێنیی ئینتەرنێت لەسەر مۆبایلەکەی دەنووسێت و لەدواوە ئاڵای ئێران دەرکەوتووە
وەزارەتی تەکنەلۆژیا و پەیوەندییەکانی ئێران دەڵێت، تۆڕی ئینتەرنێتی نێودەوڵەتی بۆ ماوەیەکی کاتیی سنووردار دەکرێت.
رۆژی چوارشەممە، 18ی 2025، وەزارەتی تەکنەلوژیا و پەیوەندییەکانی ئێران رایگەیاند، "بەهۆی خراپ بە کارهێنانی تۆڕی پەیوەندییەکانیی وڵات لەلایەن دەستدرێژکارانەوە بۆ مەبەستی سەربازی و هەڕەشەکردن لە ژیان و ماڵی خەڵک، بە بڕیاری لایەنە پەیوەندیدارەکان بە شێوەیەکی کاتی دەست گەیشتن بە ئینتەرنێت بۆ کارهێنەران سنووردار کرا."
وەزارەتەکە دەڵێت: "دەستگەیشتن بە خزمەتگوزارییەکانی پەیوەندیی گشتی و پلاتفۆرمە خزمەتگوزارییە نێوخۆییەکان بەردەوام دەبێت."
19:38
هێرشێکی دیکەی مووشەکیی ئێران بۆ سەر ئیسرائیل دەستیپێکرد
رووداو
سوپای پاسدارانی ئێران رایگەیاندووە کە ژمارەیەک مووشەکیان ئاراستەی ئیسرائیل کردووە.
سوپای ئیسرائیلیش داوا لە خەڵک دەکات بچنە پەناگەکان و خۆیان حەشار بدەن، هەروەها دەڵێت: "ژمارەی مووشەکەکان 10 دانە دەبن."
18:51
ئێران رەتیدەکاتەوە شاندنی دانوستاندنکاریان ناردبێ بۆ مەسقەت
رووداو
گوتەبێژی وەزارەتی دەرەوەی ئێران رەتیکردەوە شاندیان ناردبێ بۆ مەسقەتی پایتەختی عومان بۆ دانوستاندن لەگەڵ ئەمریکا.
ئیسماعیل بەقائی، رۆژی چوارشەممە رایگەیاند، ئەو هەواڵانەی باسی چوونی شاندی دانوستاندنکاری ئێران دەکەن بۆ مەسقەت، دوورە لە راستی.
18:34
میدیای ئەمریکی: بڕیارە هەفتەی داهاتوو کەشتییەکی فڕۆکە هەڵگری ئەمریکی ببرێتە نزیکی ئەورووپا
وێنەیەکی کەشتیی فڕۆکەهەڵگری ئەمریکی
ماڵپەڕی سی ئێن ئێن لە بەرپرسێکی ئەمریکی و دوو سەرچاوەی ئاگادارەوە رایگەیاندووە: بڕیارە هەفتەی داهاتوو کەشتیی جەنگیی فڕۆکەهەڵگری (USS Ford Carrier Strike Group) بەرەو وڵاتانی ئەورووپا بنێردرێت، لەو وڵاتانە جێگیر دەکرێت کە نزیکی رۆژهەڵاتی نێوەڕاستن."
کەشتییەکە توانای هەڵگرتنی دەیان فڕۆکەی جەنگی هەیە و هەروەها دەتوانێت بەرپەرچی هێرشی فڕۆکەوانی و درۆن بداتەوە.
18:19
ئێران پێشنیازی دانوستاندنی بۆ ئەمریکا کردووە؟
ئاڵای ئەمریکا و ئێران
ماڵپەڕی ئاکسیۆسی ئەمریکی لە زاری سەرچاوەیەکی باڵای کۆشکی سپییەوە دەڵێت: "ئێران پێشنیازی دانوستاندنی بۆ ئەمریکا کردووە، بەڵام [ئەمریکا] هیچ پلانێکی بۆ ئەو بابەتە نییە."
لەدوای بڵاوکردنەوەی هەواڵەکە، نوێنەری ئێران لە نەتەوە یەکگرتووەکان وەڵامی دایەوە و رەتیکردەوە وڵاتەکەی پێشنیازێکی لەوشێوەیەیان بە ئەمریکا دابێت.
18:17
وەزارەتی دەرەوەی ئێران: لە ژێر گوشار و هەڕەشەدا هیچ رێککەوتنێک قبووڵ ناکەین
ئیسماعیل بەقایی، گوتەبێژی وەزارەتی دەرەوەی ئێران
گوتەبێژی وەزارەتی دەرەوەی ئێران دەڵێت: ناتوانرێت وڵاتێک ناچار بکەیت، بەڵێننامەیەک یان رێککەوتنێک لە ژێر بارودۆخی نائاسایی و گوشار و هەڕەشەدا قبووڵ بکات.
رۆژی چوارشەممە، 18ی حوزەیرانی 2025، ئیسماعیل بەقایی، گوتەبێژی وەزارەتی دەرەوەی ئێران رایگەیاند،" ئێمە رووبەڕووی هێرشێکی چەکداری نایاسایی بووینەتەوە لە لایەن رژێمێکی دژی مرۆڤایەتی و هیچ رێگایەکمان نییە، جگە لە بەرگریکردن لە خۆمان و کەرامەتی خۆمان و خاکەکەمان."
بەقایی گوتی: "ناتوانرێت وڵاتێک ناچار بکەیت بەڵێننامەیەک یان رێککەوتنێک لە ژێر بارودۆخی نائاسایی و گوشار و هەڕەشەدا قبووڵ بکات و چاوەڕێی ئەوە بکەیت ئەو رێککەوتنە بەردەوام بێت."
گوتەبێژی وەزارەتی دەرەوەی ئێران ئاماژەی بەوەشکرد،" ئێران لە ژێر گوشار و هەڕەشەدا هیچ رێککەوتنێک قبووڵ ناکات."
بەقایی گوتیشی: "وەزارەتی دەرەوە وەک نوێنەری نەتەوەی ئێران بە دڵنیاییەوە لێدوانەکانی رێبەری باڵا بە گوتاری سەرەکی دەزانێت."
18:02
وەزارەتی رۆشنبیری: پێویستە دەزگەکانی راگەیاندن بێلایەنانە رووماڵی ئەم جەنگە بکەن
ئاڵای ئێران و ئیسرائیل
گوتەبێژی وەزارەتی رۆشنبیریی هەرێمی کوردستان دەڵێت، پێویستە دەزگاکانی راگەیاندن بێلایەنانە رووماڵی جەنگی ئێران و ئیسرائیل بکەن و نەبنە هۆکاری پەلکێشانی هەرێمی کوردستان بۆ نێو جەنگەکە.
رۆژی چوارشەممە، 18ـی حوزەیرانی 2025، نامیق هەورامی، گوتەبێژی وەزارەتی رۆشنبیریی هەرێمی کوردستان بە تۆڕی میدیایی رووداوی راگەیاند: "پێویستە دەزگە و کەناڵە میدیاییەکان لەم دۆخە ئاڵۆزەی ناوچەکەدا، رەچاوی لایەنی دەروونی و دۆخی ئاسایشی کۆمەڵایەتی بکەن، هەواڵی بێ سەرچاوە و نادروست لەبارەی پەرەسەندنەکانی ناوچەکە و لێکەوتەکانی بڵاونەکەنەوە."
نامیق هەورامی گوتی، پێویستە دەزگاکانی راگەیاندن بێلایەنانە رووماڵی ئەم جەنگە بکەن و لایەنگری هیچ کامیان نەکەن. باسی لەوەشکرد: "نابێت راگەیاندن ببێتە هۆکاری پەلکێشکردنی هەرێمی کوردستان بۆ نێو جەنگی ئێران و ئیسرائیل."
گوتەبێژی وەزارەتی رۆشنبیریی هەرێمی کوردستان دەڵێت، دوایین ئاگادارکردنەوە بە هەموو دەزگاکان و راگەیاندنکاران دەدەین، "دوور بکەونەوە لەو جۆرە هەواڵانە، بە پێچەوانەوە رووبەڕووی لێپرسینەوەی یاسایی دەبنەوە."
وەک گوتەبێژی وەزارەتی رۆشنبیریی گوتی: "تائێستا هیچ سەرپێچییەک لەوبارەیەوە تۆمار نەکراوە، بەڵام لیژنەیەکیان پێکهێناوە لەگەڵ لایەنی پەیوەندیدار، لە ئەمڕۆوە زۆر بەچڕی چاودێریی هەموو دەزگاکانی راگەیاندن و پەیجەکان دەکەن."
17:58
پاسەوانی سنووری ئێران: ئاسایش لە هەموو سنوورەکان بەرقەرارە
پاسەوانی سنووری ئێران
ئەحمەد گودەرزی، فەرماندەی پاسەوانی سنووری ئێران رایگەیاند، ئاسایشی تەواو لە هەموو سنوورەکانی ئێران بەرقەرارە.
بە گوتەی ئەحمەد گودەرزی، هێزەکانی پاسەوانی سنوور بە هاوئاهەنگی سەرجەم هێزە چەکدارەکانی ئێران، لەنێویشیاندا سوپای پاسدارانی کۆماری ئیسلامی و ئەرتەش، چاودێری تەواوی بەسەر سنوورەکاندا هەیە.
فەرماندەی پاسەوانی سنووری ئێران رایگەیاند: "کاری دیپلۆماسی لەگەڵ وڵاتانی دۆست و برای دراوسێ بەشێوەیەکی بەردەوام و لە ئاستی جیاواز بەڕێوەدەچێت، بەڵام ئەو چاوەڕوانییەمان لە دراوسێکانمان هەیە کە ئەگەر سەرچاوەی کارە شەڕەنگێزییەکان دژی خاکمان لە وڵاتەکانی ئەوانەوە بێت، خۆیان هەنگاو بنێن و ئێمە ناچار نەکەن کە رووبەڕوویان ببینەوە".
ئەو بەرپرسەی ئێران راشیگەیاند: "هۆشداری دەدەینە هەموو گرووپەکانی دژبەر، تیرۆریست، شەڕەنگێز و قاچاخچییەکان، بە تووندی وەڵامی هەر جۆرە هەوڵ و دەستدرێژییەکیان دەدەینەوە کە دژی سنوورەکانی وڵات بیکەن".
17:44
سوپای ئیسرائیل: زیاتر لە هەزار و 100 ئامانجمان لە ئێران پێکاوە
وێنەیەکی هێرشەکەی ئەمڕۆ
سوپای ئیسرائیل دەڵێت، فرۆکە جەنگییەکانیان زیاتر لە هەزار و 100 ئامانجیان لە ئێران پێکاوە؛ ئاماژە بەوەش دەکات، بەرنامەی ئەتۆمیی ئێرانی بەشێوەیەکی سیستماتیك وێران دەکەن.
رۆژی چوارشەممە، 18ی حوزەیرانی 2025، ئێفی دێفرین، گوتەبێژی سوپای ئیسرائیل لەبارەی دوایین ئاماری شەش رۆژی ئۆپەراسیۆنەکانیان بۆسەر پێگە سەربازی و ئەتۆمییەکانی ئێران گوتی: "هێزی ئاسمانی لە رۆژی هەینییەوە سەتان هێرشی کردووە. ئێمە بە شێوەیەکی سیستماتیکی کارمان بۆ نەهێشتنی هەڕەشە ئەتۆمییەکەی ئێران کردووە."
گوتەبێژی سوپای ئیسرائیل گوتیشی: "هێرشەکان زیانێکی بەرچاویان بە ژێرخانی مووشەکە بالیستییەکانی ئێران گەیاندووە."
لەبارەی ئۆپەراسیۆنەکانی بەیانی رۆژی چوارشەممە، سوپای ئیسرائیل لە بەیاننامەیەکدا رایگەیاند: "ئەم بەیانییە هێزی ئاسمانی زنجیرەیەک هێرشی بۆ سەر نزیکەی 40 ئامانجی سەربازیی ئێران لە رۆژئاوای ئەو وڵاتە کرد. نزیکەی 25 فڕۆکەی جەنگی بەشدارییان لە ئۆپەراسیۆنەکەدا کرد و ئامانجەکانیش بریتی بوون لەو سەکۆی مووشەکهاویژانەی کە مووشەکیان ئاراستەی ئیسرائیل دەکرد لەگەڵ کۆگاکانی هەڵگرتنی مووشەک، هەروەها سەربازانی ئێرانی."
لەبارەی هێرشە درۆنی و مووشەکییەکانی شەوی سێشەممەی ئێران بۆ سەر ئیسرائیل، دێفرین گوتی: "شەوی رابردوو نزیکەی 30 مووشەکی بالیستی بە دوو زنجیرە هاوێژراون. زۆربەی مووشەکەکان تێکشکێندران ."
هاوکات سوپای ئیسرائیل تێکشکاندنی درۆنێکی سەربازی لەنێو خاکی ئێران پشتڕاست کردەوە و رایانگەیاند: "لە کاتی چالاکییە سەربازییەکان لە ئاسمانی ئێران، یەکێک لە درۆنەکانمان لەرێگەی مووشەکەوە تێکشکێندرا، بەڵام هیچ مەترسییەکی ئاشکرابوونی زانیاریی هەستیار نییە."
17:29
ئێران: چەند جارێک هێرش کرایە سەر تاران
دیمەنێکی هێرشەکە
میدیای ئێران دەڵێت: "دەنگی تەقینەوە لە چەند ناوچەیەکی جیاوازی تاران بیستراوە"؛ ئاماژە بەوەش دەکات کە هێرشکراوەتە سەر باڵەخانەی مانگی سوور.
رۆژی چوارشەممە 18ی حوزەیرانی 2025، میدیای ئێران بڵاویکردەوە: "دوانیوەڕۆی ئەمڕۆ چەند جارێک دەنگی تەقینەوە لە شوێنی جیاوازی تاران بیسترا."
میدیای ئێران باس لەوە دەکات کە لە لایەن ئیسرائیلەوە هێرش کراوەتە سەر بینای مانگی سووری تاران.
17:09
ترەمپ لەبارەی هێرشکردنە سەر بنکە ئەتۆمییەکانی ئێران: رەنگە بیکەم، رەنگە نەیکەم
رووداو
دۆناڵد ترەمپ هەرچەندە لە بەردەم رۆژنامەڤانان گوتی کە وەڵامی پرسیاری لێدان لە بنکە ئەتۆمییەکانی ئێران ناداتەوە، بەڵام بە کورتی گوتی: "رەنگە لە بنکە ئەتۆمییەکانی ئێران بدەین، رەنگە [هێرشەکە] نەکەم."
لە بەشێکی دیکەی قسەکانی لە کۆنفرانسە رۆژنامەڤانییەکەی، سەرۆکی ئەمریکا رایگەیاند: "کەس نازانێت لەبارەی ئێران چی دەکەم. ئێران داوای دانوستاندنی کردووە، بەڵام قسەی من لەبارەی ئێران خۆ بەدەستەوەدانی بێ مەرجە."
ترەمپ باسی هەڕەشەکانی ئێران دەکات و دەڵێت: "ساڵانێکی زۆر هەڕەشەی لێدەکردین، هەفتەی داهاتوو یەکلاکەرەوەیە، رەنگە نەگاتە کۆتایی هەفتەش."
17:06
کۆمپانیای مێتا نیگەرانیی خۆی لە رێکارەکانی ئێران بەرامبەر وەتسئەپ دەردەبڕێت
لۆگۆی واتسئەپ
کۆمپانیای مێتای خاوەنی وەتسئەپ "نیگەرانی" خۆی دەربڕی لەوەی خزمەتگوزارییەکانی لە ئێران بلۆک بکرێن، دوای ئەوەی کەناڵێکی فەرمیی دەوڵەت داوای لە خەڵک کرد ئەپلیکەیشنەکە بسڕنەوە و تۆمەتباری کرد بە هاوبەشیکردنی زانیاری لەگەڵ ئیسرائیل.
کەناڵی دووی دامەزراوەی رادیۆ و تەلەڤزیۆنی ئێران رۆژی سێشەممە داوای لە ئێرانییەکان کرد وەتسئەپ و ئینستاگرام، بە تایبەتی وەتسئەپ، لەسەر مۆبایلەکانیان بسڕنەوە و تۆمەتباری کرد بەوەی ئەپلیکەیشنەکە زانیاریی کەسیی بەکارهێنەران و "دوایین شوێنی زانراو و پەیوەندییەکان"یان کۆدەکاتەوە و لەگەڵ ئیسرائیل هاوبەشیان پێدەکات.
رۆژی چوارشەممە، ئیسرائیل و ئێران بۆ شەشەم رۆژی لەسەریەک لەسەر بۆردوومانەکانیان بۆسەر یەک بەردەوام بوون.
گوتەبێژێکی وەتسئەپ بانگەشەکانی میدیای ئێرانی رەتکردەوە و رایگەیاند، هەموو نامەکانی نێردراو لە رێگەی ئەپلیکەیشنەکەوە تەنیا نێرەر و وەرگر دەتوانن بیانبینن.
گوتەبێژەکە بە ئاژانسی فرانس پرێسی گوت: "نیگەرانین لەوەی ئەم راپۆرتە نادروستانە ببنە بیانوویەک بۆ بلۆککردنی خزمەتگوزارییەکانمان، لە کاتێکدا خەڵک زۆرترین پێویستییان پێیەتی."
گوتەبێژەکە گوتی: "ئێمە شوێنپێی کەس هەڵناگرین. بەدوای ئەوەیشدا ناچین کێ نامە بۆ کێ دەنێرێت و چاودێریی ئەو نامە کەسییانەش ناکەین خەڵک بۆ یەکدییان دەنێرن."
ئەو گوتەبێژە ئاماژەی بەوەشکرد، وەتسئەپ "زانیاریی بەکۆمەڵ بە هیچ حکومەتێک نادات."
ئیسرائیل رۆژی هەینی ئۆپەراسیۆنێکی بۆ سەر ئێران دەستپێکرد و هەمان رۆژ ئێرانیش بە مووشەک و درۆن وەڵامی دایەوە.
16:56
ئەردۆغان: ئێران مافی خۆیەتی دژی چەتەگەری و دەوڵەتی تیرۆر بەرگری لە خۆی بکات
وێنەیەکی سەرۆککۆماری تورکیا
سەرۆککۆماری تورکیا دەڵێت، وڵاتەکەی بۆ هەر جۆرە سیناریۆیەک لەبارەی جەنگی ئێران و ئیسرائیل ئامادەیە؛ ئاماژە بەوەش دەکات کە ''هەموو دامەزراوەکانمان لە ئەگەری دروستبوونی کاریگەرییەکانی ئەو هێرشانە لەسەر تورکیا، لەسەر هێڵن''؛ باس لەوەش دەکات کە ''ئێران مافی رەوای خۆیەتی دژی هێرشەکانی ئیسرائیل بەرگری لە خۆی بکات''.
رەجەب تەیب ئەردۆغان، سەرۆککۆماری تورکیا رۆژی چوارشەممە، 18ـی حوزەیرانی 2025 لە کۆبوونەوەی فراکسیۆنی پارتەکەی رەخنەی لە حکومەتی ئیسرائیل گرت لە بەرامبەر ئەو هێرشانەی بۆ سەر ''غەززە، لوبنان، سووریا و یەمەن کردوونی'' و گوتیشی، ''نەتەنیاهوو زۆر دەمێکە لە تاوانی کۆمەڵکوژیدا هیتلەری ستەمکاری تێپەڕاندووە''.
سەرۆککۆماری تورکیا پێی وابوو رۆژێک دێت کە سەرۆکوەزیرانی ئیسرائیل دادگەیی دەکرێ و گوتی، ''پشتیوان بە خودا زوو یان درەنگ، بەر لەوەی بچێتە ئەو دنیا، هەر لەم دنیایەدا دەچێتە دادگەیەکی سەربەخۆی نێودەوڵەتی و باجی تاوان و کۆمەڵکوژییەکانی دەدات''.
ئەردۆغان گوتی، ئیسرائیل بە هێرشەکانی بۆ سەر ئێران ''زەوینەی چەتەگەرێتیی خۆی فراوانتر کرد''؛ و ''لە بەرامبەردا، ئێران مافی تەواو یاسایی و رەوای خۆیەتی دژی ئەو چەتەگەری و دەوڵەتی تیرۆرە، بەرگری لە خۆی بکات''.
سەرۆککۆماری تورکیا هێرشەکەی ئیسرائیلی بۆ سەر ئێران بە ''کردەی تیرۆریستی'' ناوبرد و گوتیشی، ''ئیسرائیل کە خۆی خاوەنی چەکی ئەتۆمییە و لەبارەی کاروچالاکییەکانی ئەتۆم هیچ رێزێک لە یاسای نێودەوڵەتی ناگرێت، چاوەڕێی تەواوبوونی دانوستاندن و ئەنجامەکانی نەکرد''.
لەبارەی جەنگی ئێران و ئیسرائیل، ئەردۆغان رایگەیاند، بۆ هەموو جۆرە سیناریۆیەک ئامادەن کە مەترسی لەسەر ئاسایشی وڵاتەکەی دروست بکات؛ ئاماژەی بەوەش کرد: ''هەموو هاوڕێ و دامەزراوە پەیوەندیدارەکانمان لەسەر هێڵن. هەموو ئامادەکارییەکمان بۆ هەموو جۆرە دۆخێکی نەرێنی کردووە و دەشیکەین''.
16:24
عەلی خامنەیی بۆ دۆناڵد ترەمپ: هەڕەشە لەوانە بکە کە دەترسن
عەلی خامنەیی
عەلی خامنەیی، رێبەری کۆماری ئیسلامیی ئێران رەتیدەکاتەوە وڵاتەکەی دەستپێشخەری ئەو جەنگە بووبێ کە لەگەڵ ئیسرائیل هەڵگیرساوە و گوتی: "ئەو رووداوە کاتێک روویدا کە بەرپرسانی ئێمە سەرقاڵی دانوستاندنی ناڕاستەوخۆ بوون لەگەڵ ئەمریکا و هیچ نیشانەیەک لە جووڵەی تووند و سەربازی و سەخت لەلایەن ئێرانەوە نەبوو".
ئێران و ئەمریکا 5 گەڕی دانوستاندنیان ئەنجام دابوو و بڕیاربوو یەکشەممەی رابردوو 15ـی ئەم مانگەش گەڕێکی دیکە بەڕێوەبچێ.
عەلی خامنەیی لە پەیامێکی تەلەڤزیۆنییدا گوتی: "هەڵبەت لە سەرەتاوە گومانی ئەوە دەکرا، ئەمریکا دەستی لەو جووڵە دووژمنکارییەی رژێمی زایۆنیدا هەبێت کە بە قسەکانی ئەم دواییەی بەرپرسانی ئەمریکا، ئەو گومانە رۆژ دوای رۆژ بەهێزتر دەبێت".
رێبەری کۆماری ئیسلامیی ئێران هەروەها گوتی، "چاوەڕوانیم لە خاوەن بیروڕا و قەڵەمەکان بە تایبەت ئەوانەی پەیوەندییان لەگەڵ رای گشتیی جیهان هەیە، ئەوەیە رێگە نەدەن دووژمن بە بانگەشەی فریودەرانەی خۆی، راستییەکان بە پێچەوانە پێشان بدات".
عەلی خامنەیی لە بەشێکی دیکەی گوتارەکەیدا باس لە هێرشە مووشەکییەکانی سوپای وڵاتەکەی دەکات و دەڵێت: "دەبێ دووژمنی زایۆنی سزا بدرێت و خەریکە سزاکەیشی وەردەگرێت. ئەو سزایەی گەلی ئێران و هێزە چەکدارەکان دایانە ئەو دووژمنە ناپاکە و لە داهاتووشدا دەیدەن و پلانیان هەیە بۆ داهاتوو، سزایەکی سەختە و لاوازی کردووە".
رێبەری کۆماری ئیسلامیی ئێران دەڵێت: "هەر ئەوەی هاوڕێیانی ئەمریکییان خەریکە دێنە نێو گۆڕەپانەکە، لاوازی و بێ توانایی رژێمی زایۆنی پێشان دەدات".
عەلی خامنەیی پەیامێکیش ئاراستەی دۆناڵد ترەمپ، سەرۆکی ئەمریکا دەکات و دەڵێت: "سەرۆکی ئەمریکا لە هەندێک قسەی بووڵنەکراودا بە راشکاوی داوا لە گەلی ئێران دەکات خۆیان بەدەستەوە بدەن، بەڵام پێیان دەڵێین: یەکەم، هەڕەشە لەوانە بکەن کە لە هەڕەشە دەترسن. گەلی ئێران باوەڕیان بەو ئایەتەی قورئان هەیە "وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ کُنْتُمْ مُؤْمِنِینَ" و هەڕەشە هیچکات کاریگەر لەسەر هەڵسوکەوت و بیرکردنەوەی گەلی ئێران دانانێت. دووەم، گوتنی ئەو قسەیە بە گەلی ئێران کە وەرن و خۆ بەدەستەوە بدەن، قسەیەکی ژیرانە نییە و کەسانی تێگەیشتوو کە ئێران و گەل و مێژووی ئێران دەناسن، هیچکات بە زمانی هەڕەشە قسە لەگەڵ ئەو گەلە ناکەن، چونکە گەلی ئێران خۆی بەدەستەوە نادات و ناچێتە ژێر باری دەستدرێژی هیچ لایەنێک".
رێبەری کۆماری ئیسلامیی ئێران هەروەها دەڵێ: "گەلی ئێران لێبڕاوانە لە بەرامبەر شەڕی سەپێندراودا دەوەستێتەوە، هەروەکو چۆن لە بەرامبەر ئاشتیی سەپێندراودا وەستایەوە. ئەو گەلە لە بەرامبەر سەپاندندا، خۆی بەرامبەر هیچ کەس بەدەستەوە نادات".
عەلی خامنەیی هەروەها دەڵێت: "ئەمریکییەکان و ئەوانەی شارەزای سیاسەتەکانی ئەم ناوچەیەن دەزانن، دەستوەردانی ئەمریکا لەم بابەتەدا 100٪ بە زیانی ئەمریکا دەبێت و زیانی پێدەگەیێنێت؛ زیانێک کە خەسارەکەی زۆر زیاتر دەبێت لەو خەسارەی بە ئێران دەگات.
دەبێ ئەمریکییەکان بزانن، هەرچەشنە دەستوەردانێکی سەربازیی ئەمریکا بێگومان زیانی قەرەبوونەکراوی بۆ ئەوان بەدواوە دەبێت".
رێبەری کۆماری ئیسلامیی ئێران لە کۆتایی پەیامەکەیدا روو لە خەڵکی ئێران دەکات و دەڵێت: "بە هێزەوە بەردەوام بن لە ژیان، بەتایبەت ئەوانەی کاروباری خزمەتگوزارییان لە ئەستۆیە و سەروکاریان لەگەڵ خەڵکە؛ هەروەها ئەوانەی کاریان بانگەشە و تێگەیاندنی خەڵکە، بە هێزەوە درێژە بە راپەڕاندنی کاری خۆیان بدەن و پشت بە خودای گەورە ببەستن. بە دڵنیاییەوە خوای گەورە، گەلی ئێران و راستی و خاوەن ماف بوون سەردەخات".
10:27
وەزیری بەرگریی ئیسرائیل: بارەگاکانی حکومەت لە ئێران وێران دەکەین
یسرائیل کاتز، وەزیری بەرگریی ئیسرائیل.
وەزیری بەرگریی ئیسرائیل دەڵێت، بەمزووانە هێرش دەکەنە سەر ئامانجی دیکە لە ئێران و "بارەگاکانی حکومەت لە ئێران وێران دەکەین."
یسرائیل کاتز، وەزیری بەرگریی ئیسرائیل دەڵێت، "بارەگاکانی حکومەت لە ئێران رووبەڕووی بۆردومان و وێرانکاری دەبنەوە، لە دەزگای پەخشی فەرمییەوە دەستمان پێکردووە و بەمزووانە هێرش دەکەینە سەر ئامانجی دیکەش."
10:00
ئیسرائیل: ئێران پلانێکی ستراتیژی بۆ لەنێوبردنی ئیسرائیل هەیە
رووداو
ئیسرائیل دەڵێت، ئێران پلانێکی ستراتیژی بۆ لەنێوبردنی وڵاتەکەیان هەیە و بەمزووانە هێرش دەکەنە سەر چەند شوێنێکی ستراتیژی لە تاران.
ئیسرائیل دەشڵێت، ئەو دەزگایانەی بانگەشە بۆ "رژێم دەکەن لەنێو دەبەین."
08:13
سوپای ئیسرائیل: 50 فڕۆکەمان زنجیرەیەک هێرشیان ئەنجامدا
رووداو
سوپای ئیسرائیل دەڵێت، "50 فڕۆکەمان زنجیرەیەک هێرشیان ئەنجامدا". دەشڵێت، ئامانجێکی ئاسمانیی گومانلێکراویان لە رۆژهەڵاتی نێوەڕاست "لەنێوبردووە".
05:55
میدیای ئێران: هێرشکرایە سەر زانکۆی ئیمام حوسێن
دیمەنێکی هێرشەکە
بە گوێرەی میدیای سوپای پاسداران، ئیسرائیل هێرشی کردووەتەسەر زانکۆی سەربازیی ئیمام حوسێن لە تاران.
بەرەبەیانیی رۆژی چوارشەممە، 18-06-2025، سوپای ئیسرائیل رایگەیاند، بە مەبەستی بەئامانجگرتنی ژێرخانی سەربازیی ئێران، زنجیرە هێرشێکیان کردووەتە سەر رۆژهەڵاتی تاران.
هاوکات میدیای سوپای پاسداران بۆردوومانی زانکۆی سەربازیی ئیمام حوسێنی لە تاران پشتڕاستکردەوە کە باڵەخانە سەرەکییەکەی دەکەوێتە باکووری رۆژهەڵاتی شارەکە.
05:51
هاوکێشەی مووشەکەکان؛ ئەو ژمارەیەی چارەنووسی جەنگی ئێران و ئیسرائیل دیاری دەکات
مووشەکێکی بالیستیی ئێران
رەنگە ئەنجامی کۆتایی جەنگی نێوان ئێران و ئیسرائیل بە وەڵامی پرسیارێکی سادە یەکلایی بێتەوە: چەند مووشەکی بالیستی لە کۆگەکانی ئێراندا ماونەتەوە؟ ئەم ژمارەیە دیاری دەکات کە ئایا تاران دەتوانێت لە شەڕ بەردەوام بێت یان ناچار بە دانوستاندن دەبێت؟
زانیارییەکانی سوپای ئیسرائیل و شیکاریی شارەزایان دەریدەخەن کە ئێران لە ماوەی 14 مانگی رابردوودا نزیکەی 700 مووشەکی بالیستیی مامناوەندی (MRBM)ـی ئاراستەی ئیسرائیل کردووە، بەمەش لەنێوان 300 بۆ 1300 مووشەک لە کۆگاکانیدا ماوەتەوە.
ئەم یەدەگەی کە ماوەوەتەوە بووەتە ئامانجی هێرشە ئاسمانییە چڕەکانی پێنج رۆژی رابردووی ئیسرائیل؛ هێزەکانی بەرگریی ئیسرائیل (IDF) دەڵێن، لانیکەم سێیەکی سەکۆی مووشەکە زەوین بە زەویینیەکانیان کردوونەتە ئامانج کە مووشەکە بالیستییە مامناوەندەکان هەڵدەدەن، ئەمەش ئەگەری هەیە "توانای ئێران بۆ وەڵامدانەوەی ئیسرائیل زیاتر کەم بکاتەوە."
شیکەرەوەکان دەڵێن، "کەمبوونەوەی کۆگەی چەکەکانی رەنگە ئارەزووی ئێران بۆ دانوستاندن و دەرچوون لە ململانێکە زیاتر بکات و هاوکات هێرشەکەی ئیسرائیلیش لە رۆژانی داهاتوودا زیاتر بکات."
خەمڵاندنی کەمی باوەڕپێکراو بۆ کۆگەکانی چەکی ئێران هەیە، هەرچەندە ژەنەراڵ کینێس مەکێنزی، فەرماندەی پێشووی فەرماندەیی ناوەندیی ئەمریکا (سێنتکۆم)، لە ساڵی 2023دا گوتی کە ئێران زیاتر لە 3000 مووشەکی جۆراوجۆری هەیە.
بەهنام بێن تالەبلو، توێژەری باڵا لە دامەزراوەی بەرگری لە دیموکراسی، رایگەیاندووە کە رەنگە 1000 بۆ 2000 لەو مووشەکانە مامناوەند بن و توانای بڕینی 1400 کیلۆمەتری نێوان ئێران و ئیسرائیلیان هەبێت.
بە گوێرەی هێزەکانی بەرگریی ئیسرائیل، ئێران 120 مووشەکی بالیستیی مامناوەندی لە هێرشەکەی 13ی نیسانی ساڵی رابردوودا بۆ سەر ئیسرائیل بەکارهێناوە، 200ی دیکەی لە 1ی تشرینی یەکەم و کۆی گشتی 380 مووشەکیشی لە پێنج رۆژی رابردوودا بەکارهێناوە.
بێن تالەبلو پێی وایە ئەمە رەنگە وایکردبێت ئێران 1300 مووشەکی بالیستیی مامناوەندی بۆ مابێتەوە. دکتۆر ئەیال پینکۆ، ئەفسەری خانەنشینی هەواڵگریی دەریایی ئیسرائیل کە ئێستا توێژەری باڵایە لە سەنتەری بێگن-سادات بۆ توێژینەوەی ستراتیژی، دەڵێت: "بە لەبەرچاوگرتنی ئەوەی کە ئەوان [ئێران] لە چوار رۆژی رابردوودا نزیکەی 400 بۆ 500 مووشەکیان تەقاندووە و ئیسرائیلیش بەشێک لەو کۆگایەی لەناوبردووە کە هەیانبوو، پێموایە ئێستا 800 بۆ 700یان ماوە."
بەگوێرەی زانیارییەکان کە هێرشێکی پێشووی ئیسرائیل زیانی لە ئێران داوە. سوپاسالاری بەریتانیا، ئادمیرال تۆنی رادکین، دەڵێت، "تەنیا لە یەک هێرشدا 100 فڕۆکەی ئیسرائیلی توانیویانە، نزیکەی تەواوی بەرگریی ئاسمانیی ئێران تێکبشکێنن. ئەو هێرشە وایکردووە کە ئێران بۆ ماوەی ساڵێک توانای بەرهەمهێنانی مووشەکی نەمێنێت."
بنیامین نەتەنیاهوو، سەرۆکوەزیرانی ئیسرائیل، رۆژی هەینی لە کاتی دەستپێکردنی هێرشە ئاسمانییەکەی ئیسرائیلدا گوتی، ئێران بەرهەمهێنانی مووشەکی بالیستی بۆ 300 مووشەک لە مانگێکدا خێرا کردووە، کە دەتوانێت لە ماوەی شەش ساڵدا ژمارەیان بگاتە 20,000. بەڵام هیچ بەڵگەیەکی پێشکێش نەکرد.
ئەیال پینکۆ دەڵێت، هێرشەکانی ساڵی 2024ـی [ئیسرائیل] "دامەزراوە سەرەکییەکانی بەرهەمهێنانی بزوێنەری مووشەکە بالیستییەکانیان" لە ئێران لەناوبردووە، بەمەش دابینکردنی مووشەکی لەو وڵاتە سنووردار کردووە.
05:32
دۆناڵد ترەمپ دەتوانێت بەبێ کۆنگرێس بڕیاری چوونە نێو جەنگ بدات؟
وێنەیەکی دۆناڵد ترەمپ
راگەیاندنی دۆخی جەنگیی ئەمریکا لەگەڵ هەر وڵاتێکی دیکە ئەرکی کۆنگرێسە لەو وڵاتە، بەڵام سەرەڕای ئەوەی ئەمریکا لە دوای جەنگی جیهانیی دووەمەوە چووەتە نێو چەندین جەنگ، بەڵام کۆنگرێس رۆڵی نەبووە.
سیناتۆری دیموکراتی ویلایەتی ڤێرجینیا، تیم کەین، لە گوتارێکیدا لە ئەنجوومەنی پیران دەڵێت، لەو کاتەی دەستوور نووسراوەتەوە، زۆربەی وڵاتان بڕیاری پێویستیی جەنگیان بۆ پاشاکانیان جێهێشتبوو.
ئەو سیناتۆرە لەبارەی داڕێژەرانی دەستوور دەڵێت: "داڕێژەرانی دەستوورەکەمان لە ساڵی 1787 بڕیاریان دا کە ئێمە جیاواز بین." گوتیشی، ئەوان ویستوویانە گفتوگۆکان "لەبەرچاوی رای گشتیی ئەمریکا" بکرێن بۆ ئەوەی دیاری بکرێت ئایا جەنگ پێویستە یان نا.
کەین دەڵێت، ئەمریکا هەنگاو بە هەنگاو بەرەو جەنگ دەچێت، ئەوەش بە لەبەرچاوگرتنی ئەوەی کە "دوژمنکاریی راستەوخۆی سەربازی" لەڕێگەی بەکارهێنانی چەکی دروستکراوی ئەمریکا لەلایەن ئیسرائیلەوە لە ئارادایە.
بەگوێرەی ئەو سیناتۆرە ئەمریکییە وڵاتەکەی دەبێت بەردەوام بێت لە پێدانی چەکی بەرگری بە ئیسرائیل، بەڵام ئاماژە بەوەش دەکات: "هیچ هۆکارێکی ئەمنیی ناچاری نییە بۆ ئەوەی ئەمریکا بچێتە جەنگەوە لەگەڵ ئێران."
کۆمارییەکان کۆنترۆڵی هەردوو ئەنجوومەنی کۆنگرێس (ئەنجوومەنی پیران و ئەنجوومەنی نوێنەران)ـی کردووە، ئەمەش وایکردووە روون نەبێت کە ئایا پڕۆژەیاساکە دەنگی پێویست بۆ تێپەڕاندنی بەدەستدەهێنێت یان نا.
تاوەکو ئێستا روون نییە ئەمریکا چ رۆڵێک لە ململانێی بەردەوامی نێوان ئێران و ئیسرائیلدا دەگێڕێت. بەڵام دۆناڵد ترەمپ چەندێک دەسەڵاتی هەیە لە بژاردەی کە ئایا ئەمریکا بەشداریی شەڕەکەدا دەکات یان نا.
بەپێی یاسای ئەمریکا، سەرۆک بە تەنیا دەسەڵاتی راگەیاندنی فەرمیی جەنگی دژی وڵاتێکی دیکە نییە. تەنیا کۆنگرێس دەتوانێت ئەو بڕیارە بدات.
بەڵام یاساکە ئەوەش دەڵێت کە سەرۆک، فەرماندەی گشتیی هێزە چەکدارەکانە. ئەمەش واتای ئەوەیە کە دەتوانێت هێزەکانی ئەمریکا بنێرێت و ئۆپەراسیۆنی سەربازی بکات بەبێ ئەوەی بە فەرمیی رایبگەیێنێت کە وڵاتە لە جەنگدایە.
بۆ نموونە، بڕیارەکەی ترەمپ بۆ ئەنجامدانی هێرشی ئاسمانی لە سووریا لە ساڵی 2017 دژی حکومەتی بەشار ئەسەد، پێویستی بە رەزامەندیی کۆنگرێس نەبوو. لەبری ئەوە، ترەمپ بە شێوەیەکی تاکلایەنە کاری کرد و ئاماژەی بە هۆکاری ئاسایشی نیشتمانی و مرۆیی کرد.
هەندێک لە یاسادانەران لە هەردوو پارتی دیموکرات و کۆماری هەوڵ دەدەن توانای ترەمپ بۆ فەرمانکردن بە هێرشی ئەمریکا بۆ سەر ئێران سنووردار بکەن.
تۆماس ماسیی، نوێنەری کۆماریی ویلایەتی کێنتاکی، رۆژی سێشەممە پڕۆژەیەکی پێشکێش کرد بۆ رێگریکردن لە هەنگاوێکی لەو شێوەیە بەبێ رەزامەندیی کۆنگرێس.
ئەو نوێنەرەی کێنتاکی لە پۆستێکدا لە تۆڕی کۆمەڵایەتیی ئێکس نووسیویەتی: "ئەمە جەنگی ئێمە نییە. تەنانەت ئەگەر جەنگی ئێمەش بووایە، دەبێت کۆنگرێس بەپێی دەستوورەکەمان بڕیار لەسەر بابەتێکی وا بدات."
04:55
ئیسرائیل دامەزراوەی مووشەکیی خۆجیر لە تاران دەکاتە ئامانج
دامەزراوەی مووشەکیی خۆجیر
میدیای سوپای پاسداران پشتڕاستی کردەوە ئیسرائیل هێرشی کردووەتە سەر دامەزراوەی مووشەکیی خۆجیر لە نزیک تاران؛ دەشڵێت، پێشتر دامەزراوەکە گوێزراوەتەوە ژێرزەوی و هێرشەکە هیچ زیانێکی نەبووە.
بەرەبەیانیی رۆژی چوارشەممە، 18-06-2025، میدیای سوپای پاسداران رایگەیاند، ئیسرائیل هێرشی کردووەتەوە سەر دامەزراوەی مووشەکیی خۆجیر لە نزیک تارانی پایتەخت، بەڵام هیچ زیانێک بە دامەزراوەکە نەگەیشتووە.
بە گوێرەی میدیاکە، ئیسرائیل لە ئۆکتۆبەری 2024ـیش هێرشی کردووەتە سەر ئەو دامەزراوە مووشەکییە، ''بەڵام ئەوکاتیش باڵەخانەکان چۆڵ بوون و زۆربەی پرۆسەی بەرهەمهێنانی مووشەک لە خۆجیر، گوێزرابووەوە ژێرزەوی، بۆیە هیچ زیانی پێنەگەیشت.''
خۆجیر یەکێک لە سەرەکیترین دامەزراوەی بەرهەمهێنانی مووشەکە لە ئێران و دەکەوێتە رۆژهەڵاتی تاران. هەر ئەمڕۆ سوپای ئیسرائیلیش رایگەیاند کە هێرشێکی قورسیان کردووەتە سەر رۆژهەڵاتی شارەکە.
03:09
ئەمشەو ئێران بە چ مووشەکێک هێرشی کردە سەر ئیسرائیل؟
میدیای ئێران بڵاویکردووەتەوە کە سوپای پاسداران بە مووشەکی فەتاح1 هێرشەکەی ئەمشەوی ئەنجامداوە لە چوارچێوەی ئۆپەراسیۆنی "بەڵێنی راست 3."
هاوکات باس لەوەش دەکەن، "بە ئۆپەراسیۆنەکەمان کۆتایی بە ئەفسانەی بەرگریی ئاسمانی ئیسرائیل دەهێنین."
02:35
سوپای پاسداران داوای چۆڵکردنی گەڕەکەکانی تەل ئەڤیڤ دەکات
سوپای پاسداران داوای چۆڵکردنی گەڕەکەکانی تەل ئەڤیڤ دەکات
بەپێی میدیاکانی ئێران، سوپای پاسدارانی ئێران فەرمانێکی چۆڵکردنی بۆ گەڕەکەکانی تەل ئەڤیڤ لە ئیسرائیل دەرکردووە.
ئەو هۆشدارییە لە کاتێکدایە کە هێزەکانی بەرگریی ئیسرائیل دەڵێن "رێگرییان لە دوو فڕۆکەی بێفڕۆکەوان کردووە" کە لە رۆژهەڵاتەوە دەفڕین و بوونە هۆی لێدانی زەنگی ئاگادارکردنەوە لە ناوچەی دەریای مردوو لە ئیسرائیل.
هەروەها دەڵێن، فڕۆکە بێفڕۆکەوانەکانیان خستووەتە خوارەوە.
02:23
سوپای ئیسرائیل: شەپۆلێکی نوێی هێرش بۆ سەر ئێران دەستیپێکرد
سوپای ئیسرائیل: شەپۆلێکی نوێی هێرش بۆ سەر ئێران دەستیپێکرد
سوپای ئیسرائیل دەڵێت، هێزی ئاسمانیی وڵاتەکەیان شەپۆلێکی نوێی هێرشی بۆ سەر تاران دەستپێکردووە.
بەگوێرەی زانیارییەکان و ئەو ڤیدیۆیانەی گەیشتوون، دەنگی تەقینەوەی بەهێز لە تاران و چەندین شاری دیکەی ئێران و رۆژهەڵاتی کوردستان بیستراوە.
02:08
میدیای سوپای ئێران: هێرشکرایە سەر مەشهەد
دیمەنی هێرشێکی ئیسرائیل لە مەشهەد
بە گوێرەی میدیای سوپای پاسداران ئیسرائیل هێرشێکی ''قورسی'' کردووەتە سەر شاری مەشهەد. ئاماژە بەوەش دەکات، ''سیستمی بەرگریی ئاسمانی کاراکراوە و بەرپەرچی هێرشەکە دراوەتەوە.''
بەرەبەیانیی رۆژی چوارشەممە، 18-06-2025 میدیای سوپای پاسداران بڵاوی کردەوە، دەنگی تەقینەوەی بەهێز لە شاری مەشهەد بیستراوە و لەلایەن ئیسرائیلەوە هێرشکراوەتە سەر چەند ناوچەیەک.
میدیاکە ئاماژەی بەوە کردووە، سیستمی بەرگریی ئاسمانی بە قورسی بەرپەرچی هێرشەکە دەداتەوە، ''بەڵام ژمارەی ئامانجەکان زۆرن''.
بە گوێرەی زانیارییەکان، جیا لە مەشهەد دەنگی "تەقینەوەی بەهێز" لە چەندین شاری دیکەی ئێران و رۆژهەڵاتی کوردستان بیستراوە.
01:49
خامنەیی: هەرگیز سازش لەگەڵ زایۆنییەکان ناکەین
رووداو
عەلی خامنەیی، رێبەری باڵای کۆماری ئیسلامیی ئێران لە پۆستێکی لە تۆڕی ئێکس بە زمانی عەرەبی نووسیویەتی: "دەبێت بە تووندی مامەڵە لەگەڵ قەوارەی زایۆنی بکەین و هەرگیز سازشیان لەگەڵ ناکەین."
01:46
میدیای فەرمیی ئێران: ئەمشەو هەژەندێکی گەورە روودەدات
میدیای فەرمیی ئێران پەیامێکی لەبارەی جەنگ لەگەڵ ئیسرائیل بڵاوکردووەتەوە و دەڵێت، بۆ ئەمشەو هەژەندێکی گەورەمان دەبێت.
بەرەبەیانیی ئەمڕۆ چوارشەممە 18-06-2025، میدیای فەرمیی ئێران پەیامێکی بڵاوکردەوە و تێیدا هاتووە، ''ئەمشەو هەژەندێک روودەدات کە بۆ چەندین سەدە جیهان لەبیری ناکات."
پەیامەکەی میدیای فەرمیی ئێران بەبێ ئاماژەدان بە هیچ وردەکارییەکە و لەکاتێکدایە کە جەنگی راستەوخۆی نێوان تاران و تەلئەڤیڤ پێ دەنێتە شەشەم رۆژ و هەردوولا هێرش دەکەنە سەر یەکدی.
01:24
فڕۆکە رەشەکەی ئەمریکا؛ یەکێک لە 'پێشکەوتووترین و مەترسیدارترین' فڕۆکەی جەنگی
نۆرسرۆپ گرومن B2 سپیریت (Northrop Grumman B-2 Spirit)
کورت و پوخت
نۆرسرۆپ گرومن B2 سپیریت (Northrop Grumman B-2 Spirit)
یەکێکە لە پێشکەوتووترین و گرانبەهاترین فڕۆکەکانی جیهان
کاتێک لە ئاسمان دەبیندرێت، کە ئامانجێکی سەخت، پێویستی بە بۆردوومانی تووند بێت
رادار و سیستمی بەرگری نایدۆزێتەوە، هۆکارەکەشی ئەمەیە:
- فڕۆکەکە هیچ کلکێکی ستوونی یان ئاسۆیی نییە. ئەم دیزاینە یارمەتیدەرە بۆ ئەوەی شەپۆلەکانی رادار پەرشوبڵاو بکاتەوە
- رووی دەرەوەی فڕۆکەکە بە مادەیەکی تایبەت داپۆشراوە کە توانای هەڵمژینی وزەی شەپۆلەکانی راداری هەیە و دەیگۆڕێت بۆ گەرمی
- بزوێنەرەکانی لەنێو باڵەکانی شاردراونەتەوە، گەرمییەکەی بە سیستمێک سارد دەکرێتەوە ئینجا دەری دەداتە دەرەوە
زانیاریی تەکنیکی
- دوو کەس دەستەی فڕۆکەوانین، یەکێکیان فڕۆکەوانە و ئەوەی دیکە فەرماندەی ئەرک
- درێژییەکەی 21 مەترە و باڵەکانیشی 56.4 مەتر درێژن
- خێراییەکەی نزیکە لە خێرایی دەنگ
- تەنیا ئەم فڕۆکەیە دەتوانێت مووشەکی GBU 57 هەڵبگرێت، ئەو مووشەکە دەچێتە قوڵایی زەوی بە نزیکەی 80 بۆ 90 مەتر و دەتەقێتەوە
ئەمە ئەو فڕۆکە و مووشەکەن کە ئیسرائیل چاوەڕوانە ئەمریکا لە دژی ئێران بەکاری بهێنێت و بنکەی ئەتۆمیی فۆردۆی پێ بتەقێنێتەوە
01:17
سوپای ئیسرائیل بۆ خەڵک: دەتوانن لە پەناگەکان بچنە دەرەوە
سوپای ئیسرائیل بۆ خەڵک: دەتوانن لە پەناگەکان بچنە دەرەوە
سوپای ئیسرائیل دەڵێت، دوای دوایین مووشەکبارانی ئێران، خەڵک دەتوانن پەناگەکان جێبهێڵن و دۆخەکە سەلامەتە. دەشڵێت، وا دیارە دوایین شەپۆلی مووشەکبارانی ئێران کۆتایی هاتووە.
پێشتر، زەنگی ئاگادارکردنەوە لە سەرانسەری ئیسرائیلدا لێدرا کاتێک شەپۆلێکی نوێی مووشەک لە ئێرانەوە ئاراستەی ئیسرائیل کرا.
00:50
کاریگەریی مووشەکەکانی ئێران لەسەر ئیسرائیل چی بوون؟
کاریگەریی مووشەکەکانی ئێران لەسەر ئیسرائیل چی بوون؟
بەپێی میدیای ئیسرائیل، ژمارەی مووشەکەکانی ئەم جارە 15 مووشەک بوون و هیچ یەکێکیان نەکەوتوونەتە خوارەوە لە تەلئەڤیڤ.
هەندێک ریپۆرتیش هەن کە باس لەوە دەکەن مووشەکەکان لە ئۆرشەلیم/قودس کاریگەرییان هەبووە.
00:44
ژمارەیەک مووشەکی دیکەی ئێران گەیشتنە ئاسمانی ئیسرائیل
وێنەی مووشەکەکان لە ئاسمانی تەل ئەڤیڤ
ئێران ژمارەیەک مووشەکی دیکەی ئاراستەی شارەکانی ئیسرائیل کرد و سیستمی بەرگریی ئاسمانی بەرپەرچیان دەداتەوە.
00:15
ئیسرائیل خاوەنی چەکی ئەتۆمییە؟
بنیامین نەتەنیاهوو، سەرۆکوەزیرانی ئیسرائیل
بنیامین نەتەنیاهوو ساڵانێکە دەڵێت ئێران نزیکە لە دروستکردنی چەکی ئەتۆمی، بەڵام هەرگیز بەئاشکرا پشتڕاستی نەکردووەتەوە وڵاتەکەی چەکی ئەتۆمی هەیە یان نا؟
بەڵام باوەڕێکی باو لە جیهاندا هەیە کە ئیسرائیل لە شەستەکانی سەدەی 20ـەوە خاوەنی چەکی ئەتۆمییە.
دامەزراوەی جیهانی بۆ کۆنترۆڵکردنی چەک (CACNP) دەڵێت، ئیسرائیل خاوەنی نزیکەی 90 کڵاوەی ئەتۆمییە.
ئیسرائیل هەروەها رێککەوتننامەی قەدەخەکردنی بڵاوبوونەوەی چەکی ئەتۆمی (NPT) واژۆ نەکردووە.
شارەزایان پێیانوایە، بنکە ئەتۆمییەکان دەکەونە شاری دیمۆنا لە بیابانی نەگەڤی ئیسرائیل.
سیاسەتی ئیسرائیل ناڕوونە، هەرگیز نە دانی پێدا ناوە و نە رەتیکردووەتەوە چەکی ئەتۆمی هەبێت.
وەڵامی ئەم پرسیارە لە ڤیدیۆکەدایە: ئیسرائیل خۆی چەکی ئەتۆمیی هەیە؟ pic.twitter.com/bsLmNSnyq8
— Rudaw (@Rudawkurdish) June 17, 2025
00:01
ئەگەر ئەمریکا بچێتە جەنگەکەوە، ئێرانیش هێرش دەکاتە سەر بەرژەوەندییەکانی لە رۆژهەڵاتی نێوەڕاست
بۆردوومانی ئیسرائیل لە تاران. وێنە: AFP
بەپێی بەرپرسانی ئەمریکی کە راپۆرتە هەواڵگرییەکانیان بینیوە، بە نیویۆرک تایمزیان گوتووە، ئێران مووشەک و کەرەستەی دیکەی سەربازی ئامادەکردووە بۆ هێرشکردنە سەر بنکەکانی ئەمریکا لە رۆژهەڵاتی نێوەڕاست، ئەگەر ئەمریکا بەشداریی جەنگی ئیسرائیل بکات دژی ئەو وڵاتە.
ویلایەتە یەکگرتووەکانی ئەمریکا نزیکەی سێ دەرزەن فڕۆکەی سووتەمەنی گواستنەوەی ناردووە بۆ ئەورووپا و ئەوانە دەکرێت بەکاربهێنرێن بۆ یارمەتیدانی فڕۆکە جەنگییەکان کە بنکە ئەمریکییەکان دەپارێزن، یان بۆ درێژکردنەوەی مەودای بۆمبهاوێژەکان بەکاربهێنرێن کە بەشدارن لە ئەگەری هەر هێرشێک بۆ سەر دامەزراوە ئەتۆمییەکانی ئێران.
ترسی جەنگێکی فراوانتر لەنێو بەرپرسانی ئەمریکیدا زیاد دەکات، لە کاتێکدا ئیسرائیل گوشار دەخاتە سەر کۆشکی سپی بۆ دەستێوەردان لە ململانێکەی لەگەڵ ئێران. بەرپرسان گوتیان، ئەگەر ئەمریکا بەشداری هەڵمەتەکەی ئیسرائیل بکات و هێرش بکاتە سەر فۆردۆ، کە دامەزراوەیەکی سەرەکیی ئەتۆمیی ئێرانە، ئەوا حووسییەکانی یەمەن کە هاوپەیمانی ئێرانن، بە دڵنیاییەوە دەست دەکەنەوە بە هێرشکردنە سەر کەشتییەکان لە دەریای سوور.
دەشڵێن، گرووپە چەکدارەکانی سەر بە ئێران لە عێراق و سووریاش رەنگە هەوڵی هێرشکردنە سەر بنکەکانی ئەمریکا بدەن لە ناوچەکانی خۆیان و دەوروبەریان.
بەرپرسانی دیکە گوتیان لە ئەگەری هێرشێکدا، ئێران لەوانەیە دەست بکات بە مینڕێژکردنی گەرووی هورمز، تاکتیکێک کە مەبەست لێی گیرخواردنی کەشتییە جەنگییەکانی ئەمریکایە لە کەنداوی فارس.
فەرماندەکان هێزەکانی ئەمریکایان خستووەتە ئامادەیی باڵاوە لە بنکە سەربازییەکانی سەرانسەری ناوچەکە، بە ئیماراتی یەکگرتووی عەرەبی، ئوردن و سعودیەشەوە. ئەمریکا زیاتر لە 40 هەزار سەربازی لە رۆژهەڵاتی نێوەڕاست جێگیر کردووە.
دوو بەرپرسی ئێرانی دانیان بەوەدا ناوە کە وڵاتەکەیان هێرش دەکاتە سەر بنکەکانی ئەمریکا لە رۆژهەڵاتی نێوەڕاست، سەرەتا بەوانەی عێراق دەستپێدەکەن، ئەگەر ئەمریکا بەشداری جەنگی ئیسرائیل بکات.
هەردوو بەرپرسەکە گوتیان، ئێران هەر بنکەیەکی ئەمریکیش دەکاتە ئامانج کە لە وڵاتانی عەرەبیدایە و بەشداری لە هێرشێکدا دەکات.
عەباس عێراقچی، وەزیری دەرەوەی ئێران، رۆژی دووشەممە لە راگەیێندراوێکدا گوتی، "دووژمنەکانمان دەبێت بزانن کە ناتوانن بە هێرشی سەربازی بگەنە چارەسەرێک لەگەڵمان و ناتوانن ئیرادەی خۆیان بەسەر گەلی ئێراندا بسەپێنن." بەپێی پوختەیەکی پەیوەندییە تەلەفۆنییەکان کە لەلایەن وەزارەتی دەرەوەی ئێرانەوە خراوەتەڕوو، عێراقچی لە پەیوەندییە تەلەفۆنییەکاندا بە هاوتا ئەورووپییەکانی گوتووە، ئەگەر جەنگەکە پەرەبسێنێت، ئەوا لۆمەکە دەکەوێتە ئەستۆی ئیسرائیل و پشتیوانە سەرەکییەکانی.
بەرپرسانی ئەمریکی ئاماژەیان بەوەشکردووە، ئێران پێویستی بە ئامادەکارییەکی زۆر نابێت بۆ هێرشکردنە سەر بنکەکانی ئەمریکا لە ناوچەکە. سوپای ئێران بنکەی مووشەکی هەیە لە مەودایەکی نزیکدا کە بە ئاسانی دەتوانێت لە بەحرەین، قەتەر و ئیماراتی یەکگرتووی عەرەبی بدات.
ئەگەری بەشداریکردنی هێزەکانی ئەمریکا لە جەنگەکەدا لەم رۆژانەی دواییدا زیادی کردووە، بەهۆی بەردەوامیی هەڵمەتەکەی ئیسرائیل، و وەک وەڵامێکیش ئێران شەپۆلی مووشەکی ئاراستەی ئیسرائیل کردووە.
تۆڕی سی بی ئێسی ئەمریکی کە هاوبەشی رووداوە لە ئاژانسی ئاڵوگۆڕی هەواڵی ئەورووپی لە زاری چەند سەرچاوەیەکی ئاگادار لە دۆخەکە گواستوویەتییەوە کە دۆناڵد ترەمپ، سەرۆکی ئەمریکا بیر لەوە دەکاتەوە لەگەڵ ئیسرائیل بەشداری بکات بۆ لێدانی بنکە ئەتۆمییەکانی ئێران، بە بنکەی فۆردۆشەوە.
ئەو سەرچاوانە دەڵێن، چاوەڕوان دەکرا ئەو بابەتە لە کۆبوونەوەی ئەمڕۆی ژووری ئۆپەراسیۆنەکان (سیچوەیشن رووم) تاوتوێ بکرێت، گوتوویشیانە کە کۆدەنگیی تەواو لەسەر ئەو بابەتە لەنێوان راوێژکارە نزیکەکانی ترەمپدا نییە.
روون نییە هێرشێک بۆ سەر فۆردۆ چەندە زیان بە تواناکانی ئەتۆمیی ئێران دەگەیێنێت، یان چەندە پەرەپێدانی چەک دوادەخات. کۆگای ئێستای یۆرانیۆمی پیتێنراوی ئێرانیش لە توونێلەکاندا لە شوێنی جیاوازی وڵاتەکەدا شاردراونەتەوە.
چەندین بەرپرسی ئەمریکی باسیان لەوە کردووە کە ئیسرائیل پێویستی بە یارمەتیی ئەمریکا دەبێت بۆ ئەوەی زیانێکی بەرچاوتر بە بەرنامە ئەتۆمییەکەی ئێران بگەیێنێت.
23:31
سی بی ئێسی ئەمریکی: ترەمپ بیر لەوە دەکاتەوە لەگەڵ ئیسرائیل بەشداری بکات بۆ لێدانی بنکە ئەتۆمییەکانی ئێران
تۆڕی سی بی ئێسی ئەمریکی کە هاوبەشی رووداوە لە ئاژانسی ئاڵوگۆڕی هەواڵی ئەورووپی لە زاری چەند سەرچاوەیەکی ئاگادار لە دۆخەکە گواستوویەتییەوە کە دۆناڵد ترەمپ، سەرۆکی ئەمریکا بیر لەوە دەکاتەوە لەگەڵ ئیسرائیل بەشداری بکات بۆ لێدانی بنکە ئەتۆمییەکانی ئێران، بە بنکەی فۆردۆشەوە.
ئەو سەرچاوانە دەڵێن، چاوەڕوان دەکرا ئەو بابەتە لە کۆبوونەوەی ئەمڕۆی ژووری ئۆپەراسیۆنەکان (سیچوەیشن رووم) تاوتوێ بکرێت، گوتوویشیانە کە کۆدەنگیی تەواو لەسەر ئەو بابەتە لەنێوان راوێژکارە نزیکەکانی ترەمپدا نییە.
23:09
ئیسرائیل دەڵێت بەبێ زیانگەیاندن بە دامەزراوەی ئەتۆمیی فۆردۆ جەنگ کۆتایی نایێت
تزاخی هەنگەبی، راوێژکاری ئاسایشی نیشتمانیی ئیسرائیل لە چاوپێکەوتنێکدا لەگەڵ کەناڵی 12ـی وڵاتەکە، بەڵێن دەدات کە ئۆپەراسیۆنی ئیسرائیل دژی ئێران "بەبێ زیانگەیاندن بە دامەزراوەی ئەتۆمیی فۆردۆ کۆتایی نایێت."
ئەو شوێنە کە زیاتر لە 90 مەتر لەژێر زەویدایە، هەزاران ئامێری چەقی ناوەندی (سەنتەرفیوج)ـی بۆ پیتاندنی یۆرانیۆم تێدایە. چەکە ئاساییەکانی ئیسرائیل ناتوانن بگەنە ئەو قووڵاییە و، پێویستی بەوەیە ئەمریکا بەشداریی شەڕەکە بکات بۆ ئەوەی لەڕێگەی ئاسمانەوە لەناوی ببات.
هەنگەبی دەڵێت: "نازانم ئەمریکا بەشدار دەبێت یان نا،" گوتیشی، ئیسرائیل بەردەوام لەگەڵ ئەمریکا لە گفتوگۆدایە، بەڵام هەوڵی قایلکردنیان نادات.
ئاماژەی بەوەشکرد، "پلانەکە شین و سپییە و هەموو لایەنەکانی هێرشەکە لەخۆدەگرێت،" مەبەستی لە رەنگەکانی ئاڵای ئیسرائیل بوو.
هەنگەبی دەڵێت، بنیامین نەتەنیاهوو، سەرۆکوەزیرانی ئیسرائیل، "دیالۆگێکی دۆستانە"ـی لەگەڵ دۆناڵد ترەمپ، سەرۆکی ئەمریکا هەیە. گوتیشی، ئیسرائیل دەیزانی هیچ گەرەنتییەک نییە بۆ بەشداریکردنی ئەمریکا کاتێک بڕیاریدا ئۆپەراسیۆنەکە ئەنجام بدات.
22:27
کۆبوونەوەی ترەمپ و تیمی ئاسایشی نیشتمانییەکەی تەواوبوو
بەرپرسێکی کۆشکی سپی بە رووداوی راگەیاند، دوای کاژێرێک کۆبوونەوەی دۆناڵد ترەمپ لە سیچوەیشن رووم لەگەڵ تیمی ئاسایشی نیشتمانییەکەی تەواوبووە.
بەپێی میدیای ئەمریکی، سەرۆکی ئەمریکا لەو بڕیارەی پاشگەزبووەتەوە کە بەرپرسانی باڵای وڵاتەکەی بنێرێت بۆ دانوستاندن لەگەڵ ئێرانییەکان لەبارەی بەرنامەی ئەتۆمی.
هاوکات فۆکس نیوز دەڵێت، بژاردەی لێدان لە ئێران و بەرنامە ئەتۆمییەکەی لەسەر مێزە.
بەپێی میدیای ئەمریکی، سەرۆکی ئەمریکا لەو بڕیارەی پاشگەزبووەتەوە کە بەرپرسانی باڵای وڵاتەکەی بنێرێت بۆ دانوستاندن لەگەڵ ئێرانییەکان لەبارەی بەرنامەی ئەتۆمی.
هاوکات فۆکس نیوز دەڵێت، بژاردەی لێدان لە ئێران و بەرنامە ئەتۆمییەکەی لەسەر مێزە.
22:17
وەتسئەپ: زانیاریمان بە ئیسرائیل نەداوە
وەتسئەپ: زانیاریمان بە ئیسرائیل نەداوە
کۆمپانیای مێتا کە خاوەنی ئەپلیکەیشنی نامەناردنی وەتسئەپە، رەتیدەکاتەوە زانیاری لەگەڵ ئیسرائیل بەش کردبێت.
کۆمپانیای مێتا راگەیێندراوێکی بڵاوکردەوە و وەڵامی تۆمەتەکانی ئێرانی دایەوە کە گوایە "وەتسئەپ زانیاری بە ئیسرائیل دەدات" و داوای کردبوو هاووڵاتییان ئەپەکە بسڕنەوە.
گوتەبێژێکی کۆمپانیای مێتا، کە خاوەنی واتسئەپە و هەروەها خاوەنی فەیسبووک و ئینستاگرامیشە، دەڵێت: "نیگەرانین ئەم راپۆرتە ناڕاستانە ببنە بیانوویەک بۆ ئەوەی خزمەتگوزارییەکانمان بلۆک بکرێن، لە کاتێکدا کە خەڵک زۆرترین پێویستیان پێیانە".
راگەیێندراوەکە دەڵێت کە "هەموو ئەو نامانەی لە وەتسئەپدا بۆ خێزان و هاوڕێکانتانی دەنێرن، بە شێوەی 'ئینکرپشنی سەرتاپاگیر' (end-to-end encrypted) پارێزراون، ئەمەش واتای ئەوەیە کە جگە لە نێرەر و وەرگر، هیچ کەسێکی دیکە دەستی بەو نامانە ناگات".
گوتەبێژەکەی مێتا گوتیشی: "ئێمە زانیاریی بەکۆمەڵ نادەینە هیچ حکومەتێک. بۆ ماوەی زیاتر لە دەیەیەکە، مێتا بە بەردەوامی راپۆرتی شەفافییەتی بڵاوکردووەتەوە کە ئەو بارودۆخە سنووردارانە روون دەکاتەوە کە تێیاندا داوای زانیاری وەتسئەپ کراوە".
سێشهممه، 17ـی حوزهیرانی 2025، كهناڵی فهرمیی ئێران رایگهیاند، داوا له هاووڵاتییانی وڵاتهكهی دهكات پلاتفۆرمهكان "واتسئەپ و ئینیستگرام" لهسهر ئامێری مۆبایلهكانیان بسڕنهوه، بۆ ئهوهی لهلایهن ئیسرائیلهوه شوێنهكانیان دهستنیشان نهكرێت.
22:00
ماکرۆن: گۆڕینی رژێم لە ئێران دەبێتە هۆی پشێوی
لە کاردانەوەکانی جەنگەکەدا، گوێمان لە ئیمانوێل ماکرۆن، سەرۆکی فەرەنسا دەبێت کە دەڵێت، گۆڕینی رژێم لە ئێران دەبێتە هۆی پشێوی.
21:52
وەزارەتی دەرەوەی ئەمریکا بۆ رووداو: زیان بەر ئەمریکییەکان بکەوێت، لێکەوتەی دەبێت
وەزارەتی دەرەوەی ئەمریکا بۆ رووداو: زیان بەر ئەمریکییەکان بکەوێت، لێکەوتەی دەبێت
تامی برووس، گوتەبێژی وەزارەتی دەرەوەی ئەمریکا بۆ رووداو: سەرۆک ترەمپ روونیکردووەتەوە کە ئێمە بەشێک نەبووین لە دەستپێکردنی شەڕی ئێران و ئیسرائیل و بە دڵنیاییشەوە ئێمە بەشێک نین لە هێرشەکانی ئیسرائیل بۆ سەر ئێران.
هەروەها گوتی، "پێم وایە، زۆر بە روونی لەلایەن وەزیر روبیۆ و سەرۆکەوە راگەیێندراوە و، گرنگە خەڵک ئەوە بزانن. لەم حاڵەتەدا، بێگومان، سەرۆک روونی کردووەتەوە کە ئەگەر ئەمریکییەکان زیانیان پێبگات، یان، لەم بارودۆخەدا، مووشەکێک ئاراستەی خەڵکی سڤیل یان سەربازانی ئەمریکی بکرێت، ئەوا لێکەوتەی دەبێت، پێم وایە ئەوەش جێی سەرسوڕمان نابێت.
21:46
سوپای ئیسرائیل: مووشەک لە ئێرانەوە بەڕێوەن
سوپای ئیسرائیل: مووشەک لە ئێرانەوە بەڕێوەن
سوپای ئیسرائیل دەڵێت: کەمێک لەمەوبەر، دوای ئاشکرابوونی مووشەکی هاوێژراو لە ئێرانەوە بەرەو خاکی دەوڵەتی ئیسرائیل، زەنگی ئاگادارکردنەوە لە چەند ناوچەیەکی وڵاتدا لێدرا.
هەروەها داوا لە هاووڵاتییان دەکات پابەندی رێنماییەکانی فەرماندەیی بەرەی ناوخۆ بن.
سوپا لە راگەیێندراوێکدا دەڵێت، لەم کاتەدا، هێزی ئاسمانی کاردەکات بۆ رێگریکردن و هێرشکردن لە هەر کوێیەک پێویست بکات بۆ لەناوبردنی هەڕەشەکە.
دەشڵێت، بەرگرییەکە 100٪ نییە، بۆیە دەبێت خەڵک بەردەوام بن لە پابەندبوون بە رێنماییەکانی فەرماندەیی بەرەی ناوخۆ.
21:33
پەیامی نوێی ئەمریکا لەسەر جەنگەکە
تامی برووس، گوتەبێژی وەزارەتی دەرەوەی ئەمریکا لە کۆنفرانسێکی رۆژنامەڤانیدا قسە دەکات و بە هاووڵاتییانی ئەمریکای گوت: سەردانی ئیسرائیل، ئێران و عێراق مەکەن.
گوتەبێژی وەزارەتی دەرەوەی ئەمریکا گوتیشی، سەرۆک ترەمپ جەخت لەوە دەکاتەوە کە نابێت ئێران ببێتە خاوەنی چەکی ئەتۆمی.
21:28
ئیسرائیل بە 60 فڕۆکە هێرشێکی چڕی لە ئێران ئەنجامداوە
ئیسرائیل بە 60 فڕۆکە هێرشێکی چڕی لە ئێران ئەنجامداوە
عەمید ئێفی دێفرین، گوتەبێژی سوپای ئیسرائیل دەڵێت، چەند کاژێرێک لەمەوبەر 60 فڕۆکەی هێزی ئاسمانیی ئیسرائیل دەستیان بە "شەپۆلێکی بەرفراوانی هێرش لە دڵی ئێراندا،" کردووە و ئەو شوێنانەیان کردووەتە ئامانج کە مووشەکی بالیستی لێوە ئاراستەی ئیسرائیل دەکرێت.
ئەو دەڵێت، بەهۆی هێرشەکانی ئەم دواییەی ئیسرائیلەوە، هێزەکانی ئێران کشاونەتەوە بۆ نێوەڕاستی وڵاتەکە.
هەروەها دەشڵێت: "ئێستا، ئەوان هەوڵدەدەن [مووشەکەکان] لە ئەسفەهانەوە بهاوێژن." "ئەوان لە رۆژئاوای ئێران کشاونەتەوە، بەڵام ئێمە بەدوایانەوەین."
21:17
ڤیدیۆی سووتانی رادیۆ و تەلەڤزیۆنی ئێران
سووتانی دەزگاکە
ڤیدیۆیەک لە سۆشیاڵمیدیا بڵاودەکرێتەوە و تێیدا دەردەکەوێت، باڵەخانەی رادیۆ و تەلەڤزیۆنی ئێران بەتەواوی دەسووتێت و ئاگری لێ بەرزدەبێتەوە.
تاوەکو ئێستا ڤیدیۆکە بەتەواوی پشتڕاستنەکراوەتەوە لەلایەن میدیای فەرمیی ئێرانەوە، بەڵام گوتوویانە کە هێرشیان لەسەرە.
ئەمشەو ئاژانسی ئیرنای ئێران باس لە تەقینەوەی "بەردەوام و تووند" دەکات لە پایتەختی وڵاتەکە.
21:14
دەنگی چەندین تەقینەوەی نوێ لە تاران دەبیسترێت
دەنگی چەندین تەقینەوەی نوێ لە تاران دەبیسترێت
بەپێی میدیای فەرمیی ئێران، ژمارەیەک تەقینەوە لە نێوەڕاستی تاران روویانداوە.
هاوکات ژمارەیەک ڤیدیۆ بڵاوکرانەتەوە کە ئاگر و دووکەڵ لە ژمارەیەک باڵەخانەی شوێنی جیاوازی نێو شارەکە بەرزدەبنەوە. یەکێک لەوانە باڵەخانەی رادیۆ و تەلەڤزیۆنی ئێرانە.
ئاژانسی هەواڵی فرانس پرێس رایدەگەیێنێت کە دەنگی تەقینەوەی بەهێز لە سەرانسەری شارەکەدا بیستراون. ئاژانسی ئیرنای ئێرانیش باس لە تەقینەوەی "بەردەوام و تووند" دەکات.
20:39
لێدوانی وەزارەتی دەرەوەی ئەڵمانیا بۆ رووداو لەبارەی گواستنەوەی خەڵکەکەیان لە ئیسرائیل
لێدوانی وەزارەتی دەرەوەی ئەڵمانیا بۆ رووداو لەبارەی گواستنەوەی خەڵکەکەیان لە ئیسرائیل
وەزارەتی دەرەوەی ئەڵمانیا قسەیان بۆ زنار شینۆ، پەیامنێری رووداو کردووە و دەڵێن:
- رۆژانی چوارشەممە دەست بە گواستنەوەی هاووڵاتیانی ئەڵمانی لە ئیسرائیل دەکەین.
- لە رێگەی وشکانییەوە هاووڵاتییەکان دەگوازرێنەوە بۆ عەممانی پایتەختی ئوردن و دواتر بە فڕۆکەی تایبەت کە جێگەی 180 کەسی تێدا دەبێتەوە، دەبرێنە ئەڵمانیا.
- بۆ رۆژی پێنجشەممەش گەشتێک رێکخراوە.
لەبارەی هەوڵەکانی ئەڵمانیا بۆ ئاڵوزنەبوونی جەنگەکەی ئیسرائیل و ئێران، گوتەبێژی وەزارەتی دەرەوە بە رووداوی گوت:
- وەزیری دەرەوە جگە لە سەردانەکەی بۆ سعودیە، قەتەر و عومان، بە تەلەفۆنیش قسەی لەگەڵ وەزیرانی دەرەوەی عێراق و ئیمارات کردووە.
- راسپێردراوی حکومەت بۆ کاروباری رۆژهەڵاتی نێوەڕاست لەگەڵ باڵیۆزی ئێران لە ئەڵمانیا قسەی کردووە.
20:24
کۆبوونەوەی ترەمپ و ئەنجوومەنی ئاسایشی نیشتمانیی ئەمریکا دەست پێدەکات
بەگوێرەی کۆشکی سپی، چاوەڕوان دەکرێت دۆناڵد ترەمپ بە زوویی لەگەڵ ئەنجوومەنی ئاسایشی نیشتمانیی خۆی کۆببێتەوە لە ژووری کۆبوونەوە گرنگەکان.
دیار کوردە، بەرپرسی نووسینگەی رووداو لە واشنتن لە کۆشکی سپییە و دوایین زانیارییەکانتان پێدەڵێت هەر کاتێک ئەبدەیتێک هەبوو.
20:05
حکومەت دەڵێت، زیاتر لە 2700 کەس لە ئیسرائیل ماڵەکانیان چۆڵکردووە
بەپێی نووسینگەی رۆژنامەوانیی حکومەتی ئیسرائیل (GPO)، بەهۆی هێرشەکانی ئێرانەوە، لانیکەم دوو هەزار و 725 کەس لە ئیسرائیل لە ماڵەکانیان چوونەتە دەرەوە.
حکومەت رایگەیاند، تاوەکو رۆژی سێشەممە، ژمارەی کوژراوان لە ئیسرائیل هەر 24 کەسە، بەڵام زیاتر لە 647 کەس برینداربوون، کە لانیکەم 10 کەسیان لە دۆخێکی خراپدان.
ئێران و ئیسرائیل لە پێنجەمین رۆژی ئاڵوگۆڕی هێرشەکاندان. لانیکەم 224 کەس لە ئێران کوژراون لەوەتەی پێکدادانەکان لە رۆژی هەینی دەستیپێکردووە، کاتێک ئیسرائیل هێرشی بێوێنەی کردە سەر ئێران، کە بەرنامە ئەتۆمییەکەی و سەرکردە سەربازییەکانی کردبووە ئامانج.
19:34
ئێستا کاتی بووڵتەنی کاژێر 08:00ـی شاهۆ ئەمینە
ئێستا کاتی بووڵتەنی کاژێر 08:00ـی شاهۆ ئەمینە
گۆڕانکارییەکان خێران، بۆ ئەوەی بزانی لە تەواوی رۆژەکە چی روویداوە و چی روودەدات، سەیری بووڵتەنی کاژێر 08:00 بکە لەگەڵ شاهۆ ئەمین.
19:28
ترەمپ لەسەر ئێران: خۆبەدەستەوەدانێکی بێمەرج
ترەمپ لەسەر ئێران: خۆبەدەستەوەدانێکی بێمەرج
پۆستی زیاتر لە دۆناڵد ترەمپەوە گەیشت لەبارەی جەنگی ئێران و ئیسرائیل و دەڵێت، خۆبەدەستەوەدانێکی بێ مەرج. بەپێی پۆستەکانی پێشوو، رووی دەمی ترەمپ لە ئێرانە.
لە پۆستێکی دیکەشدا دەڵێت، دەزانن رێبەری باڵای ئێران لە کوێیە، ئامانجێکی ئاسانە بۆ ئەوان، "بەڵام لەوێ سەلامەتە - ئێمە لەناوی نابەین - نایکوژین." بەلایەنی کەمەوە بۆ ئێستا.
سەرۆکی ئەمریکا گوتوویەتی، "ئێمە نامانەوێت مووشەک ئاراستەی خەڵکی سڤیل، یان سەربازانی ئەمریکی بکرێت. خەریکە سەبرمان لێ دەبڕێت. سوپاس بۆ گرنگیدانتان بەم بابەتە!"
19:17
ستامەر: ترەمپ ئاماژەی بەوە نەکردووە ئەمریکا نیازی هەیە بچێتە جەنگەکەوە
سەرکردەکانی وڵاتانی جی 7
کیەر ستامەر، سەرۆکوەزیرانی بەریتانیا دەڵێت، ترەمپ هیچ شتێکی نەگوتووە کە ئاماژە بێت بۆ ئەوەی ئەمریکا خەریکە تێوەبگلێت لە جەنگی نێوان ئیسرائیل و ئێراندا.
هەردوو پیاوەکە شانبەشانی سەرکردەکانی دیکە لە لووتکەی G7 (جی حەوت) لە کەنەدا کۆبوونەوە، بەڵام سەرۆکی ئەمریکا زوو کۆبوونەوەکەی بەجێهێشت، وەک ئاماژەیەک بۆ رووداوەکانی رۆژهەڵاتی نێوەڕاست.
19:16
جێگری ترەمپ: رەنگە سەرۆک رێکاری زیاتر بگرێتە بەر
جەی دی ڤانس، جێگری ترەمپ: رەنگە سەرۆک ترەمپ رێکاری زیاتر بگرێتە بەر بۆ کۆتاییهێنان بە پرۆگرامی ئەتۆمیی ئێران
جەی دی ڤانس، جێگری ترەمپ: رەنگە سەرۆک ترەمپ رێکاری زیاتر بگرێتە بەر بۆ کۆتاییهێنان بە پرۆگرامی ئەتۆمیی ئێران pic.twitter.com/5DfS5nB0xJ
— Rudaw (@Rudawkurdish) June 17, 2025
19:12
دۆناڵد ترەمپ: بەتەواویی کۆنترۆڵی ئاسمانی ئێرانمان کردووە
رووداو
دۆناڵد ترەمپ: ئێستا بەتەواویی کۆنترۆڵی ئاسمانی ئێرانمان کردووە. ئێران چەکی بەرگریی باشی هەیە، بەڵام بەراورد ناکرێت بەوانەی ئەمریکا. هیچ کەس وەکو ئێمە باش دروستیان ناکات.
17:53
بۆردوومانی نوێ لە ئەسفەهان
ڤیدیۆی زیاتر گەیشت؛ تەقاندنەوەی کۆگەیەکی سەربازی لە ئەسفەهان. تاوەکو ئێستا زیانە گیانی و مادییەکانی رانەگەیێندراون.
بەپەلە.. ڤیدیۆی زیاتر گەیشت؛ تەقاندنەوەی کۆگەیەکی سەربازی لە ئەسفەهان pic.twitter.com/8Xv3Fdidjp
— Rudaw (@Rudawkurdish) June 17, 2025
17:01
میدیای فەرمیی ئێران: داوا لە هاووڵاتیان دەکەین وەتسئەپ و ئینستاگرام بەکارنەهێنن
رووداو
دامەزراوەی رادیۆ و تەلەڤزیۆنی ئێران داوا لە هاووڵاتیانی ئەو وڵاتە دەکات وەتسئەپ و ئیسنتاگرام بەکارنەهێنن.
ئەمڕۆ سێشەممە 17ی حوزەیرانی 2025، کەناڵی دووی دامەزراوەی رادیۆ و تەلەڤزیۆنی ئێران بڵاویکردەوە، وەتسئەپ و ئینستاگرام خەریکە زانیاری تاکە کەسی و زانیاری لە سەر شوێنی مانەوەی هاووڵاتییان بۆ ئیسرائیل کۆدەکاتەوە.
ئەو کەناڵە داوا لە خەڵک دەکات ئەو دوو ئەپلیکەیشنە بەکارنەهێنن و لە سەر مۆبایلەکانیشیان رەشی بکەنەوە یان لانیکەم ئەم ماوەیە بەهیچ جۆرێک بەکاریان نەهێنن.
بە گوێرەی کەناڵەکە، ئیسرائیل لەو رێگەیەوە دەستی بە زانیارییە تاکەکەسییەکان دەگات و هەربۆیە دەبێت زۆر هۆشیار بن.
بەیانی ئەمرۆش بە بڕیاری ناوەندی فەرماندەیی ئاسایشی ئەلیکترۆنیی ئێران، بەکارهێنانی هەر جۆرە ئامێرێکی ئەلیکترۆنی لە بەرپرسانی ئەو وڵاتە و پاسەوانەکانیان قەدەخە کرا.
ئەو بڕیارە دوای ئەوە هات، یەحیەئیل لیتەر، باڵیۆزی ئیسرائیل لە ئەمریکا لە هەڤپەیڤینێکدا لەگەڵ کەناڵی مێریتی ئیسرائیلی رایگەیاند: "شەوانی پێنجشەممە و هەینی شتی حەپەسێنەر روودەدەن".
بە گوتەی باڵیۆزی ئیسرائیل، "سوپرایزەکە بە جۆرێک گەورە دەبێت کە ئۆپەراسیۆنی [تەقاندنەوەی] پەیجەر و بێتەلەکان لەچاویدا هیچ نابێت".
ئۆپەراسیۆنی پەیجەر ئاماژەیە بە تەقاندنەوەی ئامێرەکانی پەیوەندیی حیزبوڵڵای لوبنان لە ئەیلوولی 2024 کە بووە هۆی کوژرانی 37 کەس و برینداربوونی نزیکەی 3000 کەسی دیکە.
ئیسرائیل لە رۆژی هەینییەوە دەستی بە هێرش بۆسەر ئێران کردووە و دەڵێت، ئامانجی رێگریکردنە لەوەی تاران ببێتە خاوەنی چەکی ئەتۆمی؛ ئامانجێک کە ئێران رەتی دەکاتەوە کاری بۆ بکات.
14:03
بەکارهێنانی ئامێرەکانی پەیوەندی لە بەرپرسانی ئێران قەدەخە کرا
ئامێرێکی ئەلیکترۆنی پەیوەندیکردن.
بە بڕیاری ناوەندی فەرماندەیی ئاسایشی ئەلیکترۆنیی ئێران، بەکارهێنانی هەر جۆرە ئامێرێکی ئەلیکترۆنی لە بەرپرسانی ئەو وڵاتە و پاسەوانەکانیان قەدەخە کرا.
میدیاکانی ئێران نیوەڕۆی سێشەممە 17-06-2025 بڵاویانکردەوە، ناوەندی فەرماندەیی ئاسایشی ئەلیکترۆنیی ئێران بڕیاری داوە کەڵکوەرگرتنی بەرپرسانی ئێران لە تەواوی ئامێرە ئەلیکترۆنییەکان کە بۆ پەیوەندیکردن بەکاردەهێندرێن، قەدەخە بکات.
ئەو بڕیارە پاسەوانەکانیشیان دەگرێتەوە و ئەوانیش نابێت هیچ ئامێرێک بەکاربێنن کە بۆ پەیوەندیکردن بەکاربهێندرێت.
ئەو بڕیارە دوای ئەوە هات، یەحیەئیل لیتەر، باڵیۆزی ئیسرائیل لە ئەمریکا لە هەڤپەیڤینێکدا لەگەڵ کەناڵی مێریتی ئیسرائیلی رایگەیاند، "شەوانی پێنجشەممە و هەینی شتی حەپەسێنەر دەبینن".
بە گوتەی باڵیۆزی ئیسرائیل، "سوپرایزەکە بە جۆرێک گەورە دەبێت، کە ئۆپەراسیۆنی [تەقاندنەوەی] پەیجەر و بێتەلەکان لەچاویدا هیچ نابێت".
ئۆپەراسیۆنی پەیجەر ئاماژەیە بە تەقاندنەوەی ئامێرەکانی پەیوەندیی حیزبوڵڵای لوبنان لە ئەیلوولی 2024 کە بووە هۆی کوژرانی 37 کەس و برینداربوونی نزیکەی سێ کەسی دیکە، لە نێویاندا باڵیۆزی ئێران لە لوبنان.
13:15
سوپای پاسداران: بارەگای مۆسادمان لە تەل ئەڤیڤ بەئامانج گرت
ناوچەیەکی بۆردوومانکراوی تەل ئەڤیڤ لەلایەن ئێرانەوە. وێنە: AFP
سوپای پاسداران دەڵێت، "بارەگای ناوەندی هەواڵگریی و ناوەندی ئۆپەراسیۆنەکانی سوپای زایۆنیمان بەئامانج گرت."
سوپای پاسداران دەشڵێت، دوو بارەگاکە "ئاگریان گرتووە."
12:12
ترەمپ دەیەوێت بەرنامەی ئەتۆمیی ئێران 'بە راستی کۆتایی پێ بێت'
دۆناڵد ترەمپ، سەرۆکی ئەمریکا
دۆناڵد ترەمپ، سەرۆکی ئەمریکا جەخت دەکاتەوە کە هەوڵی وەستاندنی جەنگی نێوان ئیسرائیل و ئێران نادات، بەڵکو دەیەوێت بەرنامەی ئەتۆمیی ئێران "بە راستی کۆتایی پێ بێت"، ئەمە وەک میدیای ئەمریکی باسی دەکات.
لە کاتی گەڕانەوەی لە کەنەداوە بۆ واشنتن، ترەمپ لە نێو فڕۆکەی سەرۆکایەتییدا بە رۆژنامەڤانانی گوت: "نەمگوتووە ئاگربەستم دەوێت"؛ هەروەها ئاماژەی بەوە کرد کە دەیەوێت "کۆتاییهاتنێکی راستەقینە" بۆ بەرنامەی ئەتۆمی ئێران بەدەستبێت و تاران "بە تەواوی دەستبەرداری" چەکی ئەتۆمی بێت.
ئێران بەردەوام رەتیکردووەتەوە ئامانج لە بەرنامە ئەتۆمییەکەی دروستکردن بۆمب بێت.
ترەمپ هەروەها باسی لەوە کرد کە ئیسرائیل هێرشەکانی بۆ سەر ئێران کەم ناکاتەوە؛ گوتیشی: "دوو رۆژی دیکە دەزانن چی دەبێت. دەیبینن. تاوەکو ئێستا هیچ کەس [هێرشەکانی] خاونەکردوونەتەوە."
بڕیارە ئەمڕۆ ترەمپ لە ژووری ئۆپەراسیۆنە هەستیارەکان لە کۆشکی سپی دۆخەکە تاوتوێ بکات، لە کاتێکدا باس لە ئەگەری بەشداربوونی ئەمریکا لە جەنگەکەدا دەکرێت، چونکە ئیسرائیل توانای سەربازیی پێویستی نییە بۆ لێدان لە بنکەی ئەتۆمیی فوردۆ لە نزیک شاری قوم کە لە ژێر زەویدایە.
ترەمپ ئاماژەی بەوە کرد، پێویست بوو لە کۆشکی سپی بێت، بۆ ئەوەی راستەوخۆ و بە باشی گوێی لە زانیارییەکان بێت لەبری ئەوەی بە تەلەفۆن لەسەر هێڵ بێت.
ترەمپ هەروەها دڵنیا نییە کە ئایا ستیڤ ویتکۆڤ، نێردەی تایبەت یانیش جەی دی ڤانس، جێگری سەرۆک بنێرێت بۆ ئەوەی دانوستاندن لەگەڵ ئێرانییەکان بکەن.
کاتێک پرسیاری لێکرا ئایا دەیاننێرێت یان نا، ترەمپ لە وەڵامدا گوتی: "رەنگە،" بەڵام ئاماژەی بەوەشکرد کە "ئەوە بەندە لەسەر ئەوەی کە گەڕامەوە چی روودەدات."
لەبارەی ئەگەری هێرشکردنە سەر بنکە سەربازییەکانی ئەمریکا لە ناوچەکە، ترەمپ گوتی: "ئێران دەزانێت کە نابێت دەست لە هێزەکانمان بدات،" ئەگەر نا، ئەمریکا "بە هێزێکی یەکجار گەورەوە لێی دەدات."
دەقی پرسیاری رۆژنامەڤانان و وەڵامی دۆناڵد ترەمپ:
رۆژنامەڤانی یەکەم: پێش ئەوەی بەڕێبکەوی، گوتت بەهۆی ئاگربەست نییە کە دەگەڕێیەوە، دەتوانی روونتری بکەیەوە؟
دۆناڵد ترەمپ، سەرۆکی ئەمریکا: ئێمە بە دوای ئاگربەستەوە نین. ئەوە ئیمانوێل بوو وایگوت، کە پیاوێکی چاکە، بەڵام زۆر جار راست نایپێکێت، ئێمە بەدوای شتێکەوەین کە لە ئاگربەست باشتر بێت."
رۆژنامەڤانی دووەم: چ شتێک لە ئاگربەست باشترە؟ چیتان دەوێت؟
دۆناڵد ترەمپ: کۆتایی. کۆتاییهاتنێکی راستەقینە، نەوەک ئاگربەست. دەبێت بە تەواوی دەستبەرداری بن، ئەوەش شتێکی باشە.
رۆژنامەڤانی دووەم: دەکرێت ئەم شتە لە 24 کاژێردا رووبدات؟
دۆناڵد ترەمپ: بۆچی نا؟ بێگومان دەرفەتی ئەوەیان هەیە. دەکرێت بە تەواوی دەستبەرداری بن.
دۆناڵد ترەمپ: کارێکی زۆر باش دەکەین. لەبیرتان بێت، نابێت ئێران چەکی ئەتۆمی هەبێت، کورت و پوخت، پێویست ناکات بە قووڵی بچینە نێو بابەتەکە، بە سادەیی نابێت چەکی ئەتۆمییان هەبێت.
رۆژنامەڤانی سێیەم: داوات لە خەڵکی تاران کرد شارەکە چۆڵ بکەن، ئایا ئەوە هەڕەشەیە یان شتێک بەڕێوەیە؟ بۆچی داوای چۆڵکردنت کرد؟
دۆناڵد ترەمپ: تەنیا ئەوەیە کە دەمەوێت خەڵک سەلامەت بێت. هەمیشە دەکرێت هەندی شت رووبدەن. تەنیا دەمەوێت خەڵکەکە سەلامەت بن. ئێمە خەڵکی زۆر باشمان هەیە و دەزانن چۆن خۆیان بپارێزن. ئەگەر ئەوان شتێک لە خەڵکەکەمان بکەن، زۆر بە هێزەوە لێیان دەدەین. پێم وایە ئەوان دەزانن کە نابێت دەست لە هێزەکانمان بدەن.
09:51
فریاگوزاری نیشتمانیی ئیسرائیل: 5 کەس بەهۆی دوایین هێرشەکانی ئێران بریندار بوون
رووداو
دەزگەی فریاگوزاری نیشتمانیی ئیسرائیل دەڵێت، 5 کەس بەهۆی دوایین هێرشەکانی ئێران بۆ سەر وڵاتەکە بریندار بوون.
گوتەبێژێکی دەزگەی فریاگوزاری نیشتمانیی ئیسرائیل دەڵێت، ئەو 5 کەسە لە وێستگەیەکی پاس لە نێوەڕاستی ئیسرائیل بریندار بوون.
09:25
سوپای ئیسرائیل: سوپاسالاری نوێی ئێرانمان کوشت
رووداو
سوپای ئیسرائیل دەڵێت، عەلی شادومانی، سوپاسالاری نوێی ئێرانیان کوشتووە.
09:17
ئێران هێرشێکی مووشەکی نوێی بۆ سەر ئیسرائیل دەستپێکرد
رووداو
ئێران هێرشێکی مووشەکی نوێی بۆ سەر ئیسرائیل دەستپێکرد. ئیسرائیل دەڵێت، مووشەکێکی ئێران لەناوچەی غووش دان لە تەلئەڤیڤ کەوتەخوارەوە.
میدیای ئێرانی دەڵێت، بنکەی سەربازی نێڤاتیم لە نەقەب کراوەتە ئامانج.
07:08
راگەیێندراوی G7: ئیسرائیل مافی هەیە بەرگری لە خۆی بکات
سەرکردەکانی G7 لە کەنەدا. وێنە: AFP
سەرۆکی وڵاتانی گرووپی7 لە کەنەداوە راگەیێندراوێکی هاوبەشیان بڵاوکردەوە و تێیدا هاتووە: ئیسرائیل مافی هەیە بەرگری لە خۆی بکات و ئێمە روونین لەوەی کە تاران نابێ هەرگیز چەکی ئەتۆمی هەبێت.
ئاماژە بەوەش دەکات: جەخت دەکەینەوە بەزوویی چارەسەری قەیرانی ئێران بکرێت و چارەسەرێکی فراوان بۆ رۆژهەڵاتی نێوەڕاست بدۆزرێتەوە بە ئاگربەستی غەززەشەوە.
06:37
رۆژهەڵات و رۆژئاوای تاران بۆردوومان دەکرێت
رووداو
جارێکی دیکە دەنگی تەقینەوەی بەهێز لە تاران بیسترا؛ میدیای فەرمیی ئێران دەڵێت، تەقینەوەکە تایبەتە بە شاری قودسی سەر بە پارێزگاکە.
لە درێژەی پێکدادانی نێوان ئێران و ئیسرائیل، کاژێر 05:45 خولەکی بەرەبەیانیی ئەمڕۆ سێشەممە 17-06-2025، میدیای فەرمیی ئێران بڵاوی کردەوە، لە پارێزگای تاران دەنگی تەقینەوەیەکی بەهێز بیسترا.
بەگوێرەی زانیارییەکان، تەقینەوەکە لە شاری قودسی سەر بە پارێزگاکە روویداوە و سیستمی بەرگریی ئاسمانیی سوپا بۆ بەرپەرچدانەوە کاراکراوە.
شاری قودس کە لە رۆژئاوای تاران هەڵکەوتووە، چەندین بنکەی سەربازی و هەواڵگریی گرنگی لێ دەبینرێت؛ لەوانەش بنکەکانی سەربازیی وەلی عەسر، موخبیری و قەرارگەی ساروڵڵای سوپای پاسداران.
هەروەها فڕۆکەخانەی پەیامی کەرەج و ژمارەیەک لە گرنگترین کۆگەکانی لۆجیستی و پشتیوانیی سوپا لەو شارە هەڵکەوتوون.
بنکەی مەلاردیش کە یەکێک لە دامەزراوە مووشەکییە سەرەکییەکانی ئێرانە، دەکەوێتە رۆژئاوای شاری قودس کە پێشتریش لەلایەن ئیسرائیلەوە کرابووە ئامانج.
لە لایەکی دیکە، ڤیدیۆ بڵاوکراوەتەوە کە ئیسرائیل رۆژهەڵاتی تاران بۆردوومان دەکات؛ دووکەڵ ئاسمانی گرتووەتەوە.
06:00
ڤیدیۆ: ئیسرائیل رۆژهەڵاتی تاران بۆردوومان دەکات
دیمەنی بۆردوومانەکە.
.کاژێر 6:00ـی بەیانییە و ئیسرائیل رۆژهەڵاتی تاران بۆردوومان دەکات؛ دووکەڵ ئاسمانی گرتووەتەوە
05:50
سێ کەشتی لە گەرووی هورمز ئاگریان گرتووە
رووداو
بەپێی زانیارییەکان، سێ کەشتی کە وادیارە نەوتهەڵگر بن، لە ئاوەکانی کەنداو و لە نزیک عومان ئاگریان گرتووە.
04:51
هاونیشتمانییەک بۆ رووداو: بنکەیەکی سەربازی لە شنۆی رۆژهەڵاتی کوردستان کرایە ئامانج
دیمەنێک لە ئاسمانی شنۆی رۆژهەڵاتی کوردستان.
لە شارە سنوورییەکانی پارێزگای ورمێی رۆژهەڵاتی کوردستان سیستمەکانی بەرگریی ئاسمانی کارا کراون، هاونیشتمانییەکی خەڵکی شنۆی سەر بە پارێزگاکە دەڵێت، بنکەیەکی سەربازیی شارەکە کە سێ سەکۆی مووشەکی تێدا جێگیر کرابوون، کرایە ئامانج.
بەگوێرەی زانیارییەکان، بەرەبەیانیی ئەمڕۆ سێشەممە 17-06-2025، لە شارەکانی پیرانشار، مهاباد و شنۆی رۆژهەڵاتی کوردستان سیستمی بەرگریی ئاسمانی کاراکراون.
کاراکرانی سیستمە بەرگرییە ئاسمانییەکان هاوکات بوو لەگەڵ دەستپێکردنی زنجیرە هێرشێکی مووشەکی و درۆنیی ئێران بۆ سەر ئیسرائیل.
هاونیشتمانییەکی خەڵکی شنۆی رۆژهەڵاتی کوردستان هێرشکردنە سەر بنکەیەکی سەربازی پشتڕاستکردەوە و بە رووداوی راگەیاند، ''لە نزیک گوندی بێمزورتێی سەر بە شارەکە، بنکەیەکی سەربازیی چۆڵی بە ناوی تۆپخانە لێیە کە بۆ هێرشکردنە سەر ئیسرائیل، سێ سەکۆی مووشەکی تێدا جێگیر کرابوون.''
بەگوتەی ئەو هاونیشتمانییە، ''هاوکات لەگەڵ هێرشە مووشەکییەکانی ئێران بۆ سەر ئیسرائیل، سیستمی بەرگریی ئاسمانیی جێگیر لە بنکە سەربازییەکەش کاراکرا و دواتر دەنگی تەقینەوەیەکی بەهێز بیسترا".
04:39
سوودانی و شێخ تەمیم گفتوگۆیان لەبارەی هێرشی ئیسرائیل بۆ سەر ئێران کرد
محەممەد شیاع سوودانی، سەرۆکوەزیرانی عێراق و شێخ تەمیم بن محەممەد ئال سانی، میری قەتەر.
سەرۆکوەزیرانی عێراق و میری قەتەر گفتوگۆیان لەبارەی رەنگدانەوە نەرێنییەکان و ئاڵنگارییە ئەمنییەکان بۆ سەر ناوچەی رۆژهەڵاتی نێوەڕاست کرد بەهۆی هێرشەکانی نێوان ئیسرائیل و ئێران.
شەوی 16ـی حوزەیرانی 2025، نووسینگەی راگەیاندنی سەرۆکی ئەنجوومەنی وەزیرانی عێراق راگەیێندراوێکی بڵاوکردەوە و رایگەیاند، محەممەد شیاع سوودانی، سەرۆکوەزیرانی عێراق، پەیوەندییەکی تەلەفۆنی لەگەڵ شێخ تەمیم بن محەممەد ئال سانی، میری قەتەر کردووە.
نووسینگەی راگەیاندنی سەرۆکی ئەنجوومەنی وەزیرانی عێراق راشیگەیاند، لە پەیوەندییە تەلەفۆنییەکەی سوودانی – تەمیم، گفتوگۆ لەبارەی دوایین پێشهاتە ئەمنییەکانی ناوچەکە کردووە لە رۆشنایی "هێرشە دوژمنکارانەکەی قەوارەی زایۆنی بۆ سەر کۆماری ئیسلامیی ئێران".
لە پەیوەندییە تەلەفۆنییەکەدا، سوودانی رایگەیاندووە: "دەستدرێژییەکانی زایۆنیزم بۆ سەر ئێران، پێشێلکارییەکی زەق و ئاشکرایە دژی یاسا نێودەوڵەتییەکان و هەڕەشەیە بۆ سەر ئاسایشی هەرێمی."
سوودانی وەک لە راگەیێندراوەکەدا هاتووە، پێداگری کردووە لە رەتکردنەوەی عێراق بۆ بەزاندنی ئاسمانەکەی کە پێشێلکارییە بۆ سەروەرییەکان و پێچەوانەی هەموو یاسا و پەیماننامە نێودەوڵەتییەکانە.
سەرۆکوەزیرانی عێراق ئاماژەی بە گرنگی تۆکمەکردنی زیاتری هاوکاری و هاوئاهەنگییەکانی نێوان وڵاتانی عەرەبی و ئیسلامی کردووە بۆ راگرتنی "دەستدرێژی دوژمنکارانەی زایۆنی" و پشتیوانیکردن لە ئاراستەی دانووستاندنەکانی نێوان کۆماری ئیسلامی ئێران و ویلایەتە یەکگرتووەکانی ئەمریکا.
لەلایەن خۆیەوە، میری قەتەر پاڵپشتی تەواوی وڵاتەکەی بۆ سەروەری عێراق کرد لە رێگەی هەوڵە دیپلۆماسییەکانی حکومەتی ناوەندی لەپێناو پاراستنی ئاسایش و سەقامگیری و بەرگرتن لە فراوانبوونی بازنەی جەنگ.
04:33
20 وڵاتی ئیسلامی سەرکۆنەی هێرشەکانی ئیسرائیل بۆ سەر ئێران دەکەن
ئیسرائیل بۆردوومانی ناوچەیەکی تارانی کردووە. وێنە: AFP
لە راگەیێندراوێکی هاوبەشدا، وەزیرانی دەرەوەی 20 وڵاتی ئیسلامی، سەرکۆنەی هێرشەکانی ئیسرائیل بۆ سەر کۆماری ئیسلامیی ئێران دەکەن.
وەزیرانی دەرەوەی 20 وڵاتی ئیسلامی لە راگەیێندراوێکی هاوبەشدا، سەرکۆنەی ئەو هێرشانەی ئیسرائیلیان کرد کە لە بەرەبەیانی رۆژی 13ـی حوزەیرانی 2025ـەوە کراونەتە سەر کۆماری ئیسلامیی ئێران. هاوکات هۆشدارییاندا لە پەرەسەندنی "مەترسیدار" لە ناوچەکەدا و داوای گەڕانەوەیان کرد بۆ گفتوگۆ و دیپلۆماسییەت وەک تاکە رێگەچارە بۆ چارەسەرکردنی قەیرانەکە.
راگەیێندراوەکە لەلایەن وەزیرانی دەرەوەی هەر یەک لە ئوردن، ئیمارات، پاکستان، بەحرەین، بڕونای دارولسەلام، تورکیا، چاد، جەزائیر، دوورگەکانی قەمەر، جیبۆتی، سعودیە، سوودان، سۆمال، عێراق، عومان، قەتەر، کوێت، لیبیا، میسر و مۆریتانیا دەرچووە.
04:19
چین داوا لە هاووڵاتییانی دەکات "بە زووترین کات" ئیسرائیل بەجێبهێڵن
پاشماوەی بۆردوومانی ئێران لە ئیسرائیل. وێنە: AFP
باڵیۆزخانەی چین لە ئیسرائیل داوای لە هاووڵاتییانی کرد "بە زووترین کات" ئیسرائیل بەجێبهێڵن، ئەمەش دوای ئەوە دێت هەردوولا بە قورسی هێرشیان بۆ سەر یەکدی دەستپێکردووە.
باڵیۆزخانەکە لە راگەیێندراوێکدا لە ویچات (WeChat) بڵاویکردەوە: "نوێنەرایەتیی چین لە ئیسرائیل داوا لە هاووڵاتییانی چینی دەکات بە زووترین کات لە رێگەی دەروازە سنوورییە وشکانییەکانەوە وڵاتەکە جێبهێڵن، بەو مەرجەی بتوانن سەلامەتیی گیانی خۆیان مسۆگەر بکەن."
هەروەها پێشنیازی بۆ هاووڵاتییانی کردووە کە بەرەو ئوردن بڕۆن.
لە راگەیێندراوەکەدا هاتووە: "زیانێکی زۆر بە ژێرخانی سڤیل گەیشتووە، قوربانیی سڤیل روو لە زیادبوونە و دۆخی ئەمنی مەترسیدارتر دەبێت."
04:06
میدیای پاسداران: ئیسرائیل هێرشی کردە سەر بنکەیەکی سەربازی لە ئابادان
میدیای سوپای پاسداران بڵاوی کردووەتەوە ئیسرائیل هێرشی کردووەتە سەر بنکەیەکی سەربازیی شاری ئابادانی باشووری ئێران.
بەرەبەیانیی ئەمڕۆ سێشەممە 17-06-2025، میدیای سوپای پاسداران ڤیدیۆیەکی بڵاوکردەوە کە تێیدا شوێنێک دەردەکەوێت کە ئاگرکەوتنەوە تێیدا روویداوە و پێدەچێت بۆردوومان کرابێت.
بەگوێرەی میدیای سوپای پاسداران، ڤیدیۆکە تایبەتە بە بنکەیەکی سەربازی لە شاری ئابادانی سەر بە پارێزگای خوزستان.
هاوکات لە درێژەی هێرشەکانی ئیسرائیل، چەند بنکەی سەربازی لە پیرانشار، شنۆ و مهابادی رۆژهەڵاتی کوردستان کراونەتە ئامانج، هەروەها شارەکانی شیراز، ئەهواز، شووش، ئەندیمێشک، مەشهەد، گەرمدەڕە و ناوچە جیاجیاکانی تاران بۆردوومان کراون.
03:58
وەزیری بەرگریی ئەمریکا: هەڵوێستی سەرۆک ترەمپ لەسەر رێککەوتنی ئەتۆمی نەگۆڕاوە
وەزیری بەرگریی ئەمریکا: هەڵوێستی سەرۆک ترەمپ لەسەر رێککەوتنی ئەتۆمی نەگۆڕاوە
پیت هێگسێس، وەزیری بەرگریی ئەمریکا رایدەگەیێنێت، "هێزەکانی ئەمریکا لەسەر دۆخی بەرگریی خۆیان بەردەوامن و ئەوە نەگۆڕاوە. هەروەها دەڵێت، ئێمە پارێزگاری لە سەربازانی ئەمریکا و بەرژەوەندییەکانمان دەکەین."
لەکاتی قسەکردنی بۆ فۆکس نیوز، پیت هێگسێس، وەزیری بەرگریی ئەمریکا لە وەڵامی ئەو پرسیارەی ئایا سەرۆک ترەمپ هێشتا ئامانجی ئەوەیە رێککەوتنێک لەگەڵ ئێرانییەکان بکات؟ گوتی، "بێگومان، سەرۆک وەکو ئەمڕۆ گوتی، هەڵوێستی لەمبارەیەوە نەگۆڕاوە."
02:36
لێدوانی ماکرۆن لەسەر ئاگربەستی ئێران و ئیسرائیل
لێدوانی ماکرۆن لەسەر ئاگربەستی ئێران و ئیسرائیل
ئیمانوێل ماکرۆن، سەرۆکی فەرەنسا دەڵێت، کە زوو جێهێشتنی لووتکەی G7 لە کەنەدا لەلایەن دۆناڵد ترەمپەوە "ئەرێنییە... بە لەبەرچاوگرتنی ئامانجی گەیشتن بە ئاگربەست لە رۆژهەڵاتی نێوەڕاستدا."
دۆناڵد ترەمپ بڕیاریداوە لووتکەکە جێبهێڵێت و بگەڕێتەوە کۆشکی سپی. فۆکس نیوزی ئەمریکی دەڵێت، ترەمپ داوای لە ئەندامانی ئەنجوومەنی ئاسایشی نەتەوەیی کردووە لە سیچوەیشن رووم ئامادە بن.
ماکرۆن گوتی کە ترەمپ بە سەرکردەکانی G7ی گوتووە، گفتوگۆ لە ئارادایە بۆ بەدەستهێنانی ئاگربەست لەنێوان ئیسرائیل و ئێراندا و حکومەتە ئەورووپییەکان ئامادەدەبن بەشداری لە دانوستانە ئەتۆمییەکانی ئێراندا بکەن ئەگەر ئاگربەستەکە بەدیبێت.
02:15
بەهۆی دۆخی رۆژهەڵاتی نێوەڕاست ترەمپ بەپەلە لە کەنەداوە دەچێتەوە کۆشکی سپی
بەهۆی دۆخی رۆژهەڵاتی نێوەڕاست ترەمپ بەپەلە لە کەنەداوە دەچێتەوە کۆشکی سپی
گوتەبێژی کۆشکی سپی رایدەگەیێنێت، بەهۆی ئەو رووداوانەی کە لە رۆژهەڵاتی نێوەڕاست روودەدەن، دۆناڵد ترەمپ، سەرۆکی ئەمریکا لە کەنەداوە دوای نانی ئێوارە لەگەڵ سەرۆکی وڵاتانی گرووپی 7، شوێنەکە جێدەهێڵێت و دەگەڕێتەوە کۆشکی سپی.
گوتەبێژەکە پۆستێکی ترەمپی لە ترووس سۆشیاڵ بڵاوکردووەتەوە کە تێیدا ترەمپ داوای لە خەڵک کردبوو دەستبەجێ تاران جێبهێڵن.
02:09
هیچ هەواڵێک لەبارەی قوربانییانی دوایین مووشەکەکانی ئێران نییە
هیچ هەواڵێک لەبارەی قوربانییانی دوایین مووشەکەکانی ئێران نییە
دوای ئەوەی ئیسرائیل رایگەیاند، شەپۆلێکی نوێی مووشەکییان لە ئێرانەوە دەستنیشان کردووە، ماگێن داڤید ئەدۆم، خزمەتگوزاریی فریاکەوتنی نیشتمانیی ئیسرائیل رایگەیاند، "لەم قۆناخەدا" هیچ راپۆرتێک نییە لەبارەی بەرکەوتنی مووشەک یان قوربانی.
خزمەتگوزارییەکە رایگەیاندووە، دوای ئەوەی زەنگی ئاگادارکردنەوە لە بەشێک لە نێوەڕاست و باشووری ئیسرائیل لێدرا، چەند کەسێک لە کاتی چوونە شوێنی پارێزراو برینداربوون.
02:00
دەنگی چەند تەقینەوەیەکی بەهێز لە رۆژهەڵاتی تاران و چەند شارێکی دیکەی ئێران بیسترا
ئاگر لە پاڵاوگەیەکی نەوت لە تاران بەرز دەبێتەوە. وێنەکە لە 15-6-2025 گیراوە: AFP
میدیای فەرمیی ئێران دەڵێت، لەگەڵ بیستنی دەنگی چەند تەقینەوەیەکی بەهێز لە شەقامی ''پیرووزی''ـی تاران، سیستمی بەرگریی ئاسمانی کاراکرا. هاوکات لە مەشهەد و ئەهوازیش دەنگی تەقینەوە بیستراوە.
بەرەبەیانیی ئەمڕۆ سێشەممە 17-06-2025، لە چەند ناوچەی پایتەختی ئێران سیستمی بەرگریی ئاسمانی کاراکران. ئاژانسی فەرمیی ئێران (ئیرنا) کاژێر 01:40 خولەک بڵاوی کردەوە، لە شەقامی پیرووزیی رۆژهەڵاتی شارەکە دەنگی تەقینەوەی بەهێز بیستراوە.
بەگوێرەی بەدواداچوونی تۆڕی میدیایی رووداو، قەرارگەی پشتیوانیی هێزی ئاسمانیی ئێران لەو شەقامە هەڵکەوتووە کە پێشتریش لەلایەن ئیسرائیلەوە بۆردوومان کرابوو.
هەروەها لە شارەکانی مەشهەد و ئەهوازیش دەنگی تەقینەوەی بەهێز بیستراوە و میدیایەکی نزیک لە سوپای پاسداران بەبێ ئاماژەدان بە شێوەی هێرشەکە دەڵێت، سیستمی بەرگریی ئاسمانی لە هەردوو شارەکان بە سەرکەوتوویی کەوتوونەتە کار.
هاوکات لەگەڵ بیستنی دەنگی تەقینەوە لە ناوچە جیاجیاکانی ئێران و رۆژهەڵاتی کوردستان، سوپای پاسداران ناوە ناوە بە درۆن و مووشەک هێرش دەکاتە سەر ئیسرائیل.
01:48
وەزیری بەرگریی ئەمریکا دەڵێت فەرمانی کردووە "توانای زیاتر" رەوانەی رۆژهەڵاتی نێوەڕاست بکرێت
وەزیری بەرگریی ئەمریکا دەڵێت فەرمانی کردووە "توانای زیاتر" رەوانەی رۆژهەڵاتی نێوەڕاست بکرێت
پیت هێگسێس، وەزیری بەرگریی ئەمریکا، رۆژی دووشەممە رایگەیاند کە فەرمانی "جوڵەپێکردنی توانای زیاتری" داوە بۆ ناوچەی رۆژهەڵاتی نێوەڕاست.
هێگسێس لە پۆستێکدا لەسەر تۆڕی ئێکس (X) نووسیویەتی: "پاراستنی هێزەکانی ئەمریکا لە پێشینەی کارەکانماندایە و ئەم جوڵەپێکردنانە بە مەبەستی بەهێزکردنی دۆخی بەرگریمانە لە ناوچەکەدا."
روون نییە توانایە زیادەکان چی لەخۆدەگرن. پێشتر میدیای ئەمریکا رایگەیاندبوو کە گرووپی هێرشبەری کەشتیی فڕۆکەهەڵگری یو ئێس ئێس نیمیتز کە پلانی بۆ دانرابوو بە شێوەی خولاو بچێتە ناوچەکە و جێگەی گرووپی هێرشبەری کەشتیی فڕۆکەهەڵگری یو ئێس ئێس کارڵ ڤینسۆن بگرێتەوە، سەردانێکی پێشتر بەرنامە بۆ داڕێژراوی بۆ بەندەرێک هەڵوەشاندووەتەوە و "بەبێ دواکەوتن" بەرەو رۆژهەڵاتی نێوەڕاست دەجووڵێت.
01:38
پەیامێکی بەپەلە و تووند لە ترەمپەوە
پەیامێکی بەپەلە و تووند لە ترەمپەوە
دۆناڵد ترەمپ، سەرۆکی ئەمریکا رایگەیاند، "دەبێ هەمووکەسێک دەستبەجێ تاران جێبهێڵێت".
لە پەیامێکدا لە سۆشیاڵ ترووس، ترەمپ رایگەیاند، "ئێران دەبوو ئەو رێککەوتنەی واژۆ بکردایە کە پێم گوتن واژۆی بکەن. چەند جێگای داخە و، بەفیڕۆدانی ژیانی مرۆڤە. بە سادەیی، ئێران نابێت چەکی ئەتۆمی هەبێت. من چەندین جار ئەمەم گوتووە! پێویستە هەمووان دەستبەجێ تاران چۆڵ بکەن!"
01:20
سوپای پاسداران دەڵێت، فەرمانبەرێکی ئاژانسی دەنگ و رەنگی ئێران کوژراوە
باڵەخانە و لۆگۆی ئاژانسی دەنگ و رەنگی ئێران.
سوپای پاسدارانی ئێران کوژرانی فەرمانبەرێکی ئاژانسی دەنگ و رەنگی وڵاتەکەی راگەیاند.
رۆژی دووشەممە، سوپای پاسداران رایگەیاند، مەعسومە عەزیمی، فەرمانبەری نووسینگەی ئاژانسی دەنگ و رەنگ، "بەهۆی هێرشەکەی ئیسرائیلەوە شەهید بووە."
بۆردوومانەکە لەکاتێکدا بوو کە ئاژانسەکە راگەیێندراوێکی ئەنجوومەنی ئاسایشی کۆماری ئیسلامیی ئێرانی دەخوێندەوە.
01:13
سوپای ئیسرائیل دەڵێت هاووڵاتیانی مەدەنی دەتوانن لە پەناگەکان بچنەدەرەوە
سوپای ئیسرائیل دەڵێت هاووڵاتیانی مەدەنی دەتوانن لە پەناگەکان بچنەدەرەوە
چەند خولەکێک لەمەوبەر، لە پۆستێکدا لەسەر تۆڕی ئێکس، هێزەکانی بەرگریی ئیسرائیل خەڵکیان ئاگادارکردەوە کە دەتوانن لە هەموو ناوچەکانی وڵاتدا ناوچە پارێزراوەکان جێبهێڵن.
ئەوە دوای ئاگادارکردنەوەکان دێت لە چەندین ناوچەدا کە سوپای ئیسرائیل رایگەیاند، مووشەکی هەڵدراویان لە ئێرانەوە دەستنیشان کردووە و هەوڵی تەقاندنەوەیان دەدەن.
نزیکەی 20 خولەک دواتر، سوپای ئیسرائیل نوێکردنەوەیەکی دیکەی دەرکرد و رایگەیاند، "دوای هەڵسەنگاندنی دۆخەکە، فەرماندەیی بەرەی ناوخۆ رێنمایی دەرکرد کە دەتوانرێت لە هەموو ناوچەکانی وڵاتدا لە ناوچە پارێزراوەکان بچنە دەرەوە."
هێزەکانی بەرگریی ئیسرائیل داوا دەکەن خەڵک لە کاتی پێویستدا بەردەوام بن لە پابەندبوون بە رێنماییەکان بۆ چوونە نێو پەناگەکان.
00:08
دوو کارمەندی مانگی سووری ئێرانی لە هێرشێکی ئیسرائیلدا لە تاران کوژران
دوو کارمەندی مانگی سووری ئێرانی لە هێرشێکی ئیسرائیلدا لە تاران کوژران
مانگی سووری ئێرانی رایگەیاند، دوو کارمەندی کۆمەڵەکەیان لە هێرشێکی ئیسرائیلدا لە تاران کوژراون.
کۆمەڵەی مانگی سووری ئێرانی رایگەیاند، "ئەم هێرشە لە کاتێکدا روویداوە کە کارمەندەکان پابەندی سەرەتایترین ئەرکە مرۆییەکانی خۆیان بوون و تێوەنەگلابوون لە هیچ چالاکییەکی سەربازیدا."
گرووپەکە وێنەی ئۆتۆمبێلێکی سووتاو و زیانلێکەوتووی بڵاوکردەوە کە دەگوترا ئەو ئەمبوڵانسەی مانگی سوور بووە کە کراوەتە ئامانج.
23:45
گوتەبێژێکی پاسداران: هێرشی مووشەکی تاوەکو بەرەبەیان بەردەوام دەبێت
میدیای فەرمیی ئێران لە زاری گوتەبێژێکی سوپای پاسدارانی ئێران رایگەیاند، نۆیەمین شەپۆلی هێرشەکانی ئێران بۆ سەر ئیسرائیل دەستیپێکردووە و تاوەکو بەرەبەیان بەردەوام دەبێت.
پێشتر میدیای ئێران رایگەیاندبوو، هێرشەکان لە مووشەک و درۆن پێکهاتوون.
23:42
ئەو فڕۆکە جەنگییە ئەمریکییانەی کە ئێران دەیەوێت لە شەڕی دژی ئیسرائیل بەکاریان بهێنێت
ئەو فڕۆکە جەنگییە ئەمریکییانەی کە ئێران دەیەوێت لە شەڕی دژی ئیسرائیل بەکاریان بهێنێت
لە پێش شۆڕشی ئیسلامیی ساڵی 1979 کاتێک ئێران پەیوەندییەکانی لەگەڵ ئەمریکا باش بوون، چەندین فڕۆکەی پێشکەوتووی لێ کڕیوە کە تاوەکو ئێستاش لە خزمەتی سەربازیدا کار دەکەن.
جۆرەکانی ئەمانەن:
F-14 Tomcat
F-4 Phantom 2
F-5 Tiger 2
تەمەنی ئەو فڕۆکانە نیو سەدە دەبن، بەشێکیان ئێران بە پارچەی ناوخۆ نوێی کردوونەتەوە و سیستمی تەکنەلۆژی بۆ زیاد کردوون، بەڵام ژمارەیان بە تەواوی نازانرێت کە چەندێکیان دەتوانن بە تەواوی کار بکەن.
چوار رۆژە جەنگی وڵاتەکە لەگەڵ ئیسرائیل دەستیپێکردووە تاوەکو ئێستا تەنیا بە مووشەک و درۆن وەڵامی هێرشەکانی ئیسرائیلی داونەتەوە و هیچ فڕۆکەیەکی لە هێرشەکانی بەکارنەهێناوە.
23:15
رێنوێنیی نوێ بۆ گەڕاندنەوەی ئەو گەشتیارانەی بەهۆی جەنگەوە گیریان خواردووە
بەهۆی جەنگەکەوە ئاسمانی عێراق و هەرێمی کوردستان داخراوە و ژمارەیەکی زۆری گەشتیار و هاونیشتمانییان لە وڵاتانی دیکە گیریان خواردووە. حکومەتی هەرێمی کوردستانیش بە رێنوێنیی نوێ دەیەوێت هاونیشتمانییان بە سەلامەتی بگەڕێنێتەوە.
بەگوێرەی پلانەکە، هاونیشتمانییان دەتوانن لە رێگەی تورکیاوە و بە وەرگرتنی "ڤیزای ترانزێت" بگەڕێنەوە هەرێمی کوردستان.
لە راگەیێندراوەکەی حکومەتدا هاتووە، ئەو هاونیشتمانییانەی کە پێشتر ناوی خۆیان تۆمارکردووە یان لە هەر شوێنێکی جیهان گیریانخواردووە، دەتوانن سەردانی نزیکترین باڵیۆزخانە یان کۆنسووڵخانەی تورکیا بکەن لەو وڵاتەی تێیدان بۆ وەرگرتنی ڤیزەی ترانزێتی کە ماوەکەی سێ رۆژە.
بە گوێرەی رێکارەکە، دوای وەرگرتنی ڤیزە، هاونیشتمانییان دەتوانن بگەنە تورکیا و لەوێشەوە بە رێگەی وشکانی و لە رێگەی دەروازەی ئیبراهیم خەلیلەوە بگەڕێنەوە هەرێمی کوردستان.
23:00
میدیای ئێران: لە هێرشەکاندا ئێران درۆن و مووشەک بەکاردەهێنێت
بەگوێرەی ئاژانسی هەواڵی مێهر، کە ئاژانسێکی نیمچەفەرمیی ئێرانییە، هێرشەکان فڕۆکەی بێفڕۆکەوان و مووشەک لەخۆدەگرن و ئاراستەی شارەکانی حەیفا و تەلئەڤیڤی ئیسرائیل کراون.
22:02
ئێران: هێرشێکی نوێی مووشەکی بۆ سەر ئیسرائیل دەستیپێکرد
ئێران: هێرشێکی نوێی مووشەکی بۆ سەر ئیسرائیل دەستیپێکرد
چەند هەواڵ و راپۆرتێک لە میدیای فەرمیی ئێران دەبینین کە دەڵێن، شەپۆلێکی دیکەی هێرشی مووشەکیی وڵاتەکە بۆ سەر ئیسرائیل دەستیپێکردووە.
چاوتان لەسەر لایڤ بلۆگەکە بێت، زانیاریی نوێتان لەسەر ئەو هەواڵانە پێدەڵێین.
هەروەها لە کاژێر 23:00 رووماڵێکی تایبەتمان دەستپێدەکات لەم لینکەوە بینەری بن
21:24
وەزارەتی دەرەوەی ئێران: هێرشکردنە سەر نەخۆشخانەکەی کرماشان تاوانی جەنگە
بۆردوومانکردنی کرماشان
وەزارەتی دەرەوەی ئێران دەڵێت، ئیسرائیل هێرشی کردە سەر نەخۆشخانەیەکی پارێزگای کرماشان، ئاماژە بەوەش دەکات، ئەو هێرشە پێشێلکارییەکی گەورەی یاسای نێودەوڵەتی و تاوانی جەنگە.
رۆژی دووشەممە، 16ی حوزەیرانی 2025، ئیسماعیل بەقایی، گوتەبێژی وەزارەتی دەرەوەی ئێران لە ئێکس بڵاویکردەوە، ئیسرائیل نەخۆشخانەی فارابی لە کرماشان بۆردوومانکرد. گوتیشی: هێرشکردنە سەر نەخۆشخانەکان و ناوچەکانی نیشتەجێبوون بە بڕیاری راستەوخۆی وەزیری بەرگریی ئەو وڵاتە بووە.
گوتەبێژەکەی وەزارەتی دەرەوەی ئێران ئاماژەی بەوەش کرد، ئەو هێرشە "پێشێلکارییەکی گەورەی یاسای نێودەوڵەتی و تاوانی جەنگە"؛ جەختی لەوەش کردەوە، "مێژوو بڕیار دەدات و شەرم بۆ پاڵپشتیکارانی رژێمەکە".
کاژێر 09:00ی بەیانیی ئەمڕۆ بە مووشەک هێرش کرایە سەر چەند ئامانجێک لە گەڕەکەکانی دزڵئاوا و دەوڵەتئاوای شاری کرماشان.
ئەو دوو گەڕەکە دەکەونە قەراخ شاری کرماشان؛ چەندین کۆمەڵگەی پیشەسازی و کۆگە لەوێن.
21:19
ئیسرائیل: دوو فڕۆکەی ئێرانمان تێکشکاندووە
وێنەی تێکشاندنی فڕۆکەکە
کەمێک لەمەوبەر گوێمان لە ئیفی دفرین، گوتەبێژی هێزەکانی بەرگریی ئیسرائیل بوو کە رایگەیاند، هێزی ئاسمانیی ئیسرائیل هێرشی کردووەتە سەر دوو فڕۆکەی جەنگیی جۆری F-14ی ئێرانی لەنێو وڵاتەکە.
دفرین هەروەها هەوڵیدا دڵنیایی بداتە ئەو بارمتە ئیسرائیلییانەی کە هێشتا لە غەززە دەستبەسەرن، گوتی، "ئەگەر گوێتان لێمە، ئێمە ئێوەمان لەبیرنەکردووە."
21:18
سەرۆککۆماری ئێران: نامانەوێت بازنەی شەڕەکە فراوان بێت
مەسعود پزیشکیان، سەرۆککۆماری ئێران
مەسعود پزیشکیان، سەرۆککۆماری ئێران رۆژی دووشەممە رایگەیاند کە وڵاتەکەی نایەوێت "بازنەی شەڕ" لەگەڵ ئیسرائیل فراوانتر بکات، بەڵام "بەڕێژەی گونجاو" وەڵامی هەر هێرشێک دەداتەوە.
بەگوێرەی ئاژانسی هەواڵی فەرمیی ئێران، پزیشکیان ئەم قسانەی لە پەیوەندییەکی تەلەفۆنیدا لەگەڵ رەجەب تەیب ئەردۆغان، سەرۆککۆماری تورکیا، لە رۆژی دووشەممەدا کردووە.
پزیشکیان گوتی، "دەستدرێژییەکەی" ئیسرائیل بووەتە هۆی کوژرانی هاووڵاتییانی مەدەنی، زانایان و سەرکردە سەربازییەکان لە ئێران. "ئێران ئەم شەڕەی دەستپێنەکردووە، بەڵام بە پێی ئاستی هێرشەکە وەڵام دەداتەوە."
هەروەها گوتیشی، بەشداریکردنی ئێران لە گفتوگۆ ئەتۆمییەکان لەگەڵ ویلایەتە یەکگرتووەکانی ئەمریکا "تەنیا بەندە بە راگرتنی هێرشەکانی رژێمی زایۆنی بۆ سەر وڵاتانی ناوچەکە."
بەگوێرەی ئاژانسی هەواڵی فەرمیی تورکیا، رەجەب تەیب ئەردۆغان بە پزیشکیانی گوتووە کە تورکیا ئامادەیە "رۆڵێکی ئاسانکاری بگێڕێت بۆ یارمەتیدان لە کەمکردنەوەی گرژییەکانی ململانێکە و پشتیوانیکردنی گەڕانەوە بۆ گفتوگۆ ئەتۆمییەکان."
20:14
شەڕ بەردەوامە؛ دوایین زانیارییەکان بزانە
بە ئامانجگرتنی دەزگای رادیۆ و تەلەڤزیۆنی ئێران
شەڕی خوێناویی ئیسرائیل و ئێران بەردەوامە: ئەوەی تاوەکو ئێستا دەیزانین:
لە بەرەبەیانی رۆژی چوارەمی جەنگەکەدا، مووشەکەکانی ئێران پاڵاوگەیەکی نەوتی ئیسرائیل و تۆڕی کارەبایان کردە ئامانج. لەلایەکی دیکەوە، هێزەکانی بەرگریی ئیسرائیل رایانگەیاند کە نزیکەی یەک لەسەر سێی مووشەکهاوێژەکانی ئێرانیان وێران کردووە.
ئێران زیاتر لە 300 مووشەکی ئاراستەی ئیسرائیل کردووە: نووسینگەی سەرۆکوەزیرانی ئیسرائیل رایگەیاند، تاران لە ماوەی چوار رۆژی ململانێکەدا 370 مووشەکی بالیستی و سەدان فڕۆکەی بێفڕۆکەوانی ئاراستەی ئیسرائیل کردووە. مووشەکەکان بە سەرکەوتوویی 30 شوێنیان لە ئیسرائیل پێکاوە. بەو واتایەی 10٪ـی مووشەکەکان ئامانجەکانیان پێکاوە.
لە کرماشانی ئێران، دامەزراوەیەکی مووشەکی بەهۆی هێرشەکانی ئیسرائیلەوە زیانی بەرکەوتووە، هەروەها نەخۆشخانەیەکیش لە شارەکە.
قوربانییەکان: بەگوێرەی نووسینگەی سەرۆکوەزیرانی ئیسرائیل، لەوەتەی جەنگەکە لە هەینییەوە دەستیپێکردووە، 24 کەس لە ئیسرائیل کوژراون و 592ی دیکەش برینداربوون کە 10 کەسیان باری تەندروستییان ناجێگیرە.
لە ئێرانیش لانیکەم 224 کەس لە رۆژی هەینییەوە کوژراون، وەزارەتی تەندروستیی وڵاتەکە دوێنێ وایگوت، وەک میدیای فەرمیی ئێران ئاماژەی پێکردبوو.
ئیسرائیل هۆشداری دەداتە تاران کە "باجەکەی دەدات" و ئێران داوای یەکڕیزی دەکات: ئیسرائیل کاتز، وەزیری بەرگریی ئیسرائیل، لەسەر ئێکس نووسیویەتی: "دیکتاتۆرە خۆبەزلزانەکەی تاران بووەتە بکوژێکی ترسنۆک". "دانیشتووانی تاران بەمزووانە باجەکەی دەدەن."
مەسعود پزیشکیان، سەرۆککۆماری ئێران لە پەرلەمانی وڵاتەکە داوای یەکڕیزی کرد و بەرگری لە بەرنامە ئەتۆمییەکەی وڵاتەکەی کرد. پزیشکیان گوتی: "خەڵکی ئێران دەبێت دەست بخەنە ناو دەستی یەک و بەهێز بن دژی ئەو دەستدرێژییەی کراوەتە سەرمان"، گوتیشی ئێرانییەکان "دەستپێشخەری شەڕەکە نەبوون".
ئاگادارییەکانی چۆڵکردن: هەردوولای ئێران و ئیسرائیل هۆشدارییان داوەتە دانیشتووانی وڵاتی بەرامبەر کە بۆ سەلامەتیی خۆیان ناوچە نزیکەکان لە شوێنە سەربازییە گرنگەکان چۆڵ بکەن. ئەمڕۆ سوپای ئیسرائیل فەرمانی چۆڵکردنی لە ناوچەی 3ی تاران دەرکرد پێش هێرشە پلان بۆ داڕێژراوەکان بۆ سەر ئەوەی کە بە ژێرخانی سەربازی لە پایتەختی ئێران ناوی برد.
ئێران دانوستان لەگەڵ ئەمریکا رەتدەکاتەوە تاوەکو تۆڵەسەندنەوەکەی تەواو دەکات: بەپێی زانیارییەکانی سی ئێن ئێنی ئەمریکی، ئێران بە عومان و قەتەری راگەیاندووە کە دانوستان لەگەڵ ئەمریکادا ناکات، لەکاتێکدا شارەکانی ئێران "لەژێر هێرشی" ئیسرائیلدان، ئەوەش تاوەکو وەڵامدانەوەی تاران تەواو دەبێت.
ترەمپ واژۆکردنی بەیاننامەی G7 سەبارەت بە ململانێکە رەتدەکاتەوە: بەگوێرەی چەند سەرچاوەیەکی ئەمریکی، دۆناڵد ترەمپ، سەرۆکی ئەمریکا نیازی نییە بەیاننامەیەکی هاوبەش واژۆ بکات کە لەلایەن سەرکردەکانی G7 لە کەنەداوە داڕێژراوە و داوای کەمکردنەوەی گرژییەکانی نێوان ئیسرائیل و ئێران دەکات.
20:13
لە هێرشەکەی ئیسرائیل بۆ سەر رادیۆ و تەلەڤزیۆنی ئێران قوربانی هەیە
تەلەڤزیۆنی فەرمیی ئێران دەڵێت "ژمارەیەک" لە کارمەندەکانی لە هێرشێکی ئیسرائیلدا بۆ سەر بارەگاکەی لە تاران کوژراون.
پەیامنێرێکی دەزگای راگەیاندنی فەرمیی دەڵێت، ئەوان "تا دوا ساتەکانی پێش هێرشەکە کاریان دەکرد".
پەیمان جەبەلی، سەرۆکی دەزگای راگەیاندن لە تەلەڤزیۆنی فەرمی دەرکەوتووە و کاغەزێکی خوێناویی نیشان دەدات. ئەو دەڵێت، تەلەڤزیۆنی فەرمی و کارمەندەکانی "تا کۆتایی رادەوەستن".
هەزاران کەس لە شوێنێک کار دەکەن کە وەک گوندێکی بچووک وایە و تەلەڤزیۆنی فەرمی تێیدا جێگیرە.
ئیسرائیل پێشتر نەخشەیەکی بڵاوکردبووەوە کە بەشێک لە ناوچەی 3ـی تارانی نیشان دەدا و داوای لە هاووڵاتییان دەکرد پێش هێرشەکە چۆڵی بکەن و تەلەڤزیۆنی فەرمیش لەوێدا بوو.
19:38
گرووپی هێرشبەری هێزی دەریایی ئەمریکا "بەبێ دواکەوتن" بەرەو رۆژهەڵاتی نێوەڕاست جووڵە دەکات
وێنەیەک لەسەر رووی کەشتییەکە
لەکاتێکدا ململانێی نێوان ئیسرائیل و ئێران پەرەدەسێنێت، بەرپرسێکی ئەمریکی رایدەگەیێنێت، گرووپی هێرشبەری کەشتیی فڕۆکەهەڵگری یو ئێس ئێس نیمیتز (USS Nimitz Carrier Strike Group) "بەبێ دواکەوتن" بەرەو رۆژهەڵاتی نێوەڕاست جووڵە دەکات.
نیمیتز پێشتر بڕیاربوو جێگەی گرووپە هێرشبەرەکەی دیکە لە رۆژهەڵاتی نێوەڕاست بگرێتەوە، کە گرووپی هێرشبەری کەشتیی فڕۆکەهەڵگری یو ئێس ئێس کارڵ ڤینسۆن بوو. بەرپرسە ئەمریکییەکە گوتی، نیمیتز "لەو ماوەیەی بۆی دیاریکرابوو" بۆ جێگرتنەوەی ڤینسۆن دەچێتە ناوچەکە، بەڵام ئێستا سەردانێکی پێشتر بەرنامە بۆ داڕێژراوی بۆ بەندەرێک هەڵدەوەشێنێتەوە بۆ ئەوەی زووتر بگات.
بەپێی بەیاننامەیەکی هێزی دەریایی، تەنها چەند رۆژێک لەمەوبەر، نیمیتز ئۆپەراسیۆنی فڕینی ئاسایی لە دەریای باشووری چین ئەنجام دەدا.
ڤینسۆن نزیکەی حەوت مانگە لە ئەرکەکەیدایە. روون نییە تا کەی هەردوو گرووپە هێرشبەرەکە لە رۆژهەڵاتی نێوەڕاست پێکەوە دەبن پێش ئەوەی ڤینسۆن بگەڕێتەوە وڵات.
بەرپرسە ئەمریکییەکە ئەوەشی گوت کە چاوەڕوان دەکرێت هەندێک کەلوپەلی دەریایی کە توانای بەرگریکردن لە مووشەکی بالیستییان هەیە و پێشتر لە رۆژهەڵاتی نێوەڕاست بوون، "لە رۆژانی داهاتوودا" بەرەو رۆژهەڵاتی دەریای نێوەڕاست بجووڵێن.
بەرپرسەکە گوتی، دوو کەشتیی هێزی دەریایی ئەمریکا لانیکەم دوو جار لە کۆتایی هەفتەدا رێگەیان لە مووشەکەکانی ئێران گرتووە بۆ بەرگریکردن لە ئیسرائیل.
19:32
ئێران: ئامانجی نەتەنیاهوو لە هێرشەکە شکستهێنان بوو بە رێککەوتنی ئێران و ئەمریکا
وەزیری دەرەوەی ئێران رایگەیاند، سەرۆکوەزیرانی ئیسرائیل دژایەتی رێککەوتنی وڵاتەکەی و ئەمریکای کردووە. دەشڵێت، سەرۆکوەزیرانی ئیسرائیل بۆ شکستهێنان بە رێککەوتنیان لەگەڵ ئەمریکا دەستی بە جەنگ کرد.
رۆژی دووشەممە، عەباس عێراقچی، وەزیری دەرەوەی ئێران لەبارەی ئامانجی بنیامین نەتەنیاهوو، سەرۆکوەزیرانی ئیسرائیل لە دەستکردن بە جەنگ لەگەڵ وڵاتەکەی لە ئێکس بڵاویکردەوە، "ئامانجی نەتەنیاهوو لە هێرشکردنە سەر ئێران بۆ شکستهێنان بووە بە رێککەوتنی ئێران و ئەمریکا". دەشڵێت، پێش جەنگ "ئێران و ئەمریکا لەسەر رێگەیەکی راست بوون بۆ رێککەوتن".
وەزیری دەرەوەی ئێران لە نووسیەنەکیدا دەشڵێت، "نەتەنیاهوو یاری بە سەرۆکی ئەمریکا و باجدەرە ئەمریکیەکان دەکات". ئاماژەی بەوەش کرد، "تاوانباران لە تەلئەڤیڤ خۆیان لە پەناگەکان ناوە و بەبێ سزا لە تاوانەکەیان دەرناچن".
19:26
هێزی ئاسمانیی ئەمریکا فڕۆکەی تانکەری سووتەمەنی دەگوازێتەوە رۆژهەڵاتی نێوەڕاست
هێزی ئاسمانیی ئەمریکا فڕۆکەی تانکەری سووتەمەنی دەگوازێتەوە رۆژهەڵاتی نێوەڕاست
دوو بەرپرسی ئەمریکی بە ئاژانسی ئەسۆشیەیتد پرێسیان راگەیاندووە، هێزی ئاسمانیی ئەمریکا فڕۆکەی تانکەری سووتەمەنی دەگوازێتەوە رۆژهەڵاتی نێوەڕاست و ئەم جووڵانە بژاردەی زیاتر دەداتە سەرۆک دۆناڵد ترەمپ بۆ بەرگریکردن لە بنکە و کارمەندانی ئەمریکا لە ناوچەکە.
بڕیارەکە لەدوای هێرشە مووشەکییە بالیستییە بەردەوامەکانی ئێران و ئۆپەراسیۆنە ئاسمانییە بەردەوامەکانی ئیسرائیل دژی تاران دێت.
تانکەرەکانی سووتەمەنی زۆر گرنگن بۆ پشتیوانیکردنی هەر ئۆپەراسیۆنێکی گەورەی ئاسمانیی ئەمریکا، جا چ چۆڵکردن بێت یان هێرشێکی ئەگەریی فڕۆکە جەنگییەکانی ئەمریکا.
19:09
ئیسرائیل هێرشکردنە سەر میدیای فەرمیی ئێران پشتڕاست دەکاتەوە
دیمەنی پاشماوەی هێرشەکە
وەزیری بەرگریی ئیسرائیل پشتڕاستی کردەوە کە هێرشیان کردووەتە سەر دەزگای راگەیاندنی فەرمیی ئێران.
لە راگەیێندراوێکدا، ئیسرائیل کاتز دەڵێت هێرشەکە دوای "چۆڵکردنێکی بەرفراوانی دانیشتووانی ناوچەکە" روویداوە.
18:53
زانیاریی نوێ؛ چی لەسەر شەڕەکە دەزانین؟
مووشەکی ئێران لە ئاسمانی ئیسرائیل
شەڕی ئیسرائیل و ئێران کە دوو هێزی کاریگەری ناوچەکەن، پێی نایە رۆژی چوارەمەوە. بەیانیی رۆژی دووشەممە ئێران شەپۆلێکی نوێی هێرشی مووشەکیی کردە سەر ئیسرائیل، کە بووە هۆی کوژرانی لانیکەم پێنج کەس، لە کاتێکدا ئیسرائیل بانگەشەی ئەوەی کرد کە باڵادەستیی ئاسمانیی بەسەر تاراندا بەدەستهێناوە و دەتوانێت بەبێ رووبەڕووبوونەوەی هەڕەشەی گەورە بەسەر پایتەختی ئێراندا بفڕێت.
ژمارەی قوربانییان: ئیسرائیل رایگەیاندووە تاوەکو ئێستا 24 کەس کوژراون و زیاتر لە 500 کەس برینداربوون بەهۆی هەڵدانی زیاتر لە 370 مووشەک و سەدان فڕۆکەی بێفڕۆکەوان لەلایەن ئێرانەوە.
وەزارەتی تەندروستیی ئێران دەڵێت 224 کەس کوژراون لەوەتەی هێرشەکەی ئیسرائیل لە رۆژی هەینی دەستیپێکردووە، بێ ئەوەی جیاوازی بکات لە نێوان بەرپرسانی سەربازی و هاووڵاتییانی مەدەنیدا. حوسێن کرمانپوور، گوتەبێژی وەزارەتی تەندروستیی ئێران رایگەیاند، هەزار و 277 کەسی دیکە لە نەخۆشخانە خەوێندراون، و جەختی کردەوە کە زیاتر لە 90٪ی قوربانییەکان هاووڵاتیی مەدەنین.
چۆن گەیشتینە ئێرە؟
ئێران پێنجشەممەی رابردوو رایگەیاند کە دامەزراوەیەکی سێیەمی پیتاندنی یۆرانیۆمی دروستکردووە و دەیکاتە کار. راگەیاندنەکە کەمتر لە دوو هەفتە دوای ئەوە هات کە ئاژانسی نێودەوڵەتیی وزەی ئەتۆم ئێرانی سەرکۆنە کردبوو بەهۆی پابەندنەبوونی بە ئەرکەکانی نەهێشتنی بڵاوبوونەوەی چەکی ئەتۆمی کە مەبەست لێی رێگریکردنە لە پەرەپێدانی چەکی ئەتۆمی.
بەرەبەیانی رۆژی هەینی، ئیسرائیل یەکەم گەڕی هێرشەکانی دەستپێکرد، کە ژێرخانی ئەتۆمی و سەربازیی ئێرانی کردبووە ئامانج.
زانیارییەک بۆ ئەوانەی لە لایڤ بلۆگەکەدا لەگەڵمانن:
بەرنامە ئەتۆمییە رانەگەیێندراوەکەی ئیسرائیل وایکردووە تاکە وڵات بێت لە رۆژهەڵاتی نێوەڕاستدا کە خاوەنی بۆمبی ئەتۆمییە.
18:37
کاردانەوەی نوێی ترەمپ بۆ جەنگەکە
دۆناڵد ترەمپ لە کەنەدا
دۆناڵد ترەمپ، سەرۆکی ئەمریکا لە کەنەداوە قسەی نوێی لەبارەی شەڕی ئێران و ئیسرائیل کرد، گوتی، ئێران دەیەوێت دانوستاندن بکات، بەڵام دەبوو پێشتر کردبایان. ئەوان 60 رۆژیان هەبوو. واباشە پێش ئەوەی زۆر درەنگ بێت ئێران دانوستاندن بکات.
18:29
پەخشی ئەو کەناڵەی ئێران دەستی پێکردەوە کە هێرشی کرابووەسەر
دیمەنی دەستپێکردنەوەی پەخش
کەناڵی "شەبەکە خەبەر" کە بەشێکە لە کۆمەڵەی رادیۆ و تەلەڤزیۆنی فەرمیی ئێران، دوای ئەوە لەلایەن ئیسرائیلەوە هێرشی کرایەسەر، دەستی بە پەخش کردەوە.
هێرشەکە لە کاژێر 18:34 خولەک بە کاتی تاران روویدا، لە کاژێر 18:59 خولەک ستودیۆکەیان گۆڕی و پەخشیان دەستی پێکردەوە.
18:28
ئەو پێشکێشکارە زیندووە کە لە پەخشی راستەوخۆدا هێرشی کرایەسەر؟
دیمەنی ساتی هێرشەکە
زانیاریی نوێ لە ئێرانەوە گەیشت کە دەڵێت، پەخشی هەموو کەناڵەکانیان ئاساییە تەنیا یەک دانەیان نەبێت کە ئەویش "شەبەکەی خەبەرە."
هەروەها دەڵێت، ئەو پێشکێشکارەی کە لە کاتی بۆردوومانەکەدا هەواڵی پێشکێش دەکرد، ناوی سەحەر ئیمامییە، زیندووە و دەگەڕێتەوە سەر شاشە.
ساتی هێرشەکە ببینن
18:24
نەتەنیاهوو: لە رێگەی بەدەستهێنانی سەرکەوتنین
نەتەنیاهوو: لە رێگەی بەدەستهێنانی سەرکەوتنین
بنیامین نەتەنیاهوو، سەرۆکوەزیرانی ئیسرائیل رایگەیاند، "ئێمە لە رێگەی بەدەستهێنانی سەرکەوتنداین".
لەکاتی سەردانیکردنی بنکەیەکی ئاسمانیی ئیسرائیلدا، نەتەنیاهوو ئەو بانگەشەیەی دووپاتکردەوە کە ئەمڕۆ ئیسرائیل رایگەیاند بەوەی، "کۆنترۆڵی ئاسمانی تاران" یان کردووە.
ئەو دەڵێت: "ئێمە لە رێگەی بەدەستهێنانی دوو ئامانجی خۆمانداین: لەناوبردنی هەڕەشەی ئەتۆمی و لەناوبردنی هەڕەشەی مووشەکی."
نەتەنیاهوو هەروەها هەوڵی دا جیاوازییەک لە نێوان هێرشەکانی ئیسرائیل و هێرشەکانی ئێراندا بکات، گوتی، ئەمانە ئامانجەکانی ئیسرائیلن و بانگەشەی ئەوەی کرد کە ئێران هاووڵاتییانی مەدەنی دەکاتە ئامانج. ئەو دەڵێت: "ئێمە بە هاووڵاتییانی تاران دەڵێین، 'چۆڵی بکەن' پاشان کارەکەمان دەکەین."
18:17
بە ڤیدیۆ... ئیسرائیل لە پەخشی راستەوخۆدا هێرشدەکاتە سەر رادیۆ و تەلەڤزیۆنی ئێران
دیمەنی ساتی هێرشی ئێران بۆ سەر رادیۆ و تەلەڤزیۆنی ئێران لەلایەن ئیسرائیلەوە گەیشت. لە ڤیدیۆکەدا دەردەکەوێت، ستودیۆکە خەریکە دەڕووخێت و پێشکێشکارەکە بەخێرایی دەچێتە دەرەوە.
18:15
ئیسرائیل هێرشی کردە سەر رادیۆ و تەلەڤزیۆنی ئێران
رووداو
کەمێک لەمەوبەر ئیسرائیل هێرشی کردە سەر رادیۆ و تەلەڤزیۆنی ئێران لە 'ناوچەی 3ـی تاران' و لە پەخشی راستەوخۆ دا بۆردوومان کرا.
ئەمە دوای ئەوە هات کە یسرائیل کاتز، وەزیری بەرگریی ئیسرائیل رایگەیاند، رادیۆ و تەلەڤزیۆنی ئێران "نزیکن لەوەی نەمێنن" بەو واتایەی هێرشیان کردووەتە سەریان.
وەزیرە ئیسرائیلییەکە ئەوەشی گوتووە کە خەڵک لە ناوچەکانی دەوروبەری بارەگای سەرەکیی رادیۆ و تەلەڤزیۆنی ئێران چۆڵ دەکەن.
18:12
ئەو ناوچانەی ئیسرائیل داوای چۆڵکردنیان دەکات زیاتر لە 300 هەزار کەسی تێدان
سوپای ئیسرائیل ئاگادارییەکی چۆڵکردنی بۆ بەشێک لە ناوەندی تاران دەرکردووە، کە تەلەڤزیۆنی فەرمیی وڵات و بارەگای سەرەکیی پۆلیسی تێدایە، هەروەها سێ نەخۆشخانەی گەورە، کە یەکێکیان تایبەت بە سوپای پاسداران
01:09
ترەمپ پەیامێکی تووند بۆ ئێران دەنێرێت و تارانیش مەرج بۆ تەل ئەڤیڤ دادەنێت
مووشەکی ئێران لە ئاسمانی تەل ئەڤیڤ دەتەقێندرێتەوە. وێنە: AFP
رووداو دیجیتاڵ
ئێوارەی رۆژی دووشەممەیە و دەنگی تەقینەوە لە پایتەختی ئێران دەبیسترێت. بەرپرسانی سوپای ئیسرائیلیش هۆشداری دەداتە خەڵکی بەشێک لە ناوچەکانی تاران کە شوێنەکانی خۆیان جێبهێڵن.
وەزیری بەرگریی ئیسرائیل دەڵێت، رادیۆ و تەلەڤزیۆنی ئێران "نزیکن لەوەی نەمێنن" بەو واتایەی هێرشیان کردووەتە سەریان. بەپێی چێککردنی رووداو، تەلەڤزیۆنی فەرمیی ئێران "شەبەکە خەبەر" پەخشی نەماوە.
وەزیرە ئیسرائیلییەکە ئەوەشی گوتووە کە خەڵک لە ناوچەکانی دەوروبەری بارەگای سەرەکیی رادیۆ و تەلەڤزیۆنی ئێران چۆڵ دەکەن.
لەم لایڤ بلۆگەدا دوایین زانیارییەکانتان بۆ دەگوازینەوە.
هەروەها لە یوتیوبی رووداو بەردەوام سەیری رووماڵی رووداو بکەن