نەتەوە یەکگرتووەکان: لە یەمەن 24 کەس بەهۆی...

گالەری

نەتەوە یەکگرتووەکان: لە یەمەن 24 کەس بەهۆی لافاوەوە گیانیان لەدەستدا

30-08-2024

14 Photos

تەنیا ئەحمەد

رووداو دیجیتاڵ

نەتەوە یەکگرتووەکان دەڵێت، لانیکەم 24 کەس بەهۆی لافاوەکانی رۆژئاوای یەمەن گیانیان لەدەستدا، تیمە فریاگوزارییەکان لە گەڕان بەردەوامن.

ئاژانسی سندووقی دانیشتووانی نەتەوە یەکگرتووەکان (UNFPA) لە تۆڕی کۆمەڵایەتیی ئێکس بڵاویکردەوە: "لە یەمەن 24 کەس بەهۆی لافاوەوە گیانیان لەدەستداوە و 17 کەسیش بێسەروشوێنن."

بەگوێرەی ئەو ئاژانسەی نەتەوە یەکگرتووەکان، سێ بەنداو رووخاون، هەزار و 20 خێزان بەهۆی لافاوەکانەوە زیانیان پێگەیشتووە و چەندین خانووش رووخاون.

تاوەکو ئێستا حووسییەکان هیچ لێدوانێکیان لەسەر رووخان و تێکچوونی هیچ بەنداوێک نەداوە.

دوێنێ چوارشەممە، میدیای فەرمیی حووسییەکانی یەمەن بڵاویکردەوە: "16 کەس بەهۆی لافاوەوە لە ناوچەی مەحویت لە رۆژئاوای سەنعای پایتەخت گیانیان لەدەستداوە."

محەممەد میفتاح، جێگری سەرۆکوەزیرانی ئیدارەی حووسییەکان بە میدیای وڵاتەکەی گوت: "چەندین رێگە ژێرئاو کەوتوون و تیمەکان ناتوانن لەکاتی خۆی بگەنە شوێنە زیان بەرکەوتووەکان."

ئەحمەد سلێمان دانیشتووی شاری حەیس لە پارێزگای تەعز گوتی: "من و منداڵەکانم رزگارمان بوو، بەڵام لافاو ماڵەکەمانی برد، ئاژەڵەکان، هەموو کەلوپەل و بەتانییەکانمانی برد؛ هیچ شتێکمان نەماوە."

دوێنێ دەسەڵاتی حووسییەکان رایگەیاند، لیژنەیەک بۆ وەڵامدانەوەی قەیران و رووداوەکان پێکدەهێنن و دەستیان بە دابەشکردنی خواردن و فەراهەمکردنی پەناگە بۆ زیانلێکەوتووان کردووە.

ناوچە شاخاوییەکانی رۆژئاوای یەمەن، ساڵانە بارانێکی زۆری وەرزی دەیانگرێتەوە. بەگوێرەی نەتەوە یەکگرتووەکان، لە کۆتایی مانگی تەممووزەوە تاوەکو کۆتایی ئاب، 60 کەس بەهۆی لافاوەوە گیانیان لەدەستداوە و 268 هەزار کەسیش زیانیان بەرکەوتووە. پارێزگەکانی نێوەڕاست و رۆژئاوای یەمەن ئاگادار کراونەتەوە کە چاوەڕوانی لافاوی خراپتر بکەن.

رۆژی دووشەممە، 26-08-2024، رێکخراوی تەندروستیی جیهانی رایگەیاند: "لە مانگەکانی داهاتوو، پێشبینی بارانی زیاتر دەکەین کە نێوەڕاستی یەمەن و دەریای سوور بگرێتەوە."

سەرەتای مانگی ئابی ئەم ساڵ، نەتەوە یەکگرتووەکان هۆشداریدا کە کارەساتەکانی یەمەن پێویستییان بە 4.9 ملیۆن دۆلار هەیە.