رووداو دیجیتاڵ
عەلیئەکبەر ویلایەتی، راوێژکاری رێبەری باڵای ئێران بۆ کاروباری نێودەوڵەتی، هێرشی تووند دەکاتە سەر دۆناڵد ترهمپ و رەفتارەکانی بە "سەرەڕۆیی" وەسف دەکات. رایدەگەیێنێت، تێکشکانی خەیاڵەکانی کۆشکی سپی دەستیپێکردووە.
رۆژی یەکشەممە، 3ـی ئایاری 2026، عەلیئەکبەر ویلایەتی لە تۆڕی ئێکس سەبارەت بە هەڵوێستە دواییەکانی سەرۆکی ئەمریکا رایگەیاند، "سەرەڕۆیی و رەفتارە نائاساییەکانی ترهمپ ناتوانن پەردەپۆشی بارودۆخە جیۆپۆلیتیکییە هەستیارەکان بکەن."
"خەیاڵەکانی کۆشکی سپی تێکشکاون"
راوێژکارەکەی رێبەری باڵای ئێران ئاماژەی بەوە کرد، کشانەوەی هێزەکانی ئەمریکا لە ئەڵمانیا، لاوازکردنی هاوپەیمانیی ناتۆ و دووبارەبوونەوەی کێشە تەکنیکییەکان لەناو کەشتییە جەنگییەکانی ئەمریکادا، نیشانەی "تێکشکانی ئەو خەیاڵانەن کە کۆشکی سپی هەیەتی."
تەنگەی هورمز و ئاسایشی خۆراک
ویلایەتی، وەڵامی هەڕەشەکانی ترهمپی دایەوە سەبارەت بە "برسیکردنی ئێران" و گوتی، "ئەم هەڵوێستە بێئاگایی ترهمپ لە دۆخی ئابووری و سیاسیی جیهان نیشان دەدات."
ئەو بەرپرسە باڵایەی ئێران جەختی لەوە کردەوە، ئێستا ئاسایشی خۆراکی جیهان و زنجیرەی دابینکردنی پەینی کیمیایی لە تەنگەی هورمز "لەژێر کۆنترۆڵی ئێراندایە" و هۆشداری دا کە هەر جۆرە یارییەک بەم هێڵە، جیهان و ئەمریکا دەخاتە ناو "بنبەستێکی کوشندە."
"سیاسەت فیلمی سینەمایی نییە"
لە کۆتایی پەیامەکەیدا، عەلیئەکبەر ویلایەتی بە زمانێکی تەنزئامێز رووی دەمی کردە دۆناڵد ترهمپ و گوتی، "بەڕێز ترهمپ! دنیای سیاسەت گۆڕەپانی فیلمەکانی وەک 'جاک سپارۆ' نییە. هەر کەسێک یاری بە هێڵی ژیانی جیهان بکات، خۆی دەخاتە ناو بنبەستێکی کوشندەوە!"
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ