رووداو دیجیتاڵ
جێگری لیژنەی ئاسایشی نیشتمانی و سیاسەتی دەرەوە لە پەرلەمانی ئێران رایدەگەیێنێت، تاران لە ململانێکانی لەگەڵ ئەمریکادا دەستی باڵای هەیە و دانوستاندنەکانیش بە بەشێک لە "بەرەی جەنگ" ناودەبات. دەشڵێت، ئەمریکا ناتوانێت رووبەڕووی کەشتییەکانیان ببێتەوە.
عەلائەدین بروجێری، جێگری سەرۆکی لیژنەی نیشتمانی و سیاسەتی دەرەوە لە پەرلەمانی ئێران بە میدیای فەرمیی وڵاتەکەی رایگەیاند، کۆماری ئیسلامیی ئێران لە ململانێکانیدا لەگەڵ ئەمریکا و ئیسرائیل باڵادەستە. گوتیشی: "هەموو شرۆڤەکارانی ئەمریکی و ئەوروپی بە ترەمپیان گوتووە کە تۆ لەم جەنگەدا دۆڕاوی، بۆیە ناوبانگ و ئابووریی ئەمریکا لەوە زیاتر تێک مەدە."
بروجێری هەڕەشەکانی ئەمریکای بۆ گەماڕۆی دەریایی بە "بێبایەخ" ناوبرد و گوتی: "ئێستا نزیکەی 120 کەشتی لەودیوی تەنگەی هورمزەوە چاوەڕیی تێپەربوون دەکەن، کەشتییەکانی ئێرانیش بە ئازادی هاتووچۆ دەکەن و هێزەکانی ئەمریکا ناوێرن رووبەڕوویان ببنەوە."
لەبارەی هەڕەشەکانی ئەمریکا بۆ دەستبەسەرداگرتنی کەشتییە ئێرانییەکانیش، ئەو بەرپرسەی ئێرانییە هۆشداریی دا کە هێزە چەکدارەکانی وڵاتەکەی دەتوانن بە ئاسانی هەر کەشتییەکی وڵاتانی دووژمن دەستبەسەر بکەن و بەرەو کەناراوەکانی ئێران بگوازنەوە. گوتیشی، ئێران هێشتا کارتە نوێیەکانی بەکارنەهێناوە و دەڵێت: "گرنگی تەنگەی بابولمەندەب کەمتر نییە لە هورمز؛ یەمەنییەکان چاوەڕێن ئەو تەنگەیە دابخەن و گورزێکی دیکە لە ئەمریکا بوەشێنن."
جێگری سەرۆکی لیژنەی نیشتمانی و سیاسەتی دەرەوە لە پەرلەمانی ئێران، ئاماژە بەوەش دەکات کە دانوستاندن گۆڕەپانێکی دیکەی جەنگ و بەرگرییە و دەڵێت: "گۆڕەپانی جەنگ و مێزی دانوستاندن هیچ جیاوازییەکیان نییە. لە گۆڕەپانی جەنگدا چەکمان مووشەک و درۆنە، لە دانوستاندنیشدا هونەری دیپلۆماسییە. دانوستاندن بریتییە نییە لە پاشەکشەکردن، بەڵکو سەنگەرێکی دیکەی جەنگە بۆ چەسپاندنی مافەکانمان و سەروەریمان بەسەر تەنگەی هورمزدا."
بە گوتەی عەلائەدین بروجێری، گفتوگۆکان لە ژێر رێنوێنیی راستەوخۆی موجتەبا خامنەیی، رێبەری کۆماری ئیسلامیی ئێران و بە سەرپەرشتیی مەیدانیی محەممەدباقر قالیباف، سەرۆکی پەرلەمانی ئەو وڵاتە بەڕێوەدەچن.
لە لایەکی دیکەوە دۆناڵد ترەمپ، سەرۆکی ئەمریکا رۆژی چوارشەممە لە کۆشکی سپی رایگەیاند، پەیوەندییەکانی نێوان واشنتن و تاران گۆڕدراون بۆ پەیوەندیی تەلەفۆنی نەک کۆبوونەوەی درێژخایەن و ئاڵۆگۆڕی کاخەز، ئەمەش بە مەبەستی خێراکردنی وەڵامەکان.
ترەمپ گۆتی: "هەندێک پێشکەوتن هەن، بەڵام هیچ رێککەوتنێک ناکەین مەگەر ئێران بە تەواوی دەستبەرداری چەکی ئەتۆمی بێت."
بەپێی میدیای ئەمریکی، ئێران لە رێگەی پاکستانەوە پێشنیازێکی سێ قۆناخیی داوەتە ئەمریکا:
1- کۆتاییهێنان بە دووژمنکارییەکان. 2- گفتوگۆ لەسەر مافی کەشتیوانی لە تەنگەی هورمز. 3- گفتوگۆ لەسەر پرسی ئەتۆمی.
کارۆلین لیڤیت، گوتەبێژی کۆشکی سپی پشتراستی کردەوە کە ترەمپ و تیمی ئاسایشی نیشتمانی خەریکی تاوتوێکردنی پێشنیازەکەن، بەڵام سەرچاوە ئەمریکییەکان دەڵێن، ترەمپ لە پێشنیازەکە ناڕازییە، چونکە دەیەوێت پرسی ئەتۆمی لە قۆناخی یەکەمدا دانوستاندنی لەسەر بکرێت، نەک قۆناخی کۆتایی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ