رووداو دیجیتاڵ
سەرۆکوەزیرانى عێراق و باڵیۆزى ئەمریکا کۆبوونەوە و باسیان لە رێککەوتنى چوارچێوەى ستراتیژیى نێوان بەغداو واشنتن کرد.
بەگوێرەى نووسینگەى رۆژنامەڤانیى سەرۆکوەزیرانى عێراق، محەممەد شیاع سوودانى و ئەلینا رۆمانۆوسکى، باسیان لە هەنگاونان بەرەو پەیوەندیى دوو قۆڵى نێوان عێراق و ئەمریکا لە دۆسیە و لایەنە جیاوازەکاندا کردووە، لەگەڵ ئەو لێکتێگەیشتنانەى کە لە سەردانى شاندى عێراق بۆ ئەمریکا لە 13ى نیسان کراون لە بوارى وزە و بازرگانى و چۆنێتى جێبەجێکردنیان.
رێککەوتنى چوارچێوەى ستراتیژى لە 2008 واژۆ کرا، بۆ دیاریکردنى هاریکارى نێوان عێراق و ئەمریکایە لە بوارە جیاوازەکاندا، لە سەردانى سوودانى بۆ ئەمریکا کار لەسەر کارکردنى لێژنەکانى جێبەجێکردنى ئەو رێککەوتنە کرا.
سوودانى و رۆمانۆوسکى تاوتوێى کارى لێژنەى هاوئاهەنگى تایبەت بە جێبەجێکردنى ئەو رێککەوتنەیان کردووە.
لە سەردانەکەیدا بۆ ئەمریکا شاندى عێراق بە سەرۆکایەتى سوودانى زیاتر لە 18 رێککەوتن و لێکتێگەیشتنیان لەگەڵ کۆمپانیا و دامەزراوە فەرمییەکانى ئەو وڵاتە واژۆ کرد.
لە نووسینێکدا لە تۆڕى کۆمەڵایەتى ئێکس، رۆمانۆوسکى ئاماژەى بەوەداوە کە "کارێکى باشە" سەرۆکوەزیرانى عێراقى بینیوە بۆ بەدواداچوونى سەردانە بەرهەمدارەکەى بۆ ئەمریکا و دەڵێت، "تاوتوێى هەنگاوەکانى داهاتوومان کرد بۆ پەرەدان بە هاوبەشی گشتگیرى ئەمریکا و عێراق".
.jpeg&w=3840&q=75)
