رووداو دیجیتاڵ
وەزارەتی ناوخۆی عێراق راگەیێندراوێکی لەبارەی هەوڵی بەقاچاخهێنانی حەبی هۆشبەر لە سنووری پارێزگای بەسرە بڵاوکردەوە، کە هەوڵدراوە لە رێگەی پاراگلایدەرەوە یەک ملیۆن حەبی هۆشبەر بگوازرێتەوە.
رۆژی هەینی 03-06-2022 وەزارەتی ناوخۆی عێراق لەو بارەیەوە راگەیێندراوێکی بڵاوکردەوە، کە تێیدا هاتووە: ''لەسەر بنەمای زانیاری هەواڵگری بە بوونی فڕۆکەیەک لە ئاسمانی ناوچەی جرێشان لە پارێزگای بەسرە، بەپەلە تیمێک لە هەواڵگری و لیوای 14ی پاسەوانی سنوور گەیشتوونەتە ناوچەکە و تەقە لە فڕۆکەوانەکە کراوە و بە ناچاری نیشتووەتەوە''.
بەپێی ئەو وێنانەی، کە وەزارەتی ناوخۆ لەگەڵ هەواڵەکە بڵاویکردوونەتەوە، ئەوەی حەبەکانی هەڵگرتووە، پاراگلایدەرە. لە راگەیێندراوەکەدا هاتووە: "دوای گەیشتنی تیمەکانمان بۆ شوێنی سووڕانەوەی فرۆکەکە، تەقەیان لێکردووە و فڕۆکەوانەکە نیشتووەتەوە و بەرەو سنووری وڵاتێكی دراوسێ هەڵاتووە".
هەواڵگریی عێراق ئاماژەی بەوەداوە، قاچاخچییەکان مەبەستیان بووە ئەو حەبە هۆشبەرانە، کە یەک ملیۆن دانە بووە، بگەیێننە نێو عێراق. ئێستاش لێکۆڵینەوە دەکەن لە سەرچاوە و وەرگری ئەو حەبە هۆشبەرانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ