رووداو دیجیتاڵ
وەزارەتی بازرگانیی عێراق دڵنیایی دەداتە هاووڵاتییان لەبارەی دۆخی ئاسایشی خۆراک و رایدەگەیێنێت، سەرەڕای ئاڵۆزییەکانی ناوچەکە، رەوشی خۆراک لە وڵات جێگیرە و لەژێر کۆنترۆڵدایە. گوتەبێژی وەزارەتەکەش دەڵێت، "گەنمی پێویست بۆ ساڵ و نیوێکی دیکە لە کۆگاکاندا هەیە."
محەممەد حەنوون، گوتەبێژی وەزارەتی بازرگانیی عێراق، ئەمڕۆ دووشەممە 9ی ئاداری 2026، بە رووداوی راگەیاند: "دۆسیەی ئاسایشی خۆراک لە کارە هەرە لەپێشینەکانی حکومەتە، کۆگاکانمان خاوەنی یەدەگێکی ستراتیژیی گەورەی مەوادە خۆراکییە سەرەکییەکانن وەک برنج، شەکر، زەیت و پاقلەمەنییەکان، رەوانەکردنی کاڵاکانیش بۆ بەشەخۆراکی مانگانەی هاووڵاتییان بە شێوەیەکی رێکوپێک بەردەوامە."
سەبارەت بە بەرهەمی گەنم، محەممەد حەنوون ئاشکرای کرد، گەنجینەی گەنم لە عێراق لە دۆخێکی زۆر باشدایە و تاوەکو کۆتایی ساڵی 2026 بەشی پێداویستیی ناوخۆ دەکات، ئەمەش "سەقامگیریی بەرهەمهێنانی ئارد و دابینکردنی گەنم بۆ ئاشەکان مسۆگەر دەکات."
گوتەبێژی وەزارەتی بازرگانیی عێراق باسی لە رێکارە پێشوەختەکان کرد بۆ رووبەڕووبوونەوەی هەر قەیرانێکی هەرێمی و گوتی: "کار دەکەین بۆ بەهێزکردنی زیاتری گەنجینەی ستراتیژی و رێگریگرتن لە بەرزبوونەوەی نرخ و قۆرخکاری لە بازاڕەکاندا."
هەروەها ئاماژەی بەوە کرد کە پلانێکی نوێیان بۆ دروستکردنی سایلۆی مۆدێرن و وێستگەی نوێی کۆگاکردنی دانەوێڵە دەستپێکردووە.
محەممەد حەنوون داوای لە هاووڵاتییان کرد "نەکەونە ژێر کاریگەریی پروپاگەندەکان و پێویست ناکات خۆراکێکی زۆر کۆبکەنەوە، چونکە بازاڕەکان پڕن لە کاڵا." جەختیشی کردەوە کە حکومەت بە وردی چاودێری پەرەسەندنەکان دەکات بۆ پاراستنی سەقامگیریی رەوشی خۆراک لە وڵاتدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ