رووداو دیجیتاڵ
لە شاری بەغدا منداڵێک لەلایەن باوکییەوە بە زنجیر بە بنمیچی خانووەکەیان هەڵدەواسرێت، دوای ئاگادارکردنەوەی هێزە ئەمنییەکان، منداڵەکە لە دەست باوکی رزگار دەکرێت و باوکەکەشی دەستگیر دەکرێت.
رۆژی یەکشەممە، 06-08-2023، وەزارەتی ناوخۆی عێراق لە راگەیێندراوێکدا بڵاویکردەوە، لەسەر بنەمای رێنمایی وەزیری ناوخۆ بۆ بەدواداچوونی رووداوەکانی تووندوتیژیی خێزانی، دوای گەیشتنی زانیاری لەبارەی ئەوەی منداڵێکی 10 ساڵ لە ناوچەی کەرخی شاری بەغدا تووندوتیژی بەرامبەر دەکرێت و بە زنجیر بە بنمیچی خانووەکەیان هەڵواسراوە، رەزامەندیی دادوەر وەرگیرا بۆ رزگارکردنی ئەو منداڵە و دەستگیرکردنی ئەو کەسەی ئەو کارە نامرۆڤانەی کردووە.
وەزارەتی ناوخۆ دەڵێت، "لێژنەیەکی پسپۆڕ پێکهات بە هاوئاهەنگیی بنکەی پۆلیسی مەشاهاد، ماڵەکەیان پشکنی، منداڵەکەیان رزگارکرد و باوکەکەشیان دەستگیرکرد کە تووندوتیژی بەرامبەر منداڵەکەی کردووە."
وەزارەتی ناوخۆ ئاماژەی بەوەداوە، باوکەکە بەکارهێنەری مادەی هۆشبەر بووە، لە ماڵەکەیدا دەست بەسەر مادەی هۆشبەر و چەکێکی جۆری کلاشینکۆف و سێ فیشەکدان و دوو نارنجۆک گیراوە. دەشڵێت، رێکاری یاسایی بەرامبەر تۆمەتبارەکە گیراوەتەبەر.
بەپێی ئامارێکی رێکخراوی ئور بۆ رۆشنبیریی ژنان و منداڵان، ساڵی رابردوو سەرووی 15 هەزار تووندوتیژیی خێزانی لە عێراق تۆمارکراون. لە ساڵی 2020ـەوە ئەنجوومەنی وەزیرانی عێراق پڕۆژەیاسای بەرەنگاربوونەوەی تووندوتیژیی خێرانی پەسندکردووە و رەوانەی پەرلەمانی کردووە، بەڵام تائێستا لە پەرلەمان پەسند نەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ