رووداو دیجیتاڵ
بەپێی راپۆرتێکی کۆمیسیۆنی باڵای هەڵبژاردنەکانی عێراق، 40%ی بەربژێرانی خولی شەشەمی پەرلەمانی عێراق گەنجن و تەمەنیان لە 40 ساڵ کەمترە. تەمەنیان لە نێوان کۆتاییەکانی بیستەکان و نێوەڕاستی سییەکانە، کە جیاوازییەکی زۆرە لەگەڵ پەرلەمانی ئێستا هەیە کە تێکڕای تەمەنی پەرلەمانتاران نزیکەی 55 ساڵە.
کۆمیسیۆنی باڵای هەڵبژاردنەکان رایگەیاند، نزیکەی 40%ـی بەربژێرە تۆمارکراوەکان تەمەنیان لە 40 ساڵ کەمترە و نزیکەی 15%یان تەمەنیان خوار 35 ساڵە. واتە لە نێوان 28 بۆ 35 ساڵیدا. ئەمە لە کاتێکدایە لە هەڵبژاردنەکانی 2021دا، رێژەی بەربژێرەکانی خوار 30 ساڵ 24% بووە.
کۆمیسیۆنی باڵای سەربەخۆی هەڵبژاردنەکانی عێراق راشیگەیاند: "نزیکەی 40%ـی بەربژێرە تۆمارکراوەکان گەنجن، ئەمەش نیشان دەدات کە حەزێکی گەشەسەندوو لە نێوان گەنجاندا هەیە بۆ بەشداریکردن لە دیاریکردنی داهاتووی وڵات". ئەوەشی خستەڕوو: "ئەم ئارەزووە بۆ نوێبوونەوە دەیسەلمێنێت کە نەوەیەک هەمیشە هەستی بە پەراوێزخستن کردووە لە سیاسەتدا، ئەمجارە دەنگێکی بەهێزتری هەبێت".
بانگەشەی هەڵبژاردنی پەرلەمانی عێراق لە 3ـی تشرینی یەکەمی 2025 دەستیپێکرد، کاژێر 07:00 رۆژی 8ـی تشرینی دووەمی 2025 بانگەشە رادەگیرێت. رۆژی 9ـی تشرینی دووەم دەنگدانی تایبەت و رۆژی 11ـی تشرینی دووەم، هەڵبژاردنی گشتی بۆ خولی شەشەمی پەرلەمانی عێراق ئەنجام دەدرێت.
.jpeg&w=3840&q=75)
