هەڵەیەک روویدا! دووبارە هەوڵبدە
رووداو دیجیتاڵ
یوسف کیلابی، ئەندامى لیژنەى دارایی پەرلەمانى عێراق رایگەیاند، لە دادگەى دەستپاکى سکاڵا لە دژى پێدانی قەرز بە هەرێمى کوردستان تۆمار دەکات.
10ى کانوونى یەکەمى 2023، یوسف کیلابی، ئەندامى لیژنەى دارایی پەرلەمانى عێراق بە تۆڕى میدیایی رووداوى راگەیاند: "لە دادگەى دەستپاکى سکاڵا لەدژى بەڕێوەبەرانى ئەو بانکانە تۆمار دەکات کە بە قەرز پارەیان داوەتەوە هەرێمى کوردستان".
حکومەتى فیدراڵى عێراق لە رێگەى هەر سێ بانکەکانى رافیدەین، رەشید و تى بی ئاى پارە بۆ مووچەى فەرمانبەرانى هەرێمى کوردستان دەنێرێت کە وەک قەرز هەژمار دەکرێت.
یوسف کیلابی گوتیشى: "پاساوى سکاڵاکە ئەوەیە کە هەرێمى کوردستان ئەو زانیارییە پێویستانەى رادەستى حکومەتى فیدراڵى نەکردووە کە پێویست بوو رادەستیان بکات بەرامبەر ناردنى ئەو بڕە پارەیە، بەتایبەت ژمارە و ناوى فەرمانبەرانى".
ئەمڕۆ یەکشەممە، 10-12-2023، وەزارەتى دارایی حکومەتى فیدراڵیی عێراق لە راگەیێندراوێکدا ئاشکرایکرد، رۆژی هەینی (8-12-2023) وەزارەتەکە نووسراوێکی کردووە، تێیدا بڕیاردراوە بە پێدانی قەرزێکی 700 ملیار دیناری بۆ پێدانی مووچەی مووچەخۆرانی هەرێمی کوردستان بەمەرجێک ئەو بڕە پارەیە دواتر لە شاییستە داراییەکانی هەرێمی کوردستان بەپێی یاسای بودجە پاکتاو بکرێت.
وەزارەتی دارایی و ئابووریی حکومەتی هەرێمی کوردستان ئێوارەی ئەمڕۆ (یەکشەممە، 10-12-2023) لە راگەیێندراوێکدا ئاشکرایکرد ئەمڕۆ گرێبەستەکەیان واژۆ کردووە بۆ وەرگرتنی بڕی 250 ملیار دیناری قەرز لەڕێگەی بانکی رافیدەین، هەروەها رایگەیاند، "چاوەڕوانین لە داهاتوویەکی نزیکدا پارەکە بگاتە سەر هەژماری بانکی وەزارەتمان لە لقی هەولێری بانکی ناوەندی عێراق."
رۆژی 17ـی ئەیلوولی 2023، ئەنجوومەنى وەزیرانى عێراق بڕیاریدا دوو تریلیۆن و 100 ملیار دینار بە قەرز بداتە هەرێمى کوردستان بۆ مووچەی فەرمانبەران، کە تاوەکو ئێستا یەک تریلیۆن و 400 ملیار دینارى بۆ مانگەکانى ئەیلوول و تشرینى یەکەم ناردووە و یەک گوژمەى ماوە کە 700 ملیار دینارە بۆ مانگى تشیرینى دووەمە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ