رووداو دیجیتاڵ
سەرچاوەیەکى بەرپرسى حکومەتى عێراق لەبارەى دەنگۆی گواستنەوەى هەندێک لە کارمەندانى ناپێویستی باڵیۆزخانەى ئەمریکا لە بەغدا رایگەیاند: "لایەنی عێراقی هیچ ئاماژەیەکی ئەمنی تۆمار نەکردووە کە پێویست بەو گواستنەوەیە بکات. ئەو هەنگاوە پەیوەندی بەو رێوشوێنانەوە هەیە کە تایبەتن بە بوونی ئەمریکا لە ناوچەکە".
سەرچاوە بەرپرسەکە بە میدیاى فەرمیی عێراقی گوتووە، "هەموو نێردە دیپلۆماسییە عەرەبی و بیانییەکان کە لە عێراقن، لە کەشێکی تەواو ئارام کاردەکەن، بەرفراوانترین زەوینەی کاریان بۆ رەخسێندراوە".
ئەو سەرچاوەیە ئاماژەى بەوەدا، هەموو ئاماژە ئەمنییەکان پاڵپشتن بۆ بەرزبوونەوەی ئاستی سەقامگیری و فەراهەمبوونى ئاسایشی نێوخۆیی لە عێراقدا.
ئەو سەرچاوەیە لەبارەى پاساوى ئەمنى بۆ کەمکردنەوەى کارمەندانى باڵیۆزخانەکەی ئەمریکا لە عێراق دەڵێت: "لایەنی عێراقی هیچ ئاماژەیەکی ئەمنی تۆمارنەکردووە کە پێویست بەو گواستنەوەیە بکات".
سەرچاوەکەى حکومەتى عێراقى رایگەیاندووە، کەمبوونەوەی هەندێک لە فەرمانبەرە ناپێویستەکانی باڵیۆزخانەی ئەمریکا پەیوەندی بەو رێوشوێنانەوە هەیە کە تایبەتن بە بوونی ئەمریکا لە ناوچەکەدا.
