کچە خوێندکارێکی کورد لە لازقییە کوژرا

کچەکە ناوی (شیندا عادل کشو)ـە. ئەمڕۆ هەینی باوکی بە تۆڕی میدیایی رووداوی گوت: "تاوەکو کاژێر 01:00ـی بەرەبەیانی ئەمڕۆ پەیوەندیم لەگەڵیدا هەبوو، دواتر بەهۆی بەرکەوتنی گولـلەوە کوژراوە".

شیندا خوێندکاری کۆلێژی پزیشکی بووە لە لازقییە. عادل کشوی باوکی دەڵێت: "کچە دکتۆرەکەم لە ژوورەکەی خۆی و لەسەر تەختەکەی خەوتووە؛ لە خەودا گوللەی لێدراوە و کوژراوە".

شیندا لە قۆناخی یەکەمی خوێندنەکەیدا بووە.

ئێوارەی دوێنێ تاوەکو بەرەبەیانی ئەمڕۆ، لە شار و شارۆچکەکانی رۆژئاوای سووریا کە بە ناوچە کەناراوییەکان ناسراون، شەڕ و رووبەرووبوونەوەیەکی تووند لەنێوان سوپای سووریا و گرووپە چەکدارەکانی نزیک لە رژێمی پێشووی سووریا روویدا. بەگوێرەی ئاماری سەرەتایی، 70 کەس کوژران و دەیانی دیکەش بریندار بوون.