یاریدەدەرێکی جۆلانی کوردە و بە زمانی کوردی گوتاری سەرکەوتن دەدات

 

عەبدولڕەحمان فەتاحی، یاریدەدەری ئەبو محەممەد جۆلانی، سەرۆکی دەستەی تەحریر شام (هەتەشە) بۆ کاروباری ئێران، لە گوتارێکی تۆمارکراویدا بەبۆنەی رووخانی دەسەڵاتی بەشار ئەسەد دەڵێت، "پیرۆزبایی لە خەڵکی موسڵمانی سووریا و موجاهیدین دەکەین کە ئەم فەتحە گەورەیان بە نسیب بوو، جێی خۆیەتی سوژدەی شوکر بۆ خوای گەورە ببەین بۆ ئەم سەرکەوتنە مەزنە، کە بە نسیبی موسڵمانان، لێقەوماوان، ئاوارەکان، دەربەدەرەکان، کوڕکوژراو و ماڵ وێرانبووەکان بوو، کە رژێمێکی ستەمکار چەندین ساڵە لەم ناوچەیە کوشت و کوشتار دەکات و نزیکەی 70 ساڵە خەڵک دەچەوسێنێتەوە."

 

عەبدولڕەحمان فەتاحی ئاماژە بەوە دەکات، "خەڵک لە سەرەتای شۆڕشدا بە مەدەنیانە خۆپێشاندانیان کرد، بەڵام رژێم خوێنی ئەو خەڵکەی تێکەڵی خاک کرد، رژێمەکە بە زەبر و زۆر سەرکەوتنەکەی دواخست بۆ 13 ساڵ؛ دواتر بە هەڵمەتی موجاهیدان، سەرکەوتن بەدەستهات و ئومێدی خستەوە دڵی هەژاران، کە ملیۆنانیان ئاوارەبوون و سەدان هەزاریان لێ کوژراون، جگە لەوەی هەزارانی دیکەش زیندانی کرابوون."

 

عەبدولڕەحمان فەتاحی، یاریدەدەری ئەبو محەممەد جۆلانی، سەرۆکی هەتەشەیە بۆ کاروباری ئێران، خەڵکی مهابادی رۆژهەڵاتی کوردستانە و لە مزگەوتی سووری مهاباد وانەی ئایینی خوێندووە، دواتر هەر لەو شارە وانەی تەفسیری قورئانی گوتووەتەوە.

 

لەبارەی تەحریر شامەوە، یاریدەدەرە کوردەکەی جۆلانی دەڵێت "ئەم موجاهیدانە خەڵکانێکن کە هیچ کەسێکیان نییە جگە لە خودا، بەڵام لەملاولا دەبینین بە تیرۆریست ناودەبرێن، ئەمانە هەمووی خەڵکی ستەملێکراوی سووریان و بەدەستی ئەم رژێمە، دەربەدەریان بینیوە، ئەم خەڵکانە سوننەمەزهەبن و تووندڕەونین، بەڵکو تەنیا دەیانەوێت لەژێر شەرعی خودا بحەسێنەوە، رژێمی ئەسەدیان دەرکرد و دەیانەوێت خۆیان چارەنووسی خۆیان بنووسنەوە."

 

عەبدولرەحمان فەتاحی، یەکێک بووە لە دامەزرێنەرانی کەتائیبی ئەلقاعیدە لە کوردستان، ئەرکەکەی بانگەوازکردن بووە بۆ بیرۆکەی سەلەفی - جیهادی، کە لەنێوان ساڵانی 2005 بۆ 2007 دەیان گەنجیان بۆ شەڕ رەوانەی عێراق و ئەفغانستان کردووە.

 

بەتۆمەتی تیرۆر، عەبدولرەحمان فەتاحی چەندین ساڵ لە ئێران زیندانیکراوە، دواتر و لە ساڵی 2015، چووەتە نێو چەکدارانی بەرەی نووسرە لە سووریا.