ئاگری شەڕ لە ئاسمانی هەولێر

ئاگری شەڕی نێوان ئەمریکا-ئیسرائیل و ئێران، سنوورەکانی بەزاندووە و گەیشتووەتە ئاسمانی هەولێر. زنجیرەیەک هێرشی درۆنی و مووشەکی، کە کەمپێکی پەنابەرانی کوردی رۆژهەڵات و ماڵی هاونیشتمانییانی سڤیلی لە پایتەختی هەرێمی کوردستان کردووەتە ئامانج، دۆخێکی نوێی لە ترس و نادڵنیایی دروستکردووە. لە کاتێکدا دیوارەکان شەق دەبەن و خەڵکی سڤیل دەبنە قوربانی، پرسیاری سەرەکی ئەوەیە: کێ لەپشت ئەم هێرشانەوەیە و بۆچی هەولێر باجی شەڕێک دەدات کە هی ئەو نییە؟

بۆ دۆزینەوەی وەڵام، هیڤیدار ئەحمەد، گەشتێکی لە هەولێرەوە بۆ بەغدا ئەنجام دا. لە بەغدا، کە دەبوو ناوەندی بڕیار بێت، دەسەڵات لەنێوان چەندین هێزی جیاوازدا دابەش بووە. وێنەی رێبەرانی کۆماری ئیسلامیی ئێران لە شەقامەکاندا و بڵاوبوونەوەی چەکداران، هەستی نائاساییبوونی دۆخەکەی زیاتر کردووە. دامەزراوە فەرمییەکانی دەوڵەت و زۆربەی لایەنەکان ئامادە نەبوون لەسەر دۆسیەی گرووپە چەکدارەکان قسە بکەن، ئەمەش دانپێدانانێکی ناڕاستەوخۆ بوو بەوەی کە ئەم گرووپانە لە دەسەڵاتی دەوڵەت گەورەترن.

دوای هەوڵێکی زۆر، شێخ کازم فەرتووسی، گوتەبێژی کەتیبەکانی "سەیدولشوهەدا" کە یەکێکە لە گرووپەکانی "موقاوەمە"، رازی بوو قسە بکات. فەرتووسی بە راشکاوی دانی بەوەدا نا کە ئەوان هێرش دەکەنە سەر بنکە سەربازییەکانی ئەمریکا لە هەرێمی کوردستان. پاساوی بۆ ئەم کارە ئەوە بوو کە گوایە ئەو بنکانە بۆ هێرشکردنە سەر ئەوان بەکاردەهێنرێن. ئەو گرووپەکەیانی بە "گەورەتر لە دەوڵەت" ناوبرد و رایگەیاند، بۆ وەڵامدانەوە "رەزامەندی لە کەس وەرناگرن". لەگەڵ ئەوەشدا، بە تووندی رەتیکردەوە کە هاووڵاتییانی سڤیلیان کردبێتە ئامانج و گوتی کرد کە هێرشەکانیان 100% وردن.

بەڵام راستییەکان لەسەر زەوی جیاوازن. گەڕانەوە بۆ هەولێر و بینینی ماڵی وێرانکراوی هاونیشتمانییان لە گەڕەکێکی شارەکە، بەڵگەیەکی حاشا هەڵنەگر بوو لەسەر ئەوەی کە خەڵکی سڤیل قوربانیی سەرەکیی ئەم شەڕەن. بەرپرسانی باڵای هەرێمی کوردستانیش جەختیان لەوە کردەوە کە زیاتر لە 70%ی هێرشەکان لەلایەن گرووپەکانی "موقاوەمە"ی عێراقییەوە ئەنجام دەدرێن و حکومەتی فیدراڵیش دان بەوەدا دەنێت کە کۆنترۆڵی بەسەر ئەو گرووپانەدا نییە.

لە کۆتاییدا، دیمەنەکە روونە: لە کاتێکدا گرووپە چەکدارەکان بە بیانووی شەڕی ئەمریکاوە سەروەریی عێراق و ئاسایشی هەرێمی کوردستان پێشێل دەکەن، حکومەتی عێراق بێدەسەڵات وەستاوە. لەم نێوەندەدا، هاونیشتمانییانی سڤیلی هەولێر و باشووری کوردستان بوونەتە سووتماکی ئاگرێک کە نە خۆیان هەڵیانگیرساندووە و نە دەتوانن بیکوژێننەوە، چونکە وەک دیارە، ئەم شەڕە هێشتا ماویەتی.