بەرهەمهێنانی ئۆتۆمبێلی ئاگرکوژێنەوە بە ستانداردی جیهانی

لە پاشیڤی چوارەمی رەمەزاندا، بێستوون عوسمان میوانداری مەریوان فایەق، بەڕێوەبەری جێبەجێکاری کۆمپانیای "دووسەرە"ی کرد. لە بەرنامەکەدا مەریوان فایەق باسی لە کارەکەی کرد کە تایبەتە بە بەرهەمهێنانی ئۆتۆمبێلی ئاگرکوژێنەوە بە ستانداردی جیهانی. کارگەی کۆمپانیای دووسەرە بۆ بەرهەمهێنانی ئۆتۆمبێلی ئاگرکوژێنەوە دەکەوێتە ناوچەی پیشەسازی تیمار لەسەر رووبەری 3000 مەتر دووجا. ئەو خاوەنکارە باسی سەرەتای دروستبوونی کۆمپانیاکەی کرد چۆن لەساڵی 2010 دامەزراوە و لە 2014 فراوانکراوە و ئێستا 52 کارمەندی هەیە کە 98٪ـیان خەڵکی کوردستانن.

مەریوان فایەق چیرۆکی سەرکەوتنی خۆی گێڕایەوە کە چۆن لە تەمەنی 12 ساڵییەوە وەکو شاگرد لەگەڵ باوکی دەستی بە کارکردن کردووە و دواتر بە بینینی ئەو کەموکوڕییانەی لە بواری ئاگرکوژێنەوەدا هەبوون، بڕیاریداوە خۆی ئەم پیشەسازییە دەست پێبکات. ئەو باسی ئەوەی کرد چۆن لە ساڵی 2014 دوای سەردانێکی دەرەوەی وڵات، کاتێک پێیان گوتووە کە کورد ناتوانن ئۆتۆمبێلی ئاگرکوژێنەوە دروست بکەن، بڕیاری داوە بەکردار وەڵامیان بداتەوە و لە ماوەی 9 مانگدا یەکەم ئۆتۆمبێلی دروست کردووە.

بەشێکی بەرنامەکە تەرخان کرا بۆ باسکردنی تایبەتمەندییەکانی ئەو ئۆتۆمبێلانە کە لە سێ بواردا کاردەکەن: ئاگرکوژێنەوە، ئەمبولانس، و رزگارکردن لە رووداوەکانی وەک بوومەلەرزە و لافاو. هەروەها باسی کوالێتی بەرزی ئۆتۆمبێلەکان کرا کە لە ئەلەمنیۆم دروست کراون بۆ ئەوەی کێشی قورسیان نەبێت. لە بەرنامەکەدا، دلێر تیلی، پێشکێشکاری بەرنامەی "مەید ئین کوردستان" لە تۆڕی میدیایی رووداو، باسی لەوە کرد چۆن لە رێگەی بەرنامەکەیەوە بە سەدان کارگەی بەرهەمهێنەری کوردیان ناساندووە لە چوار پارچەی کوردستان.

لە بەشێکی دیکەی بەرنامەکەدا، حاجی کاوە شاکر سروودێکی ئایینی پێشکەش کرد. هەروەها باخان، براوەی پێشبڕکێی رۆژی پێشوو کە لە سلێمانییەوە هاتبوو، خەڵاتەکەی وەرگرت کە تەلەڤزیۆنێکی شاشە 55 ئینجی بوو. هەروەها براوەی پێشبڕکێی ئەو رۆژەش راگەیەندرا کە رێکان عومەر بوو کە توانیبووی لە ماوەی 28 چرکەدا وەڵامی 10 پرسیار بداتەوە.

لە کۆتاییدا بەرنامەکەدا، مەریوان فایەق بەڵێنیدا پشتگیری خوێندنی یەک خوێندکار بکات لە دەرەوەی وڵات و هەلی کار بۆ پێنج گەنجی کوردیش بڕەخسێنێت لە کۆمپانیاکەی. دواتر بەرنامەکە بە سەردانی گەڕەکی سەیداوە کۆتایی هات بۆ بەشداریکردن لە پاشیڤی لەگەڵ خانەوادەی موحێدین ئەحمەد. بڕیارە لە لە شەوانی داهاتوودا سەردانی گەڕەکەکانی دیکەی هەولێر بکرێت وەک شاپاوا، مامزاوا، بەستەپیازە، شوورتاوە، ئیسکان و تەعجیل.