ژنانی سەرکەوتوو لە پاشیڤی رووداو

پاشیڤی رووداو لە شەوی هەشتەمی رەمەزانی 2025 پێشکێش کرا. بەرنامەکە بە شیعرێکی کورمانجی دەستی پێکرد کە مێژووەکەی بۆ ساڵی 1417 دەگەڕێتەوە. شیعرەکە لە کۆڕ و کۆبوونەوە ئایینییەکانی کوردستاندا دەخوێنرێتەوە. لە سەرەتای بەرنامەکەدا، پێشکێشکار بێستوون عوسمان باسی پێشبڕکێی پاشیڤی کرد کە لە کاژێر 9 تاوەکو 1:30  بەردەوام بوو و، بینەران و خەڵک وەڵامی پرسیارەکانیان داوەتەوە. هەروەها باسی پاشیڤی شەوی پێشووی کرد کە سەردانی یەکێک لە دانیشتووانی گەڕەکی مامزاوایان کردبوو لە هەولێر. 

هەشتی رەمەزانی 2025، هاوکاتە لەگەڵ هەشتی مارس، رۆژی جیهانی ژنان. بەو بۆنەیەوە ژمارەیەک خوێندکاری کچ لە زانکۆکانی هەولێر بانگهێشت کرابوون بۆ بەشداریکردن لە بەرنامەکە. لە گفتوگۆیەکی چڕوپڕدا، خاتوو سەبا ئەمیر ئاغالە چیرۆکی ژیانی خۆی و چۆنیەتی دەستپێکردنی کارەکەی گێڕایەوە. ئەو باسی لەوە کرد کە چۆن لە منداڵییەوە حەزی لە ئیشکردن بووە و لە تەمەنی 13 بۆ 14 ساڵیدا چووەتە تاران و لەوێ دەستی بە کارکردن کردووە. خاتوو سەبا باسی لەوە کرد کە باوکی کاریگەرییەکی زۆری لەسەری هەبووە و هەمیشە هانی داوە کە سەربەخۆ بێت و ئیش بکات.

خاتوو سەبا باسی لە کۆمپانیای سەبا هۆڵدینگ کرد کە ئێستا نزیکەی 102 کەس کاری تێدا دەکەن و لە بەغداش چالاکیان هەیە. ئەو هەروەها باسی لە پرۆژەیەکی نوێی کرد کە لە بواری دەرمانی شێرپەنجەی سنگ کار دەکات.
لە بەشێکی دیکەی بەرنامەکەدا، شێفی پاشیڤ مەتێ خان چیرۆکی ژیانی خۆی گێڕایەوە، کە چۆن دوای نەخۆشکەوتنی هاوژینەکەی و لە تەمەنی 18 ساڵیدا دەستی بە کارکردن کردووە. سەرەتا ساردەمەنی فرۆشتووە و دواتر خواردنگەیەکی دامەزراندووە کە ئێستا لە ناوچەکەدا ناوبانگی هەیە و خەڵک لە شارەکانی دیکەی کوردستانەوە دەچن بۆ ئەوێ.

لە بەشی کۆتایی بەرنامەکەدا، براوەی پێشبڕکێکە راگەیێندرا، پەیمان خەتاب کەریم کە توانیبووی هەر 10 پرسیارەکە بە دروستی لە ماوەی 30 چرکەدا وەڵامبداتەوە. بەرنامەکە بە مۆناجاتێکی حاجی کاوە کۆتایی پێهات.