دیداری هونەر و سەرمایە لە پاشیڤی رەمەزان

بەرنامەی پاشیڤی رووداو، لە دووەم شەوی مانگی رەمەزاندا بە پێشکەشکاریی سەمیرا کارزان و محەممەد شێخ فاتیح، درێژەی بە گەشتە شەوانەکەی دا و چەندین میوانی ناسراوی لەخۆگرت. بەرنامەکە لەنێو پاسی کەژاوەی پاشیڤەوە دەستپێدەکات و دواتر دەچێتە ستۆدیۆی سەرەکی.

لە سەرەتای بەرنامەکەدا، پێشکەشکاران ئاوڕیان لە کاردانەوەکانی یەکەم ئەڵقە دایەوە، بەتایبەتیش بڕگەی قورئان خوێندنی سەمیرا کارزان کە بووبووە جێی باسی تۆڕە کۆمەڵایەتییەکان. سەمیرا، سوپاسی ئەو کەسایەتی و مامۆستا ئایینییانەی کرد کە بەشێوەیەکی دروست سەرنجیان لەسەر بابەتەکە داوە و رایانگەیاندبوو کە شێوازی خوێندنەوەکەی لەڕووی شەرعییەوە هیچ کێشەیەکی نییە.

دواتر، میوانی سەرەکیی بەرنامەکە، ئەکتەری دیاری کورد مستەفا ئەحمەد، هاتە نێو کەژاوەی پاشیڤ. لە گفتوگۆیەکی گەرمدا، مستەفا ئەحمەد باسی لە خۆشەویستیی خۆی بۆ شاری سلێمانی کرد و یادگارییەکانی خۆی لە ساڵی 1972 لە هەولێر گێڕایەوە، کاتێک وەکو فەرمانبەر لەو شارە کاری کردووە. ئەو ئاماژەی بەوەدا کە ژیانی ئەو سەردەمە سادەتر و خۆشتر بووە و خەڵک "خۆشباوەڕ" بوون. هەروەها باسی لەوە کرد کە چۆن هونەرمەند دەبێت پێش کۆمەڵگەکەی بکەوێت و ئاگاداری دەردە کۆمەڵایەتییەکان بێت، بۆ نموونە کاتێک ئەوان لە ساڵانی حەفتاکاندا لە درامای لانەوازان باسیان لە مەترسیی ماددە هۆشبەرەکان کردووە.

لە ستۆدیۆی سەرەکی، گفتوگۆکان لەگەڵ مستەفا ئەحمەد درێژەیان کێشا. ئەو باسی لە کارەکتەرە ناسراوەکانی خۆی کرد، لەوانە "خولە چەخماخە" و "خولە پیزە". روونیکردەوە کە چیرۆکی فیلمی "خولە پیزە" لە رووداوێکی راستەقینەوە وەرگیراوە کە تێیدا گەنجێک لەبەر داکۆکیکردن لە دایکی و قورئانەکەی، رووبەڕووی پۆلیسی ئەو سەردەمە دەبێتەوە و یاخی دەبێت. بەڵام کارەکتەری "خولە چەخماخە"، کارەکتەرێکی هەڵقوڵاوی نێو کۆمەڵگەی کوردی بووە.

دواتر، حەسەن حاجی باقی هەورامی، گەنجترین سەرۆکی پێشووی ژووری بازرگانی لە عێراق، بووە میوانی دووەمی بەرنامەکە. حەسەن حاجی باقی باسی لە ئەزموونی خۆی لە بواری بازرگانیدا کرد و رایگەیاند کە گرنگترین هۆکارەکانی سەرکەوتن بریتین لە "بڕوابەخۆبوون، کۆڵنەدان و ئارامگرتن". هەروەها چیرۆکی باوکی، گێڕایەوە کە چۆن یەکەمجار لە ساڵانی حەفتاکاندا کاری ترانزێتی لە رێگەی ئێرانەوە بۆ عێراق کردووە.

لە بڕگەی چێشتلێناندا، شێف سەوسەن چەندین خواردنی کوردی ئامادە کرد، لەوانە "دەستی بەرخ" و "مەقلووبە". هەروەها، محەممەد شێخ فاتیح لە بڕگەی "حیکمەتی پاشیڤ"دا چیرۆکێکی کاریگەری لەبارەی کوڕێکەوە گێڕایەوە کە دایکە پیرەکەی دەباتە خانەی بەساڵاچووان، بەڵام لە کۆتاییدا بەهۆی وەڵامێکی دایکییەوە تووشی پەشیمانییەکی قووڵ دەبێت.

لە کۆتاییدا، براوەی خەڵاتی لیرەی زێڕی ئەڵقەی پێشوو کە پێشمەرگەیەک بوو، خەڵاتەکەی وەرگرت. هەروەها لە رێگەی ژیریی دەستکردەوە، براوەی خەڵاتی ئایفۆن بۆ ئەو کەسە دیاریکرا کە زۆرترین کۆمێنتی لەسەر پلاتفۆرمەکانی رووداو نووسیبوو. بەرنامەکە بە موناجاتێکی ئایینی لەلایەن سەمیرا کارزان و پارچە میوزیکێکەوە کۆتایی هات.

شۆیەکی دوو كاژێرییە، بەدرێژایی مانگی رەمەزان پێشكێشدەكرێت. ئەو كەسانەی تاوەكو پاشیڤ ناخەون یان بۆ پاشیڤ هەڵدەستنەوە بەدرێژایی ئەو دوو كاژێرە زانیاری و بڕگەی هەمەجۆریان پێشكێش دەكرێت. بڕگەكانی بەجۆرێكن كە رەچاوی خێرایی لەسەر شاشە و هەمەڕەنگی و پڕ زانیاریبوون و چێژوەرگرتن تێیانداكراوە .

ئامانج لە پاشیڤ دروستكردنی شۆیەکی رەمەزانی پڕ زانیاری و ئینتەرتەیمێنتە بۆ ئەوانەی شەوانی رەمەزان ناخەون، بۆ ئەوەی ئاگاداری مژارە جۆرا و جۆرەكان بن كە بەتایبەتی لەو مانگەدا دەبنە جێگەی گفتوگۆ و سەرنج.