وەڵامەکانی ترەمپ بۆ رووداو، سەردانی شاندی دەعوە بۆ هەولێر

لە بەرنامەی ئەمڕۆ شەممە 21-2-2026ـی ( رۆژی هیوا جەمال) لە تۆڕی میدیایی رووداو، وەڵامە راستەوخۆکانی دۆناڵد ترەمپ بۆ رووداو سەبارەت بە سووریا و ئێران، و سەردانی شاندێکی باڵای حیزبی دەعوە بۆ هەولێر بە مەبەستی یەکلاییکردنەوەی پۆستە سیادییەکان تاووتوێ کران. هاوکات لە رۆژی جیهانیی زمانی دایکدا، تیشک خرایە سەر پێگەی زمانی کوردی لە جیهانی تەکنەلۆژیا و ژیریی دەستکرد، لەگەڵ بڵاوکردنەوەی راپۆرتی مێژوویی پەرلەمانی تورکیا بۆ پرۆسەی ئاشتی. لە ناوخۆیشدا، تەقینەوەی بۆرییەکی غاز لە کەرکووک و گرانبوونی تێچووی ژیان لە هەولێر، بەشێکی دیکەی هەواڵەکان بوون.

بۆرییەکی غاز لە کەرکووک تەقییەوە و ئاگرەکە کۆنتڕۆڵ کرا

بەیانی ئەمڕۆ بۆرییەکی گواستنەوەی غازی خاو لە نێوان وێستگەکانی AB2 و AB3 لە سنووری گوندی باجوانی سەر بە پارێزگای کەرکووک تەقییەوە. کۆمپانیای گازی باکوور بە رووداوی راگەیاند کە تیمەکانی ئاگرکوژێنەوە توانییان ئاگرەکە بکوژێننەوە و هیچ زیانێکی گیانی نەبووە. ئێستا تیمە تەکنیکییەکان خەریکی چاککردنەوەی بۆرییەکەن.

شاندێکی باڵای حیزبی دەعوە لە هەولێرە و لەگەڵ سەرۆک بارزانی کۆدەبێتەوە

شاندێکی باڵای حیزبی دەعوە بە سەرۆکایەتیی عەباس بەیاتی گەیشتنە هەولێر. ئامانجی سەردانەکە یەکخستنی هەڵوێستی کورد و شیعەیە لەسەر پۆستەکانی سەرۆککۆمار و سەرۆکوەزیران. ئەندامێکی شاندەکە بە رووداوی راگەیاند: "کورد پایەیەکی سەرەکیی دەوڵەتن و دەمانەوێت پێکەوە بڕیار لە حکومەتی داهاتوو بدەین."

ترەمپ بۆ رووداو: ئەحمەد شەڕع لەگەڵ کورد باش بووە

لە کۆنفرانسێکی رۆژنامەڤانیدا لە کۆشکی سپی، دۆناڵد ترەمپ وەڵامی دوو پرسیاری دیار کوردە، بەڕێوەبەری نووسینگەی واشنتنی رووداوی دایەوە. ترەمپ سەبارەت بە ئایندەی سووریا و کورد رایگەیاند، ئەحمەد شەڕع "تاوەکو ئێستا لەگەڵ کورد زۆر باش بووە." سەبارەت بە ئێرانیش، ترەمپ وتی خەڵکی ئەو وڵاتە "لە دۆزەخدا دەژین" و باشترە تاران بگاتە رێککەوتنێکی دادپەروەرانە.

عێراقچی ئامارەکەی ترەمپ رەتدەکاتەوە: ٣١١٧ کەس کوژراون

عەباس عێراقچی، وەزیری دەرەوەی ئێران، وەڵامی قسەکانی ترەمپی دایەوە کە بۆ رووداو کردبووی. عێراقچی ژمارەی ٣٢ هەزار کوژراوی رەتکردەوە و رایگەیاند، کۆی گشتیی قوربانییەکانی ئەم دواییەی ئێران ٣١١٧ کەسە، کە ٢٠٠یان هێزە ئەمنییەکانن.

ئەڵمانیا داوای لە هاووڵاتییانی کرد ئێران جێبهێڵن

بەهۆی هەڵکشانی گرژییەکانی نێوان واشنتن و تاران، وەزارەتی دەرەوەی ئەڵمانیا داوای لە هاووڵاتییانی کرد بە زووترین کات بە رێگەی وشکانی یان ئاسمانی ئێران جێبهێڵن، چونکە باڵیۆزخانەکەیان ناتوانێت هاوکاریی تەواویان بکات.

کۆکردنەوەی ١٧ کەشتیی جەنگیی ئەمریکا لە ناوچەکەدا

ئەمریکا گەورەترین هێزی دەریایی لە رۆژهەڵاتی ناوەڕاست کۆکردووەتەوە. بە گەیشتنی کەشتیی (جێراڵد فۆرد)، ژمارەی کەشتییە جەنگییەکان دەگاتە ١٧ کەشتی. هەروەها ١٠ هەزار سەرباز و دەیان فڕۆکەی جەنگیی پێشکەوتوو لە بنکەکاندا لە ئامادەباشیدان.

هێرشی ئەمریکا بۆ سەر کەشتییەکی قاچاخچییەکان لە ئۆقیانووسی هێمن

فەرماندەیی باشووری سوپای ئەمریکا رایگەیاند، لە هێرشێکی ئاسمانیدا لە رۆژهەڵاتی ئۆقیانووسی هێمن، کەشتییەکی باندە تیرۆریستییەکانی قاچاخی ماددە هۆشبەرەکانیان کردووەتە ئامانج و سێ قاچاخچییان کوشتووە.

هەولێر لە بەغدا و تاران گرانترە

بەگوێرەی ئیندێکسی تێچووی ژیان بۆ ٢٠٢٦، شاری هەولێر لە پلەی ٣٩١ی جیهاندایە و تێچووی ژیان تێیدا لە ١٠ پایتەختی وەک بەغدا، تاران، قاهیرە و تەنانەت ریۆ دی جانیرۆش گرانترە. سویسرا هێشتا گرانترین و هیندستان هەرزانترین ناوچەکانی جیهانن.

وەزارەتی کار مۆڵەتی هەفتەیەک دەداتە خاوەنکاران

وەزارەتی کار و کاروباری کۆمەڵایەتی مۆڵەتی هەفتەیەک دەداتە خاوەنکار و کۆمپانیاکان تاوەکو زانیارییەکانیان بە ئەلیکترۆنی نوێ بکەنەوە، بە پێچەوانەوە رووبەڕووی سزای یاسایی دەبنەوە.

کێشەی یەکسانکردنی بڕوانامەکانی خوێندنی باڵا

کۆمەڵێک لە دەرچووانی ماستەر و دکتۆرا لە وڵاتی هەنگاریا و چەند وڵاتێکی دیکە، داوا لە وەزارەتی خوێندنی باڵا دەکەن بڕوانامەکانیان یەکسان بکات. ئەوان دەڵێن زانکۆکانیان لە ریزبەندیی جیهانیدا پێشەنگن و نابێت تەنیا بەپێی ناوی وڵات مامەڵەیان لەگەڵ بکرێت.

زمانی کوردی لە سلێمانی لە پلەی سێیەمدایە

توێژینەوەیەکی مەیدانیی قوتابیانی ئامادەیی لە سلێمانی دەریخستووە، زمانی کوردی لەسەر تابلۆی شوێنە بازرگانییەکان لە دوای زمانی ئینگلیزی و تابلۆ تێکەڵەکان دێت. سەرپەرشتیاری توێژینەوەکە دەڵێت دەیانەوێت پڕۆژەی (بیکە بە کوردی) لە شارەکانی دیکەی کوردستانیش جێبەجێ بکەن.

رەخنە لە نووسینی توێژینەوە یاساییەکان بە زمانی عەرەبی

هاوڕێ تۆفیق، بەڕێوەبەری گشتی لە سەرۆکایەتیی کۆماری عێراق، رەخنەی تووندی لە زانکۆکان گرت کە توێژینەوەکانی ماستەر و دکتۆرا لە کۆلێژەکانی یاسا بە عەرەبی دەنووسن. ناوبراو داوای کرد کتێبخانەی یاسایی کوردی دەوڵەمەند بکرێت و عەقڵی یاسایی کوردی دروست بکرێت.

٤٠٪ـی دانیشتووانی جیهان ناتوانن بە زمانی دایک بخوێنن

بەگوێرەی ئامارەکانی نەتەوە یەکگرتووەکان لە رۆژی زمانی دایکدا، هەر دوو هەفتە جارێک زمانێک لە جیهاندا دەمرێت. یونسکۆ داوا دەکات لە رێگەی ژیریی دەستکردەوە پاڵپشتی لەو زمانانە بکرێت کە کەمتر نوێنەرایەتییان کراوە.

بۆکان جاف: فۆنتە کۆنەکان زمانی کوردی دەفەوتێنن

بۆکان جاف، دامەزرێنەری کۆمەڵەی گووگڵ کراودسۆرس لە عێراق، بە رووداوی راگەیاند، پاشەڕۆژی زمانی کوردی بەندە بە "یونیکۆد"ەوە. ناوبراو هۆشداری دا کە هەر تێکستێک بە فۆنتی کۆن (وەک عەلی سمیک) بنووسرێت، ژیریی دەستکرد ناتوانێت لێی تێبگات. هەروەها روونی کردەوە کە ئیمۆجی ئاڵای کوردستان بەهۆی کۆدە نێودەوڵەتییەکانەوە تائێستا بە فەرمی زیاد نەکراوە.

پەرلەمانی تورکیا راپۆرتی مێژوویی "کۆمیسیۆنی برایەتی" بڵاوکردەوە

دوای ٦ مانگ گفتوگۆ، پەرلەمانی تورکیا راپۆرتی ١٠٠ لاپەڕەیی بۆ چارەسەری پرسی کورد بڵاوکردەوە. راپۆرتەکە پێشنیازی چاکسازی لە سیستەمی قەیوم، پاراستنی مافی زمان و دابینکردنی "مافی هیوا" بۆ زیندانییان دەکات.

ئامەد.. ٢٠ قوتابی بە جیوە ژەهراوی بوون

قوتابییەکی پۆلی حەوتەم لە ئامەد بڕێک ماددەی "جیوە"ی بردووەتە ناو پۆلەکەی؛ بەهۆی دەستاودەستکردنی ماددەکە، ٢٠ قوتابی ژەهراوی بوون و رەوانەی نەخۆشخانە کران. تیمەکانی ئافاد پۆلەکەیان پاککردەوە و لێکۆڵینەوە بەردەوامە.

ئۆجەلان داوای چاوپێکەوتن لەگەڵ میدیاکان دەکات

پەروین بوڵدان، ئەندامی شاندی ئیمراڵی، رایگەیاند کە عەبدوڵڵا ئۆجەلان لە دیداری دواییدا داوای کردووە کۆنفرانسێکی رۆژنامەڤانی بۆ ساز بکرێت. ئۆجەلان وتوویەتی قۆناغی یەکەمی چارەسەری (چەکدانان) تەواو بووە و دەبێت خوێندن بە زمانی دایک جێگیر بکرێت.

شەڕی توند لە دەرعای سووریا و قەدەغەی هاتووچۆ

دوای هەوڵێکی تیرۆرکردنی سەرنەکەوتوو دژی فەرماندە "ئەحمەد عۆدە"، شەڕێکی توند لە نێوان سوپای سووریا و گروپە چەکدارە ناوخۆییەکان لە دەرعا دەستیپێکرد. لە چەندین شارۆچکە قەدەغەی هاتووچۆ راگەیێندراوە.

میسر.. باوک و کوڕێک بەهۆی کێشەی خێزانییەوە تەقەیان لێکرا

لە پارێزگای قەلیوبیەی میسر، بەهۆی کێشەی خێزانییەوە هێرشکرایە سەر باوکێک و کوڕە ٥ ساڵانەکەی. منداڵەکە قاچێکی لەدەستداوە و باوکەکەش بریندارە. پۆلیس ٤ کەسی بە تۆمەتی ئەو تاوانە دەستگیرکردووە.

دەستگیرکردنی عێراقییەک بە تۆمەتی دزیی ١٨ ملیۆن یۆرۆ لە بەرلین

پۆلیسی ئەڵمانیا هاووڵاتییەکی عێراقیی لە فڕۆکەخانەی بەرلین دەستگیرکرد کە تۆمەتبارە بە بەشداری لە دزییەکی گەورەی ساڵی ٢٠٢٢، کە تێیدا بە بەهای ١٨ ملیۆن یۆرۆ خشڵ و زێڕ دزراون.

حوراء یاسین؛ کچە قورئانخوێنە ناودارەکەی شاری کووت

حوراء یاسین، کچێکی تەمەن ٢٤ ساڵانی شاری کووتە، توانیویەتی لە رێگەی سۆشیال میدیاوە کلتووری قورئانخوێنی لە نێو نەوەی نوێدا بڵاوبکاتەوە. ئەو بەشداریی چەندین پێشبڕکێی نێودەوڵەتیی کردووە و پلەی باڵای بەدەستهێناوە.


رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).