رووداوی ئەمڕۆ؛ پەرتەوازەیی کورد لە بەغدا و دەرهاویشتەکانی

پارتی و یەکێتی لەبەردەم قۆناخێکدان لە پەیوەندییەکانیان، کە توانای گەڵاڵەکردنی رێککەوتنیان پێکەوە نییە، ئەمە کێشەی نێوان دوو حیزبە، بەڵام رەنگدانەوەی لەسەر هەموو باشووری کوردستان هەیە.

 

عەبدولسەلام بەرواری، سیاسەتڤان دەڵێت: هیچکات پارتی لەسەر بنەمای ژمارەی کورسی مامەڵەی لەگەڵ یەکێتی نەکردووە و یەکێتی لە هەموو جومگەکان لەگەڵ پارتی هاوبەشە.

 

گوتیشی: ناکۆکییەکانی پارتی و یەکێتی سرووشتی و ئاساییە و خواستی شەقام تەبایی لایەنە سیاسییەکانی هەرێمی کوردستانە.

 

هاوکات مەحموود خۆشناو، لێکۆڵینڤانی سیاسی لە بەرنامەی رووداوی ئەمڕۆ گوتی: بنەماکانی جێبەجێکردنی رێککەوتنی سیاسیی پارتی و یەکێتی جێبەجێ نەکران و باشترە پارتی و یەکێتی بەدوای بژاردەی نوێ بگەڕێن.

 

گوتیشی: دۆسێیەکانی نێوان پارتی و یەکێتی لە سیاسییەوە گۆڕاون بۆ ئەمنی و پارتی و یەکێتی دوو ئاراستەی جیاوازن.

 

لە بەشێکی دیکەی گوتەکانی خۆشناو گوتیشی: سەرۆکی هەرێمی کوردستان رووبەرێکی باشی لەگەڵ هەمووان پاراستووە و دەتوانێت پارتی و یەکێتی کۆبکاتەوە.

 

"سەرۆکی هەرێمی کوردستان پەیوەندیی لەگەڵ هەموو لایەنەکان باشە"، مەحموود خۆشناو وای گوت.

 

هاوکات هەر لە بەرنامەی رووداوی ئەمڕۆ  رابەر تەڵعەت، بەڕێوەبەری ناوەندی توێژینەوەی سبەی گوتی: مەترسیی هەیە هەڕەشە لەسەر قەوارەی هەرێمی کوردستان دروستبێت و لە گشتپرسیی سەربەخۆیی هەموو لایەنە کوردستانییەکان یەکدەنگ بوون بۆیە هەرێمی کوردستان لە هەڕەشەیەکی جیدی لەنێوچوون قووتاری بوو.

 

گوتیشی: هەرێمی کوردستان خاوەنی حکومڕانییەکی دامەزراوەیی نییە و مەکتەبی سیاسیی حیزبەکان بوونەتە جێگرەوەی پەرلەمان، ئێستا لە هەرێمی کوردستان بوون و نەبوونی پەرلەمان وەکو یەکە.