سەرم لە ژاوەژاوی بەناو رەخنەگرتن لە تۆڕی میدیایی رووداو دەرناچێت. دەڵێن گوایە بە پارەی نەوت دامەزراوە، بەڵێ بە پارەی نەوت، ئەو نەوتەی لە ماوەی 90 ساڵی رابردوودا تەنیا کارەساتی بۆ ئەم وڵاتە بەرهەمهێناوە.
ئەوانەی ئەو "رەخنە" بێ مانایە دەگرن، ئایا پرسیاریان لە خۆیان کردووە، کەناڵەکانی تری میدیا لە کوردستاندا، چۆن و بەپارەی چی و کێ دامەزراون؟ ئایا پرسیاری ئەوەیان کردووە، راگەیاندنەکانی تر خەرجیی مانگانە و مووچەی کارمەندەکانیان چۆن و بە پارەی چی دابین دەکەن؟ وەڵامی ئەو دوو پرسیارە لە وەڵامی پرسیاری (1+1) ئاسانترە، چونکە سەرجەم کەناڵەکان حیزبین و حیزبەکانیش پارە لە خەزێنەی حکومەت دێننە دەرەوەو دەیکەن بە گەرووی راگەیاندنەکانیاندا.
واتە خەرجیی ئەوانیش هەر لە پارەی نەوت و داهاتەکانی دی دابین دەکرێت، خۆیان گوتەنی: لە قوتی خەڵک دەبڕدرێت و بەوان دەدرێت. هەر کەسێکیش وەڵامێکی پێچەوانەی هەیە، ئەوە دیارە حیزبەکەی ئەو یان پارە لە وڵاتێکی بێگانە وەردەگرێت یاخود حیزبەکەی بازرگانی دەکات و لە رێگەی بازرگانییەوە پارە پەیدا دەکات. حیزبێکیش پارە لە وڵاتێکی بێگانە وەربگرێت یان بازرگانی بکات، لە یەکەمیاندا دەبێتە جاسوس و لە دووەمیاندا دەبێتە کۆمپانیا.
کەواتە بۆچی تەنیا باسی (رووداو) دەکرێت؟ بۆچی تەنیا ئەو کەناڵە کەوتووەتە بەردەم سێرەی تفەنگ و نیشانەی لێدەگیرێت؟ وەڵامی ئەم پرسیارەیان تۆزێک ئاڵۆزە، چونکە زۆربەی "رەخنەگرەکان" پیاوی حیزبەکانن و دەیانەوێ بڵێن: پارتی دەستی بەسەر داهاتی نەوتدا گرتووەو کەناڵی رووداویشی بەو داهاتە دروستکردووە. ئاڵۆزی و پارادۆکسەکە لێرەدایە، چونکە خودی ئەو حیزبانەی پیاوەکانیان بۆ "رەخنەگرتن" لە رووداو هاندەدەن، خۆیان بەدوای پارتیدا راکەڕاکیانە، خواخوایانە پارتی چاوێکی خێری لێیان بێت و پۆستێک یان بڕێک پارەیان لە مست بکات، لەوەش سەیرتر ئەوەیە خودی ئەو کەسانەی "رەخنە" دەگرن، خۆیان شەڕەشان و پێشبڕکێیانە تا لە شاشەی رووداوەوە دەربکەون!
سەرئەنجام لەناو ئەو ئاڵۆزییەدا دەگەینە ئەو بڕوایەی "رەخنەکان" ترسن لەوەی رووداو شاشەیەکی جیاواز، بەناوەڕۆکێکی جیاوازەوە بخاتەڕوو. ترسە لەوەی ئەوانی "رەخنەگر"ی بێ پرۆژەی میدیایی و سیاسی، بەرگەی ئەو جیاوازییە نەگرن و لەبەردەم پرۆژە میدیاییەکەی رووداودا شکستبهێنن.
باشە رووداو لەم ساڵ و چەند مانگەی تەمەنیدا، شاشەیەکی جیاوازی خستووەتەڕوو تا ببێتە دێوەزمە و ئەو فۆبیا گەورەیەیان لا دروست بکات؟ زانستی راگەیاندن پێماندەڵێت: بەڵێ رووداو شاشەیەکی جیاوازە، بەڵام هێشتا ماویەتی! هەرچەندە ئەو شاشەیە، بەچەند فرسەخێک لە پێش کەناڵەکانی ترەوەیە لەرووی روماڵکردنی هەواڵ، فیچەر و بەدواداچوونی هەواڵ، پێشکەشکردنی زانیاری، بەرنامەی جیاواز و چاوپێکەوتنەکان، بەڵام هێشتا کەمی کردووە و زۆری ماوە.
ئاشکرایە میدیاکان جگە لە ئەرکی پیشەیی راگەیاندن، ئەرکێکی کۆمەڵایەتی، کەلتووری و سیاسیشیان لەئەستۆیە، هەر راگەیاندنێکیش بە گوێرەی فەلسەفەی سیاسیی خۆی ئەو ئەرکە رایی دەکات. کەناڵی رووداو، بەگوێرەی ئەو فەلسەفە سیاسییەی بانگەشەی بۆ دەکات، دەبێت ئەرکە کۆمەڵایەتی، کەلتووری و سیاسییەکەی بریتی بێت لە: ئاشتی کۆمەڵایەتی، دروستکردنی کەلتووری لێبووردەیی، یەکترقبوڵکردن و رەتکردنەوەی توندوتیژی. لەڕووی سیاسیشەوە هەوڵ بۆ پەرەپێدانی ئازادیی سیاسی و فرەیی بیرکردنەوە و جێگیرکردنی دیموکراسی بدات.
لەم رەوشە سیاسییەی ئێستای کوردستاندا، هەلێکی گەورە لەبەردەم رووداودا رەخساوە تا ببێتە کەناڵێکی نیشتمانیی سەرتاسەری، کەناڵێک "هەموو" هاووڵاتییەک خۆی تێدا ببینێتەوە. "هەموو" بۆچوونە سیاسییەکان خۆیانی تێدا ببیننەوە. "هەموو" ئاین، تائیفە و نەتەوەکان، خۆیانی تێدا ببینن.
لەم رەوشە سیاسییەدا، گۆڕەپانەکە تەنیا یەک یاریزانی تێدایە، ئەویش تەنیا دەسەڵاتە و یاریزانی بەرامبەر کە ئۆپۆزسیۆنە مەیدانەکەی چۆڵکردووە و داویەتیە پاڵ دەسەڵات، بۆیە راستەوخۆ هەموو کەناڵەکانی راگەیاندنیش بوون بە کەناڵی دەسەڵات، واتە چۆن پرۆسە سیاسییەکە لاسەنگ بووە، ئاواش مەیدانی راگەیاندن لاسەنگ بووە، ئەوەش هەلە زێڕینەکەیە کە رووداو دەتوانێت (ئەگەر بیەوێت) بیقۆزێتەوە و پارسەنگی ئەو لاسەنگییە میدیاییە سیاسییە بداتەوە. چۆن؟ رووداو دەتوانێت ببێتە سەکۆی ئەوانەی لە ئەنجامی پرۆسە سیاسییەکەدا بێ سەکۆ ماونەتەوە، چونکە راگەیاندنێک ئەگەر تەماحی بوون بە راگەیاندنی نیشتمانی هەبێت، پێویستە سەکۆی "هەمووان" بێت و هەڵاوێردی سیاسی، ئاینیی، مەزهەبی و نەتەوەیی نەکات. بەنیشتمانیبوونی رووداویش هەم وەڵامێک دەبێت بۆ "رەخنەکان"، هەم هەنگاوێکی گەورەش دەبێت بۆ چەسپاندنی قەوارەی سیاسیی کوردستان، چونکە راگەیاندنی نیشتمانی، یەکێکە لە بنەماکانی دروستکردنی یەکێتی نیشتمانی. ئایا رووداو ئەوە دەکات یان نا؟ وەڵامی ئەو پرسیارە لای رووداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ