رووداو دیجیتاڵ
یانەی دهۆک سەرکەوتنی دووەمی لە خولی ئەستێرەکانی عێراقدا بەدەستهێنا و چووە پێشەنگی ریزبەندی خولەکە.
دهۆک لە گەڕی دووەمی خولەکەدا، لە دەرەوەی یاریگەی خۆی بەرامبەر یانەی نەورۆز یارییکرد و یارییەکەی بە گۆڵێکی بێبەرامبەر لە میواندارەکەی بردەوە.
دهۆکییەکان هەر زوو دەستیان بە هێرشکرد بۆ سەر گۆڵی خاوەن یاریگە، لە خولەکی 18 یانیک زاکیری گۆڵی پێشکەوتنی تۆمارکرد و بۆ دووەم یاریی لەسەریەک توانیی گۆڵی رکابەرەکانی بهەژێنێت.
لە نیوەی دووەمدا، هەرچەند هیران ئەحمەد، ئەستێرەی یانەی دهۆک بە کارتی سوور کرایە دەرەوە و یاریزانانی یانەی نەورۆز هەوڵی زۆریاندا بۆ ئەوەی ئەنجامەکە راستبکەنەوە، بەڵام سەرجەم هەوڵەکانیان بێ سوود بوو و یارییەکە بە گۆڵێکی بێبەرامبەر لە بەرژەوەندی دهۆک کۆتاییهات و یانەکە بە سێ خاڵەوە لە سلێمانی گەڕایەوە.
یانەی دهۆک دووەم یارییە لەسەریەک دەیباتەوە، لە یاریی یەکەمدا لە یاریگەی خۆی بە دوو گۆڵی بێبەرامبەر سەرکەوتنی بەرامبەر شورتە بەدەستهێنابوو.
ئێستا دهۆک خاوەنی 6 خاڵە و چووە پێشەنگی ریزبەندی خولی ئەستێرەکانی عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ