رووداو دیجیتاڵ
قسە و باسەکان سەبارەت بە داھاتووی ئێرلینگ ھالاند، ھێرشبەری مانچێستەر سیتی و ئەگەری رۆیشتنی لە یانە ئینگلیزییەکە لە کۆتایی ئەم وەرزەدا بەردەوامن، لەکاتێکدا باس لە گرنگیپێدانی جددی ریال مەدرید دەکرێت بۆ گرێبەستکردن لەگەڵیدا.
کیس واینێس، بەڕێوەبەری جێبەجێکاری پێشووی یانەی ئاستۆن ڤێلای ئینگلیزی، لە لێدوانێکدا کە رۆژنامەی ئەی ئێسی ئیسپانی بڵاوی کردووەتەوە، دەڵێت "پێموایە ئێرلینگ ھالاند لە کۆتایی ئەم وەرزەدا لە مانچێستەر سیتی دەڕوات".
واینێس هەروەها گوتی "زۆر باس لە ئەگەری گواستنەوەی ڤینیسیۆس جونیۆر لە ریال مەدریدەوە بۆ خولی سعودیە دەکرێت و لەوانەیە ئەو دەنگۆیانەی گواستنەوەی یاریزانە بەرازیلییەکە بەرامبەر بە 200 ملیۆن یۆرۆ، ھۆکارێک بێت بۆ ئەوەی یانە ئیسپانییەکە دەستەوارەیەک بۆ ھالاند پێشکێشی مانچێستەر سیتی بکات".
پێشنیازی خولی سعودیە
راپۆرتە رۆژنامەڤانییەکان لە ئیسپانیا ئاماژەیان بەوەداوە کە یەکێک لە یانەکانی خولی سعودیە دەستەوارەیەکی 200 ملیۆن یۆرۆیی بۆ گرێبەستکردن لەگەڵ ڤینیسیۆس جونیۆر لە ماوەی گواستنەوەی ھاوینەی داھاتوودا لە ساڵی 2026 ئامادە دەکات. پێدەچێت ئەم بڕە پارە گەورەیە، لە ئەگەری تەواوبوونی گرێبەستەکەدا، توانای داراییەکی زۆر بۆ ریال مەدرید دابین بکات کە رێگەی پێبدات دەستەوارەیەکی فەرمی بۆ گواستنەوەی ھالاند لە مانچێستەر سیتی پێشکێش بکات.
ریال مەدرید ماوەیەکە بەوردی چاودێری دۆخی یاریزانە نەرویجییەکە دەکات، چونکە پێشتر ناوی بە یانەی شاھانەوە بەسترابووەوە پێش ئەوەی لە ھاوینی 2022 لە بۆرووسیا دۆرتموندی ئەڵمانییەوە بچێتە مانچێستەر سیتی. سەرەڕای سەرکەوتنە گەورەکەی لە ئینگلتەرا.
بەپێی ھەندێک راپۆرتی رۆژنامەڤانی، بیرۆکەی گواستنەوە بۆ مەدرید ھێشتا لە مێشکی یاریزانە نەرویجییەکەدایە، بەتایبەتی بە لەبەرچاوگرتنی پەیوەندی باشی نێوان بەڕێوەبەری کارەکانی و یانە ئیسپانییەکە.
ھالاند گرێبەستێکی لەگەڵ مانچێستەر سیتی ھەبوو، کە بەهۆیەوە تاوەکو ساڵی 2027 بەردەوام دەبوو، پێش ئەوەی یانە ئینگلیزییەکە لە کانوونی دووەمی رابردوودا بە گرێبەستێکی درێژخایەن تاوەکو ھاوینی 2034 لای خۆی بهێڵێتەوە، بەڵام ئەمە لەکاتێکدایە کە راپۆرتە رۆژنامەڤانییەکانی بەریتانیا باس لە بوونی خاڵێک لە گرێبەستی گۆڵکاری نەرویجیدا دەکەن، کە رێگە بە گواستنەوەی بۆ یانەیەکی دیکە لە دەرەوەی ئینگلتەرا بەرامبەر بە بڕێکی زۆر پارە دەدات.
ئەم مەرجە، ئەگەر راست بێت، ریال مەدرید لە پێگەیەکی بەھێزدا دادەنێت بۆ دانوستاندن، بەتایبەتی ئەگەر بتوانێت ڤینیسیۆس جونیۆر بە بڕە پارەیەکی زۆر بە وەبەرھێنەرە سعودییەکان بفرۆشێت. چاودێران پێیانوایە کارگێڕیی فلۆرەنتینۆ پێرێز لەوانەیە ئەم ھەنگاوە بە ھەلێکی گونجاو بزانێت بۆ ھێنانی ھێرشبەرێکی سەرەکی کە بتوانێت ھێڵی ھێرشی یانەکە بۆ ساڵانی داھاتوو سەرکردایەتی بکات.
لە لایەکی دیکەوە، بەرپرسانی مانچێستەر سیتی بەئاسانی دەستبەرداری ئەستێرەی یەکەمی یانەکە نابن، چونکە یانە ئینگلیزییەکە ھالاند بە یەکێک لە پایە سەرەکییەکانی پڕۆژەکەی راھێنەری ئیسپانی پێپ گواردیۆلا دەزانێت، کە بە یاریزانێکی نموونەیی بۆ شێوازی ھێرشبردنی خۆی دەزانێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ