رووداو دیجیتاڵ
شەڕ لەنێوان چەکدارانی بزووتنەوەی تاڵیبان و بەرەی بەرخودانی نیشتمانی، کە کوڕەکەی ئەحمەد شا مەسعود سەرکردایەتیی دەکات، لە هەرێمی پەنجشیر لە باکووری رۆژهەڵاتی کابوول دەستیپێکردووە و هەردوولا باس لە قوربانیی زۆری لایەنی بەرامبەر دەکەن.
سەرچاوە میدیاییە ناوخۆییەکانی ئەفغانستان چەند گرتەیەکی ڤیدیۆیی سۆشیال میدیایان بڵاوکردووەتەوە و تێیدا دەردەکەوێت شەڕێکی قورس لەنێوان چەکدارانی بزووتنەوەی تاڵیبان و چەکدارانی ژێر فەرمانی ئەحمەد مەسعود، کوڕی سەرکردە ئەحمەد شا مەسعود هەیە.
کەناڵی تولوع کە یەکێکە لە کەناڵە متمانەپێکراوەکانی ئەفغانستان و پێش گەڕانەوەی تاڵیبانیش کاری کردووە، ئاشکرای کرد، شەوی چوارشەممە شەڕ لەنێوان بزووتنەوەی تاڵیبان و چەکدارانی "بەرەی بەرخودانی نیشتمانی" لە رۆژئاوای ویلایەتی پەنجشیر دەستیپێکردووەتەوە
تاوەکو ئێستا بە دروستی نازانرێت ژمارەی قوربانییانی شەڕەکە چەندە و هەردوولا باس لە دەیان کوژراو لە لایەنی بەرامبەر دەکەن.
ویلایەتی پەنجشیر تاکە ویلایەتە کە تاوەکو ئێستا بزووتنەوەی تاڵیبان نەیتوانیوە کۆنترۆڵی بکات و لەژێر دەسەڵاتی هێزەکانی ئەحمەد مەسعودە.
لە 15ی ئابی ئەمساڵەوە کە بزووتنەوەی تاڵیبان کۆنترۆڵی کابوولی پایتەختی ئەفغانستانی کرد، دەنگۆی ئەوە هەبوو گفتوگۆ لەنێوان تاڵیبان و ئەحمەد مەسعود دەستیپێکردووە بە مەبەستی گەیشتن بە رێککەوتنی ئاشتی.
"بەرەی بەرخودانی نیشتمانی" بە سەرکردایەتیی ئەحمەد مەسعود، کوڕی ئەحمەد شا مەسعود، داوای سیستەمی لامەرکەزیی سیاسی و ئابووری بۆ ویلایەتی پەنجشیر دەکات، بەجۆرێك کە نیمچە سەربەخۆییەک لە دەسەڵاتی تاڵیبان بەدەستبهێنێت، بەڵام تاوەکو ئێستا پێناچێت گفتوگۆکان هیچ دەستکەوتێکیان هەبووبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ