رووداو دیجیتاڵ
لە عومان بەهۆی لافاوەوە لانیکەم 12 کەس گیانیان لەدەستداوە، کە زۆربەیان قوتابین، تیمەکانی بەرگریی شارستانی وڵاتەکە بەدوای تەرمەکاندا دەگەڕێن.
راپۆرتە سەرەتاییەکان باس لەوە دەکەن نۆ قوتابی قوتابخانەکان و سێ کەسی دیکە لەنێو ئۆتۆمبێلەکانیان بەهۆی لافاوەکەوە خنکاون. بەپێی ئاژانسی فەرمیی عومان، پێنج کەسی دیکەش بێسەروشوێنن.
تائێستا تەرمی منداڵێک و چوار کەسی دیکە دۆزراونەتەوە و هێزەکانی بەرگریی شارستانی بەردەوامن لە گەڕان بەدوای تەرمەکانی دیکە.
لە رۆژی شەممەوە شەپۆلێکی بەهێزی باران، کە بایەکی بەهێزیشی لەگەڵە لە چەند ناوچەیەکی باکوور و رۆژهەڵاتی عومان لافاوی دروستکردووە.
ئەمڕۆ دووشەممە، وەزارەتی پەروەردەی عومان بەهۆی نالەباری کەشوهەوا دەرگای قوتابخانەکانی وڵاتەکەی داخست، ئەنجوومەنی وەزیرانی ئەو وڵاتەش داوای لە هاووڵاتییان کرد لە ماڵەکانیان بمێننەوە.
تائێستا زەرەر و زیانەکانی لافاوەکە ئاشکرا نەکراوە، بەڵام بەرپرسانی عومان دەڵێن، ژمارەیەکی زۆری خانوو زیانیان پێگەیشتووە و بەشێکی شەقامەکانی وڵاتەکەش داخراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ