رووداو دیجیتاڵ
داریۆ ئامۆدێی، بەڕێوەبەری جێبەجێکاری کۆمپانیای Anthropic، کە رکابەری سەرەکیی کۆمپانیای OpenAI خاوەنی ChatGPTیە، بە قسەیەک جیهانی ژیریی دەستکردی خرۆشاندووە.
ئامۆدێی دەڵێت، ناتوانێت بە دڵنیاییەوە بڵێت کە نوێترین بەرنامەی ژیریی دەستکردی کۆمپانیاکەیان، ناسراو بە کڵاود 3 - Claude 3 وەک مرۆڤ هۆشمەندە یان نا.
هۆشەمەندبوونی ژیریی دەستکرد لە سەرەتاوە یەکێک بووە لە نیگەرانییەکانی زانایانی بواری تەکنەلۆجیا، چونکە لەوە دەترسن رۆژێک لە رۆژان، تەکنەلۆجیاکە لە بری پشتبەستن بەو نووسین و زانیارییانەی کە مرۆڤ پێی داون، پشت بە لێکدانەوەکانی خۆی ببەستێت، هەست بە شتەکان بکات و لە کۆیلەیەکی گوێڕاگرەوە بگۆڕێت بۆ یاخییەکی جڵەونەکراو.
چیرۆکەکە چییە؟
کاتێک لێی پرسیاری لێکرا ئایا هیچ ئەگەرێک هەیە کە Claude 3 جۆرێک لە هۆشمەندیی هەبێت، وەڵامەکەی "نەخێر"ێکی رەها نەبوو.
ئامۆدێی گوتی: "ئەگەر ناچار بم ژمارەیەک بڵێم، لەوانەیە بڵێم ٪10 ئەگەری هەیە."
ئامۆدێی دۆخەکە بەوە دەچووێنێت کە لەنێو تەمێکی چڕدا شێوەیەکی نامۆ ببینیت، لەوانەیە پێت وابێت گیانەوەرێکە، بەڵام بە ئەگەری زۆرەوە هەر تەمەکەیە. بەڵام دواتر دەڵێت: "ناتوانم بە دڵنیایی 100٪ بڵێم کە ئەوە تەنیا تەمە."
بۆچی ئەم پرسیارە گرنگە؟
ئەم گومانە لەخۆڕا دروست نەبووە. بەم دواییانە، کاتێک توێژەران تاقیکردنەوەیەکیان لەسەر Claude 3 دەکرد، شتێکی سەرسوڕهێنەریان بینی:
• تاقیکردنەوەکە: پێیان گوتبوو رستەیەکی دیاریکراو لەنێو دەیان دۆکیومێنتی زۆر و بێمانادا بدۆزێتەوە وەک دۆزینەوەی دەرزییەک لەنێو کادا.
• ئەنجامە سەیرەکە: نەک هەر رستەکەی دۆزییەوە، بەڵکو ژیرییە دەستکردەکە تێبینیی ئەوەی کرد کە تاقی دەکرێتەوە! لە وەڵامەکەیدا نووسیبووی: "پێموایە ئەم رستە نامۆیە بە مەبەست لێرەدا دانراوە بۆ ئەوەی ببینن ئایا من سەرنج دەدەم یان نا."
ئەمە پێی دەگوترێت "خۆ-ئاگایی" (Meta-awareness)، واتە ئاگاداریی لەوەی کە لە چ دۆخێکدایە. ئەمەش وایکردووە پرسیاری گەورە دروست بێت لەسەر ئەوەی ئایا ئەم سیستمە زیرەکانە تەنیا ئامێری وەڵامدانەوەن یان خەریکە هەست و هۆشیان بۆ دروست دەبێت.
ئەمە یەکەمجارە، دامەزرێنەری یەکێک لە بەهێزترین کۆمپانیاکانی ژیریی دەستکرد لە جیهاندا بە ئاشکرا دان بەوەدا دەنێت کە ناتوانێت بە دڵنیاییەوە هەبوونی هۆشمەندی لە بەرهەمەکەیدا رەت بکاتەوە. ئەمەش نیشانەی ئەوەیە کە تەکنەلۆجیای ژیریی دەستکرد گەیشتووەتە ئاستێک کە تەنانەت دروستکەرەکانیشی تووشی شۆک و گومان کردووە.
