وەزیری دەرەوەی ئیتاڵیا بۆ رووداو: باوەڕمان بە ئیدارەی نوێی سووریایە و بۆ وەبەرهێنان تێیدا ئامادەین

 

 

ئەنتۆنیۆ تاجانی، وەزیری دەرەوەی ئیتاڵیا لە وەڵامی پرسیارێکدا لەبارەی هەڵگرتنی سزاکانی سەر سووریا لە کاتێکدا بەشێک لە پێکهاتەکان دەڵێن، لە لایەن هێزەکانی سەر بە دەسەڵاتەوە هێرشیان دەکرێتەسەر، گوتی، ئاگادارن کێشە لە سووریا هەیە، بەڵام دەبێ پشتگیری ئەو دەسەڵاتە نوێیە بکرێ کە هەیە، ئەگەر "بتەوێت یەکێتیی سووریا سەقامگیر بێت."

 

ئەنتۆنیۆ تاجانی ئاماژەی بەوەشکرد، ئەوان وەک ئیتاڵیا و یەکێتیی ئەورووپا ئامادەن لەپێناو ئاشتییدا کاربکەن و ئامادەیشن "بۆ هاریکاریی باش لەنێوان ئیتاڵیا و سووریا لە بواری سیاسەتی پیشەسازییدا."

 

یەکێتیی ئەورووپا لە ساڵی 2011 سزای بەسەر سووریادا سەپاند، ئەوەش دوای ئەوەی حکومەتی بەشار ئەسەد دەستی بە سەرکوتکردنی خۆپێشاندانەکانی ئەو وڵاتە کرد. 

 

سزاکان گەمارۆی سەر کەرتی نەوت، سنووردارکردنی کەرتی بانکی و گواستنەوە، قەدەخەکردنی هەناردەکردنی ئەو کەلوپەلانەیان لەخۆگرتبوو کە دەکرا بۆ سەرکوتکردن سوودیان لێ وەربگیرێ. سەدان کەسایەتی و دامەزراوە رووبەڕووی قەدەخەی گەشتکردن و سڕکردنی سامانەکانیان بوونەوە.

 

لە ساڵی 2025 و دوای گۆڕانکاری دەسەڵات لە سووریا، یەکێتیی ئەورووپا ئاراستەی کار و سیاسەتی گۆڕی و لە مانگی شوباتدا سنووردارییەکانی سەر کەرتی وزە، گواستنەوە و بانکی هەڵپەسارد، هەروەها لە مانگی ئایاردا زۆربەی سزا ئابوورییەکانی بەتەواوی هەڵگرت.

 

یەکێتیی ئەورووپا دەڵێت، سووککردنی سزاکان مەرجدارە و ئەگەر سووریا لە هەنگاوەکانی پاشگەز بێتەوە، رەنگە بڕیارەکە هەڵبوەشێندرێتەوە.

 

 

 

ئەنتۆنیۆ تاجانی، وەزیری دەرەوەی ئیتالیا: دەمانەوێ گەمارۆکان هەڵگرین، چونکە باوەڕمان بە ئیدارەی نوێی هەیە. گرفت لە نێو لایەنگرانی شەرعیش هەیە، بەڵام دەبێ پشتگیریی ئیدارەی نوێ بکەی ئەگەر بتەوێ یەکێتی سووریا سەقامگیربێ. ئیتاڵیا بۆ ئەو مەبەستە بە بەهێزی بەشدارە. ئێمە باوەڕمان بە سووریا هەیە. ئامادەین لە پێناوی ئاشتیدا کاربکەین. ئامادەین بۆ وەبەرهێنانی ئیتاڵی (لە سووریا). ئامادەین بۆ هاریکاری باش لە نێوان ئیتاڵیا و سووریا لە بواری سیاسەتی پیشەسازیدا. پێمان وایە گەشتێکی ئاسمانی راستەوخۆ لە سووریاوە بۆ ئیتاڵیا پەیامێکی زۆر گرنگ دەبێت. پردێکی زۆر گرنگ دەبێت.

 

 

ئەنتۆنیۆ تاجانی: باشە، کێشە هەیە. دەبێت بۆ یەکپارچەیی کار بکەین. هەموو سووریاییەکان—کریستیان، کورد، موسڵمان، دروز—سووریاین. ئەمە خاڵە سەرەکییەکەیە. بێگومان، من مەسیحیم. بەڵام لەو بارەوە گەشبینم، هەموو سووریاییەکان سووریاین.