سەرۆکی کۆپ 30 بۆ رووداو: ئەم ساڵ عێراق پێگەیەکی تایبەتی لە کۆنفرانسی تایبەت بە گۆڕانی کەشوهەوا دەبێ

 

ئاندرێ کۆرێرا دۆ لاگۆ گوتی: "عێراق کارێکی گەورە دەکات لە هەوڵدان بۆ دروستکردنی هەڵوێستێکی هاوبەش بۆ هەموو وڵاتانی گەشەسەندوو لە هەندێک لە گرنگترین بابەتەکانی کۆپ 30."

 

کۆنفرانسی رێکخراوی نەتەوە یەکگرتووەکان بۆ رووبەڕووبوونەوەی کاریگەرییەکانی دیاردەی گۆڕانی کەشوهەوا ناسراو بە کۆپ 30 رۆژی 10ی ئەم مانگە لە بەڕازیل دەست پێدەکات و تاوەکو 21ـی مانگ بەردەوام دەبێ. 

 

 

 

ئاندرێ کۆرێرا دۆ لاگۆ: ئەمە خاڵێکی زۆر گرنگە، چونکە وەک دەزانن کاتێک باسی گۆڕانی کەشوهەوا دەکەین، بەشێوەیەکی سەرەکی باسی دوو شت دەکەین کە دەبێت ئەنجامیان بدەین. یەکێکیان کەمکردنەوەی کاریگەرییەکانە و ئەوی دیکەیان خۆگونجاندنە، چونکە گۆڕانی کەشوهەوا لێرەیە. بۆیە، هیوادارین لە COP30 گرنگی زیاتر بە خۆگونجاندن بدەین، چونکە نکۆڵیکردنێکی تەواوە ئەگەر دان بەوەدا نەنێین کە وڵاتان بە شێوەیەکی بەرچاو کەوتوونەتە ژێر کاریگەری گۆڕانی کەشوهەوا. بۆیە، پێویستە بەردەوام بین لە کەمکردنەوەی کاریگەرییەکان، چونکە ئەمە تاکە چارەسەرە لەبەردەستماندا بێت و بەردەوام بیر لە 1.5 پلەی سیلیزی دەکەینەوە وەک پلەی گەرمی ئاماژە کە دەبێت دڵنیا بین لە پاراستنی. بەڵام خۆگونجاندن زۆر گرنگە، بۆیە پێویستمان بە سەرچاوەی زۆر زیاترە و ئەمەش دەبێتە پرسێکی سەرەکی گفتۆگان لە COP30.

 

 

ئاندرێ کۆرێرا دۆ لاگۆ: گواستنەوە بۆ سفرکردنەوەی دەرهاوێشتەی گازی ژینگەپیسکەر، چەندین ساڵی دەوێ تاوەکو ئابووری جیهان لەگەڵ ئەوەی پێویستە بکرێت بگونجێت. هەر وڵاتێک رێگەی تایبەتی خۆی دەبێت بۆ دۆزینەوەی چارەسەرێک کە گونجاو بێت بۆ دۆخی خۆی. بەرهەمهێنەرانی گەورەی نەوت هەن کە چەندین چالاکی ئابووری دیکەیان هەیە. هەندێکی دیکەشیان بەرهەمهێنەری زۆر گەورەی نەوت نین، بەڵام ئابوورییەکەیان بە تەواوی پشت بە نەوت دەبەستێت. بۆیە، پێم وایە دەبێت رێگەیەکی دادپەروەرانە بدۆزینەوە بۆ دڵنیابوون لەوەی ئەم گواستنەوەیە روودەدات، چونکە هەموومان رێککەوتین لەسەر دوورکەوتنەوە لە سووتەمەنییە نەریتییەکان، بەڵام هەروەها رێککەوتین کە هەر وڵاتێک دەبێت رێگەی تایبەتی خۆی بدۆزێتەوە. 

 

ئەم ساڵ ساڵێکی تایبەتیشە چونکە عێراق سەرۆکایەتی "گروپی 77 و چین" دەکات.  ئەم گرووپە، وەک دەزانن، زیاتر لە 120 وڵاتی گەشەسەندووی تێدایە و عێراق کارێکی گەورە دەکات لە هەوڵدان بۆ دروستکردنی هەڵوێستێکی هاوبەش بۆ هەموو وڵاتانی گەشەسەندوو لەبارەی هەندێک لە گرنگترین بابەتەکانی COP30. ئەمە زۆر گرنگە چونکە گەر وڵاتانی گەشەسەندوو هەڵوێستیان هاوبەش بێت، زۆر قورسە بۆ وڵاتانی دیکە بەرەنگاری گرووپێک ببنەوە کە نوێنەرایەتی زیاتر لە دوو لەسەر سێی دانیشتوانی جیهان دەکات. بۆیە، عێراق ئەم ساڵ پێگەیەکی تایبەتی هەیە لە COP30 و ئێمە بە تەواوی هاوئاهەنگی دەکەین چونکە لە سەرەتاوە ئەندامێکی دامەزرێنەری گرووپی 77 و چین بووین.