وەزارەتی کشتوکاڵی هەرێمی کوردستان
رووداو دیجیتاڵ
بە ئامانجی زیادکردنی بەرهەمی شیر و ئالیک، وەزارەتی کشتوکاڵی هەرێمی کوردستان، بە هاوبەشی لەگەڵ وەزارەتی کشتوکاڵی عێراق، رێکخراوی فاو و بانکی نێودەوڵەتی، پڕۆژەیەک بۆ پاڵپشتیی 2 هەزار جووتیار و ئاژەڵدار رادەگەیێنێت.
هیوا عەلی، گوتەبێژی وەزارەتی کشتوکاڵی هەرێمی کوردستان، رۆژی چوارشەممە، 29ی نیسانی 2026، بە تۆڕی میدیایی رووداوی راگەیاند، "لە تەواوی عێراق 7 هەزار خێزان لە پڕۆژەکەدا بەشدارن، لە هەرێمی کوردستانیش پارێزگای سلێمانی و ئیدارەی راپەڕین بەشدارن."
بە گوتەی هیوا عەلی، پڕۆژەکە دوو بەشی سەرەکی لەخۆدەگرێت: یەکەمیان تایبەتە بە بەخێوکردنی ئاژەڵی شیردەر و دووەمیان بۆ بەرهەمهێنانی ئالیکە.
گوتەبێژی وەزارەتی کشتوکاڵ رایگەیاند، ئەمە هەشتەمین کاری هاوبەشی نێوان وەزارەتی کشتوکاڵی هەرێمی کوردستان و رێکخراوی فاوە و یەکەمجارە 2 هەزار خێزان لێی سوودمەند دەبن.
پڕۆژەکە لە سنووری قەزاکانی سەیدسادق، دووکان و ئیدارەی راپەڕین جێبەجێ دەکرێت، چونکە بەپێی هەڵسەنگاندنەکانی رێکخراوی فاو، ئەو ناوچانە بۆ بەرهەمهێنانی ئالیک گونجاون.
گوتەبێژی وەزارەتی کشتوکاڵ دەڵێت، جگە لە زیادکردنی بەرهەمی نێوخۆیی و بەبازاڕکردنی بەرهەمی ئاژەڵداران، یەکێک لە ئامانجەکانی پڕۆژەکە رەخساندنی هەلی کارە بۆ ژنان و کچان. بە مەرجێک رێژەی بەشدارییان لە %25 کەمتر نەبێت، تاوەکو ئەوانیش بتوانن ببنە خاوەنی سەرچاوەی ئابووریی سەربەخۆی خۆیان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ