Civîna Nêçîrvan Barzanî û şandeya Japonyayê / Wêne: Serokatiya Herêma Kurdistanê
Hewlêr (Rûdaw) - Nêçîrvan Barzanî şandeyeke Wezareta Karên Derve ya Japonyayê pêşwazî kir.
Serokê şandeyê êrişa li Qada Gazê ya Kormorê şermezar kir û piştgiriya welatê xwe ya ji bo Herêma Kurdistanê ducare kir.
Serokê Herêma Kurdistanê Nêçîrvan Barzanî şandeyeke Wezareta Karên Derve ya Japonyayê pêşwazî kir ku bi serokatiya Birêvebirê Kar û Barên Rojhilata Navîn Masamichi Sugaya çûbûn serdanê.
Di hevdîtinê de ku Balyozê Japonyayê yê Îraqê Akira Endo jî amade bû, pêwendiyên Japonyayê yên bi Îraq û Herêma Kurdistanê re, rewşa giştî ya Îraqê û derfetên kar û veberhênana Japonyayê ya li Herêma Kurdistanê hatin gotûbêjkirin.
Li gorî daxuyaniya Serokatiya Herêma Kurdistanê, di civînê de her du aliyan tekezî li ser xwesteka dualî ya ji bo bipêşxistina pêwendiyan û berfirehkirina hevkariya hevbeş a di navbera wan de di hemû waran de kir.
Nêçîrvan Barzanî pesnê kar û projeyên Ajansa JICAyê û şirketên Japonyayê û rola wan a li Îraq û Herêma Kurdistanê da.
Di daxuyaniyê de hat diyarkirin ku şandeya Japonyayê li gel şermezarkirina êrişa li Kormorê, piştgiriya xwe ya ji bo Herêma Kurdistanê ducare kir.
Her wiha amadebûn û xwesteka welatê xwe ya ji bo beşdariya zêdetir a di pêvajoya avedankirin û bipêşxistina li Îraq û Herêma Kurdistanê de nîşan da.
Hilbijartinên Parlamentoya Îraqê, pêwendiyên Hewlêr û Bexdayê û pêşhatên dawî yên herêmê, çend mijarên din ên hevdîtinê bûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse