Hewlêr (Rûdaw) - Partiya Azadiya Kurdistanê (PAK) ragihand ku artêşa Îranê îro berê sibehê bi mûşek û dronan êrişî yek ji baregehên wan ên leşkerî yên li Herêma Kurdistanê kiriye.
Di daxuyaniya PAKê de hat diyarkirin ku êriş li dijî baregeheke baskê leşkerî yê partiyê "Artêşa Niştimanî ya Kurdistanê" hatiye kirin.
Her çiqas cihê tam ê êrişê nehatibe eşkerekirin jî di dîmenên ku li ser hesabên medyaya civakî yên PAKê hatine belavkirin de xisara li herêmê balê dikişîne.
Hat ragihandin ku di êrişê de Pêşmergeyê bi navê Muzefer Mihemedzade yê bi nasnavê "Nebez" ê ku di yekîneya lojîstîkê ya partiyê de kar dikir şehîd ketiye.
Protestoyên li Îranê
Ev êriş di demekê de pêk hat ku li Îranê nirxê tumen di asta rekorê de daketiye û krîza aborî bûye sedema xwenîşandanên berfireh ên li dijî hikûmetê.
PAKê eşkere kir ku ew piştgiriyê didin van xwenîşandanên li nav Îranê û di demên dawî de li dijî hêzên ewlehiyê yên Îranê çalakî pêk anîne.
"Em serî natewînin"
Di daxuyaniya PAKê de wiha hat gotin:
"Em ji dijminê dagirker re dibêjin: Zarokên Kurdistanê bi vê êriş û tundiyê qet serî natewînin. Rêya derxistina wan û bidestxistina serxwebûnê dê qerebalixtir bibe."
Rayedarên Îranê derbarê êrişa li ser baregeha PAKê heta niha ti daxuyaniyeke fermî nedaye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse