Hewlêr (Rûdaw) - Dadgeha Bilind a Îranê biryara Dadgeha Şoreşê ya Urmiyeyê ya ji bo îdamkirina Mîhrab Ebdullahzade pesend kir.
Mîhrab Ebdullahzade ciwanekî Kurd ê 27 salî ye û ji Urmiyeyê ye ku di xwenîşandanên sala 2022yan de hatibû girtin.
Rêxistinên mafên mirovan ên Rojhilatê Kurdistanê belav kir ku cezayê îdamkirina Mîhrab Ebdullahzade, ji aliyê Şaxa 9emîn a Dadgeha Bilind a Îranê ve hatiye piştrastkirin.
Li gorî zanyariyan, Mîhrab Ebdullahzadeyê ku niha di Girtîgeha Navendî ya Urmiyeyê de ye, roja pêncşemê ji biryarê hatiye agahdarkirin.
Mîhrab Ebdullahzade payîza sala 2022yan hatibû girtin.
Havîna sala borî ji aliyê Şaxa Yekem a Dadgeha Şoreşê ya Urmiyeyê ve cezayê îdamê lê hatibû birîn.
Tohmeta wî bexîtî (kesê ku ji bo rûxandina Komara Îslamî ya Îranê hewl dide) ye, wate endamtiya wan komên ku li dijî hikûmeta Îslamî çalakiyên bi çekan dikin.
Mîhrab Ebdullahzade bi kuştina endamekî hêzên Besîcê tê tohmetbarkirin ku hêzeke ser bi Supaya Pasdaran a Îranê ve ye.
Îran yek ji wan welatan e ku salane herî zêde cezayê îdamê lê tê bicihanîn.
Rêxistinên parêzvanên mafên mirovan, di nav de Rêxistina Efûyê ya Navneteweyî (Amnesty International) dibêjin, Îran piştî Çînê duyemîn welat e ku herî zêde cezayê îdamê lê tê bicihanîn.
Li gorî Rêxistina Mafên Mirovan a Hengawê, ji destpêka salê ve hezar û 503 kes li Îran û Rojhilatê Kurdistanê bi tohmetên cuda hatine bidarvekirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse