Cîhan
Hêzên Polîs ên Tirkiyê li derdora avahiya Şaredariya Navçeya Peyas a Amedê ku hikûmetê qeyûm li ser daniye, roja Duşembê 21ê Cotmeha 2019. Wêne: Rûdaw
Hewlêr (Rûdaw) - Kongreya Rêveberiyên Xwecihî û Herêmî ya Encûmena Ewropayê diyar kir ku li Tirkiyê danîna qeyûman bi awayekî cidî zerarê dide hilbijartina demokratîk a welatiyan.
Li gor Euronewsê, Kongreya Rêveberiyên Xwecihî û Herêmî ya Encûmena Ewropayê raportek amade kiriye û dibêje li Tirkiyê danîna qeyûman zerarê dide demokrasiya xwecihî.
Di raportê de amaje bi wê yekê hatiye kirin ku danîna berdewam a qeyûman li şûna serokên şaredariyan ên bi tohmeta terorê ji kar hatine dûrxistin, ji demokrasiya xwecihî re bûye asteng.
Herwiha di raportê û pêşnûmaya girêdayî wê de li Tirkiyê pênasekirina berfireh a tawanên terorê ku di yasaya têkoşîna Dij-Terorê de cîh dîgire hatiye rexnekirin û tê gotinku bi awayekî cidî zerarê dide hilbijartina demokratîk a welatiyan.
Li gor agahiyên hatine belavkirin, raport û pêşnûma ji aliyê Vladimir Prebilic ê Slovanî û David Eray ê Swîsreyî ve hatiye amade kirin û roja Çarşembê 23ê Adara 2022ê piştî gotûbêjê dê bikevin dengdanê.
Li Bakurê Kurdistanê Partiya Demokratîk a Gelan (HDP) di hilbijartina 31ê Adara 2019ê de 65 şaredarî bidest xistin lê bo 49 şaredariyên wê qeyûm hatin danîn û 6 ji wan jî nehatin erkdarkirin. Di hilbijartina berî wê de jî Partiya Herêmên Demokratîk (DBP) rêveberiya 102 şaredariyan bidest xist lê qeyûm bo 96ê şaredariyên wê jî hatin danîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse