Hewlêr (Rûdaw) - Parlamenterekî Keneseta Îsraîlê ragihand ku Kurd li Sûriyeyê û bi taybetî li Helebê rûbirûyî "êrişên hovane" bûne û got, "Em wekî Îsraîl pabendî parastina mafên Kurdan in."
Parlamenterê Îsraîlî Akram Hasson di civîna parlamentoya welatê xwe (Keneset) de gotarek pêşkêş kir.
Hasson diyar kir ku ji ber êş û azarên gelê Kurd ên li Sûriyeyê wî xwestiye behsa vî "miletê qedîm" bike ku wekî koma herî mezin a neteweyî ya bêdewlet a cîhanê tê dîtin.
Hasson amaje bi hişyariyên xwe yên berê da û got, "Min beriya sê mehan li ser dika Kenesetê ragihandibû; piştî tiştên ku hatin serê Elewî, Êzidî û Durziyan li Sûriyeyê, dor dê were ser Kurdan jî. Mixabin ev pêşbîniya min sê roj berê pêk hat."
"Li Helebê serjêkirin û kuştinên hovane hene"
Parlamenterê Îsraîlî derbarê rewşa Helebê de daxuyand, "Êrişeke hovane li taxên wan ên li Helebê hat kirin.
Li wir rûbirûyî serjêkirin, destdirêjiya zayendî û kuştina hovane bûn ku zarok jî di nav de hene."
Ev daxuyaniyên wî piştî wê yekê tên ku 6ê vê mehê, hêzên Artêşa Ereban a Sûriyeyê bi 42 hezar çekdar û piştgiriya tank û dronan êrişî taxên Kurdan ên Helebê kir.
Di encamê de bi dehan kes hatin kuştin û zêdetirî 155 hezar welatî koçber bûn.
"Kurdan piştgirî da Îsraîlê"
Akram Hasson sedema piştgiriya Îsraîlê ya ji bo Kurdan ji bo helwesta Kurdan a piştî rûdanên 7ê Çiriya Pêşîn vegerand û got:
"Vî miletî 7ê Çiriya Pêşîn li kêleka me cih girt û piştgiriyeke mayînde û erênî pêşkêşî dewleta Îsraîlê kir."
Li gorî Hasson, Kurd baweriyê bi Îsraîlê tînin û wê wekî hêzeke mezin dibînin ku dikare kêmîneyên li herêma Rojhilata Navîn biparêze.
Parlamenterê Îsraîlî çekdarên mixalefetê û desthilatdarên Sûriyeyê wekî "DAIŞ" pênase kirin û anî zimên:
"Xwedê û rehm di dilê van de nîne û divê ji holê werin rakirin."
Akram Hasson di dawiya axaftina xwe de hêvî kir ku Kurd "di avakirina dewleta xwe ya serbixwe de bi ser bikevin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse