Hewlêr (Rûdaw) - Li Îranê rêjeya zewacê bi awayekî berçav kêm dibe.
Alîkarê Wezîrê Ciwanan û Werzişê yê Îranê Elî Riza Rehîmî eşkere kir ku li welêt nêzîkî 17 milyon kesên di bin 45 saliyê de hene ku qet nezewicîne.
Rêje metirsîdar e
Elî Riza Rehîmî di daxuyaniyeke xwe ya ji televîzyona dewleta Îranê re de got, ji van 17 milyonan, 9,5 milyon mêr û 7,5 milyon jî jin in.
Wî her wiha da zanîn ku ji sedî 14ê mêrên di ser 45 saliyê re û ji sedî 4ê jinên di heman temenî de qet nezewicîne
Çar sedemên sereke
Li gorî hin pisporên Îranî, li pêşiya zewacê çar astengiyên sereke hene:
- Pirsgirêkên aborî
- Kêmasiya xwe-baweriyê
- Nêzîkatiyên femînîst di nav jinan de
- Dûrketina mêran ji berpirsiyariyê
Hewlên hikûmetê
Rehîmî anî ziman ku ji bo teşwîqkirina zewacê, wan li seranserê welêt destûr daye 1,500 navendên şêwirmendiya zewacê û par jî 9,800 atolyeyên beriya zewacê hatine lidarxistin.
Li gorî amarên sala 2024an, nifûsa Îranê nêzîkî 90 milyon kesî ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse