Hewlêr (Rûdaw) - Berdevka Wezareta Karên Derve ya Rûsyayê ji Rûdawê re ragihand ku welatê wê ji têkçûna rewşa ewlehiyê ya Heleb û derdora wê dilgiran e.
Berdevka Wezareta Karên Derve ya Rûsyayê Maria Zakharovayê di konferanseke rojnamegeriyê de bersiva pirsên Edîtorê Beşa Navneteweyî ya Rûdawê Niyaz Mistefa da û got:
"Bê guman em ji zêdebûna aloziyên li Heleb û derdora wê dilgiran in.
Armanca me ya sereke ew e ku welatiyên sivîl ên wê herêmê parastî bin.
Ew êrişên ku li wan taxan hatin kirin, bi ti awayî ji aliyê Rûsyayê ve nayên qebûlkirin."
Destpêka vê mehê hêzên Artêşa Ereban a Sûriyeyê êrişî taxên Kurdan ên li Helebê, Şêx Meqsûd û Eşrefiyeyê kiribû.
Ji ber êrişê bi dehan kesan canê xwe ji dest da, bi sedan kes birîndar bûn û nêzîkî 150 hezar kes jî koçber bûn.
"Çareserî diyalog e"
Berdevka Wezareta Karên Derve ya Rûsyayê tekez kir ku tenê rêya çareseriya dawî diyaloga siyasî ye û got:
"Baweriya me ew e ku dan û standin tenê rêya asayîkirina rewşê û gihîştina çareseriyeke demdirêj e ji bo Sûriyeyê, bi mercê ku hemû pêkhateyên wî welatî beşdar bibin û rêz li serwerî û yekparçeyiya axa Sûriyeyê were girtin."
Zakharovayê amaje bi gotûbêjên di navbera Şam û Qamişloyê de kir û wiha axivî:
"Rûdanên vê dawiyê piştrast dikin, ew Peymana Adara 2025an ku di navbera serkirdayetiya Sûriyeyê û Hêzên Sûriyeya Demokratîk (HSD) de hat îmzekirin, pêngaveke girîng û pêwîst e ji bo yekgirtina herêmên rojhilatê Feratê ya bi dewleta Sûriyeyê re."
Maria Zakharovayê derbarê pêwendiyên welatê xwe yên bi Tirkiye û Îraqê re jî eşkere kir ku hevahengiyeke wan a nêzîk bi wan re heye û anî ziman:
"Hevahengiya me ya nêzîk bi Tirkiye û Îraqê re li ser hejmarek mijaran heye ku berjewendiyên me yên hevbeş tê de hene."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse