Hewlêr (Rûdaw) - Serokê Giştî yê CHPyê diyar kir ku aramiya Kurdên Rojavayê Kurdistanê ji bo Tirkiyeyê jî garantiyeke mezin e û got, “Em dixwazin li sînorê xwe bi birayên xwe re cîrantiyeke birayane bikin.”
Serokê Giştî yê Partiya Gel a Komarî (CHP) Ozgur Ozel li Lijneya Giştî ya Parlamentoya Tirkiyeyê di dema gotûbêjên budceya 2026an de axivî.
Ozgur Ozel di axaftina xwe de behsa pêvajoya çareseriyê û rewşa Kurdên Rojavayê Kurdistanê kir.
Ozel diyar kir ku ew dê di çarçoveya pêvajoyê de bi biryardarî bixebitin û piştgiriya xwe ya ji bo Komîsyona Hevgirtiba Neteweyî, Biratî û Demokrasiyê ya Parlamentoya Tirkiyeyê bidomînin.
“Em li dijî qeyûman in”
Ozgur Ozel anî zimên ku ew dê hewl bidin hêviya aştiyê nebe qurbana berjewendiyên hinekan û wiha axivî:
“Em wekî CHPyê li dijî qeyûman derdikevin, em dixwazin biryarên Dadgeha Mafên Mirovan a Ewropayê (DMME) werin bicihanîn.
Bila biryarên Dadgeha Destûra Bingehîn werin bicihanîn. Em li Tirkiyeyê biratî û aştiya Tirk û Kurdan diparêzin.”
Peyama ji bo Kurdên Rojavayê Kurdistanê
Ozgur Ozel di axaftina xwe de bal kişand ser rewşa Sûriye û Rojavyê Kurdistanê jî û anî zimên ku ew dixwazin hemû pêkhateyên li wî welatî bibin xwedî garantiya destûrî.
Ozel wiha got, “Em dixwazin Kurd, Ereb, Durzî û Tirkmenên li Sûriyeyê bibin xwedî garantiya destûrî.
Hebûna demokratîk, aştî û aramiya Kurdên Sûriyeyê ji bo Tirkiyeyê garantiyeke mezin e.
Em dixwazin li ser sînorê xwe bi birayên xwe re cîrantiyeke birayane bikin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse