Hewlêr (Rûdaw) - Hunermenda navdar a Tirk Melek Mosso, bi armanca piştgiriya Jîna Emînî û jinên Îranî li ser dikê pora xwe birî.
Li Îran û Rojhilatê Kurdistanê, xwepêşandanên ji bo protestokirina mirina bi guman a keça Kurd Jîna Emînî di roja 11emîn de berdewam in.
Çalakî û piştgiriyên bo Jîna Emînî jî her diçe li cîhanê belav dibin û jin ji bo piştgiriya jinên li Rojhilatê Kurdistanê û Îranê pora xwe dibirin.
Herî dawî hunermenda navdar a Tirk, Melek Mosso bi armanca piştgiriyê di dema konsereke xwe de li ser dikê pora xwe birî û got: “Ez îşev stranên xwe li ser navê hemû jinan dibêjim, dê kesek nikaribe azadiya me ji me bistîne.”
Piştî ku keça Kurd a 22 salî Jîna Emînî li Îranê ji aliyê “polîsên exlaqê” ve hat kuştin, li seranserê Rojhilatê Kurdistanê û Îranê nerazîbûn û xwepêpandanan destpê kirin. Li gor rêxistinên mafên mirovan ên Îranê û Rojhilatê Kurdistanê, di xwepêşanan de heta niha nêzîkî 50 kesan canê xwe ji dest dane, bi dehan kes birîndar in û bi sedan kes jî hatine desteserkirin.
Herwiha bi dehan rojnamevanên ku xwepêşandanan dişopînin ji aliyê hêzên emnî yên Îranê ve hatine girtin.
Li aliyekê din hikûmeta Îranê li hin bajar û navçeyan ji bo ku dengê xelkê neyê bihîstin û dîmenên xwepêşandanan li hundirê welat û li cîhanê belav nebin, herwiha ji bo ku xelkê cîhanê tundûtîjiya hêzên emnî li beramber xwepêşanderên sivîl nebînin, înternet qut kiriye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse